Lalai 78:1-72
Maskil.* Asaf nɔ.+
78 Nyɛboa toi, miwebii, nyɛboa mimla* lɛ toi;Nyɛbaa nyɛtoi shi nyɛhãa midaaŋ wiemɔi lɛ.
2 Magbele minaa mabu abɛ.
Magbá blema ajenui.+
3 Nibii ni wɔnu ni wɔle,Ni wɔtsɛmɛi lɛ gba wɔ lɛ,+
4 Wɔkɛteŋ amɛseshibii* lɛ;Wɔbaagba yinɔbii ni baaba lɛ+Yehowa nifeemɔi ni sa yijiemɔ lɛ kɛ ehewalɛ lɛ,+Nibii ni yɔɔ naakpɛɛ ni efee lɛ.+
5 Eto kaimɔ yɛ YakobNi ekɛ mla ma shi yɛ Israel;Efã wɔtsɛmɛi lɛKoni amɛtsɔɔ amɛbii lɛ nibii nɛɛ,+
6 Koni yinɔbii ni baaba lɛ,Bii ni anáko afɔ amɛ lɛ aná ale nibii nɛɛ.+
Ni amɛ hu amɛgba amɛbii lɛ.+
7 Kɛkɛ lɛ, amɛkɛ amɛhiɛ baafɔ̃ Nyɔŋmɔ nɔ.
Amɛhiɛ kpaŋ Nyɔŋmɔ nitsumɔi lɛ anɔ,+Shi moŋ, amɛbaaye ekitãi lɛ anɔ.+
8 Ni no hãŋ amɛfee amɛnii tamɔ amɛtsɛmɛi lɛ,Yinɔbii kuɛŋtilɔi kɛ atuatselɔi lɛ,+Yinɔbii ni tsui damɔɔɔ he kome*+Ni yeee Nyɔŋmɔ anɔkwa lɛ.
