Wolo Ni Akɛmaje Romabii Lɛ 11:1-36

  • Jeee Israelbii lɛ fɛɛ akpoo (1-16)

  • Oliv tso lɛ he nɔkwɛmɔnɔ lɛ (17-32)

  • Nyɔŋmɔ hiɛshikamɔ lɛ mlikwɔlɛ (33-36)

11  No hewɔ lɛ, miibi akɛ, ani Nyɔŋmɔ ekpoo emaŋ lɛ?+ Dabida! Ejaakɛ mi hu Israelnyo ji mi, ni mijɛ Abraham seshi* lɛ kɛ Benyamin weku lɛ mli.  Nyɔŋmɔ kpooko emaŋ ni ekpɛlɛ amɛnɔ klɛŋklɛŋ lɛ.+ Ani nyɛleee nɔ ni ŋmalɛ lɛ kɛɔ yɛ Elia he, be ni ekpa Nyɔŋmɔ fai ni ewie eshi Israel lɛ?  “Yehowa,* amɛgbe ogbalɔi lɛ, amɛkumɔ ofɔleshaa latɛi lɛ, ni eshwɛ mikome too, ni amrɔ nɛɛ, amɛmiitao amɛgbe mi hu.”*+  Shi mɛni Nyɔŋmɔ kɛɛ lɛ? “Miyɛ mɛi 7,000 lolo, mɛi ni kɛ amɛnakutsei kulako shi amɛhãko Baal.”+  No hewɔ lɛ, nakai nɔŋŋ nɛkɛ be nɛɛ mli hu lɛ, ayɛ mɛi ni eshwɛ+ ni atsɔ dromɔ nɔ ahala amɛ.  Agbɛnɛ, kɛ́ dromɔ nɔ atsɔɔ lɛ,+ belɛ jeee nitsumɔi anɔ atsɔɔ dɔŋŋ;+ kɛjeee nakai lɛ, dromɔ lɛ jeee dromɔ dɔŋŋ.  No hewɔ lɛ, te wɔbaakɛɛ tɛŋŋ? Nɔ tuuntu ni Israel kɛ hiɛdɔɔ taoɔ lɛ, enine shɛɛɛ nɔ, shi mɛi ni ahala lɛ anine shɛ nɔ.+ Mɛi ni shwɛ lɛ ajwɛŋmɔ egbo,+  tamɔ bɔ ni aŋma lɛ, akɛ: “Nyɔŋmɔ ehã amɛ wɔ ni tsii mumɔ,*+ hiŋmɛii ni enaaa nii, kɛ toii ni nuuu nii kɛbashi ŋmɛnɛ gbi nɛɛ nɔ.”+  Agbɛnɛ hu, David kɛɛ akɛ: “Hã okpɔlɔ ni amɛŋmɛ lɛ atsɔ tsɔne kɛ akpa kɛ nanetɔ̃tɔmɔnɔ kɛ toigbalamɔ ahã amɛ. 10  Hã amɛhiŋmɛii anɔ awo duŋ koni amɛkana nii, ni ohã amɛdɔ amɛmli daa nɛɛ.”+ 11  No hewɔ lɛ, miibi akɛ, Ani amɛnane tɔ̃tɔ ni amɛgbee shi kwraa? Dabida! Shi gbɛ fɔŋ ni amɛkɔ lɛ etsɔ yiwalaheremɔ ehã jeŋmajiaŋbii lɛ, koni ehã amɛye awuŋa.+ 12  Agbɛnɛ, kɛ́ gbɛ fɔŋ ni amɛkɔ lɛ hã je lɛ ná nii, ni amɛnɔ ni gbɔ lɛ hã jeŋmajiaŋbii lɛ ná nii lɛ,+ kɛ́ amɛyibɔ lɛ shɛ lɛ, kwɛ bɔ ni no baahã aná nii kɛteke nɔ! 13  Agbɛnɛ mikɛ nyɛ ni nyɛji jeŋmajiaŋbii lɛ miiwie. Akɛni miji jeŋmaji lɛ abɔfo hewɔ lɛ,+ miwoɔ misɔɔmɔ lɛ hiɛ nyam*+ 