Lalai 9:1-20
Kɛhã lalatsɔɔlɔ lɛ; yɛ Mut-laben* nɔ. Lala ni David fo.
א [Alef]
9 Ao Yehowa, mikɛ mitsui fɛɛ baajie oyi;Mawie onaakpɛɛ nitsumɔi lɛ fɛɛ ahe.+
2 Manya ni mimli baafili mi yɛ ohewɔ;Malá majie* ogbɛ́i lɛ yi, bo Mɔ Ni Nɔ Kwɔ Fe Fɛɛ.+
ב [Bet]
3 Kɛ́ mihenyɛlɔi lɛ jo foi lɛ,+Amɛbaagbeegbee shi ni amɛhiɛ baakpãtã yɛ ohiɛ.
4 Ejaakɛ oye misane lɛ ohã mi;Ota omaŋtsɛ sɛi lɛ nɔ ookojo yɛ jalɛ naa.+
ג [Gimel]
5 Okã jeŋmaji lɛ ahiɛ+ ni okpãtã mɛi fɔji lɛ ahiɛ,Ogbe amɛgbɛ́i kwrakwra kɛmiiya naanɔi anaanɔ.
6 Akpãtã henyɛlɔ lɛ hiɛ kɛmiiya naanɔ;Ofã amɛmaji lɛ ashishi,Ni hiɛ baakpa nɔ ni ale yɛ amɛhe lɛ fɛɛ nɔ.+
ה [He]
7 Shi Yehowa lɛ, eta emaŋtsɛ sɛi lɛ nɔ kɛmiiya naanɔ;+Ekɛ emaŋtsɛ sɛi lɛ ema shi shiŋŋ koni ekojo yɛ jalɛ naa.+
8 Ebaakojo mɛi ni yɔɔ shikpɔŋ lɛ nɔ lɛ* yɛ jalɛ naa;+Ebaakojo jeŋmaji lɛ yɛ jalɛ naa.+
ו [Waw]
9 Yehowa baatsɔ abobaahe ni yɔɔ shweshweeshwe* kɛhã mɛi ni awaa amɛ yi lɛ,+Abobaahe ni yɔɔ shweshweeshwe yɛ haomɔ beiaŋ.+
10 Mɛi ni le ogbɛ́i lɛ kɛ amɛhiɛ baafɔ̃ onɔ;+Ao Yehowa, okwaŋ mɛi ni taoɔ osɛɛ gbɛ lɛ kɔkɔɔkɔ.+
ז [Zayin]
11 Nyɛláa nyɛjiea Yehowa, mɔ ni yɔɔ Zion lɛ yi;Nyɛhãa maji lɛ alea enitsumɔi lɛ.+
12 Ejaakɛ lɛ mɔ ni etɔɔ amɛlá he owele lɛ kaiɔ amɛ;+Ehiɛ kpaaa nɔnalɔi abolɔmɔ kɛhã yelikɛbuamɔ lɛ nɔ.+
ח [Het]
13 Ao Yehowa, naa mi mɔbɔ;* kwɛmɔ bɔ ni minaa nɔ yɛ mɛi ni nyɛɔ mi lɛ adɛŋ,Bo mɔ ni owó mi kɛje gbele agbói lɛ amli lɛ,+
14 Koni majaje onitsumɔi ni sa yijiemɔ lɛ yɛ Zion biyoo lɛ agbói lɛ amli,+Ni manya yɛ oyiwalaheremɔ nitsumɔi lɛ ahewɔ.+
ט [Tet]
15 Jeŋmaji lɛ egbee bu ni amɛ nɔŋŋ amɛtsa lɛ mli;Tsɔne ni amɛkɛ yaa tsɔ yɛ teemɔŋ lɛ, edu amɛ diɛŋtsɛ amɛnane.+
16 Yehowa kojomɔi lɛ akɛleɔ lɛ.+
Mɔ fɔŋ lɛ diɛŋtsɛ ninenaa nitsumɔ lɛ edu lɛ.+
Higaion.* (Sela)
י [Yod]
17 Mɛi fɔji lɛ baajo foi kɛya Gbonyobu* lɛ mli,Jɛmɛ ji he ni jeŋmaji fɛɛ ni hiɛ kpaa Nyɔŋmɔ nɔ lɛ baaya.
18 Shi ohiafoi lɛ, jeee be fɛɛ be hiɛ baakpa amɛnɔ;+Ni mɛi ni he jɔ lɛ ahiɛnɔkamɔ lɛ efeŋ efolo kɔkɔɔkɔ.+
כ [Kaf]
19 Ao Yehowa, tee shi! Kaahã gbɔmɔ adesa* miiye kunim.
Akojo jeŋmaji lɛ yɛ ohiɛ.+
20 Ao Yehowa, hã amɛshe gbeyei,+Hã jeŋmaji lɛ aná ale akɛ gbɔmɛi adesai* kɛkɛ ji amɛ. (Sela)
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Loo “Matswa lala kɛjie.”
^ Loo “Ebaakojo shikpɔŋ lɛ.”
^ Loo “gɔŋ nɔ mɔɔ ni yɔɔ shweshweeshwe.”
^ Loo “dromɔ mi.”
^ Kwɛmɔ Wiemɔi Titrii Amligbalamɔ lɛ.
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Loo “gbɔmɔ ni gboɔ.”
^ Loo “adesai ni gboiɔ.”
