Ezra 8:1-36

  • Mɛi ni kɛ Ezra ku sɛɛ kɛba (1-14)

  • Henaabuamɔ kɛhã gbɛfãa lɛ (15-30)

  • Be ni amɛshi Babilon kɛ be ni amɛyashɛ Yerusalem (31-36)

8  Agbɛnɛ naa mɛi ni fata mihe kɛkwɔ kɛjɛ Babilon kɛba yɛ Maŋtsɛ Artashasta nɔyeli beiaŋ lɛ atsɛmɛi ashĩai onukpai lɛ kɛ amɛwekutɔkpaa:+  yɛ Finehas+ bii lɛ ateŋ lɛ, Gershom; yɛ Itamar+ bii lɛ ateŋ lɛ, Daniel; yɛ David bii lɛ ateŋ lɛ, Hatush;  yɛ Shekania bii lɛ ateŋ, kɛ Parosh bii lɛ ateŋ lɛ, Zakaria, ni abua hii 150 naa afata ehe;  yɛ Pahat-moab bii+ lɛ ateŋ lɛ, Zerahia binuu Elieho-enai, ni hii 200 fata ehe;  yɛ Zatu bii+ lɛ ateŋ lɛ, Yahaziel binuu Shekania, ni hii 300 fata ehe;  yɛ Adin bii+ lɛ ateŋ lɛ, Yonatan binuu Ebed, ni hii 50 fata ehe;  yɛ Elam bii+ lɛ ateŋ lɛ, Atalia binuu Yeshaia, ni hii 70 fata ehe;  yɛ Shefatia bii+ lɛ ateŋ lɛ, Mikael binuu Zebadia, ni hii 80 fata ehe;  yɛ Yoab bii lɛ ateŋ lɛ, Yehiel binuu Obadia, ni hii 218 fata ehe; 10  yɛ Bani bii lɛ ateŋ lɛ, Yosifia binuu Shelomit, ni hii 160 fata ehe; 11  yɛ Bebai bii+ lɛ ateŋ lɛ, Bebai binuu Zakaria, ni hii 28 fata ehe; 12  yɛ Azgad bii+ lɛ ateŋ lɛ, Hakatan binuu Yohanan, ni hii 110 fata ehe; 13  Adonikam bii+ lɛ ni ji naagbeebii lɛ agbɛ́ii nɛ: Elifelet, kɛ Yeiel, kɛ Shemaia, ni hii 60 fata amɛhe; 14  ni yɛ Bigvai bii+ lɛ ateŋ lɛ, Utai kɛ Zabud, ni hii 70 fata amɛhe. 15  Mibua amɛnaa yɛ faa ni hoɔ kɛbaa Ahava lɛ naa,+ ni wɔhi* jɛmɛ gbii etɛ. Shi be ni mikwɛ maŋbii lɛ kɛ osɔfoi lɛ ateŋ lɛ, minaaa Levinyo ko yɛ jɛmɛ. 16  No hewɔ lɛ, mitsu ayatsɛ Eliezer, kɛ Ariel, kɛ Shemaia, kɛ Elnatan, kɛ Yarib, kɛ Elnatan, kɛ Natan, kɛ Zakaria, kɛ Meshulam, ni ji hiɛnyiɛlɔi lɛ, kɛ agbɛnɛ hu, Yoiarib, kɛ Elnatan, ni ji tsɔɔlɔi lɛ kɛba. 17  Kɛkɛ ni mitsu amɛ Ido, mɔ ni ji hiɛnyiɛlɔ yɛ he ko ni atsɛɔ jɛmɛ Kasifia lɛ ŋɔɔ. Mikɛɛ amɛ ni amɛkɛɛ Ido kɛ enyɛmimɛi lɛ, ni ji sɔlemɔ shĩa sɔɔlɔi* ni yɔɔ Kasifia lɛ, koni amɛhã wɔ sɔɔlɔi ni amɛbasɔmɔ yɛ wɔ-Nyɔŋmɔ lɛ shĩa lɛ. 18  Akɛni