14  akɛ aleenɔ manyɛ mahã mi diɛŋtsɛ mimaŋ* lɛ aye awuŋa, ni mahere amɛteŋ mɛi komɛi ayiwala lo. 15  Ejaakɛ kɛ́ shɛrɛmɔ ni ashɛrɛ amɛ ashwie+ lɛ hãa asaa je lɛ kɛ Nyɔŋmɔ teŋ lɛ, belɛ kɛ́ akpɛlɛ amɛnɔ lɛ, ani no hãŋ gbohii aba wala mli? 16  Agbɛnɛ hu, kɛ́ ashikishaŋ ni akpɔtɔ lɛ fã ni akɛhã akɛ klɛŋklɛŋ yibii lɛ yɛ krɔŋkrɔŋ lɛ, no lɛ, ashikishaŋ ni akpɔtɔ muu lɛ fɛɛ hu yɛ krɔŋkrɔŋ; ni kɛ́ shishifã lɛ yɛ krɔŋkrɔŋ lɛ, no lɛ, tso lɛ niji lɛ hu yɛ krɔŋkrɔŋ. 17  Shi kɛ́ akumɔ tso lɛ niji lɛ ekomɛi, ni bo ni oji ŋa mli oliv tso lɛ, akɛ bo ebawo tso lɛ he kɛfata eniji ni eshwɛ lɛ ahe, ni ooná oliv tso lɛ shishifã lɛ mli nii kpakpai lɛ eko lɛ, 18  kaabu ohe akɛ onɔ kwɔ fe tso lɛ niji lɛ.* Shi kɛ́ obu ohe akɛ onɔ kwɔ fe amɛ* lɛ,+ kaimɔ akɛ jeee bo ohiɛ shishifã lɛ, shi shishifã lɛ moŋ hiɛ bo. 19  Agbɛnɛ, obaakɛɛ akɛ: “Mihewɔ akumɔ tso lɛ niji lɛ, koni akɛ mi awo tso lɛ he.”+ 20  Eji anɔkwale! Ejaakɛ hemɔkɛyeli ni amɛbɛ lɛ hewɔ akumɔ amɛ lɛ,+ shi bo lɛ hemɔkɛyeli hewɔ odamɔ shi lɛ.+ Kaawó ohe nɔ, shi moŋ she ohe gbeyei. 21  Ejaakɛ kɛ́ Nyɔŋmɔ hãaa tso lɛ diɛŋtsɛ niji lɛ aya nɔ ahi tso lɛ he lɛ, nakai nɔŋŋ kɛ́ bo hu ofee nɔ ni amɛfee lɛ, ehãŋ ohi tso lɛ he. 22  No hewɔ lɛ, susumɔ Nyɔŋmɔ mlihilɛ+ kɛ etoigbalamɔ lɛ fɛɛ he. Egbala mɛi ni gbee shi lɛ atoi,+ shi bo lɛ, Nyɔŋmɔ mlihilɛ lɛ baaya nɔ ahi onɔ kɛji otee nɔ ohi emlihilɛ lɛ mli; kɛjeee nakai lɛ, bo hu abaafo bo ashɛ afɔ̃. 23  Ni amɛ hu, kɛ́ amɛbaná hemɔkɛyeli lɛ, akɛ amɛ baawo tso lɛ he ekoŋŋ,+ ejaakɛ Nyɔŋmɔ baanyɛ ekɛ amɛ awo tso lɛ he ekoŋŋ. 24  Ejaakɛ kɛ́ afo bo kɛje tso ni ji ŋa mli oliv tso lɛ he,* ni akɛ bo bawo abɔɔ mli oliv tso lɛ he, nɔ ko ni afɔɔɔ feemɔ lɛ, kwɛ bɔ ni ebaafee mlɛo akɛ akɛ mɛnɛɛmɛi ni ji tso lɛ niji diɛŋtsɛ lɛ baawo oliv tso ni ji amɛ diɛŋtsɛ amɛnɔ lɛ he ekoŋŋ! 