Hiob 15:1-35

  • Elifaz wiemɔ ni ji enyɔ (1-35)

    • Ekɛɛ Hiob sheee Nyɔŋmɔ gbeyei (4)

    • Ekɛɛ Hiob yeɔ etsuinaa sane (7-9)

    • ‘Nyɔŋmɔ heee emɛi krɔŋkrɔŋi lɛ eyeee’ (15)

    • ‘Mɔ fɔŋ piŋɔ’ (20-24)

15  Elifaz,+ Temannyo lɛ, jie naa akɛ:   “Ani hiɛshikalɔ kɛ wiemɔi foji* baahã sane hetoo,Aloo ekɛ bokã kɔɔyɔɔ baawo emusu obɔ?   Wiemɔi kɛkɛ ní akɛjajeɔ mɔ lɛ, sɛɛnamɔ ko bɛ he,Ni wiemɔ folo hu, anáaa he sɛɛ ko.   Ejaakɛ onaaa Nyɔŋmɔ gbeyeishemɔ akɛ nɔ ko,Ni susumɔi fɛɛ ni kɔɔ Nyɔŋmɔ he lɛ, obaa lɛ shi.   Ejaakɛ otɔmɔ lɛ tsɔɔ bo nɔ ni owie,*Ni ohalaa ŋaatsɔɔ wiemɔi.   Bo diɛŋtsɛ onaabu buɔ bo fɔ, shi jeee mi;Bo diɛŋtsɛ onaabu yeɔ odase eshiɔ bo.+   Ani bo ji klɛŋklɛŋ gbɔmɔ ni afɔ,Aloo afɔ bo dani afɔ gɔji lɛ?   Ani onuɔ teemɔŋ sane ni Nyɔŋmɔ wieɔ lɛ,Aloo bo pɛ oyɔɔ hiɛshikamɔ?   Mɛni ole, ni wɔ lɛ, wɔleee?+ Mɛni shishi onuɔ, ni wɔ lɛ, wɔnuuu shishi? 10  Wajiatsɛmɛi kɛ hiimeji fɛɛ yɛ wɔteŋ,+Hii ni ye otsɛ onukpa kwraa. 11  Ani Nyɔŋmɔ miishɛjemɔi lɛ faaa hãaa bo,Aloo wiemɔi ni akɛ bo wieɔ blɛoo lɛ faaa hãaa bo? 12  Mɛni hewɔ ohãa otsui kudɔɔ bo,Ni ohiŋmɛii etsu kɛ mlifu nɛkɛ? 13  Ejaakɛ Nyɔŋmɔ diɛŋtsɛ omli efu lɛ,*Ni ohãa wiemɔi ni tamɔ nɛkɛ jeɔ onaa nɛɛ. 14  Mɛni ji gbɔmɔ adesa* ní ehe aaatse,Aloo mɔ ni yoo fɔ lɛ, ní eeefee mɔ ni ja?+ 15  Naa! Emɛi krɔŋkrɔŋi lɛ, eheee amɛ eyeee,Ni ŋwɛi po he tseee yɛ ehiɛ.+ 16  Belɛ, gbɔmɔ ni he yɔɔ nyaŋemɔ ni efite,Mɔ ni nuɔ nɔ ni ejaaa tamɔ anuɔ nu lɛ, lɛ lɛ enaŋ lɛ mɔ ko kwraa!+ 17  Bo mi toi, ni makɛɛ bo! Magba nɔ ni mina, 18  Nibii ni hiɛshikalɔi nu kɛjɛ amɛtsɛmɛi anaa ni amɛgba,+Nibii ni amɛkɛteee lɛ. 19  Amɛ pɛ akɛ shikpɔŋ lɛ hã,Ni gbɔ ko gbɔ ko ebatsɔɔɔ amɛteŋ kɛhooo. 