Daniel 11:1-45

  • Persia kɛ Grees maŋtsɛmɛi (1-4)

  • Wuoyigbɛ kɛ kooyigbɛ maŋtsɛmɛi lɛ (5-45)

    • Nibilɔ ko baate shi (20)

    • Abaakumɔ kpaŋmɔ lɛ Hiɛnyiɛlɔ lɛ (22)

    • Awo mɔji anyɔŋmɔ lɛ hiɛ nyam (38)

    • Wuoyigbɛ maŋtsɛ lɛ kɛ kooyigbɛ maŋtsɛ lɛ shishii amɛhe (40)

    • Saji ni haoɔ mɔ baajɛ bokãgbɛ kɛ kooyigbɛ aba (44)

11  “Shi mi lɛ, yɛ Dario,+ Medianyo lɛ nɔyeli afi ni ji klɛŋklɛŋ nɔ lɛ mli lɛ, mite shi midamɔ shi koni mawo lɛ hewalɛ ni mawaje lɛ.*  Agbɛnɛ, nɔ ni mibakɛɛ bo lɛ ji anɔkwale lɛ: “Naa! Maŋtsɛmɛi etɛ baate shi* yɛ Persia, ni mɔ ni ji ejwɛ lɛ baaná nii babaoo fe mɛi krokomɛi lɛ fɛɛ. Ni kɛ́ eninámɔ lɛ hã ená hewalɛ lɛ, ebaatee nɔ fɛɛ nɔ shi ewo Grees maŋtsɛyeli lɛ.+  “Ni maŋtsɛ kãkãlɔ ko baate shi adamɔ shi, ni ekɛ hewalɛ kpele baaye nɔ,*+ ni ebaafee nɔ ni esumɔɔ.  Shi be ni ete shi edamɔ shi lɛ, abaakumɔ emaŋtsɛyeli lɛ ni abaaja mli kɛya ŋwɛi kɔɔyɔi ejwɛ lɛ gbɛ,+ shi akɛhãŋ eseshibii* lɛ, ni amɛnáŋ hewalɛ tamɔ hewalɛ ni ekɛye nɔ lɛ;* ejaakɛ abaafã emaŋtsɛyeli lɛ shishi ni ebaatsɔ mɛi krokomɛi anɔ yɛ mɛnɛɛmɛi asɛɛ.  “Ni wuoyigbɛ maŋtsɛ lɛ, ni ji elumɛi lɛ ateŋ mɔ kome lɛ, he baawa; shi mɔ kome baaye enɔ, ni ekɛ hewalɛ kpele baaye nɔ,* nɔ ni da fe hewalɛ ni nakai mɔ lɛ kɛye nɔ lɛ.  “Afii komɛi asɛɛ lɛ, amɛbaabɔ naanyo, ni wuoyigbɛ maŋtsɛ lɛ biyoo lɛ baaba kooyigbɛ maŋtsɛ lɛ ŋɔɔ koni ekɛ lɛ abafee kpaŋmɔ. Shi ebiyoo lɛ hewalɛ lɛ baaje edɛŋ; ni maŋtsɛ lɛ damɔŋ shi, ni maŋtsɛ lɛ hewalɛ lɛ hu baaje edɛŋ; ni akɛ ebiyoo lɛ baahã, ebiyoo lɛ kɛ mɛi ni kɛ ebiyoo lɛ baa lɛ fɛɛ, kɛ mɔ ni fɔ lɛ lɛ,* kɛ mɔ ni hãa ebiyoo lɛ náa hewalɛ yɛ nakai bei lɛ amli lɛ.  Ni mɔ ko ni jɛ yoo lɛ shishifã lɛ mli baate shi adamɔ shi yɛ egbɛhe, ni ebaaba asraafoi lɛ aŋɔɔ, ni ebaaba ebatutua kooyigbɛ maŋtsɛ lɛ mɔɔ lɛ, ni ebaate shi eshi amɛ ni ebaaye kunim.  