Ezra 4:1-24

  • Ate shi awo sɔlemɔ shĩa lɛ maa (1-6)

  • Henyɛlɔi lɛ ŋma wolo kɛyahã Maŋtsɛ Artashasta amɛshi Yerusalem (7-16)

  • Artashasta hã amɛ hetoo (17-22)

  • Akpa sɔlemɔ shĩa lɛ maa dã (23, 24)

4  Be ni Yuda kɛ Benyamin henyɛlɔi+ lɛ nu akɛ mɛi ni ejɛ nomŋɔɔ mli amɛba+ lɛ miima sɔlemɔ shĩa amɛhã Yehowa, Israel Nyɔŋmɔ lɛ,  amɛbana Zerubabel kɛ tsɛmɛi ashĩai onukpai lɛ oya nɔŋŋ ni amɛkɛɛ amɛ akɛ: “Nyɛhãa wɔfataa nyɛhe kɛmaa; ejaakɛ wɔ hu, wɔjáa nyɛ-Nyɔŋmɔ lɛ,*+ ni kɛjɛ Asiria maŋtsɛ Esar-hadon,+ mɔ ni kɛ wɔ ba biɛ lɛ gbii lɛ amli lɛ,+ lɛ wɔshãa afɔle wɔhãa.”  Shi Zerubabel, kɛ Yeshua, kɛ Israel tsɛmɛi ashĩai onukpai krokomɛi lɛ fɛɛ kɛɛ amɛ akɛ: “Jeee nyɛhe sane ko ji shĩa ni wɔmaa wɔhãa wɔ-Nyɔŋmɔ lɛ,+ wɔ pɛ wɔbaama shĩa lɛ wɔhã Yehowa, Israel Nyɔŋmɔ lɛ, tamɔ bɔ ni Maŋtsɛ Koresh, ni ji Persia maŋtsɛ lɛ efã wɔ lɛ.”+  Kɛkɛ ni shikpɔŋ lɛ nɔ bii lɛ tee nɔ amɛje Yudabii lɛ anijiaŋ wui ni amɛsu amɛtsui koni amɛkanyɛ amɛma shĩa lɛ.+  Ni yɛ Persia maŋtsɛ Koresh gbii lɛ amli fɛɛ kɛyashi Persia maŋtsɛ Dario nɔyeli+ lɛ mli lɛ, amɛyabɔ ŋaawolɔi apaa koni amɛfite Yudabii lɛ ayiŋtoi lɛ.+  Yɛ Ahasweros nɔyeli lɛ shishijee mli lɛ, amɛŋma wolo amɛshi mɛi ni yɔɔ Yuda kɛ Yerusalem lɛ.  Ni yɛ Persia maŋtsɛ Artashasta gbii lɛ amli lɛ, Bislam, kɛ Mitredat, kɛ Tabeel kɛ enanemɛi krokomɛi lɛ, ŋma wolo amɛyahã Maŋtsɛ Artashasta; amɛtsɔɔ wolo lɛ shishi kɛtee Aramaik mli,+ ni amɛkɛ Aramaik niŋmaa okadii ŋma.*  * Rehum, ni ji amralo-nukpa lɛ kɛ Shimshai, ni ji woloŋmalɔ lɛ ŋma wolo kɛyahã Maŋtsɛ Artashasta eshi Yerusalem akɛ:  (Wolo lɛ jɛ Rehum, ni ji amralo-nukpa lɛ kɛ Shimshai, ni ji woloŋmalɔ lɛ, kɛ amɛnanemɛi krokomɛi lɛ, kɛ kojolɔi lɛ, kɛ amralofoi bibii lɛ, kɛ woloŋmalɔi lɛ, kɛ Erekbii+ lɛ, kɛ Babiloniabii lɛ, kɛ mɛi ni yɔɔ Susa,+ ni ji Elambii+ lɛ, 10  kɛ jeŋmaji krokomɛi ni Asenapar, ni ji gbɔmɔ wulu kɛ anunyamtsɛ lɛ yaŋɔ amɛ nom ni ehã amɛyahi Samaria maji lɛ amli+ lɛ, kɛ mɛi ni yɔɔ kpokpaa ni yɔɔ Faa Lɛ Sɛɛ* lɛ nɔ lɛ aŋɔɔ, ni naa, 11  wolo lɛ ni amɛŋma lɛ mli sane nɛ.) “Otsuji, ni ji mɛi ni yɔɔ kpokpaa ni yɔɔ Faa Lɛ Sɛɛ lɛ nɔ lɛ ŋma kɛhã Maŋtsɛ Artashasta: Ni naa, 12  maŋtsɛ aná ale akɛ Yudafoi ni jɛ oŋɔɔ ni kwɔ kɛba biɛ lɛ ebashɛ Yerusalem. Amɛmiitswa atuatselɔi kɛ efɔŋfeelɔi amaŋ lɛ ekoŋŋ, ni eshwɛ fioo ni amɛbaagbe ehe gbogboi lɛ tswaa+ kɛ faneshii lɛ saamɔ naa. 13  Maŋtsɛ aná ale akɛ, kɛ́ amɛtswa maŋ nɛɛ kɛ ehe gbogboi lɛ amɛgbe naa lɛ, amɛwoŋ too, amɛwoŋ jatsu too,+ ni amɛwoŋ gbɛjegbɛ too hu, ni no baagbɔ nibii ni maŋtsɛmɛi lɛ náa kɛtoɔ amɛjwetritoohei lɛ anɔ. 14  Akɛni maŋtsɛ shĩa lɛ ŋoo lɛ eko wɔyeɔ* hewɔ lɛ, ehiii akɛ wɔbaata shi ni wɔkwɛ ni nɔ ni sa maŋtsɛ lɛ aŋmɛɛ lɛ, no hewɔ ni wɔŋma wolo nɛɛ koni wɔhã maŋtsɛ lɛ ale enɛ, 15  koni ohã akwɛ otsɛmɛi lɛ ayinɔsaji awolo lɛ mli.+ Kɛ́ okwɛ yinɔsaji awolo lɛ mli lɛ, obaana akɛ maŋ nɛɛ ji atuatselɔi amaŋ, maŋ ni hãaa maŋtsɛmɛi kɛ kpokpai aya nɔ, ni ayɛ mɛi ni woɔ mɛi ayiŋ ni amɛtse atua yɛ mli kɛjɛ blema tɔ̃ɔ. No hewɔ ni akpãtã maŋ nɛɛ hiɛ lɛ.+ 16  Wɔmiihã maŋtsɛ ale akɛ kɛ́ atswa maŋ nɛɛ ekoŋŋ ni atswa ehe gbogboi lɛ agbe naa lɛ, onyɛŋ oye kpokpaa ni yɔɔ Faa Lɛ Sɛɛ+ lɛ nɔ dɔŋŋ.”* 17  Maŋtsɛ lɛ tsu ayakɛɛ Rehum, ni ji amralo-nukpa lɛ, kɛ Shimshai, ni ji woloŋmalɔ lɛ, kɛ enanemɛi krokomɛi ni yɔɔ Samaria kɛ mɛi ni yɔɔ kpokpaa ni yɔɔ Faa Lɛ Sɛɛ lɛ nɔ lɛ akɛ: “Miiŋa nyɛ! Ni naa, 18  wolo lɛ ni nyɛkɛmaje wɔ lɛ, akane lɛ faŋŋ* atsɔɔ mi. 19  Mifã ni atao nibii amli, ni ana akɛ kɛjɛ blema tɔ̃ɔ lɛ ale maŋ nɛɛ akɛ maŋ ko ni teɔ shi woɔ maŋtsɛmɛi, ni atseɔ atua, ni awoɔ mɛi ayiŋ yɛ nɔyelɔi ahe hu yɛ jɛmɛ.+ 20  Maŋtsɛmɛi komɛi ni yɔɔ hewalɛ ni ye Yerusalem nɔ lɛ ye kpokpaa ni yɔɔ Faa Lɛ Sɛɛ lɛ fɛɛ nɔ lɛ nɔ, ni awo too ahã amɛ, awo jatsu too ahã amɛ, ni awo gbɛjegbɛ too hu ahã amɛ. 21  No hewɔ lɛ, nyɛwoa mɛi nɛɛ kitã koni amɛkpa nitsumɔ lɛ koni akatswa maŋ nɛɛ dɔŋŋ kɛyashi famɔ ko baajɛ miŋɔɔ kɛba. 22  Nyɛkwɛa jogbaŋŋ koni nyɛkakua nyɛhiɛ nyɛshwiea enɛ nɔ, koni nɔ ni sa akɛ maŋtsɛ lɛ nine ashɛ nɔ lɛ akaŋmɛɛ lɛ dɔŋŋ.”+ 23  Agbɛnɛ, be ni akane wolo ni Maŋtsɛ Artashasta ŋma lɛ atsɔɔ Rehum kɛ Shimshai, ni ji woloŋmalɔ lɛ, kɛ amɛnanemɛi krokomɛi lɛ, oya nɔŋŋ ni amɛtee Yudafoi lɛ aŋɔɔ yɛ Yerusalem ni amɛnyɛ amɛnɔ koni amɛkpa nitsumɔ lɛ. 24  Nakai beiaŋ ji be ni akpa Nyɔŋmɔ shĩa ni yɔɔ Yerusalem lɛ he nitsumɔ; ni akpa nitsumɔ lɛ kɛyashi Persia maŋtsɛ Dario nɔyeli afi ni ji enyɔ lɛ mli.+

Shishigbɛ Niŋmaa

Loo “wɔtaoɔ nyɛ-Nyɔŋmɔ lɛ sɛɛ gbɛ.”
Shishitsɔɔmɔi komɛi kɛɔ akɛ, “aŋma yɛ Aramaik mli, ni atsɔɔ shishi.”
Aŋma Ezr 4:8 kɛyashi 6:18 lɛ yɛ Aramaik mli klɛŋklɛŋ.
Loo “Yufrate Faa Lɛ Sɛɛ.”
Loo “maŋtsɛ shĩa lɛ ajɛɔ awoɔ wɔ nyɔmɔ.”
Loo “onáŋ gbɛfaŋnɔ ko yɛ kpokpaa ni yɔɔ Faa Lɛ Sɛɛ lɛ nɔ dɔŋŋ.”
Shishitsɔɔmɔi komɛi kɛɔ akɛ, “atsɔɔ shishi ni akane.”