9 Eyɛ mli akɛ Efraimbii lɛ hiɛ gãi moŋ,Shi amɛjo foi yɛ tawuu gbi lɛ nɔ.
10 Amɛyeee Nyɔŋmɔ kpaŋmɔ lɛ nɔ+Ni amɛnyiɛɛɛ yɛ emla lɛ mli.+
11 Amɛhiɛ kpa nɔ ni efee lɛ hu nɔ,+Naakpɛɛ nitsumɔi ni etsu yɛ amɛhiɛ lɛ.+
12 Efee naakpɛɛ nii yɛ amɛtsɛmɛi lɛ ahiɛ,+Yɛ Ejipt shikpɔŋ lɛ nɔ, yɛ Zoan+ kpokpaa lɛ nɔ.
13 Egba ŋshɔ lɛ mli koni amɛtsɔ mli kɛho,Ni ehã nui lɛ damɔ shi tamɔ gbogbo.*+
14 Kɛ́ je tsɛre lɛ, ekɛ atatu nyiɛɔ amɛhiɛNi jenamɔ muu fɛɛ lɛ, ekɛ la ni kpɛɔ nyiɛɔ amɛhiɛ.+
15 Egbala tɛsai amli yɛ ŋa lɛ nɔ,Ehã amɛ nu amɛnu kɛyashi amɛtɔrɔ oookɛɛ amɛmiinu kpaakpo wulu ko* mli nu.+
16 Ehã fai je kpo kɛje tɛsaa mliNi ehã nui lɛ kpeleke shi kɛho tamɔ fai.+
17 Shi amɛtee nɔ amɛtse Mɔ Ni Nɔ Kwɔ Fe Fɛɛ lɛ hiɛ atua yɛ ŋa kpataa lɛ nɔ,Ni amɛkɛ no fee esha amɛshi lɛ;+
18 Amɛbi niyenii ni baa amɛtsine lɛ*Ni amɛkɛje Nyɔŋmɔ ŋwane* yɛ amɛtsui mli.+
19 No hewɔ lɛ, amɛwie amɛshi Nyɔŋmɔ,Amɛkɛɛ: “Ani Nyɔŋmɔ baanyɛ aŋmɛ okpɔlɔ yɛ ŋa lɛ nɔ?”+
20 Naa! Etswa tɛsaa lɛ niiNi nui tue kɛje mli, ni fai babaoo ho.+
“Shi ani ebaanyɛ ehã wɔ niyenii* hu?Ani ebaanyɛ ehã emaŋ lɛ loo hu?”+
21 Be ni Yehowa nu nɔ ni amɛwie lɛ, emli fu waa;+La+ bashã Yakob,Ni emli wo la ewo Israel+
22 Ejaakɛ amɛheee Nyɔŋmɔ amɛyeee;+Amɛkɛ amɛhiɛ efɔ̃ɔɔ enɔ akɛ ebaanyɛ ehere amɛ.
23 No hewɔ lɛ, efã atatui ni yɔɔ ŋwɛi lɛ,Ni egbele ŋwɛi shinai lɛ hu efɔ̃.
24 Etee nɔ ehã mana nɛ ehã amɛ koni amɛye;Ehã amɛ niyenii* ni jɛ ŋwɛi.+
25 Gbɔmɛi ye kãkãlɔi* aniyenii;*+Ehã amɛ bɔ ni baashɛ amɛnaa.+
26 Ehã bokã kɔɔyɔɔ lɛ tswa yɛ ŋwɛiNi ehã wuoyi kɔɔyɔɔ lɛ tswa yɛ ehewalɛ lɛ naa.+
27 Ni ehã loo ni fa babaoo tamɔ mulu nɛ eshwie amɛnɔ,Hɛɛ, loofɔji babaoo tamɔ ŋshɔnaa shia.
28 Ehã amɛgbeegbee shi yɛ ensara lɛ teŋ,Kɛbɔle emama tsũi lɛ ahe fɛɛ.
29 Ni amɛye, ni amɛye lɛ gidigidi;Ehã amɛ nɔ ni baa amɛtsine lɛ.+
30 Shi be ni niyenii lɛ yɔɔ amɛdaaŋ lolo,Ni amɛnáko amɛtɔrɔ kɛ nɔ ni baa amɛtsine lɛ,
31 Nyɔŋmɔ mli wo la ewo amɛ.+
Egbegbee amɛteŋ hii ni he wa waa lɛ;+Ekpãtã Israel oblahii lɛ ahiɛ.
32 Enɛ fɛɛ sɛɛ lɛ, amɛtee nɔ amɛfee esha,+Ni amɛheee enaakpɛɛ nitsumɔi lɛ amɛyeee.+
33 No hewɔ lɛ, efo amɛgbii lɛ asɛɛ tamɔ kɔɔyɔɔ ni amuɔ,+Ni ekɛ nibii ni yɔɔ gbeyei ba amɛnɔ trukaa kɛfo amɛwala afii lɛ asɛɛ.
34 Shi shii abɔ ni egbeɔ amɛteŋ mɛi komɛi lɛ, shii abɔ ni amɛtaoɔ esɛɛ gbɛ ji no;+Amɛkuɔ amɛsɛɛ ni amɛbataoɔ Nyɔŋmɔ sɛɛ gbɛ,
35 Ni amɛkaiɔ akɛ Nyɔŋmɔ ji amɛ-Tɛsaa+Ni Nyɔŋmɔ Ni Nɔ Kwɔ Fe Fɛɛ lɛ ji amɛ-Kpɔ̃lɔ.*+
36 Shi amɛka akɛ amɛkɛ amɛnaabu baalaka lɛ,Ni amɛkɛ amɛlilɛi male amɛtsɔɔ lɛ.
37 Amɛtsui damɔɔɔ shi shiŋŋ yɛ egbɛfaŋ;+Ni amɛyeee ekpaŋmɔ lɛ anɔkwa.+
38 Shi enaa amɛ mɔbɔ;+Ekɛ amɛtɔmɔ lɛ keɔ amɛ* ni ekpãtãaa amɛhiɛ.+
Bei pii lɛ, yɛ nɔ najiaŋ ni ebaajie emlifu lɛ fɛɛ kpo lɛ,Egbalaa emlifu lɛ sɛɛ moŋ.+
