Hiob 10:1-22
10 “Minyaŋeɔ* miwala.+
Mafã minaa mawie mihaomɔi lɛ ahe.
Magbele minaa mawie yɛ haomɔ ni mihao waa* lɛ mli!
2 Makɛɛ Nyɔŋmɔ akɛ: ‘Kaabu mi fɔ.
Tsɔɔmɔ mi nɔ hewɔ ni okɛ mi tswaa lɛ.
3 Ani onáa he sɛɛ ko kɛji owa mi yi,Kɛji ogbe oninenaa nitsumɔ lɛ he guɔ+Ni oná mɛi fɔji aŋaawoo moŋ he miishɛɛ?
4 Ani heloo hiŋmɛii ohiɛ,Aloo onaa nii tamɔ gbɔmɔ adesa* naa nii lɛ?
5 Ani ogbii lɛ tamɔ gbɔmɛi adesai* agbii,Aloo ofii lɛ tamɔ gbɔmɔ nɔ,+
6 Hewɔ ni otaoɔ mitɔmɔ lɛ,Ni oyaa nɔ otaoɔ mihe esha lɛ?+
7 Ole faŋŋ akɛ miyeee fɔ;+Ni mɔ ko mɔ ko bɛ ni baanyɛ ajie mi yɛ odɛŋ.+
8 Bo diɛŋtsɛ oniji shɔ̃ mi ni amɛfee mi,+Shi amrɔ nɛɛ, ooba obakpãtã mihiɛ kwraa.
9 Ofainɛ, kaimɔ akɛ, sũ okɛfee mi,+Shi amrɔ nɛɛ, obaahã maku misɛɛ kɛya sũ* mli.+
10 Ani jeee tsɔ otsɔ mi tamɔ atsɔɔ mliki*Ni ohã mifĩ tamɔ tsiisi?*
11 Okɛ hewolo kɛ loo ha mihe,Ni okɛ wui kɛ fãji lo mi kɛtsara.+
12 Ohã mi wala ni ojie suɔmɔ ni tsakeee kpo otsɔɔ mi;Okɛ okwɛmɔ lɛ buɔ mimumɔ* he.+
13 Shi oto oyiŋ ní mileee, akɛ obaafee nibii nɛɛ.*
Mile akɛ nibii nɛɛ jɛ oŋɔɔ.
14 Kɛji mifee esha lɛ, no lɛ ona mi,+Ni obuŋ mi bem yɛ mitɔmɔ lɛ he.
15 Kɛji miyeɔ fɔ lɛ, kpoo hã mi!
Ni kɛji miyeɔ bem po lɛ, minyɛŋ miyitso nɔ mawó,+Ejaakɛ miyi obɔ kɛ hiɛgbele kɛ amanehulu.+
16 Kɛji miwó miyitso nɔ lɛ, ogbɔbiɔ mi tamɔ jata+Ni osaa ojieɔ ohewalɛ lɛ kpo oshiɔ mi.
17 Okɛ odasefoi hei ni baawie ashi mi baaNi ohãa omlifu lɛ naa waa yɛ minɔ,Ni shihilɛi ni mli wawai ní eko nyiɛ eko sɛɛ baa minɔ.
18 Mɛɛba ojie mi kɛjɛ musu mli kɛba mɔ?+
Kulɛ esa akɛ magbo dani hiŋmɛi ko ana mi.
19 Kulɛ ebaafee tamɔ nɔ ni mihiko shi pɛŋ;Kulɛ be ni mijɛ musu mli nɔŋŋ lɛ, akɛ mi baaya gbonyobu lɛ mli tɛ̃ɛ.’
20 Ani migbii lɛ, jeee fioo ni?+ Hã eŋmɛɛ mihe;Hã ejie ehiŋmɛii yɛ minɔ, koni mihe ajɔ mi fioo*+
21 Dani mashi—ni mikuŋ misɛɛ dɔŋŋ+—Kɛya duŋ kpii shikpɔŋ* lɛ nɔ,+
22 Kɛya duŋ kabitii shikpɔŋ lɛ nɔ,Duŋ kpii shikpɔŋ ní basabasafeemɔ yɔɔ nɔ lɛ,He ni la po tamɔ duŋ kpii lɛ.”
Shishigbɛ Niŋmaa
^ Loo “Misusuma nyaŋeɔ.”
^ Loo “yɛ misusuma ni ehao waa.”
^ Loo “gbɔmɔ ni gboɔ.”
^ Loo “gbɔmɛi ni gboiɔ.”
^ Hebri sht. ŋm., “mulu.”
^ Loo “keesu.”
^ Loo “fufɔ.”
^ Loo “mumɔ ni mimuɔ; miwala.”
^ Hebri sht. ŋm., “Ni okɛ nibii nɛɛ etee yɛ otsui mli.”
^ Loo “koni maná miishɛɛ fioo.”
^ Loo “duŋ kɛ gbele hɔɔŋ shikpɔŋ.”
