Habakuk 1:1-17

  • Gbalɔ lɛ bolɔ kɛhã yelikɛbuamɔ (1-4)

    • “Ao, Yehowa, mɛɛ beyinɔ nɔŋŋ?” (2)

    • “Mɛni hewɔ oŋmɛɔ gbɛ ni yiwaa yaa nɔ?” (3)

  • Kaldeabii lɛ ji dɛŋdade ni Nyɔŋmɔ kɛbaatsu kojomɔ he nii (5-11)

  • Gbalɔ lɛ kpa Yehowa fai (12-17)

    • ‘Mi-Nyɔŋmɔ, ogbooo’ (12)

    • ‘Oyɛ krɔŋŋ tsɔ, bɔ ni oookwɛ nɔ fɔŋ’ (13)

1  Sane ni gbalɔ Habakuk* nine shɛ nɔ yɛ ninaa mli nɛ:   Ao, Yehowa, mɛɛ beyinɔ nɔŋŋ mabolɔ kɛhã yelikɛbuamɔ kɛyashi, ni oboŋ mi toi?+ Mɛɛ beyinɔ nɔŋŋ mabi ni ojie mi kɛje yiwalɛ mli kɛyashi, ni otsuŋ he nii?*+   Mɛni hewɔ ohãa minaa nɔfɔŋfeemɔ? Ni mɛni hewɔ oŋmɛɔ gbɛ ni yiwaa yaa nɔ? Mɛni hewɔ hiɛkpatamɔ kɛ yiwalɛ yɔɔ mihiɛ? Ni mɛni hewɔ béi kɛ naataamɔ efa nɛkɛ?   No hewɔ lɛ, mla tsuuu nii,Ni ayeee jalɛ sane kwrakwra. Ejaakɛ mɛi fɔji bɔleɔ jalɔi kɛkpeɔ;No hewɔ ni ayeee jalɛ sane lɛ.+   “Nyɛkwɛa jeŋmaji lɛ ateŋ, ní nyɛboa toi jogbaŋŋ! Nyɛkwɛa, ní nyɛnaa akpɛa nyɛhe, ní nyɛhe hu ajɔ̃a nyɛhe;Ejaakɛ nɔ ko baaba yɛ nyɛgbii lɛ amliNi kɛji agba nyɛ tete po lɛ, nyɛheŋ nyɛyeŋ.+   Ejaakɛ naa, miitee Kaldeabii lɛ ashi,+Jeŋmaŋ ní yitsoŋ wa ní feɔ enii kplakpla. Amɛfãa kɛyakpaa shikpɔji ni lɛɛlɛi anɔNi amɛshɔ̃ɔ shĩai ni jeee amɛnɔ.+   Amɛhe yɛ gbeyei, ni amɛhãa ŋmiŋmi mɔɔ mɔ. Amɛwoɔ amɛ diɛŋtsɛ amɛmla yɛ jalɛ sane kɛ nɔyeli* he.+   Amɛkpɔŋɔi lɛ ahe yɛ oya fe kootsɛi,Ni amɛhiɛ yɛ kramakrama fe gbɛkɛ ŋa mli gbei.+ Amɛtayaa okpɔŋɔi lɛ joɔ foi;Amɛkpɔŋɔi lɛ jɛɔ shɔŋŋ kɛbaa. Amɛkpelekeɔ shi oya tamɔ okropɔŋ ni miiye oyai eyaye nɔ ko.+   Amɛ fɛɛ amɛbaa yɛ yiwalɛ hewɔ.+ Kɛji abua amɛhiɛi anaa lɛ, etamɔ bokã kɔɔyɔɔ,+Ni amɛloɔ nomii tamɔ shia. 10  Amɛyeɔ maŋtsɛmɛi ahe fɛoNi amɛŋmɔɔ lumɛi.+ Amɛŋmɔɔ he fɛɛ he ni atswa gbogbo awo he;+Amɛbuaa sũ naa tamɔ gɔŋ, ni amɛkɛŋɔɔ he nɛɛ. 11  Ni amɛfãa kɛyaa tamɔ kɔɔyɔɔ, ni amɛyatsɔɔ mli kɛhoɔ,Shi amɛbaaye fɔ,+Ejaakɛ amɛkɛ amɛhewalɛ lɛ he yijiemɔ hãa amɛnyɔŋmɔ* lɛ.”+ 12  Ao, Yehowa, ani obɛ kɛjɛ naanɔ?+ Ao, mi-Nyɔŋmɔ, mi-Mɔ Krɔŋkrɔŋ, ogbooo.*+ Ao, Yehowa, ohala amɛ koni amɛkojo;Mi-Tɛsaa,+ oto amɛ kɛhã toigbalamɔ.*+ 13  Ohiŋmɛii yɛ krɔŋŋ tsɔ, bɔ ni okɛaakwɛ nɔ fɔŋ,Ni onyɛŋ okwɛ ni efɔŋfeemɔ aya nɔ.+ Belɛ, mɛni hewɔ ni oŋmɛɔ mɛi ni yeee anɔkwa lɛ gbɛ,+Ni ofeɔ diŋŋ kɛji mɔ fɔŋ mi mɔ ko ni ja fe lɛ lɛ?+ 14  Mɛni hewɔ ohãa gbɔmɛi tsɔɔ tamɔ ŋshɔŋ loi,Tamɔ nibii ni wamɔɔ ní bɛ nɔyelɔ lɛ? 15  Ekɛ* kpoŋ shaa enɛɛmɛi fɛɛ. Eduɔ amɛ yɛ eyaa* mli,Ni ebuaa amɛnaa yɛ ewuoyaa yaa mli. No hewɔ ni emli filiɔ lɛ waa lɛ.+ 16  No hewɔ ni eshãa afɔlei ehãa eyaa* lɛ,Ni eshãa afɔlei* ehãa ewuoyaa yaa lɛ;Ejaakɛ nomɛi hãa egbɛfaŋnɔ lɛ feɔ pɔtsii,*Ni eniyenii feɔ niyenii kpakpa. 17  Ani no hewɔ lɛ ebaakã he ejie eyaa* lɛ mli nii?* Ani ebaaya nɔ egbegbee jeŋmaji lɛ ní emusuŋ etsɔɔɔ lɛ?+

Shishigbɛ Niŋmaa

Eeenyɛ efee akɛ, eshishi ji, “Fuamɔ Ni Yɔɔ Kpɛŋŋ.”
Loo “ni ohereŋ miyiwala.”
Loo “hiɛnyam.”
Shishitsɔɔmɔi komɛi kɛɔ akɛ, “amɛhewalɛ lɛ ji amɛnyɔŋmɔ.”
Shishitsɔɔmɔi komɛi kɛɔ akɛ, “wɔgboiŋ.”
Loo “oto amɛ kɛhã mɔjajemɔ.”
Ni ji, henyɛlɔi ni ji Kaldeabii lɛ.
Loo “etsãani; edrã.”
Loo “etsãani; edrã.”
Loo “eshãa lasu afɔlei.”
Hebri sht. ŋm., “egbɛfaŋnɔ lɛ woɔ fɔ.”
Loo “etsãani; edrã.”
Shishitsɔɔmɔi komɛi kɛɔ akɛ, “ebaakã he egbala eklante?”