Lalai 109:1-31
Kɛhã lalatsɔɔlɔ lɛ. Lala ni afo. David nɔ.
109 Ao Nyɔŋmɔ, bo mɔ ni mijieɔ oyi,+ kaafee diŋŋ.
2 Ejaakɛ mɔ fɔŋ lɛ kɛ mɔ ni lakaa mɔ lɛ egbɛ amɛdaaŋ amɛwo mi.
Amɛkɛ amale lilɛi wieɔ mihe;+
3 Amɛkɛ nyɛɛ wiemɔi ebɔle mi,Ni amɛtutuaa mi be ni mifeko amɛ nɔ ko.+
4 Amɛte shi amɛwo mi kɛto suɔmɔ ni mijie kpo mitsɔɔ amɛ lɛ najiaŋ;+Shi maya nɔ masɔle.
5 Amɛkɛ efɔŋ to ekpakpa ni mifee amɛ lɛ najiaŋ,+Ni amɛkɛ nyɛɛ to suɔmɔ ni mijie kpo mitsɔɔ amɛ lɛ najiaŋ.+
6 Hã mɔ fɔŋ aye enɔ;Hã shiteekɛwolɔ* adamɔ eninejurɔ nɔ.
7 Kɛ́ akojo lɛ lɛ, hã eye fɔ;Buu esɔlemɔ po akɛ esha.+
8 Hã egbii lɛ afee kuku;+Hã mɔ kroko aŋɔ enɔkwɛmɔ nitsumɔ lɛ.+
9 Hã ebii* atsɔmɔ mɛi ni bɛ tsɛ,*Ni eŋa atsɔ okulafo.
10 Hã ebii atsɔmɔ mɛi ni kpaa shi kɛbaa nii,Mɛi ni yataoɔ niyenii yɛ amɛtsukoi lɛ amli.
11 Hã mɔ ni faa lɛ nii lɛ ashɔ̃ nɔ fɛɛ nɔ ni eyɔɔ lɛ yɛ edɛŋ,*Ni gbɔi aloo enibii.
12 Mɔ ko mɔ ko akajie mlihilɛ* kpo etsɔɔ lɛ,Ni mɔ ko mɔ ko akadro ebii ni bɛ tsɛ* lɛ.
13 Hã afolɔ eseshibii lɛ ashwie;+Agbe amɛgbɛ́i yɛ yinɔ kome mli.
14 Yehowa akai etsɛmɛi lɛ atɔmɔ lɛ,+Ni akatsumɔ emami he esha lɛ.
15 Nɔ ni amɛfee lɛ ahi Yehowa hiɛ daaNi ehiɛ akpa nɔ ni ale yɛ amɛhe lɛ nɔ yɛ shikpɔŋ lɛ nɔ.+
16 Ejaakɛ ekaiii ni ebaajie mlihilɛ* kpo,+Shi etee nɔ etiu mɔ ni awaa lɛ yi,+ kɛ ohiafo, kɛ mɔ ni tsui ekumɔ lɛKoni egbe lɛ.+
17 Akɛni esumɔɔ ni elomɔ hewɔ lɛ, loomɔ nɔŋŋ ba enɔ;Akɛni esumɔɔɔ ni ejɔɔ hewɔ lɛ, enáaa jɔɔmɔ ko.
18 Loomɔ ewula lɛ tamɔ atade.
Ni afɔse awo egbɔmɔtso mli tamɔ nu,Ebote ewui amli tamɔ fɔ.*
19 Eloomɔ lɛ atsɔ tamɔ mama ni ebuɔ+Kɛ bɛlti* ni ekɛfĩɔ emli lɛ.
20 Nɛkɛ Yehowa baawo mɔ ni teɔ shi ewoɔ mi lɛ nyɔmɔ,+Kɛ mɛi fɛɛ ni wieɔ saji fɔji amɛshiɔ mi* lɛ.
21 Shi bo, Yehowa Nuŋtsɔ Ofe,Tsu saji ahe nii ohã mi yɛ ogbɛ́i lɛ hewɔ.+
Jiemɔ mi ejaakɛ osuɔmɔ ni tsakeee lɛ hi.*+
22 Ejaakɛ mi lɛ, mibɛ yelikɛbualɔ, ni miiye ohia;+Ni atsurɔ mitsui nii yɛ mimli.+
23 Miilaaje tamɔ hɔɔŋ laajeɔ;Ahwanya mi ashwie tamɔ baalabi.
24 Ŋmaahilɛ sɔŋŋ ehã minakutsei egbɔjɔ;Mitã loo ni mifee kanyakanya.*
25 Mitsɔ tamɔ nyaŋemɔ nii yɛ amɛhiɛ.+
Kɛ́ amɛna mi lɛ, amɛhosoɔ amɛyitsei.+
26 Ao Yehowa, mi-Nyɔŋmɔ, ye obua mi;Okɛ osuɔmɔ ni tsakeee lɛ ahere mi.
27 Koni amɛle akɛ onine fee enɛ;Ni akɛ, bo Yehowa ofee enɛ.
28 Amɛ lɛ amɛlomɔɔ, shi bo lɛ obaajɔɔ.
Kɛ́ amɛte shi amɛwo mi lɛ, amɛhiɛ ashwie shi,Ni otsulɔ anya.
29 Hiɛshishwiemɔ awula mɛi ni teɔ shi amɛwoɔ mi lɛ;Hiɛgbele awula amɛ tamɔ atade kakadaŋŋ.*+
30 Minaabu baajie Yehowa yi babaoo;Majie eyi yɛ mɛi babaoo ahiɛ.+
31 Ejaakɛ ebaadamɔ ohiafo lɛ ninejurɔ nɔKoni ehere eyiwala kɛje mɛi ni buɔ lɛ* fɔ lɛ adɛŋ.
Shishigbɛ Niŋmaa
^ Loo “mɔ ni wieɔ eshiɔ lɛ.”
^ Hebri sht. ŋm., “ebihii.”
^ Loo “awusãi.”
^ Loo “Hã mɛi ni faa nii ni amɛheɔ he kpa lɛ atsɔ̃ nɔ fɛɛ nɔ ni eyɔɔ lɛ tsɔne.”
^ Loo “suɔmɔ ni tsakeee.”
^ Loo “ebii awusãi.”
^ Loo “suɔmɔ ni tsakeee.”
^ Loo “mu.”
^ Loo “hɛfiinɔ.”
^ Loo “misusuma.”
^ Loo “nɔ ko kpakpa ni.”
^ Hebri sht. ŋm., “Mitã loo ni fɔ bɛ mihe.”
^ Loo “atade ni nine bɛ he.”
^ Loo “esusuma.”
