Wolo Ni Akɛmaje Galatiabii Lɛ 4:1-31

  • Jeee nyɔji dɔŋŋ, shi moŋ bii (1-7)

  • Paulo susu Galatiabii lɛ ahe (8-20)

  • Hagar kɛ Sara: kpaŋmɔi enyɔ (21-31)

    • Yerusalem ni yɔɔ ŋwɛi lɛ, wɔnyɛ lɛ, jeee nyɔŋ ni (26)

4  Agbɛnɛ, miikɛɛ akɛ, gbii abɔ ni niyelɔ lɛ ji gbekɛ bibioo lɛ, eyɛ mli akɛ lɛ ji nibii fɛɛ nuŋtsɔ moŋ, shi srɔto ko bɛ ekɛ nyɔŋ ni yɔɔ shĩa lɛ teŋ,  shi eyɛ nɔkwɛlɔi kɛ shĩa nɔkwɛlɔi ashishi, kɛyashi gbi ni epapa eto lɛ.  Nakai nɔŋŋ hu be ni wɔji gbekɛbii lɛ, wɔ hu bɔ ni je lɛ susuɔ nii ahe ehãa lɛ ye wɔ nyɔŋ.+  Shi be ni be ni ato lɛ ba naagbee lɛ, Nyɔŋmɔ tsu e-Bi lɛ, mɔ ni yoo fɔ+ lɛ ni ebahi mla shishi lɛ,+  koni ehé mɛi ni yɔɔ mla shishi lɛ ni ekpɔ̃ amɛ,+ bɔ ni afee ni aŋɔ wɔ akɛ bii.+  Agbɛnɛ, akɛni bii ji nyɛ hewɔ lɛ, Nyɔŋmɔ etsu e-Bi lɛ mumɔ+ lɛ kɛba wɔtsuii amli,+ ni no boɔ akɛ: “Aba,* Ataa!”+  No hewɔ lɛ, jeee nyɔŋ ji bo dɔŋŋ, shi moŋ bi ji bo; ni kɛ́ bi ji bo lɛ, belɛ Nyɔŋmɔ efee bo niyelɔ hu.+  Shi be ni nyɛleee Nyɔŋmɔ lɛ, no mli lɛ mɛi ni jeee nyɔŋmɔi diɛŋtsɛ lɛ ye nyɛ nyɔŋ.  Shi amrɔ nɛɛ ni nyɛbale Nyɔŋmɔ, aloo kɛ́ wɔɔkɛɛ lɛ, Nyɔŋmɔ ebale nyɛ nɛɛ, te tɛŋŋ ni nyɛkuɔ nyɛsɛɛ kɛyaa susumɔi ni nyɛɛɛ nɔ ko atsu+ ni sɛɛnamɔ bɛ he lɛ ahe, ni nyɛmiitao ni amɛye nyɛ nyɔŋ lɛ?+ 10  Nyɛyeɔ gbii kɛ nyɔji+ kɛ bei ni ato kɛ afii fitsofitso. 11  Miishe gbeyei miihã nyɛ, akɛ yɛ gbɛ ko nɔ lɛ, deŋme ni migbo yɛ nyɛhe lɛ baafee efolo. 12  Nyɛmimɛi, miikpa nyɛ fai, nyɛtsɔa tamɔ mi, ejaakɛ be ko ni eho lɛ, mi hu mitamɔ nyɛ.+ Nyɛfeko mi efɔŋ ko. 13  Shi nyɛle akɛ heloo mli hela ko ji nɔ ni hã miná hegbɛ kɛjaje sane kpakpa lɛ mitsɔɔ nyɛ klɛŋklɛŋ lɛ. 14  Ni eyɛ mli akɛ miheloo mli hela lɛ bafee shihilɛ ni mli wa kɛhã nyɛ moŋ, shi nyɛnyaŋeee mi, ni mihe efeee nyɛ taŋ hu;* shi moŋ nyɛhere mi tamɔ Nyɔŋmɔ bɔfo, tamɔ Kristo Yesu. 15  Nɛgbɛ miishɛɛ ni no mli lɛ nyɛyɔɔ lɛ yɔɔ? Ejaakɛ miyeɔ nyɛhe odase akɛ, eji no mli lɛ ehiɔ feemɔ kulɛ, nyɛbaafamɔ nyɛhiŋmɛii po ni nyɛkɛhã mi.+ 16  No hewɔ lɛ, ani mitsɔ nyɛhenyɛlɔ akɛni mikɛɔ nyɛ anɔkwale lɛ hewɔ? 17  Jeee yiŋtoo kpakpa ko hewɔ amɛkɛ hiɛdɔɔ taoɔ akɛ amɛgbala nyɛ kɛba amɛgbɛfaŋ lɛ; amɛmiitao ni nyɛkpa yɛ misɛɛ, koni nyɛná he miishɛɛ akɛ nyɛbaanyiɛ amɛsɛɛ. 