20  Mɔ fɔŋ piŋɔ egbii fɛɛ,Yɛ afii fɛɛ ni ajie ato ahã yiwalɔ lɛ amli. 21  Enuɔ gbɛɛmɔi ni yɔɔ gbeyei yɛ etoiiaŋ;+Toiŋjɔlɛ be mli lɛ, ojotswalɔi akuu batutuaa lɛ. 22  Eheee eyeee akɛ ebaaje duŋ mli;+Ajie lɛ ato ahã klante. 23  Ekpaa shi kɛtaoɔ niyenii* ni ebiɔ akɛ: “Nɛgbɛ niyenii lɛ yɔɔ?” Ele jogbaŋŋ akɛ, duŋ gbi lɛ ebɛŋkɛ. 24  Haomɔ kɛ hejaramɔ yaa nɔ amɛwoɔ ehe gbeyei;Amɛyeɔ enɔ kunim tamɔ maŋtsɛ ko ni efee klalo koni efã ta feɔ lɛ. 25  Ejaakɛ ewóɔ enine nɔ eshiɔ Nyɔŋmɔ,Ni ekaa akɛ ebaatse Ofe lɛ hiɛ atua;* 26  Ekɛ kuɛŋtimɔ tsɛ̃ɔ kɛyaa enɔ,Kɛ etsɛŋ ni ti, ní yɔɔ hewalɛ lɛ;* 27  Fɔ eha ehiɛ,Ni ehɛ eda agbo kɛ fɔ; 28  Ehiɔ maji ni abaakpãtã hiɛ amli,Shĩai ni mɔ ko mɔ ko ehiŋ mli,Ní baatsɔmɔ tɛi ni bua shi kuikui. 29  Etsɔŋ niiatsɛ, ni nii ni ená lɛ faŋ babaoo,Ni nii ni eyɔɔ lɛ shwereŋ yɛ shikpɔŋ lɛ nɔ hu. 30  Ejeŋ duŋ mli;Lalilɛi baahã enine ni etsɛ̃* lɛ aŋala,Ni kɛ́ Nyɔŋmɔ fili* edaaŋ kɔɔyɔɔ nɔŋŋ lɛ, ebaaho eya.+ 31  Ekadu gbɛ ní ekɛ ehiɛ yafɔ̃ nii ni he bɛ sɛɛnamɔ nɔ,Ejaakɛ nɔ ni ebaaná yɛ mli lɛ hu baafee nɔ ko ni he bɛ sɛɛnamɔ; 32  Ebaaba enɔ dani egbi lɛ baashɛ,Ni eniji lɛ efeŋ frɔ̃frɔ̃ kɔkɔɔkɔ.+ 33  Ebaatsɔ tamɔ wain tso ni kpalaa eyibii ŋmilikitii eshwieɔ shi,Tamɔ oliv tso ni kpalaa efɔfɔii eshwieɔ shi. 34  Ejaakɛ mɛi ni ebuuu Nyɔŋmɔ* lɛ akuu lɛ woŋ yibii,+Ni la baakpãtã nyɔɔŋnihemɔ mama tsũi lɛ ahiɛ. 35  Amɛŋɔɔ haomɔ hɔ, ni amɛfɔɔ nɔ fɔŋ,Ni mɔlakamɔ eyi amɛmusuŋ obɔ.”

Shishigbɛ Niŋmaa

Loo “kɛ kɔɔyɔɔ nilee.”
Loo “otɔmɔ lɛ tsɔseɔ onaabu.”
Hebri sht. ŋm., “Ejaakɛ Nyɔŋmɔ diɛŋtsɛ otsɔɔ omumɔ owoɔ lɛ.”
Loo “gbɔmɔ ni gboɔ.”
Hebri sht. ŋm., “blodo.”
Loo “ekaa akɛ ebaafee ehe mɔ ni nɔ kwɔ fe Ofe lɛ.”
Hebri sht. ŋm., “etsɛŋi anɔ nii ní titii lɛ.”
Enine ni etsɛ̃ lɛ damɔ shi kɛhã hiɛnɔkamɔ fɛɛ ni eyɔɔ akɛ nibii baahi ekoŋŋ lɛ.
Hebri sht. ŋm., “kɛ́ efili.”
Loo “mɛi ni ekwa Nyɔŋmɔ.”