Lalai 64:1-10
-
Hebuu kɛmiije tutuamɔ ni yɔɔ nigii he
-
“Nyɔŋmɔ baatsɛ̃ amɛ gãi” (7)
-
Kɛhã lalatsɔɔlɔ lɛ. Lala ni David fo.
64 Ao Nyɔŋmɔ, bo migbee toi be ni mikpaa bo fai lɛ.+
Buu miwala he kɛje mihe gbeyei ni mihenyɛlɔ lɛ woɔ lɛ he.
2 Buu mihe kɛje ŋaa ni efɔŋfeelɔi lɛ etsɔ yɛ teemɔŋ lɛ he,+Kɛje efɔŋfeelɔi babaoo lɛ ahe.
3 Amɛjɔɔ amɛlilɛi naa tamɔ klante;Amɛkɛ amɛwiemɔi ni naa wa lɛ maa minɔ tamɔ atáa gãimlibii lɛ,
4 Koni amɛjɛ amɛteemɔhei lɛ amɛtsɛ̃ mɔ ni efeko nɔ ko lɛ gãi;Amɛtsɛ̃ɔ lɛ gãi trukaa ni amɛsheee gbeyei.
5 Amɛhiɛɔ amɛyiŋtoo fɔŋ lɛ mli kpɛŋŋ;*Amɛsusuɔ bɔ ni amɛkɛ amɛtsɔnei lɛ baatee lɛ he.
Amɛkɛɔ akɛ: “Namɔ po baana?”+
6 Amɛtaoɔ gbɛi hei ni amɛaatsɔ nɔ amɛfee efɔŋ;Amɛkɛ hiɛtɛ̃ɛ tsɔɔ amɛŋaa lɛ yɛ teemɔŋ;+Amɛteŋ mɔ fɛɛ mɔ susumɔ kɛ etsui mli kwɔ.
7 Shi Nyɔŋmɔ baatsɛ̃ amɛ gãi;+Gãimlibi baapila amɛ trukaa.
8 Amɛ diɛŋtsɛ amɛlilɛi baahã amɛgbee shi;+Mɛi fɛɛ ni kwɛɔ lɛ baahoso amɛyitsei.
9 Kɛkɛ lɛ, gbɔmɛi fɛɛ baashe gbeyei,Ni amɛbaajaje nɔ ni Nyɔŋmɔ efee lɛ,Ni amɛbaayoo enitsumɔi lɛ asɛɛ.+
10 Jalɔ baanya yɛ Yehowa hewɔ ni ebaaba abo yɛ emli;+Mɛi fɛɛ ni ja yɛ amɛtsui mli lɛ baanya.*
