Hiob 32:1-22

  • Oblanyo Elihu kɛ ehe wo sanegbaa lɛ mli (1-22)

    • Emli fu Hiob kɛ Hiob nanemɛi lɛ (2, 3)

    • Ejɛ bulɛ mli emɛ dani ebɔi wiemɔ (6, 7)

    • Dalɛ kɛkɛ hãaa mɔ atsɔ hiɛshikalɔ (9)

    • Elihu miishwe ni ewie (18-20)

32  No hewɔ lɛ, hii etɛ nɛɛ kpa Hiob hetoo hãmɔ, ejaakɛ eyɛ nɔmimaa yɛ lɛ diɛŋtsɛ ejalɛ lɛ he.*+  Shi no mli lɛ Elihu, ni ji Buznyo+ Barakel ni jɛ Ram weku lɛ mli lɛ binuu lɛ, mli efu waa. Emli wo la waa ewo Hiob akɛni eetao etsɔɔ akɛ, lɛ moŋ esane ja* fe Nyɔŋmɔ lɛ hewɔ.+  Emli fu Hiob nanemɛi etɛ lɛ hu waa, ejaakɛ amɛnáaa hetoo ko amɛhã Hiob, shi moŋ, amɛbu Nyɔŋmɔ mɔ fɔŋ.+  No mli lɛ, Elihu miimɛ ní ejie Hiob naa, ejaakɛ amɛye lɛ onukpa.+  Be ni Elihu na akɛ hii etɛ lɛ bɛ nɔ ko dɔŋŋ ni amɛbaawie kɛjie naa lɛ, emli wo la waa.  No hewɔ lɛ, Elihu, ni ji Buznyo Barakel binuu lɛ, bɔi wiemɔ ekɛɛ: “Gbekɛ ji mi*Ni nyɛ lɛ, hiimeji ji nyɛ.+ No hewɔ lɛ, mijɛ bulɛ mli mifee diŋŋ dã,+Ni mikaaa akɛ makɛɛ nyɛ nɔ ni mile.   Mikɛɛ mihe akɛ, ‘Dalɛ* awie,Ní afii babaoo ajaje hiɛshikamɔ atsɔɔ.’   Shi mumɔ ni yɔɔ gbɔmɛi amli,Hɛɛ, Ofe lɛ mumɔ ni emuɔ lɛ ji nɔ ni hãa amɛnáa niiashishinumɔ.+   Dalɛ* kɛkɛ hãaa mɔ atsɔ hiɛshikalɔ,Ni jeee hiimeji pɛ le nɔ ni ja.+ 10  No hewɔ lɛ, miikɛɛ akɛ, ‘Bo mi toi,Ní mi hu matsɔɔ bo nɔ ni mile.’ 11  Naa! Mitee nɔ mimɛ nyɛwiemɔi lɛ;Mitee nɔ mibo nyɛsusumɔi lɛ toi+Be ni nyɛtaoɔ nibii ni nyɛbaawie lɛ.+ 12  Mibo nyɛ toi jogbaŋŋ,Shi nyɛteŋ mɔ ko mɔ ko nyɛɛɛ ahã Hiob ana akɛ esane ejaaa*Aloo ní ehã ewiemɔi* lɛ ahetoo. 13  No hewɔ lɛ, nyɛkakɛa akɛ, ‘Wɔhiɛ kã shi;Nyɔŋmɔ ji mɔ ni baahã ena akɛ esane ejaaa, jeee gbɔmɔ.’ 14  Jeee mi ekɛwie,No hewɔ lɛ, jeee nyɛsanenaatsɔɔmɔi lɛ mikɛbaajie lɛ naa. 15  Amɛhiɛ miifee amɛ yaa, amɛbɛ hetoo ko dɔŋŋ;Amɛbɛ nɔ ko ni amɛbaawie dɔŋŋ. 16  Mimɛ aahu, shi amɛwieee dɔŋŋ;Amɛdamɔ shi kɛkɛ, amɛbɛ naajiemɔ ko dɔŋŋ. 17  No hewɔ lɛ, mi hu mawie;Mi hu matsɔɔ nɔ ni mile, 18  Ejaakɛ miyi obɔ kɛ wiemɔi;Mumɔ ni yɔɔ mimli lɛ miitsirɛ mi. 19  Mimligbɛ efee tamɔ wain ni atsĩ naa,Tamɔ wain kotokui* hei ni miihe afɛlɛ.+ 20  Hã mawie, koni mihe ajɔ mi! Magbele minaa ní mahã hetoo. 21  Mikwɛŋ mɔ ko mɔ ko hiɛaŋ;+Ni miwoŋ gbɔmɔ ko gbɔmɔ ko yiteŋ mulu,* 22  Ejaakɛ mileee bɔ ni awoɔ mɔ yiteŋ mulu;Kɛ́ mifee nakai lɛ, mi-Feelɔ lɛ baakpãtã mihiɛ oya nɔŋŋ.

Shishigbɛ Niŋmaa

Loo “jalɔ ji lɛ yɛ lɛ diɛŋtsɛ ehiŋmɛiiaŋ.”
Loo “esusuma sane ja.”
Hebri sht. ŋm., “Midaaa yɛ gbii amli.”
Hebri sht. ŋm., “Gbii.”
Loo “Gbii pii.”
Loo “nyɛɛɛ ajaje Hiob.”
Loo “esanenaatsɔɔmɔi.”
Ni ji, kotokui ni akɛ kooloo hewolo fee.
Loo “mikɛ gbɛnaa gbɛ́i ko ni akɛwoɔ mɔ okɛse tsɛŋ gbɔmɔ ko.”