Agbɛnɛ hu, ebaaloo amɛnyɔŋmɔi lɛ, kɛ amɛdade amagai lɛ, kɛ amɛjwiɛtɛi kɛ shika tsuru nibii ni jara wala* lɛ, kɛ mɛi ni eŋɔ amɛ nom lɛ, ni ebaaba Ejipt. Ebɛŋkɛŋ kooyigbɛ maŋtsɛ lɛ kɛyashi afii komɛi,  ni kooyigbɛ maŋtsɛ lɛ hu baate shi ashi wuoyigbɛ maŋtsɛ lɛ maŋtsɛyeli lɛ, shi ebaaku esɛɛ kɛya lɛ diɛŋtsɛ eshikpɔŋ nɔ. 10  “Shi ebihii lɛ, amɛbaasaa amɛhe kɛhã ta ni amɛbaabua asraafoi babaoo, asafo kpele diɛŋtsɛ naa. Ebaafã kɛba ni ebaabɛɛ shikpɔŋ lɛ nɔ kɛho tamɔ nu afua. Shi ebaaku esɛɛ, ni ebaawu ta aahu kɛya emɔɔ lɛ he tɔ̃ɔ. 11  “Ni wuoyigbɛ maŋtsɛ lɛ mli baawo la, ni ebaafã kɛba ni ekɛ lɛ, ni ji kooyigbɛ maŋtsɛ lɛ abawu; ni ebaabua mɛi babaoo diɛŋtsɛ anaa, shi akɛ mɛi babaoo lɛ baawo nakai mɔ lɛ dɛŋ. 12  Ni abaaloo mɛi babaoo lɛ kɛya. Etsui baawó ehe nɔ, ni ebaahã mɛi akpei nyɔŋmai abɔ anyɔnyɔi; shi ekɛ ehewalɛ kpele lɛ tsuŋ nii. 13  “Ni kooyigbɛ maŋtsɛ lɛ baaku esɛɛ ni ebaabua mɛi babaoo ni fa fe klɛŋklɛŋ nɔ lɛ naa; ni afii komɛi asɛɛ yɛ bei lɛ anaagbee mli lɛ, ekɛ asraafoi babaoo kɛ nibii babaoo baaba. 14  Yɛ nakai bei lɛ amli lɛ, mɛi babaoo baate shi awo wuoyigbɛ maŋtsɛ lɛ. “Ni abaaloo omaŋbii lɛ ateŋ awuiyelɔi* lɛ kɛya koni akɛhã ninaa ko aba mli; shi amɛbaatɛrɛ. 15  “Ni kooyigbɛ maŋtsɛ lɛ baaba ni ebaatswa kpoku ewo maŋ ko ni atswa gbogbo awo he lɛ he, ni ebaaye nɔ kunim. Ni wuoyigbɛ asraafoi* lɛ damɔŋ shi, ni ehii ni ehala lɛ hu damɔŋ shi; ni amɛnáŋ hewalɛ ko ni amɛkɛaadamɔ shi. 16  Mɔ ni baa enɔ lɛ baafee nɔ ni esumɔɔ, ni mɔ ko mɔ ko damɔŋ ehiɛ. Ebaadamɔ shikpɔŋ, ni ji Fɛfɛo Nɔ*+ lɛ nɔ, ni hiɛkpatamɔ hewalɛ baahi edɛŋ. 17  Ekɛbaama ehiɛ* akɛ ekɛ emaŋtsɛyeli lɛ hewalɛ lɛ fɛɛ baaba, ni akɛ lɛ* baafee kpaŋmɔ; ni ebaafee bɔ ni ekpɛ eyiŋ lɛ pɛpɛɛpɛ. Ni akɛbaawo edɛŋ akɛ ekpãtã yei abiyoo lɛ hiɛ. Shi yoo lɛ damɔŋ shi, ni yoo lɛ eyaŋ nɔ etsɔŋ enɔ. 18  Ebaaku esɛɛ etsɔ ehiɛ ewo ŋshɔnaa maji lɛ, ni ebaaye amɛteŋ babaoo anɔ kunim. Ni tatsɛ ko baahã hiɛshishwiemɔ ni ekɛba enɔ lɛ sɛɛ afo, koni ehiɛ akashwie shi dɔŋŋ. Ebaahã eku sɛɛ ebabua nakai mɔ lɛ yiteŋ. 