Hiob 8:1-22

  • Bildad klɛŋklɛŋ wiemɔ (1-22)

    • Etsɔɔ akɛ Hiob bii lɛ efee esha (4)

    • ‘Kɛji ohe tse lɛ, Nyɔŋmɔ baabu ohe’ (6)

    • Etsɔɔ akɛ Hiob ebuuu Nyɔŋmɔ (13)

8  Kɛkɛ ni Bildad,+ Shuanyo+ lɛ, jie naa akɛ:   “Mɛɛ beyinɔ nɔŋŋ obaaya nɔ owie nɛkɛ kɛyashi?+ Odaaŋ wiemɔi lɛ, kɔɔyɔɔ wulu ni!   Ani Nyɔŋmɔ baatsɔ jalɛ sane hiɛ ebu shi,Aloo Ofe lɛ baatsɔ jalɛ hiɛ ebu shi?   Kɛ́ obii lɛ efee esha amɛshi lɛ lɛ,No lɛ, amɛtoi ehã agbala yɛ amɛtuatsemɔ lɛ hewɔ lɛ;*   Shi bo lɛ, kɛ́ obaakwɛ Nyɔŋmɔ gbɛ+Ní okpa Ofe lɛ fai koni ena bo mɔbɔ,   Ni kɛji ohe tse ni oja lɛɛlɛŋ lɛ,+No lɛ, ebaagbala ejwɛŋmɔ kɛba onɔ*Ní ekɛ bo ato ogbɛhe ni sa bo lɛ ekoŋŋ.   Ni eyɛ mli akɛ oshishijee lɛ fee bibioo moŋ,Shi owɔsɛɛ shihilɛ lɛ baafee kpeteŋkpele.+   Ofainɛ, bi yinɔ ni eho lɛ,Ni obo nibii ni amɛtsɛmɛi lɛ kpa shi amɛna lɛ toi.+   Wɔ lɛ, nyɛ nɔŋŋ afɔ wɔ, ni wɔleee nɔ ko nɔ ko,Ejaakɛ wɔgbii yɛ shikpɔŋ lɛ nɔ lɛ, hɔɔŋ ni. 10  Ani amɛtsɔŋ bo nii,Ni amɛgbaŋ bo nɔ ni amɛle?* 11  Ani papiro tso baada yɛ he ko ni nu bɛ? Ani gãlã baada kɛ́ enáaa nu? 12  Be ni egba afoforo lolo, ni anáko afo lɛ,Ebaaŋala eshi tsei krokomɛi fɛɛ. 13  Nɛkɛ ji bɔ ni mɛi fɛɛ ni hiɛ kpaa Nyɔŋmɔ nɔ lɛ anaagbee* yɔɔ,Ejaakɛ mɛi ni ebuuu Nyɔŋmɔ* lɛ ahiɛnɔkamɔ lɛ baafite, 14  Mɛi ni amɛhiɛnɔkamɔ lɛ baafee efoloNi nɔ ni amɛkɛ amɛhiɛ fɔ̃ɔ nɔ lɛ hu waaa tamɔ anaanu ntaŋ* nɔŋŋ lɛ. 15  Ekɛ ehe baakpasa etsũ lɛ, shi tsũ lɛ emaŋ shi;Ebaabɔ mɔdɛŋ akɛ ebaahiɛ mli kpɛŋŋ, shi emaŋ shi etsɛŋ. 16  Eji tso ni nu yɔɔ mli yɛ hulu nɔ,Ni eniji lɛ lɛɔ shi yɛ abɔɔ lɛ mli.+ 17  Eshishifãi lɛ lalaa tɛi ni bua shi kuu lɛ;Etaoɔ tsũ yɛ tɛi lɛ ateŋ.* 18  Shi kɛji afã lɛ kɛ eshishifã* kɛje he ni eyɔɔ lɛ,No lɛ, he ni eyɔɔ lɛ baakwa lɛ ni ebaakɛɛ akɛ, ‘Minako bo pɛŋ.’+ 19  Hɛɛ, nakai ji bɔ ni ebaalaaje;*+Kɛkɛ lɛ, mɛi krokomɛi hu baakwɛ̃ kɛbaajɛ sũ* lɛ mli. 20  Anɔkwa, Nyɔŋmɔ kwaŋ mɛi ni yaa nɔ amɛyeɔ anɔkwa* lɛ;Ni mɛi fɔji hu, eyeŋ ebuaŋ amɛ,* 21  Ebaawo odaaŋ obɔ kɛ ŋmɔlɔKɛ onaabu hu kɛ nyamɔ wiemɔi. 22  Mɛi ni nyɛɔ bo lɛ, akɛ hiɛgbele baabu amɛ tamɔ mama,Ni mɛi fɔji amama tsũ lɛ ehiŋ shi dɔŋŋ.”

Shishigbɛ Niŋmaa

Hebri sht. ŋm., “etu amɛ ewo amɛtuatsemɔ lɛ dɛŋ.”
Loo “ebaakãnya ehe ehã bo.”
Hebri sht. ŋm., “Ni amɛjieŋ wiemɔi akpo kɛjɛŋ amɛtsuii amli?”
Hebri sht. ŋm., “agbɛi lɛ.”
Loo “mɛi ni ekwa Nyɔŋmɔ.”
Hebri sht. ŋm., “anaanu tsũ.”
Loo “Ekwɛɔ tɛ tsũ.”
Loo “kɛji ami lɛ.”
Loo “nakai ji egbɛ lɛ fitemɔ.”
Hebri sht. ŋm., “mulu.”
Loo “mɛi ni shwamɔ ko bɛ amɛhe.”
Hebri sht. ŋm., “emɔŋ amɛnine mli.”