39 Ejaakɛ ekaiɔ akɛ heloo kɛkɛ ji amɛ,+Kɔɔyɔɔ ni tswaa kɛhoɔ ni ekuuu esɛɛ ebaaa.*
40 Amɛtse ehiɛ atua shii abɔ yɛ ŋa lɛ nɔ,+Ni amɛfee lɛ nidɔɔnii yɛ ŋa kpataa lɛ nɔ!+
41 Amɛka Nyɔŋmɔ shii abɔ,+Ni amɛwo Israel Mɔ Krɔŋkrɔŋ lɛ awerɛho.*
42 Amɛkaiii ehewalɛ* lɛ,Gbi ni ejie* amɛ kɛje amɛhenyɛlɔ lɛ dɛŋ lɛ,+
43 Bɔ ni efee okadii yɛ Ejipt+Kɛ naakpɛɛ nii yɛ Zoan kpokpaa lɛ nɔ lɛ,
44 Kɛ bɔ ni ehã Nilo nujɔi lɛ tsɔ lá+Koni amɛkanyɛ amɛnu amɛfai lɛ amli nu lɛ.
45 Etsu filikilɔi bibii babaoo ni kɔ̃ɔ mɔ kɛba koni amɛbaye amɛ awui+Kɛ kɔkɔdenei koni amɛbakpãtã amɛhiɛ.+
46 Ekɛ amɛŋmɔshi nii lɛ hã agãi ni fiteɔ nii,Ni ekɛ amɛnitsumɔ lɛ mli yibii lɛ hã baalabii pii.+
47 Ekɛ nyɔŋmɔŋtɛi fite amɛwain ŋmɔji lɛ,+Ni ekɛ nyɔŋmɔŋtɛi wuji fite amɛsikamore tsei lɛ.
48 Ehã nyɔŋmɔŋtɛi nɛ eshwie amɛnitsumɔ kooloi lɛ anɔ,+Ni ehã sarawai gbala ewo* kooloi ni amɛlɛɔ lɛ hu.
49 Efɔse emlila lɛ eshwie amɛnɔ,Egirimɔ lɛ, kɛ emlifu lɛ, kɛ ehaomɔ lɛ hu,Etsu ŋwɛibɔfoi akui koni amɛhã amɛhe ajara amɛ.
