Lalai 68:1-35
Kɛhã lalatsɔɔlɔ lɛ. David nɔ. Lala ni afo. Lala.
68 Nyɔŋmɔ awó ehe nɔ, ehenyɛlɔi lɛ agbɛ ashwã,Ni mɛi ni nyɛɔ lɛ lɛ ajo foi yɛ ehiɛ.+
2 Shwiemɔ amɛ kɛya tamɔ bɔ ni kɔɔyɔɔ loɔ lasu kɛyaa lɛ;Bɔ ni wo agbaku* sereɔ yɛ la he lɛ,Nakai mɛi fɔji ahiɛ akpãtã yɛ Nyɔŋmɔ hiɛ.+
3 Shi jalɔi anya;+Amɛmii ashɛ amɛhe waa yɛ Nyɔŋmɔ hiɛ;Amɛnya ni amɛmii ashɛ amɛhe waa.
4 Nyɛláa nyɛhãa Nyɔŋmɔ; nyɛláa nyɛjiea* egbɛ́i lɛ yi.+
Nyɛláa nyɛhãa mɔ ni baa yɛ ŋa kpataa lɛ nɔ lɛ.*
Yah* ji egbɛ́i!+ Nyɛnyaa yɛ ehiɛ!
5 Mɛi ni bɛ tsɛmɛi lɛ* atsɛ kɛ yei okulafoi ahebulɔ*+Ji Nyɔŋmɔ yɛ eshihilɛhe krɔŋkrɔŋ lɛ.+
6 Nyɔŋmɔ hãa mɛi ni bɛ mɔ ko lɛ shĩa koni amɛhi mli;+Ejieɔ mɛi ni awo amɛ tsuŋ lɛ, ni ehãa amɛshwereɔ.+
Shi mɛi ni kuɛŋ ti lɛ,* amɛhiɔ shikpɔŋ ni egbi nɔ.+
7 Ao Nyɔŋmɔ, be ni onyiɛ omaŋbii lɛ* ahiɛ lɛ,+Be ni otsɔ ŋa kpataa lɛ nɔ kɛho lɛ, (Sela)
8 Shikpɔŋ lɛ hoso;+Ŋwɛi nɛ nu eshwie shi* yɛ Nyɔŋmɔ hewɔ;Sinai nɛɛ hoso yɛ Nyɔŋmɔ, Israel Nyɔŋmɔ lɛ, hewɔ.+
9 Ao Nyɔŋmɔ, ohã nugbɔ nɛ babaoo;Ohã omaŋbii* ni etɔ amɛ lɛ ná hewalɛ hee.
10 Amɛhi omama tsũi lɛ amli;+Ao Nyɔŋmɔ, ojɛ ekpakpa ni ofeɔ lɛ mli ohã ohiafoi anii.
11 Yehowa ewie;Yei ni jajeɔ sane kpakpa lɛ tamɔ asraafoi babaoo.+
12 Maŋtsɛmɛi kɛ amɛsraafoi lɛ ejo foi,+ amɛjo foi!
Yoo ni ashi yɛ shĩa lɛ po ená ta mli nii lɛ eko.+
13 Eyɛ mli akɛ nyɛkamɔ nsara lɛ mli lamului lɛ ahe* moŋ,Shi jɛmɛ nyɛbaaná okpo fiji ni akɛ jwiɛtɛi eha he,Kɛ shika tsuru tsɛji ni atsuu he* yɛ.