wɔ-Nyɔŋmɔ lɛ nine ni hi lɛ yɛ wɔnɔ hewɔ lɛ, amɛkɛ nuu hiɛshikalɔ ko ni atsɛɔ lɛ Sherebia,+ kɛ ebii lɛ kɛ enyɛmimɛi hii lɛ, hii 18 ba; Sherebia jɛ Mali+ bii lɛ ateŋ, ni Mali nɛɛ ji Israel binuu Levi nabi; 19  ni amɛkɛ Hashabia hu ba, ni Yeshaia ni jɛ Meraribii+ lɛ ateŋ lɛ, kɛ enyɛmimɛi hii kɛ ebii lɛ fata ehe, hii 20. 20  Ni yɛ sɔlemɔ shĩa sɔɔlɔi* ni David kɛ lumɛi lɛ kɛ amɛ hã koni amɛsɔmɔ Levibii lɛ ateŋ lɛ, atsɛ mɛi 220.* 21  Kɛkɛ ni mishiɛ ni ahi ŋmaa yɛ jɛmɛ yɛ Ahava faa lɛ naa, koni wɔba wɔhe shi yɛ wɔ-Nyɔŋmɔ lɛ hiɛ, ni wɔtao ŋaawoo kɛjɛ edɛŋ yɛ wɔgbɛfaa lɛ hewɔ, kɛ agbɛnɛ hu, yɛ wɔ kɛ wɔbii lɛ kɛ wɔjatsui lɛ fɛɛ ahewɔ. 22  No mli lɛ, eefee mi hiɛgbele akɛ mabi maŋtsɛ lɛ ni ehã wɔ asraafoi kɛ okpɔŋɔnɔtaralɔi koni amɛbu wɔhe kɛje henyɛlɔi ni yɔɔ gbɛ lɛ nɔ lɛ ahe, ejaakɛ no mli lɛ, wɔkɛɛ maŋtsɛ lɛ akɛ: “Wɔ-Nyɔŋmɔ lɛ nine ni hi lɛ yɛ mɛi fɛɛ ni taoɔ esɛɛ gbɛ lɛ anɔ,+ shi mɛi fɛɛ ni jeɔ esɛɛ lɛ, emlifu ni naa wa lɛ hiɔ amɛnɔ.”*+ 23  No hewɔ lɛ, wɔhi ŋmaa ni wɔkpa wɔ-Nyɔŋmɔ lɛ fai yɛ enɛ he, ni ebo fai ni wɔkɛ hiɛdɔɔ kpa lɛ toi.+ 24  Agbɛnɛ mihala osɔfoi lɛ ateŋ hiɛnyiɛlɔi lɛ 12, amɛji, Sherebia kɛ Hashabia,+ kɛ amɛnyɛmimɛi lɛ ateŋ mɛi nyɔŋma. 25  Kɛkɛ ni miŋmɛ jwiɛtɛi kɛ shika tsuru kɛ nibii ni maŋtsɛ lɛ kɛ eŋaawolɔi lɛ kɛ elumɛi lɛ, kɛ Israelbii fɛɛ ni yɔɔ jɛmɛ lɛ kɛke wɔ-Nyɔŋmɔ lɛ shĩa lɛ tsiimɔ lɛ miwo amɛdɛŋ.+ 26  Miŋmɛ jwiɛtɛi talɛntai* 650 miwo amɛdɛŋ, kɛ jwiɛtɛi nibii 100 ni tsiimɔ ji talɛntai 2, kɛ shika tsuru talɛntai 100, 27  kɛ tsɛnsii bibii 20 ni akɛ shika tsuru fee ni tsiimɔ ji darik* 1,000, kɛ nibii 2 ni jara wa tamɔ shika tsuru ni akɛ akɔɔble kpakpa ni kpɛlɛɔ kaŋkaŋ fee. 28  Kɛkɛ ni mikɛɛ amɛ akɛ: “Afee nyɛ krɔŋkrɔŋ ahã Yehowa,+ ni nibii lɛ hu yɛ krɔŋkrɔŋ, ni jwiɛtɛi kɛ shika tsuru lɛ ji nibii ni ajɛ suɔmɔ mli akɛke Yehowa, nyɛtsɛmɛi lɛ a-Nyɔŋmɔ lɛ. 29  Nyɛkwɛa nibii nɛɛ anɔ jogbaŋŋ kɛyashi nyɛbaaŋmɛ nibii nɛɛ atsiimɔ yɛ osɔfoi lɛ ateŋ hiɛnyiɛlɔi lɛ, kɛ Levibii lɛ, kɛ Israel tsɛmɛi ashĩai ni yɔɔ Yerusalem lɛ ateŋ lumɛi lɛ ahiɛ+ yɛ Yehowa shĩa lɛ tsũi* lɛ amli.” 30  Ni osɔfoi lɛ kɛ Levibii lɛ loo jwiɛtɛi lɛ kɛ shika tsuru lɛ kɛ nibii ni aŋmɛ awo amɛdɛŋ lɛ, koni amɛkɛba wɔ-Nyɔŋmɔ lɛ shĩa lɛ yɛ Yerusalem. 