Wolo Ni Akɛmaje Romabii Lɛ 10:1-21

  • Bɔ ni aaafee aná Nyɔŋmɔ jalɛ (1-15)

    • Sane ni ajajeɔ atsɔɔ (10)

    • Abaahere mɛi ni boɔ tsɛɔ Yehowa lɛ ayiwala (13)

    • Shiɛlɔi anaji yɛ fɛo (15)

  • Akpoo sane kpakpa lɛ (16-21)

10  Nyɛmimɛi, yɛ anɔkwale mli lɛ, nɔ ni mitsui shweɔ kɛ fai ni mikɛ hiɛdɔɔ kpaa Nyɔŋmɔ mihãa amɛ ji akɛ, ahere amɛyiwala.+  Ejaakɛ miyeɔ amɛhe odase akɛ amɛhiɛ dɔɔ yɛ Nyɔŋmɔ he moŋ,+ shi jeee yɛ nilee krɔŋŋ naa.  Akɛni amɛleee Nyɔŋmɔ jalɛ+ lɛ shi amɛmiitao ni amɛto amɛ diɛŋtsɛ amɛnɔ shishi hewɔ lɛ,+ amɛbaaa amɛhe shi amɛwooo Nyɔŋmɔ jalɛ lɛ shishi.+  Ejaakɛ Kristo ji Mla lɛ naagbee,+ koni mɔ fɛɛ mɔ ni heɔ eyeɔ* lɛ aná jalɛ.+  Ejaakɛ Mose ŋma yɛ jalɛ ni jɛ Mla lɛ mli lɛ he akɛ: “Gbɔmɔ ni yeɔ nibii nɛɛ anɔ lɛ, nomɛi baahã eya nɔ ehi shi.”+  Shi jalɔ ni abuɔ mɔ ko yɛ hemɔkɛyeli hewɔ lɛ kɛɔ akɛ: “Kaakɛɛ yɛ otsui mli akɛ,+ ‘Namɔ baakwɔ kɛya ŋwɛi?’+ no ji, koni eyaŋɔ Kristo kɛkpeleke shi,  aloo, ‘Namɔ baakpeleke shi kɛya bu kwɔŋkwɔŋ lɛ mli?’+ no ji, koni eyaŋɔ Kristo kɛjɛ gbohii ateŋ kɛba.”  Shi moŋ te ekɛɔ tɛŋŋ? “Wiemɔ lɛ bɛŋkɛ bo, eyɛ bo diɛŋtsɛ odaaŋ kɛ bo diɛŋtsɛ otsui mli”;+ no ji hemɔkɛyeli he “wiemɔ lɛ” ni wɔshiɛɔ lɛ.  Ejaakɛ kɛ́ okɛ onaabu jaje otsɔɔ akɛ, Yesu ji Nuŋtsɔ,+ ni ohe oye yɛ otsui mli akɛ Nyɔŋmɔ tee lɛ shi kɛjɛ gbohii ateŋ lɛ, abaahere oyiwala. 10  Ejaakɛ tsui akɛheɔ ayeɔ* kɛshɛɔ jalɛ he, shi naabu akɛjajeɔ atsɔɔ+ kɛshɛɔ yiwalaheremɔ he. 11  Ejaakɛ ŋmalɛ lɛ kɛɔ akɛ: “Mɔ ko mɔ ko bɛ ni heɔ enɔ eyeɔ ni nine baanyɛ shi.”*+ 12  Ejaakɛ srɔto ko bɛ Yudanyo kɛ Greeknyo teŋ.+ Nuŋtsɔ kome ta nii fɛɛ nɔ, ni niiatsɛ hu ji lɛ hã mɛi fɛɛ ni boɔ tsɛɔ lɛ lɛ.* 13  Ejaakɛ “mɔ fɛɛ mɔ ni boɔ tsɛɔ Yehowa* gbɛ́i lɛ, abaahere eyiwala.”+ 14  Shi te amɛbaafee tɛŋŋ amɛbo amɛtsɛ mɔ ni amɛheko enɔ amɛyeko lɛ? Ni te amɛbaafee tɛŋŋ amɛhe mɔ ni amɛnuko ehe sane lɛ nɔ amɛye lɛ? Ni te amɛbaafee tɛŋŋ amɛnu hu kɛ́ mɔ ko bɛ ni baashiɛ? 15  Ni te amɛbaafee tɛŋŋ amɛshiɛ hu kɛ́ atsuko amɛ?+ Tamɔ bɔ ni aŋma lɛ, akɛ: “Mɔ ni jajeɔ nibii kpakpai ahe sane kpakpa lɛ naji yɛ fɛo.”+ 16  Shi jeee amɛ fɛɛ amɛbo sane kpakpa lɛ toi. Ejaakɛ Yesaia kɛɛ akɛ: “Yehowa,* namɔ ehe nɔ ni anu kɛjɛ wɔŋɔɔ lɛ eye?”*+ 17  No hewɔ lɛ, hemɔkɛyeli nyiɛɔ nɔ ni anuɔ lɛ sɛɛ kɛbaa.+ Ni nɔ ni anuɔ lɛ hu tsɔɔ Kristo he wiemɔ lɛ nɔ kɛbaa. 18  Shi miibi akɛ, Ani nu amɛnuuu? Dabida, anɔkwa, “amɛgbee jije kɛtee shikpɔŋ lɛ nɔ fɛɛ, ni mɛi ni yɔɔ shikpɔŋ lɛ naagbeehei lɛ fɛɛ nu sane ni amɛshiɛ lɛ.”+ 19  Shi miibi akɛ, Ani le Israel leee?+ Klɛŋklɛŋ lɛ, Mose kɛɛ akɛ: “Matsɔ mɛi ni jeee jeŋmaŋ ko nɔ mahã nyɛye awuŋa; matsɔ jeŋmaŋ ko ni leee nii nɔ mahã nyɛmli afu waa.”+ 20  Ni Yesaia fee ekãa babaoo ni ekɛɛ: “Mɛi ni taooo misɛɛ gbɛ lɛ na mi;+ mɛi ni biii mishi lɛ bale mi.”+ 21  Shi ewie Israel he akɛ: “Gbi muu fɛɛ lɛ, migbɛɔ miniji amli mihãa maŋ toigbolɔi kɛ kuɛŋtilɔi lɛ.”+

Shishigbɛ Niŋmaa

Loo “mɔ fɛɛ mɔ ni jieɔ hemɔkɛyeli kpo.”
Loo “tsui akɛjieɔ hemɔkɛyeli kpo.”
Loo “ni hiɛ baagbo.”
Loo “ni efeɔ mɛi fɛɛ ni boɔ tsɛɔ lɛ lɛ ejurɔ babaoo.”
Loo “namɔ ehe wɔmaniɛbɔɔ lɛ eye?”