18  Shi be fɛɛ be lɛ, ehi akɛ mɔ ko kɛ hiɛdɔɔ atao nyɛsɛɛ gbɛ yɛ yiŋtoo kpakpa ko hewɔ, ni jeee be ni miyɔɔ nyɛŋɔɔ lɛ kɛkɛ, 19  mibii bibii,+ nyɛhewɔ lɛ, miikɔ̃mɔ ekoŋŋ kɛyashi abaashɔ̃ Kristo* yɛ nyɛmli. 20  Miná ni kulɛ miyɛ nyɛŋɔɔ amrɔ nɛɛ nɔŋŋ, ni mikɛ nyɛ awie yɛ gbɛ kroko nɔ, ejaakɛ mihiɛ efee mi yaa yɛ nyɛhewɔ. 21  Nyɛkɛa mi, nyɛ mɛi ni nyɛmiitao nyɛhi mla shishi, Ani nyɛnuuu Mla lɛ? 22  Akɛ nɔkwɛmɔnɔ lɛ, aŋma akɛ Abraham ná bihii enyɔ, mɔ kome lɛ, ekɛ nyɔŋ yoo lɛ fɔ lɛ,+ ni mɔ kome hu, ekɛ yoo ni jeee nyɔŋ ni lɛ fɔ lɛ;+ 23  shi mɔ ni ekɛ nyɔŋ yoo lɛ fɔ lɛ lɛ, afɔ lɛ tamɔ bɔ ni afɔɔ mɔ fɛɛ mɔ lɛ,*+ ni mɔ ni ekɛ yoo ni jeee nyɔŋ ni lɛ fɔ lɛ lɛ, afɔ lɛ yɛ shiwoo naa.+ 24  Abaanyɛ aŋɔ nibii nɛɛ akɛ okadifeemɔŋ nifeemɔ ko; ejaakɛ yei nɛɛ damɔ shi kɛhã kpaŋmɔi enyɔ, ekome jɛ Sinai Gɔŋ lɛ nɔ,+ ni efɔɔ bii ewoɔ nyɔŋyeli mli, ni no ji Hagar. 25  Agbɛnɛ, Hagar damɔ shi kɛhã Sinai,+ gɔŋ ko ni yɔɔ Arabia lɛ, ni efeɔ Yerusalem ni yɔɔ ŋmɛnɛ lɛ he mfoniri, ejaakɛ Yerusalem kɛ ebii lɛ yɛ nyɔŋyeli mli. 26  Shi Yerusalem ni yɔɔ ŋwɛi lɛ, jeee nyɔŋ ni, ni lɛ ji wɔnyɛ lɛ. 27  Ejaakɛ aŋma akɛ: “Bo yoo kene ni ofɔɔɔ, omii ashɛ ohe; bo yoo ni kɔ̃ɔmɔi etaaa ohe, bolɔmɔ kɛ miishɛɛ babaoo; ejaakɛ yoo ni akpoo lɛ lɛ bii lɛ fa fe yoo ni yɔɔ wu lɛ bii lɛ.”+ 28  Agbɛnɛ, nyɛmimɛi, nyɛ lɛ, shiwoo lɛ bii ji nyɛ tamɔ Isak nɔŋŋ.+ 29  Shi bɔ ni no be lɛ mli lɛ, mɔ ni afɔ lɛ tamɔ bɔ ni afɔɔ mɔ fɛɛ mɔ* lɛ bɔi mɔ ni atsɔ mumɔ nɔ afɔ lɛ lɛ yiwaa lɛ,+ nakai nɔŋŋ hu eji amrɔ nɛɛ.+ 30  Shi mɛni ŋmalɛ lɛ kɛɔ? “Shwiemɔ nyɔŋ yoo lɛ kɛ ebinuu lɛ, ejaakɛ nyɔŋ yoo lɛ binuu lɛ fataŋ yoo ni jeee nyɔŋ ni lɛ binuu lɛ he kɛyeŋ gboshinii lɛ kɔkɔɔkɔ.”+ 31  No hewɔ lɛ, nyɛmimɛi, jeee nyɔŋ yoo lɛ bii ji wɔ, shi moŋ yoo ni jeee nyɔŋ ni lɛ bii ji wɔ.

Shishigbɛ Niŋmaa

Hebri loo Aramaik wiemɔ ni shishi ji “Mitsɛ!”
Loo “nyɛfɛ̃ɛɛ lajɔ̃ nyɛshwieee yɛ mihewɔ.”
Loo “kɛyashi abaashɔ̃ Kristo su lɛ.”
Greek sht. ŋm., “afɔ lɛ yɛ heloo lɛ naa.”
Greek sht. ŋm., “afɔ lɛ yɛ heloo lɛ naa.”