Ezra 5:1-17

  • Yudafoi lɛ tsa sɔlemɔ shĩa lɛ maa nɔ (1-5)

  • Tatenai ŋma wolo kɛyahã Maŋtsɛ Dario (6-17)

5  Kɛkɛ ni gbalɔ Hagai+ kɛ gbalɔ Zakaria,+ Ido+ nabi lɛ gba amɛhã Yudafoi ni yɔɔ Yuda kɛ Yerusalem lɛ, yɛ Israel Nyɔŋmɔ lɛ ni tsɔɔ amɛ gbɛ lɛ* gbɛ́i mli.  Nakai beiaŋ ni Zerubabel,+ Shealtiel binuu lɛ kɛ Yeshua,+ Yehozadak binuu lɛ bɔi Nyɔŋmɔ shĩa ni yɔɔ Yerusalem lɛ maa ekoŋŋ;+ no mli lɛ, Nyɔŋmɔ gbalɔi lɛ fata amɛhe ni amɛwo amɛ hewalɛ.+  Nakai be lɛ mli lɛ, Tatenai, ni ji amralo ni kwɛɔ kpokpaa ni yɔɔ Faa Lɛ Sɛɛ* lɛ nɔ lɛ, kɛ Shetar-bozenai kɛ amɛnanemɛi lɛ ba ni amɛbabi amɛ akɛ: “Namɔ wo nyɛ kitã akɛ nyɛma shĩa nɛɛ ni nyɛkala mplaŋi nɛɛ kɛyashi nyɛbaagbe naa?”  Kɛkɛ ni amɛbi amɛ akɛ: “Te atsɛɔ hii ni maa shĩa nɛɛ tɛŋŋ?”  Shi no mli lɛ, Nyɔŋmɔ miikwɛ Yudafoi lɛ ateŋ onukpai lɛ,*+ ni amɛhãaa amɛkpa nitsumɔ lɛ kɛyashi aŋma wolo amaje Dario, ni lɛ hu ekɛ wolo nɛɛ hetoo tsu kɛba.  Wolo lɛ ni Tatenai, amralo ni kwɛɔ kpokpaa ni yɔɔ Faa Lɛ Sɛɛ lɛ nɔ lɛ, kɛ Shetar-bozenai kɛ enanemɛi lɛ, kɛ amralofoi bibii ni yɔɔ kpokpaa ni yɔɔ Faa Lɛ Sɛɛ lɛ nɔ lɛ ŋma, ni amɛkɛtsu kɛyahã Maŋtsɛ Dario lɛ mli sane nɛ;  amɛtsu ni akɛ wolo lɛ ayahã lɛ, ni nɔ ni amɛŋma lɛ nɛ: “Kɛyahã Maŋtsɛ Dario: “Toiŋjɔlɛ sɔŋŋ ahã bo!  Maŋtsɛ aná ale akɛ, wɔtee Yuda kpokpaa lɛ nɔ, he ni Nyɔŋmɔ kpele lɛ shĩa lɛ yɔɔ lɛ, ni akɛ tɛi wuji miima shĩa lɛ, ni akɛ tsei hu miiwo egbogboi lɛ amli. Maŋbii lɛ kɛ hiɛdɔɔ miitsu nii lɛ, ni amɛmɔdɛŋbɔɔ lɛ hewɔ lɛ, nitsumɔ lɛ miiya nɔ jogbaŋŋ.  Kɛkɛ ni wɔbi amɛnukpai lɛ akɛ: ‘Namɔ wo nyɛ kitã akɛ nyɛma shĩa nɛɛ ni nyɛkala mplaŋi nɛɛ kɛyashi nyɛbaagbe naa?’+ 10  Wɔbi amɛgbɛ́ii hu bɔ ni afee ni wɔŋma hii ni nyiɛ hiɛ lɛ agbɛ́ii koni wɔhã ole. 11  “Nɔ ni amɛkɛɛ wɔ nɛ: ‘Wɔji ŋwɛi kɛ shikpɔŋ Nyɔŋmɔ lɛ tsuji, ni wɔmiima shĩa ni ama afii babaoo ni eho nɛ lɛ ekoŋŋ, shĩa ni Israel maŋtsɛ kpele ko ma ni egbe naa lɛ.+ 12  Shi akɛni wɔtsɛmɛi lɛ wo ŋwɛi Nyɔŋmɔ lɛ mlila hewɔ lɛ,+ ekɛ amɛ wo Babilon maŋtsɛ Nebukadnezar,+ Kaldeanyo lɛ dɛŋ, ni ekumɔ shĩa nɛɛ,+ ni eŋɔ maŋbii lɛ nom kɛtee Babilon.+ 13  Shi yɛ Babilon maŋtsɛ Koresh nɔyeli afi ni ji klɛŋklɛŋ lɛ nɔ lɛ, Maŋtsɛ Koresh wo kitã akɛ ayama Nyɔŋmɔ shĩa nɛɛ ekoŋŋ.+ 14  Agbɛnɛ hu, Nyɔŋmɔ shĩa lɛ shika tsuru kɛ jwiɛtɛi nibii ni Nebukadnezar yaloo yɛ sɔlemɔ shĩa ni yɔɔ Yerusalem lɛ mli ni ekɛyawo Babilon sɔlemɔ shĩa lɛ mli lɛ,+ Maŋtsɛ Koresh yaloo yɛ Babilon sɔlemɔ shĩa lɛ mli. Akɛ nibii nɛɛ hã nuu ko ni atsɛɔ lɛ Sheshbazar,*+ ni Koresh wó lɛ amralo lɛ.+ 15  Koresh kɛɛ lɛ akɛ: “Loomɔ nɛkɛ nibii nɛɛ. Yaa ni okɛyawo sɔlemɔ shĩa ni yɔɔ Yerusalem lɛ mli, ni ohã ama Nyɔŋmɔ shĩa lɛ ekoŋŋ yɛ he ni eyɔɔ tsutsu lɛ.”+ 16  Kɛkɛ ni Sheshbazar nɛɛ ba, ni ebatswa Nyɔŋmɔ shĩa ni yɔɔ Yerusalem lɛ faneshii lɛ;+ ni kɛjɛ nakai be lɛ nɔ kɛbashi amrɔ nɛɛ, aama lolo shi agbeko naa.’+ 17  “No hewɔ lɛ, agbɛnɛ kɛ́ esa maŋtsɛ hiɛ lɛ, ehã akwɛ maŋtsɛ jwetritoohe ni yɔɔ Babilon lɛ mli, koni akwɛ akɛ, lɛɛlɛŋ akɛ Maŋtsɛ Koresh wo kitã ko akɛ ayama Nyɔŋmɔ shĩa ni yɔɔ Yerusalem lɛ ekoŋŋ lo;+ ni maŋtsɛ atsu ni akɛ yiŋ ni ebaakpɛ yɛ he lɛ abahã wɔ.”

Shishigbɛ Niŋmaa

Aramaik sht. ŋm., “ni yɔɔ amɛnɔ lɛ.”
Loo “Yufrate Faa Lɛ Sɛɛ.”
Loo “amɛ-Nyɔŋmɔ lɛ hiŋmɛi kã Yudafoi onukpai lɛ anɔ.”
Eeenyɛ efee akɛ, lɛ ji Zerubabel ni atsĩ etã yɛ Ezr 2:2; 3:8 lɛ.