Hiob 21:1-34
21 Hiob jie naa akɛ:
2 “Nyɛboa nɔ ni miwieɔ lɛ toi jogbaŋŋ;Nyɛhãa enɛ afea nɔ ni nyɛkɛbaashɛje mimii.
3 Nyɛnáa tsui nyɛhãa mi ní mawie;Kɛ́ miwie migbe naa lɛ, nyɛbaanyɛ nyɛye mihe fɛo.+
4 Ani gbɔmɔ mijajeɔ misane lɛ mitsɔɔ?
Kɛ́ nakai ni lɛ, ani kulɛ mato mitsui shi?*
5 Nyɛkwɛa mi, ní nyɛnaa akpɛa nyɛhe;Nyɛkɛ nyɛnine atoa nyɛnaa.
6 Kɛ́ misusu he lɛ, egbaa minaa waa,Ni migbɔmɔtso muu lɛ fɛɛ kpokpoɔ.
7 Mɛni hewɔ mɛi fɔji yaa nɔ amɛhiɔ shi,+Amɛgbɔlɔɔ, ni amɛnáa nii?*+
8 Amɛbii yɛ amɛhiɛ be fɛɛ be,Ni amɛnaa amɛseshibii.
9 Amɛshĩai yɛ shweshweeshwe, amɛsheee nɔ ko gbeyei,+Ni Nyɔŋmɔ kɛ etso lɛ gbalaaa amɛtoi.
10 Amɛtsinahii kwɔɔ tsinayei ní efeee efolo;Amɛtsinayei fɔɔ ní amɛmusu sharakeee.
11 Amɛbihii joɔ foi yɛ agbó naa tamɔ tooku,Ni amɛbii tumɔɔ kɛyaa kɛbaa.
12 Amɛláa ní akashaa kɛ saŋku gbɛɛmɔ fata heNi amɛnyaa yɛ obɛnta* gbɛɛmɔ naa.+
13 Amɛyeɔ amɛgbii lɛ kɛ tsui ni enyɔ mɔ mliNi amɛkpelekeɔ shi kɛyaa Gbonyobu* lɛ mli yɛ toiŋjɔlɛ mli.*
14 Shi amɛkɛɔ anɔkwa Nyɔŋmɔ lɛ akɛ, ‘Kaagba wɔnaa!
Wɔsumɔɔɔ ni wɔle ogbɛi lɛ.+
15 Namɔ ji Ofe lɛ, ní wɔɔsɔmɔ lɛ?+
Kɛ́ wɔná wɔle lɛ lɛ, mɛni wɔbaaná?’+
16 Shi mile akɛ amɛbɛ hewalɛ yɛ amɛninámɔ nɔ.+
Mikɛ mɛi fɔji asusumɔ* lɛ teŋ jekɛ waa.+
17 Shii enyiɛ agbeɔ mɛi fɔji akane?+
Shii enyiɛ oshãra baa amɛnɔ?
Shii enyiɛ Nyɔŋmɔ kpãtãa amɛhiɛ yɛ emlifu mli?
