Ezra 1:1-11

  • Maŋtsɛ Koresh wo mla koni ayama sɔlemɔ shĩa lɛ ekoŋŋ (1-4)

  • Ato gbɛjianɔ koni mɛi ni aŋɔ amɛ nom lɛ ashi Babilon (5-11)

1  Bɔ ni afee ni nɔ ni Yehowa tsɔ Yeremia nɔ ewie+ lɛ aba mli lɛ, yɛ Persia maŋtsɛ Koresh+ nɔyeli afi ni ji klɛŋklɛŋ lɛ nɔ lɛ, Yehowa tsirɛ Persia maŋtsɛ Koresh* koni ehã ashiɛ yɛ emaŋtsɛyeli lɛ mli fɛɛ, ni eŋma efɔ̃ shi+ hu akɛ:  “Nɔ ni Persia maŋtsɛ Koresh kɛɛ nɛ, ‘Yehowa, ŋwɛii a-Nyɔŋmɔ lɛ kɛ shikpɔŋ lɛ nɔ maŋtsɛyelii lɛ fɛɛ ehã mi,+ ni efã mi ni miyama shĩa mihã lɛ yɛ Yerusalem+ yɛ Yuda.  Emaŋbii lɛ ateŋ mɔ fɛɛ mɔ ni yɔɔ nyɛteŋ lɛ, e-Nyɔŋmɔ lɛ, afata ehe koni ekwɔ kɛya Yerusalem yɛ Yuda, ni eyatswa Yehowa, Israel Nyɔŋmɔ lɛ shĩa lɛ ekoŋŋ, lɛ ji anɔkwa Nyɔŋmɔ lɛ, mɔ ni shĩa yɔɔ Yerusalem lɛ.*  Mɔ fɛɛ mɔ ni ebahi wɔteŋ akɛ gbɔ lɛ,+ he fɛɛ he ni eyɔɔ lɛ, ekutsoŋbii* lɛ aye abua lɛ kɛ jwiɛtɛi, kɛ shika tsuru, kɛ nibii srɔtoi, kɛ kooloi, kɛ agbɛnɛ hu, tsuijurɔ naa nikeenii kɛhã anɔkwa Nyɔŋmɔ lɛ shĩa lɛ+ ni yɔɔ Yerusalem lɛ.’”  Kɛkɛ ni Yuda kɛ Benyamin tsɛmɛi ashĩai onukpai lɛ, kɛ osɔfoi lɛ, kɛ Levibii lɛ—mɔ fɛɛ mɔ ni anɔkwa Nyɔŋmɔ lɛ tsirɛ lɛ* lɛ—bua amɛhe naa koni amɛkwɔ kɛya ni amɛyatswa Yehowa shĩa lɛ ni yɔɔ Yerusalem lɛ ekoŋŋ.  Yɛ tsuijurɔ naa nikeenii ni mɛi fɛɛ ni bɔle amɛ lɛ kɛhã amɛ lɛ sɛɛ lɛ, amɛhã amɛ jwiɛtɛi nibii kɛ shika tsuru nibii, kɛ nibii srɔtoi, kɛ kooloi, kɛ nibii ni jara wa hu kɛye amɛbua amɛ.*  Agbɛnɛ hu, Maŋtsɛ Koresh jie Yehowa shĩa lɛ nibii ni Nebukadnezar baloo kɛjɛ Yerusalem ni ekɛyawo enyɔŋmɔ lɛ jamɔhe lɛ kpo.+  Persia maŋtsɛ Koresh hã Mitredat, ni ji jwetri nɔkwɛlɔ lɛ jie nibii lɛ kɛje kpo ni ekane, ni ekɛwo Sheshbazar,*+ Yuda lumɔ lɛ dɛŋ.  Naa nibii ni akane lɛ: kɛntɛŋi 30 ni akɛ shika tsuru fee, kɛntɛŋi 1,000 ni akɛ jwiɛtɛi fee, tsɛnsii nibii krokomɛi 29, 10  shika tsuru tsɛnsii bibii 30, jwiɛtɛi tsɛnsii bibii 410, kɛ tsɛnsii nibii krokomɛi 1,000. 11  Shika tsuru nibii lɛ kɛ jwiɛtɛi nibii lɛ fɛɛ feɔ 5,400. Sheshbazar kɛ nibii nɛɛ fɛɛ kwɔ kɛba be ni akɛ mɛi ni aŋɔ amɛ nom+ kɛtee Babilon lɛ ku sɛɛ kɛba Yerusalem lɛ.

Shishigbɛ Niŋmaa

Hebri sht. ŋm., “Yehowa tee Persia maŋtsɛ Koresh mumɔ shi.”
Shishitsɔɔmɔi komɛi kɛɔ akɛ, “lɛ ji anɔkwa Nyɔŋmɔ lɛ ni yɔɔ Yerusalem lɛ.”
Hebri sht. ŋm., “hii ni yɔɔ he ni eyɔɔ.”
Hebri sht. ŋm., “anɔkwa Nyɔŋmɔ lɛ tee emumɔ shi.”
Hebri sht. ŋm., “kɛwaje amɛnijiaŋ.”
Eeenyɛ efee akɛ lɛ nɔŋŋ ji Zerubabel ni atsĩ etã yɛ Ezr 2:2; Ezr 3:8 lɛ.