Hiob 39:1-30
39 “Ani ole be ni gɔji anɔ abotiai fɔɔ?+
Ani ona baayelɔi ni miifɔ amɛbii pɛŋ?+
2 Ani okaneɔ nyɔji ni amɛkɛhiɛɔ musu?
Ani ole be ni amɛfɔɔ?
3 Kɛji amɛmiifɔ amɛbii lɛ, amɛbuɔ shi,Ni amɛkɔ̃ɔmɔi lɛ asɛɛ foɔ.
4 Amɛbii lɛ náa hewalɛ, ni amɛdaraa yɛ ŋa mli;Amɛyaa, ni amɛkuuu amɛsɛɛ kɛbaaa amɛŋɔɔ dɔŋŋ.
5 Namɔ ŋmɛɛ ŋa mli teji* he ní eye ehe,+Ni namɔ fɛne ŋa mli teji kpãi lɛ?
6 Mikɛ ŋa kpataa efee eshĩaKɛ ŋoo shikpɔŋ lɛ hu eshihilɛhe.
7 Eŋmɔɔ hoofeemɔ ni yɔɔ maŋ lɛ mli lɛ;Enuuu kooloo kpalalɔ bolɔmɔi lɛ.
8 Ekpaa shi yɛ gɔŋkpɔi anɔ etaoɔ niyenii,Etaoɔ jwɛi fɔ fɛɛ jwɛi fɔ.
9 Ani ŋa mli tsina baakpɛlɛ ní esɔmɔ bo?+
Ani ebaaye jenamɔ yɛ okooloi atsũ mli?*
10 Ani obaawo ŋa mli tsina kpãa kɛyagbá nujɔɔ yɛ ŋmɔ mli,Aloo ebaanyiɛ osɛɛ kɛyahu* jɔɔ mli?
11 Ani okɛ ohiɛ baafɔ̃ ehewalɛ kpele lɛ nɔNí ohã etsu onitsumɔ ni wa ehã bo?
12 Ani okɛ ohiɛ baafɔ̃ enɔ akɛ ekɛ onikpamɔnii* lɛ baaba,Ni ebaabua naa kɛya oŋmaagbeemɔhe lɛ?
13 Duguma* tswaa efiji amli kɛ nyamɔ,Shi ani abaanyɛ akɛ efiji kɛ etsɛji lɛ ato klitso nɔ he?+
14 Ejaakɛ eshiɔ ewɔji yɛ shikpɔŋ,Ni ehãa amɛhe dɔɔ la yɛ mulu mli.
15 Ehiɛ kpaa nɔ akɛ nane ko baanyɛ ajwara amɛAloo ŋa mli kooloo ko aaanaanaa amɛnɔ.
16 Efeɔ ebii lɛ niseniianii, oookɛɛ jeee ebii ji amɛ;+Esheee gbeyei akɛ etɔlɛ lɛ baafee efolo.
17 Ejaakɛ Nyɔŋmɔ ehã hiɛshikamɔ ebɔ lɛ*Ni ehãaa lɛ niiashishinumɔ ko kwraa.
18 Shi kɛji ewó ehe nɔ, ni etswa efiji amli lɛ,Eŋmɔɔ okpɔŋɔ kɛ enɔtalɔ.
19 Ani bo ji mɔ ni hã okpɔŋɔ ehewalɛ lɛ?+
Ani bo okɛ ekuɛ he tsɔi ni tswaa kɛyaa kɛbaa lɛ wula ekuɛ he?
20 Ani obaanyɛ ohã ehuru tamɔ baalabi?*
Etsinemɔ ni naa wa lɛ yɛ gbeyei waa.+
21 Ekɛ enaji gbɛɔ shi yɛ jɔɔ mli, ni emli filiɔ lɛ waa;+Etsɛ̃ɔ kɛyaa ta naa.*+
22 Eŋmɔɔ gbeyeishemɔ, ni esheee nɔ ko nɔ ko gbeyei.+
Ekuuu esɛɛ yɛ klante hewɔ.
23 Gãimlibii akotoku gbɛɔ woɔ lɛ,Akpɔlɔ kɛ akpɔlɔ kuku kpɛlɛɔ kaŋkaŋ woɔ lɛ.
24 Ehe kpokpoɔ kɛ miishɛɛ, ni etsɛ̃ɔ kɛyaa ehiɛ,*Kɛ́ tɛtɛrɛmantɛrɛ gbɛɛ lɛ, enyɛɛɛ edamɔ shi diŋŋ.*
25 Kɛ́ tɛtɛrɛmantɛrɛ gbɛɛ lɛ, ekɛɔ akɛ, ‘Ahãa!’
Enuɔ ta he fu yɛ shɔŋŋNi enuɔ tatsɛmɛi abolɔmɔ kɛ oshebɔɔ hu.+
26 Ani bo oniiashishinumɔ naa akroma* filikiɔ kɛyaa ŋwɛi shɔŋŋ,Ni egbɛɔ efiji amli kɛyaa wuoyigbɛ lɛ?
27 Aloo bo ofamɔ naa okropɔŋ filikiɔ kɛyaa ŋwɛigbɛ+Ni efeɔ etsũ yɛ ŋwɛi shɔŋŋ,+
28 Ni eyeɔ jenamɔ yɛ tɛsaa nɔ,Ni ehiɔ emɔɔ lɛ mli yɛ tɛsaa* nɔ lɛ?
29 Jɛmɛ ejɛɔ etaoɔ niyenii;+Ehiŋmɛii kwɛɔ nii kɛyaa shɔŋŋ diɛŋtsɛ.
30 Ebii bibii lɛ shɔɔ lá;Ni he fɛɛ he ni gbohii jwere lɛ, jɛmɛ eyɔɔ.”+
Shishigbɛ Niŋmaa
^ Loo “onager.”
^ Loo “okooloi aniyeli nɔ he?”
^ Loo “kɛyapuku.”
^ Hebri sht. ŋm., “odumɔwui.”
^ Loo “Dugumayoo.”
^ Hebri sht. ŋm., “ehã ehiɛ ekpa hiɛshikamɔ nɔ.”
^ Baalabi ji agã henɔ ko.
^ Hebri sht. ŋm., “Ejeɔ kpo ekɛ tawuu hewulamɔ nii yakpeɔ.”
^ Hebri sht. ŋm., “ni emiɔ shikpɔŋ.”
^ Shishitsɔɔmɔi komɛi kɛɔ akɛ, “eheee eyeee.”
^ Akroma ni awieɔ he yɛ biɛ lɛ ji akroma henɔ ko ni atsɛɔ lɛ yɛ Blɔfo mli akɛ “falkon” lɛ.
^ Hebri sht. ŋm., “tɛsaa nyanyɔŋ.”