18 Ani amɛtsɔmɔ tamɔ jwɛi yɛ kɔɔyɔɔ naaKɛ ŋmaa* he totoi* ni kɔɔyɔɔ ni naa wa woɔ kɛyaa pɛŋ?
19 Nyɔŋmɔ kɛ mɔ ko toigbalamɔ baato ehã ebii.
Shi Nyɔŋmɔ ato lɛ najiaŋ koni ená ele.+
20 Lɛ diɛŋtsɛ ehiŋmɛii ana ehiɛkpatamɔ lɛ,Ní lɛ enu Ofe lɛ mlifu lɛ eko.+
21 Ani esusuɔ nɔ ni baaba eshĩa lɛ nɔ yɛ esɛɛKɛ́ afo enyɔji lɛ afalɛ lɛ nɔ kuku lɛ he?*+
22 Ani mɔ ko baanyɛ atsɔɔ Nyɔŋmɔ nilee,*+Be mli ni lɛ ji mɔ ni kojoɔ mɛi ni nɔ kwɔlɔ fe fɛɛ po lɛ?+
23 Mɔ ko gboɔ be ni eyɛ hewalɛ kpintiŋkpliŋŋ+Be ni ebɛ naagba ko ní ehe ejɔ lɛ,+
24 Be ni eshuɔji ewo fɔNí ewuiaŋ wa.*
25 Shi mɔ kroko hu gboɔ be ni ehao waa,*Ní esako enaa nibii kpakpai dã.
26 Amɛ fɛɛ amɛbaakamɔ shi yɛ sũ* mli,+Ni gɔgɔmii baaha amɛ fɛɛ amɛhe.+
27 Naa! Mile nɔ tuuntu ni nyɛjwɛŋɔKɛ ŋai ni nyɛtsɔɔ koni nyɛfee mi nɔ ko* lɛ.+
28 Ejaakɛ nyɛkɛɔ akɛ, ‘Nɛgbɛ gbɔmɔ wulu lɛ shĩa lɛ yɔɔ,Ni nɛgbɛ mama tsũ ni gbɔmɔ fɔŋ lɛ hi mli lɛ yɔɔ?’+
29 Ani nyɛbiko gbɛfalɔi lɛ?
Ani nyɛpɛiii nii ni amɛkpa shi amɛna lɛ amli* jogbaŋŋ,
30 Akɛ ahãa gbɔmɔ fɔŋ yeɔ ehe yɛ amanehulu gbi nɔ,Ni ahereɔ lɛ yɛ mlifu gbi nɔ?
31 Namɔ baakã ehiɛ yɛ egbɛ lɛ hewɔ,Ni namɔ baato lɛ najiaŋ yɛ nɔ ni efee lɛ he?
32 Kɛji awó lɛ kɛtee gɔɔ mli lɛ,Abaashi kpe kɛbu efuuhe lɛ he.
33 Jɔɔ* mli sũ kukulii lɛ baaŋɔɔ enaa,+Ni gbɔmɛi adesai fɛɛ baanyiɛ esɛɛ*+Tamɔ mɛi babaoo ni anyɛŋ akane ni etsɔ ehiɛ lɛ.
34 No hewɔ lɛ, mɛni hewɔ nyɛwieɔ wiemɔi ni he bɛ sɛɛnamɔ akɛ nyɛkɛmiishɛje mimii lɛ?+
Nyɛhetoi lɛ, amale sɔŋŋ kɛkɛ ni!”
Shishigbɛ Niŋmaa
^ Hebri sht. ŋm., “ani kulɛ mimumɔ baanyɛ ato etsui shi?”
^ Loo “hewalɛ.”
^ Loo “bɛlɛ.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Loo “yɛ hiŋmɛitswaa mli,” ni tsɔɔ akɛ, amɛgboiɔ oya ní amɛpiŋŋ dã.
^ Loo “aŋaawoo; aŋaatsɔɔ.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “Kɛ tutuu.”
^ Loo “Kɛ́ aja enyɔji lɛ afalɛ lɛ mli enyɔ lɛ he.”
^ Loo “atsɔɔ Nyɔŋmɔ nɔ ko.”
^ Hebri sht. ŋm., “ewuiaŋ fɔ lɛ efee tsɔtsɔɔtsɔ.”
^ Loo “esusuma ehao waa.”
^ Hebri sht. ŋm., “mulu.”
^ Shishitsɔɔmɔi komɛi kɛɔ akɛ, “nyɛfee mi yiwalɛ nii.”
^ Hebri sht. ŋm., “nyɛpɛiii amɛkadii lɛ amli.”
^ Loo “Nujɔɔ.” Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “Ni ebaagbala gbɔmɛi adesai fɛɛ kɛnyiɛ esɛɛ.”