50 Egba gbɛ ehã emlifu lɛ.
Ehereee amɛ* kɛjeee gbele mli;Ehã tsɛŋemɔ hela ni gbeɔ mɔ mɔmɔ amɛ.*
51 Agbɛnɛ, egbe Ejipt kromɔbii fɛɛ,+Mɛi ni ji amɛfɔmɔ hewalɛ shishijee yɛ Ham mama tsũi lɛ amli lɛ.
52 Kɛkɛ ni ejie ewebii lɛ kɛje kpo tamɔ tooku,+Ni enyiɛ amɛhiɛ yɛ ŋa lɛ nɔ tamɔ kooloi akuu.
53 Enyiɛ amɛhiɛ shweshweeshwe,Ni amɛsheee nɔ ko gbeyei;+Ŋshɔ lɛ ha amɛhenyɛlɔi lɛ anɔ.+
54 Ni ekɛ amɛ ba eshikpɔŋ krɔŋkrɔŋ lɛ nɔ,+Gɔji nɛɛ ni ekɛ eninejurɔ shɔ̃ lɛ.+
55 Eshwie jeŋmaji lɛ kɛje amɛhiɛ;+Ekɛ susumɔ kpãa ja gboshinii ehã amɛ;+Ehã Israel wekui lɛ hi amɛshihilɛhei lɛ.+
56 Shi amɛtee nɔ amɛje Nyɔŋmɔ, Mɔ Ni Nɔ Kwɔ Fe Fɛɛ lɛ ŋwane* ni amɛtse ehiɛ atua;+Amɛbooo ekaimɔi lɛ atoi.+
57 Agbɛnɛ hu, amɛku amɛsɛɛ ni amɛyeee anɔkwa tamɔ amɛtsɛmɛi lɛ nɔŋŋ.+
Amɛtamɔ gãi ni mli egbɔjɔ, anyɛɛɛ akɛ he afɔ̃ amɛnɔ.+
58 Amɛtee nɔ amɛkɛ amɛhei grɔŋŋi lɛ wo emli la,+Ni amɛkɛ amɛmagai ni agbɔ* lɛ wo emli la.*+
59 Nyɔŋmɔ nu, ni emli wo la,+No hewɔ lɛ, ekpoo Israel kwraa.
60 Ni ekwa Shilo sɔlemɔ buu lɛ,+Mama tsũ ni ehi mli yɛ gbɔmɛi ateŋ lɛ.+
61 Ehã aŋɔ ehewalɛ he okadi lɛ nom kɛtee;Etu enunyam lɛ ewo henyɛlɔ lɛ dɛŋ.+
62 Ekɛ ewebii lɛ hã klante+Ni emli wo la ewo egboshinii lɛ.
63 La kpãtã eblahii lɛ ahiɛ,Ni aláaa yookpeemɔ lala ko ahãaa eblayei froi lɛ.*
64 Akɛ klante gbe esɔfoi lɛ,+Ni amɛyei okulafoi lɛ fóoo po.+
65 Kɛkɛ ni Yehowa te shi tamɔ mɔ ko ni ete shi kɛjɛ wɔ mli,+Tamɔ nuu kãkãlɔ+ ni wain etse yɛ ehiɛ.
66 Ni ewo ehenyɛlɔi lɛ foi;+Eshwie amɛhiɛ shi kɛtee naanɔ.
67 Ekpoo Yosef mama tsũ lɛ;Ehalaaa Efraim weku lɛ.
68 Shi ehala Yuda weku lɛ,+Zion Gɔŋ ni esumɔɔ lɛ.+
69 Ehã ehe krɔŋkrɔŋ lɛ ma shi shiŋŋ tamɔ ŋwɛi,*+Tamɔ ekɛ shikpɔŋ lɛ ema shi kɛmiiya naanɔ lɛ.+
70 Ehala etsulɔ David+Ni emɔ lɛ kɛje gwantɛŋi atsũi lɛ amli,+
71 Emɔ lɛ kɛje gwantɛŋi ni hãa bii afufɔ lɛ asɛɛ;Ewó lɛ tookwɛlɔ yɛ Yakob, ni ji emaŋ lɛ nɔ,+Kɛ Israel, ni ji egboshinii lɛ nɔ.+
72 Ekɛ tsui krɔŋŋ kwɛ amɛnɔ tamɔ tookwɛlɔ,+Ni ekɛ niji ni le ŋaa tsɔɔ amɛ gbɛ.+
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Loo “mifamɔ.”
^ Hebri sht. ŋm., “amɛbihii.”
^ Hebri sht. ŋm., “esaaa amɛtsui amɛtooo.”
^ Loo “tamɔ nui ni afo afabaŋ awo he.”
^ Loo “nui ni mli kwɔlɔ.”
^ Loo “Amɛbi niyenii kɛhã amɛsusuma.”
^ Hebri sht. ŋm., “amɛkɛka Nyɔŋmɔ.”
^ Hebri sht. ŋm., “blodo.” Kwɛmɔ Wiemɔi Titrii Amligbalamɔ lɛ.
^ Loo “ŋmaa.” Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
^ Loo “ŋwɛibɔfoi.”
^ Hebri sht. ŋm., “ablodo.” Kwɛmɔ Wiemɔi Titrii Amligbalamɔ lɛ.
^ Loo “amɛ-Oweletɔlɔ.”
^ Hebri sht. ŋm., “Ehaa amɛtɔmɔ lɛ nɔ.”
^ Shishitsɔɔmɔi komɛi kɛɔ akɛ, “Kɛ́ mumɔ lɛ tee lɛ ekuuu esɛɛ.”
^ Loo “Amɛfee Israel Mɔ Krɔŋkrɔŋ lɛ nidɔɔnii.”
^ Hebri sht. ŋm., “enine.”
^ Hebri sht. ŋm., “ekpɔ̃.”
^ Shishitsɔɔmɔi komɛi kɛɔ akɛ, “ehã atiridii ni naa wa mɔmɔ.”
^ Loo “amɛsusuma.”
^ Hebri sht. ŋm., “amɛwala.”
^ Hebri sht. ŋm., “amɛka Nyɔŋmɔ, Mɔ Ni Nɔ Kwɔ Fe Fɛɛ lɛ.”
^ Loo “akpɛ́.”
^ Loo “hã eye awuŋa.”
^ Hebri sht. ŋm., “Ni ajieee eblayei froi lɛ ayi.”
^ Hebri sht. ŋm., “Ema ehe krɔŋkrɔŋ lɛ tamɔ mɔji.”
