Ester 3:1-15

  • Maŋtsɛ lɛ hã Haman hegbɛ wulu (1-4)

  • Haman tsɔ ŋaa koni ekpãtã Yudafoi lɛ ahiɛ (5-15)

3  Enɛ sɛɛ lɛ, Maŋtsɛ Ahasweros hã Haman,+ Agagnyo+ Hamedata binuu lɛ hegbɛ wulu, ni ewó Haman sɛi lɛ nɔ fe lumɛi krokomɛi fɛɛ ni fata ehe lɛ.+  Ni maŋtsɛ lɛ tsuji lɛ fɛɛ ni yɔɔ maŋtsɛ lɛ agbó lɛ naa lɛ kulaa shi ni amɛkotoɔ Haman, ejaakɛ nakai ji bɔ ni maŋtsɛ lɛ efã ni afee ahã lɛ. Shi Mordekai kulaaa shi ehãaa Haman, ni ekotooo lɛ hu.  No hewɔ lɛ, maŋtsɛ lɛ tsuji ni yɔɔ maŋtsɛ lɛ agbó lɛ naa lɛ, bi Mordekai akɛ: “Mɛni hewɔ obooo maŋtsɛ lɛ famɔ lɛ toi lɛ?”  Daa kɛ daa lɛ, amɛbiɔ lɛ sane nɛɛ, shi efooo amɛdaaŋ. Kɛkɛ ni amɛbɔ Haman amaniɛ koni amɛkɛkwɛ akɛ ebaaŋmɛ nɔ ni Mordekai feɔ lɛ gbɛ lo;+ ejaakɛ no mli lɛ, ekɛɛ amɛ akɛ Yudanyo ji lɛ.+  Agbɛnɛ be ni Haman na akɛ Mordekai kulaaa shi ehãaa lɛ ni ekotooo lɛ lɛ, Haman mli wo la.+  Shi esumɔɔɔ akɛ egbeɔ Mordekai kome kɛkɛ,* ejaakɛ akɛɛ lɛ mɛi ni ji Mordekai maŋbii. No hewɔ lɛ, Haman tao gbɛ ni ebaatsɔ nɔ ekpãtã Yudafoi fɛɛ ni yɔɔ Ahasweros maŋtsɛyeli lɛ mli lɛ ahiɛ, ni ji mɛi fɛɛ ni ji Mordekai maŋbii lɛ.  Yɛ klɛŋklɛŋ nyɔɔŋ lɛ nɔ, ni ji Nisan* nyɔɔŋ lɛ nɔ yɛ Maŋtsɛ Ahasweros nɔyeli afi ni ji 12 lɛ mli lɛ,+ amɛfɔ̃ Pur*+ (ni ji, Oshiki lɛ) yɛ Haman hiɛ koni akɛna gbi kɛ nyɔɔŋ ni sa kɛhã enɛ, ni oshiki lɛ gbee nyɔɔŋ ni ji 12 lɛ nɔ, ni ji Adar*+ nyɔɔŋ lɛ nɔ.  Kɛkɛ ni Haman kɛɛ Maŋtsɛ Ahasweros akɛ: “Mɛi komɛi yɛ ni amɛgbɛ amɛshwã mɛi+ ni yɔɔ omaŋtsɛyeli lɛ mli lɛ ateŋ yɛ kpokpai+ lɛ fɛɛ anɔ, ni esoro amɛmlai kwraa yɛ mɛi ni eshwɛ lɛ fɛɛ anɔ lɛ he; ni amɛyeee maŋtsɛ lɛ mlai lɛ anɔ, ehiii kwraa kɛhãaa maŋtsɛ akɛ ebaaŋmɛ amɛ gbɛ ni amɛya nɔ amɛhi shi.  Kɛ́ esa maŋtsɛ hiɛ lɛ, no lɛ efã akɛ akpãtã amɛhiɛ ni aŋma famɔ nɛɛ afɔ̃ shi. Ni mawo jwiɛtɛi talɛntai* 10,000 mahã nɔkwɛlɔi lɛ koni akɛwo maŋtsɛ jwetritoohe lɛ.”* 10  Kɛkɛ ni maŋtsɛ lɛ jie eniianaasɔomɔ ga+ lɛ yɛ enine ni ekɛhã Haman,+ Agagnyo+ Hamedata binuu lɛ, ni ji Yudafoi lɛ ahenyɛlɔ lɛ. 11  Maŋtsɛ lɛ kɛɛ Haman akɛ: “Akɛ jwiɛtɛi lɛ kɛ mɛi lɛ ehã bo, koni ofee amɛ bɔ ni sa ohiɛ.” 12  Kɛkɛ ni atsɛ maŋtsɛ lɛ woloŋmalɔi+ lɛ yɛ klɛŋklɛŋ nyɔɔŋ lɛ mli gbi ni ji 13 lɛ nɔ. Amɛŋmala+ famɔi fɛɛ ni Haman kɛhã maŋtsɛ lɛ kpokpaa nɔkwɛlɔi* lɛ, kɛ kpokpai lɛ anɔ amralofoi lɛ, kɛ maji srɔtoi lɛ anɔ lumɛi lɛ, kɛ kpokpaa fɛɛ kpokpaa yɛ kpokpaa lɛ diɛŋtsɛ niŋmai amli,* kɛ agbɛnɛ hu yɛ maŋ fɛɛ maŋ diɛŋtsɛ wiemɔ mli. Aŋma yɛ Maŋtsɛ Ahasweros gbɛ́i mli, ni akɛ maŋtsɛ lɛ niianaasɔomɔ ga lɛ sɔo naa.+ 13  Akɛ woji lɛ tsu mɛi* kɛtee maŋtsɛ lɛ kpokpai lɛ fɛɛ anɔ, ni akɛ famɔ hã yɛ mli akɛ abule Yudafoi lɛ fɛɛ ashishi, ni agbe amɛ, ni akpãtã amɛhiɛ, mɛi ni darako jio, mɛi ni edara jio, gbekɛbii jio, yei jio, yɛ gbi kome mli yɛ nyɔɔŋ ni ji 12, ni ji Adar+ nyɔɔŋ lɛ nɔ gbi ni ji 13 lɛ nɔ, koni ashɔ̃ amɛnibii fɛɛ hu yɛ amɛdɛŋ.+ 14  Wolo lɛ mli wiemɔi lɛ baatsɔ mla yɛ kpokpaa fɛɛ kpokpaa nɔ, ni abaashiɛ emli wiemɔi lɛ ahã mɛi fɛɛ, koni amɛsaa amɛhe amɛto nakai gbi lɛ. 15  Mɛi ni atsu lɛ tee amrɔ nɔŋŋ+ yɛ maŋtsɛ lɛ famɔ naa; awo mla lɛ yɛ Shushan*+ mɔɔ* lɛ mli. Kɛkɛ ni maŋtsɛ lɛ kɛ Haman ta shi koni amɛnu nɔ ko, shi no mli lɛ, mɛi ni yɔɔ Shushan* maŋ lɛ mli lɛ ejijaa.