31  Kɛkɛ ni wɔfã yɛ Ahava faa lɛ naa+ yɛ klɛŋklɛŋ nyɔɔŋ lɛ nɔ gbi ni ji 12 lɛ nɔ+ koni wɔya Yerusalem, ni wɔ-Nyɔŋmɔ lɛ nine yɛ wɔnɔ, ni ebu wɔhe kɛje henyɛlɔ lɛ dɛŋ, kɛ agbɛnɛ hu, kɛje mɛi ni ewo ka yɛ gbɛ lɛ nɔ lɛ adɛŋ. 32  No hewɔ lɛ, wɔbashɛ Yerusalem,+ ni wɔhi jɛmɛ gbii etɛ. 33  Ni yɛ gbi ni ji ejwɛ lɛ nɔ lɛ, wɔŋmɛ jwiɛtɛi lɛ kɛ shika tsuru lɛ, kɛ nibii lɛ atsiimɔ lɛ yɛ wɔ-Nyɔŋmɔ lɛ shĩa lɛ,+ ni wɔkɛ fɛɛ wo Meremot,+ osɔfo Uria binuu lɛ dɛŋ, no mli lɛ Eleazar, Finehas binuu lɛ fata ehe; ni mɛi krokomɛi ni fata amɛhe hu ji Yozabad,+ Yeshua binuu lɛ, kɛ Noadia, Binui+ binuu lɛ, ni ji Levibii lɛ. 34  Akane nɔ fɛɛ nɔ, ni aŋmɛ amɛtsiimɔ akwɛ, ni aŋmala amɛtsiimɔ lɛ fɛɛ ashwie shi. 35  Mɛi ni aŋɔ amɛ nom ni amɛjɛ nomŋɔɔ mli amɛba lɛ kɛ nibii ba koni akɛshã shãa afɔlei ahã Israel Nyɔŋmɔ lɛ, amɛkɛ tsinahii+ 12 ba kɛhã Israel fɛɛ, ni amɛkɛ gwantɛŋhii+ 96, kɛ gwantɛŋhii bibii 77, kɛ abotiahii+ 12 ba akɛ esha afɔle; akɛ enɛɛmɛi fɛɛ shã shãa afɔle ahã Yehowa.+ 36  Kɛkɛ ni wɔkɛ famɔi ni maŋtsɛ lɛ kɛhã+ lɛ hã maŋtsɛ lɛ kpokpaa nɔkwɛlɔi* lɛ kɛ amralofoi ni kwɛɔ kpokpaa ni yɔɔ Faa Lɛ Sɛɛ*+ lɛ nɔ lɛ, ni amɛye amɛbua maŋbii lɛ kɛ anɔkwa Nyɔŋmɔ lɛ shĩa lɛ.+

Shishigbɛ Niŋmaa

Hebri sht. ŋm., “ni wɔbɔ nsara yɛ.”
Loo “Netinim.” Hebri sht. ŋm., “mɛi ni akɛhã.”
Loo “Netinim.” Hebri sht. ŋm., “mɛi ni akɛhã.”
Loo “atsĩ mɛi 220 agbɛ́ii atã.”
Hebri sht. ŋm., “ehewalɛ kɛ emlifu lɛ kãa amɛnɔ.”
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Darik ji Persia shika tsuru kapɛlɛ. Kwɛmɔ Saji Krokomɛi B14 lɛ.
Loo “niyelihei.”
Loo “satrapii.” Satrap ji gbɛnaa gbɛ́i ni akɛtsɛɔ mɛi ni kwɛɔ kpokpai ni yɔɔ Persia nɔyeli lɛ shishi lɛ anɔ lɛ.
Loo “Yufrate Faa Lɛ Sɛɛ.”