25  Ejaakɛ, nyɛmimɛi, misumɔɔɔ akɛ mikɛ nɛkɛ teemɔŋ sane krɔŋkrɔŋ nɛɛ teɔ nyɛ,+ koni nyɛkabu nyɛhe hiɛshikalɔi yɛ nyɛ diɛŋtsɛ nyɛhiŋmɛiiaŋ: Israelbii lɛ ateŋ mɛi komɛi ajwɛŋmɔ egbo kɛyashi abaabua jeŋmajiaŋbii lɛ ayibɔ lɛ fɛɛ naa, 26  ni nɛkɛ gbɛ nɔ abaatsɔ ahere Israel fɛɛ+ yiwala. Tamɔ bɔ ni aŋma lɛ, akɛ: “Kpɔ̃lɔ lɛ* baajɛ Zion aba,+ ni ebaahã nifeemɔi ni wooo Nyɔŋmɔ hiɛ nyam lɛ aje Yakob he kɛya. 27  Ni enɛ ji kpaŋmɔ ni mi kɛ amɛ baakpaŋ,+ be ni majie amɛhe eshai lɛ kɛya lɛ.”+ 28  Anɔkwa, yɛ sane kpakpa lɛ gbɛfaŋ lɛ, henyɛlɔi ji amɛ yɛ nyɛ hewɔ; shi yɛ Nyɔŋmɔ halamɔ lɛ gbɛfaŋ lɛ, asumɔɔ amɛ yɛ amɛtsɛmɛi lɛ ahewɔ.+ 29  Ejaakɛ Nyɔŋmɔ nikeenii lɛ kɛ etsɛmɔ lɛ jeee nibii ni ebaashwa ehe yɛ he. 30  Ejaakɛ tamɔ bɔ ni tsutsu ko lɛ, nyɛji Nyɔŋmɔ nɔ toigbolɔi,+ shi amrɔ nɛɛ, ana nyɛ mɔbɔ+ yɛ amɛtoigbele lɛ hewɔ lɛ,+ 31  nakai nɔŋŋ agbɛnɛ, mɛnɛɛmɛi gbo toi, ni atsɔ no nɔ ana nyɛ mɔbɔ, koni amrɔ nɛɛ amɛ diɛŋtsɛ hu ana amɛ mɔbɔ. 32  Ejaakɛ Nyɔŋmɔ eŋamɔ amɛ fɛɛ amɛyi ewo toigbele mli,+ koni ena amɛ fɛɛ mɔbɔ.+ 33  Kwɛ bɔ ni nii ni Nyɔŋmɔ yɔɔ lɛ fa kɛteke nɔ hã, kɛ bɔ ni ehiɛ kã shi waa, kɛ bɔ ni enilee lɛ mli kwɔ hã! Eyiŋkpɛi* lɛ, anyɛɛɛ naa ana, ni egbɛi lɛ hu, anyɛɛɛ sɛɛ ana!* 34  Ejaakɛ “namɔ ebale Yehowa* jwɛŋmɔ, aloo namɔ ebatsɔ eŋaawolɔ?”+ 35  Aloo, “namɔ etsɔ hiɛ ehã Nyɔŋmɔ nɔ ko ni esa akɛ Nyɔŋmɔ ato lɛ najiaŋ?”+ 36  Ejaakɛ nibii fɛɛ jɛ eŋɔɔ, ni lɛ enɔ amɛtsɔɔ amɛhiɔ shi, ni lɛ nɔŋŋ amɛyɔɔ amɛhã. Lɛ akɛ anunyam ahã kɛya naanɔ. Amen.

Shishigbɛ Niŋmaa

Greek sht. ŋm., “dumɔwu.”
Loo “amɛmiitao amɛŋɔ misusuma kɛya.”
Enɛ tsɔɔ akɛ, amɛnyɛɛɛ amɛyɔse Nyɔŋmɔ yiŋtoo.
Loo “miwóɔ misɔɔmɔ lɛ nɔ gojoo.”
Greek sht. ŋm., “miheloo.”
Loo “kɛ́ oshwã yɛ amɛnɔ.”
Loo “kaashwã yɛ niji lɛ anɔ.”
Loo “ŋa mli oliv tso yɛ bɔɔsu naa lɛ he.”
Loo “Yiwalaherelɔ lɛ.”
Loo “Ekojomɔi.”
Loo “anyɛɛɛ sɛɛ mo aja!”