Shishigbɛ Niŋmaa

Hebri sht. ŋm., “esumɔɔɔ akɛ ekɛ enine ŋmɛɔ Mordekai kome kɛkɛ nɔ.”
“Pur,” shishi ji “Oshiki.” Aná Yudafoi lɛ agbi jurɔ ni atsɛɔ lɛ “Purim” ni amɛyeɔ yɛ nyɔɔŋ ni ji 12 lɛ mli, yɛ Yudafoi lɛ akalanda ni Nyɔŋmɔ to hã amɛ lɛ nɔ lɛ kɛjɛ wiemɔ ni ji Pur lɛ mli. “Purim” ji “Pur” piifeemɔ. Kwɛmɔ Saji Krokomɛi B15 lɛ.
Talɛnta kome feɔ kilogram 34.2 (oz t 1,101). Kwɛmɔ Saji Krokomɛi B14 lɛ.
Shishitsɔɔmɔi komɛi kɛɔ akɛ, “Mikɛ talɛntai 10,000 baawo maŋtsɛ jwetritoohe lɛ kɛhã mɛi ni baatsu nitsumɔ lɛ.”
Loo “satrapii.” Satrap ji gbɛnaa gbɛ́i ni akɛtsɛɔ mɛi ni kwɛɔ kpokpai ni yɔɔ Persia nɔyeli lɛ shishi lɛ anɔ lɛ.
Loo “yɛ bɔ ni nakai kpokpaa lɛ ŋmaa nii ehãa lɛ naa.”
Hebri sht. ŋm., “foijelɔi.”
Loo “Susa.”
Loo “maŋtsɛ shĩa.”
Loo “Susa.”