14 Be ni Ofe lɛ gbɛ nakai shikpɔŋ lɛ nɔ maŋtsɛmɛi lɛ* eshwã lɛ,+Snoo nɛ yɛ Zalmon.*
15 Bashan+ gɔŋ lɛ, Nyɔŋmɔ gɔŋ ni;*Bashan gɔŋ lɛ, gɔŋ kɛ enɔ gɔŋkpɔi gojogojoo ni.
16 Nyɛ gɔji kɛ nyɛnɔ gɔŋkpɔi gojogojoo, mɛni hewɔ nyɛkɛ hiŋmɛitsuu kwɛɔGɔŋ ni Nyɔŋmɔ ehala akɛ eshihilɛhe lɛ?*+
Anɔkwa, Yehowa baahi jɛmɛ kɛya naanɔ.+
17 Nyɔŋmɔ ta shwiilii lɛ, akpei nyɔŋmai abɔ, akpei akpei abɔ ni.+
Yehowa ejɛ Sinai kɛba he krɔŋkrɔŋ lɛ.+
18 Ao Yah Nyɔŋmɔ, okwɔ kɛtee ŋwɛi;+Oŋɔ mɛi nom kɛtee;Oŋɔ hii akɛ nikeenii,+Hɛɛ, atuatselɔi po,+ koni amɛhi amɛteŋ.
19 Ajie Yehowa, mɔ ni tereɔ wɔjatsu lɛ ehãa wɔ daa gbi lɛ yi,+Anɔkwa Nyɔŋmɔ ni ji wɔyiwalaheremɔ lɛ. (Sela)
20 Wɔle anɔkwa Nyɔŋmɔ lɛ akɛ Nyɔŋmɔ ni hereɔ mɔ yiwala;+Ni Yehowa, Nuŋtsɔ Ofe lɛ jieɔ mɔ kɛjeɔ gbele mli.+
21 Hɛɛ, Nyɔŋmɔ baajwara ehenyɛlɔi lɛ ayitsei,Mɔ fɛɛ mɔ ni yaa nɔ* yɛ efɔyeli mli lɛ yitso kɛ enɔ tsɔi lɛ.+
22 Yehowa ekɛɛ akɛ: “Mikɛ amɛ baaku sɛɛ kɛjɛ Bashan+ kɛba;Mikɛ amɛ baaku sɛɛ kɛjɛ ŋshɔ lɛ shishi tɔ̃ɔ kɛba,
23 Koni lá awu onane he+Ni ogbei lɛ alilɛi alɛmɔ nɔ ko yɛ ohenyɛlɔi lɛ ahe.”
24 Ao Nyɔŋmɔ, amɛnaa akoŋ ni oshiɔ lɛ,Akoŋ ni mi-Nyɔŋmɔ lɛ kɛ mi-Maŋtsɛ lɛ shiɔ kɛyaa he krɔŋkrɔŋ lɛ.+
25 Mɛi ni láa lɛ nyiɛ hiɛ, ni mɛi ni tswaa kpãa saŋkui lɛ nyiɛ sɛɛ;+Ni yei ni shaa akashaa lɛ yɛ amɛteŋ.+
26 Nyɛjiea Nyɔŋmɔ yi yɛ asafo babaoo* lɛ teŋ;Nyɛjiea Yehowa yi, nyɛ mɛi ni nyɛjɛ Israel Jɛɛhe lɛ.+
27 Jɛmɛ Benyamin+ ni ji amɛteŋ gbekɛ fe fɛɛ lɛ yeɔ amɛnɔ yɛ,Kɛ Yuda lumɛi lɛ kɛ amɛsafo ni feɔ hoo lɛ hu,Kɛ Zebulon lumɛi lɛ kɛ Naftali lumɛi lɛ hu.
28 O-Nyɔŋmɔ lɛ efã akɛ ohe baawa.
Ao Nyɔŋmɔ, bo mɔ ni otsuɔ nibii ahe nii ohãa wɔ, jiemɔ ohewalɛ lɛ kpo.+
29 Osɔlemɔ shĩa ni yɔɔ Yerusalem lɛ hewɔ lɛ,+Maŋtsɛmɛi baabake bo nii.+
30 Kã kooloi ni hiɔ gãlãi amli lɛ,Kɛ tsinahii+ kɛ amɛbii ni ebua amɛhe naa lɛ ahiɛ,Kɛyashi majimaji lɛ baakoto shi ni amɛkɛ jwiɛtɛi aba.*
Shi gbɛɛ majimaji ni sumɔɔ ta lɛ oshwã.
31 Akɛ brɔnz nibii baajɛ Ejipt kɛba;+Kush he baafee oya ni ebake Nyɔŋmɔ nii.
32 Nyɛ shikpɔŋ lɛ nɔ maŋtsɛyelii, nyɛláa nyɛhãa Nyɔŋmɔ,+Nyɛláa* kɛjiea Yehowa yi, (Sela)
33 Kɛjiea mɔ ni ta ŋwɛii amli ŋwɛi ni yɔɔ kɛjɛ blema tɔ̃ɔ lɛ nɔ lɛ yi.+
Naa! Egbee shimɔɔ, egbee ni wa lɛ shimɔɔ.
34 Nyɛjajea Nyɔŋmɔ hewalɛ lɛ.+
Enunyam lɛ yeɔ Israel nɔ,Ni ehewalɛ lɛ yɛ atatui lɛ amli.
35 Nyɔŋmɔ he yɛ gbeyei waa kɛ́ eeba kɛmiijɛ ejamɔhe* kpele lɛ mli lɛ.+
Lɛ ji Israel Nyɔŋmɔ lɛ,Mɔ ni hãa emaŋ lɛ hewalɛ kɛ nyɛmɔ lɛ.+
Ajie Nyɔŋmɔ yi.
Shishigbɛ Niŋmaa
^ Eeenyɛ efee akɛ, aawie nɔ ko ni wobii feɔ ni amɛkɛ wo toɔ mli ni nyɛɔ esereɔ lɛ he.
^ Loo “nyɛtswaa lala kɛjiea.”
^ Shishitsɔɔmɔi komɛi kɛɔ akɛ, “yɛ atatui lɛ anɔ lɛ.”
^ “Yah” ji gbɛ́i Yehowa lɛ ní afo lɛ kuku.
^ Loo “Awusãi.”
^ Hebri sht. ŋm., “akojolɔ.”
^ Loo “Shi atuatselɔi lɛ.”
^ Hebri sht. ŋm., “be ni oje kpo kɛnyiɛ omaŋbii lɛ.”
^ Hebri sht. ŋm., “Ŋwɛi tsere eshwie shi.”
^ Hebri sht. ŋm., “ogboshinii.”
^ Shishitsɔɔmɔi komɛi kɛɔ akɛ, “toi atsũi lɛ ateŋ.”
^ Loo “shika tsuru baa ŋmɔŋ tsɛji.”
^ Hebri sht. ŋm., “gbɛ emli maŋtsɛmɛi lɛ.”
^ Loo “Oookɛɛ snoo enɛ yɛ Zalmon.”
^ Loo “gɔŋ wulu ni.”
^ Loo “sumɔɔ akɛ ehi nɔ lɛ.”
^ Loo “Mɔ fɛɛ mɔ ni yaa ebaa.”
^ Hebri sht. ŋm., “gwabɔi.”
^ Shishitsɔɔmɔi komɛi kɛɔ akɛ, “ni amɛnaanaa jwiɛtɛi anɔ.”
^ Loo “Nyɛtswaa lala.”
^ Hebri sht. ŋm., “ojamɔhe.”