19  Kɛkɛ lɛ, ebaatsɔ ehiɛ ewo lɛ diɛŋtsɛ eshikpɔŋ lɛ nɔ mɔji lɛ, ni ebaatɛ ni ebaagbee shi, ni anaŋ lɛ. 20  “Ni nibilɔ ko* baate shi adamɔ shi yɛ egbɛhe lɛ ni ebaatsɔ maŋtsɛyeli fɛfɛo lɛ mli kɛho, shi gbii fioo sɛɛ lɛ, abaakumɔ lɛ, shi jeee yɛ mlifu loo ta naa. 21  “Ni mɔ ko ni anyaŋeɔ baate shi adamɔ shi yɛ egbɛhe lɛ, ni amɛkɛ maŋtsɛyeli lɛ anunyam lɛ hãŋ lɛ; ni ebaaba yɛ toiŋjɔlɛ beiaŋ* ni ekɛ naadɔkɔmɔ* baaŋɔ maŋtsɛyeli lɛ. 22  Ni abaabɛɛ asraafoi* ni tamɔ nu afua lɛ kɛya yɛ ehewɔ, ni amɛbaakumɔ amɛ; tamɔ bɔ ni abaafee kpaŋmɔ+ lɛ Hiɛnyiɛlɔ+ lɛ. 23  Ni naanyo ni amɛkɛ lɛ ebɔ lɛ hewɔ lɛ, ebaalaka mɛi, ni ebaate shi ni ebaatsɔ jeŋmaŋ bibioo ko nɔ etsɔ mɔ wulu. 24  Ebaaba kpokpaa lɛ mli hei ni ninámɔ babaoo yɔɔ* lɛ yɛ toiŋjɔlɛ beiaŋ,* ni ebaafee nɔ ni etsɛmɛi kɛ etsɛmɛi lɛ atsɛmɛi lɛ efeko pɛŋ. Ebaaja ta mli nii ni ayaloo, kɛ nibii ni ashɔ̃, kɛ nibii krokomɛi yɛ amɛteŋ; ni ebaatsɔ ŋaa eshi hei ni atswa gbogboi awo he lɛ, shi ebaafee enɛ kɛyashi be ko. 25  “Ni ekɛ asraafoi babaoo baawó ehewalɛ kɛ etsui nɔ eshi wuoyigbɛ maŋtsɛ lɛ, ni wuoyigbɛ maŋtsɛ lɛ baabua asraafoi kãkãlɔi babaoo diɛŋtsɛ anaa kɛsaa ehe kɛhã ta. Ni edamɔŋ shi, ejaakɛ amɛbaatsɔ ŋaa amɛshi lɛ. 26  Ni mɛi ni yeɔ eniyenii srɔtoi lɛ baahã egbee shi. “Shi esraafoi lɛ, abaabɛɛ amɛ ashwie,* ni abaagbe mɛi babaoo. 27  “Shi maŋtsɛmɛi enyɔ nɛɛ, amɛtsui baatsirɛ amɛ koni amɛfee efɔŋ, amɛbaata shi yɛ okpɔlɔ kome he amɛmalemalee amɛhe. Shi nɔ ko nɔ ko yeŋ omanye, ejaakɛ be ni ato kɛhã naagbee lɛ shɛko.+ 28  “Ni ekɛ nibii pii baaku esɛɛ kɛya eshikpɔŋ lɛ nɔ, ni etsui baate shi awo kpaŋmɔ krɔŋkrɔŋ lɛ. Ebaafee bɔ ni ekpɛ eyiŋ lɛ pɛpɛɛpɛ, ni ebaaku esɛɛ kɛya eshikpɔŋ lɛ nɔ. 29  “Ebaaku esɛɛ yɛ be ni ato lɛ mli ni ete shi eshi wuoyigbɛ lɛ. Shi be nɛɛ mli lɛ, efeŋ tamɔ bɔ ni eji tsutsu lɛ, 30  ejaakɛ Kitim meelei+ lɛ baate shi awo lɛ, ni abaaba lɛ shi. “Ebaaku esɛɛ, ni ekɛ emlifu lɛ baato kpaŋmɔ krɔŋkrɔŋ lɛ nɔ,*+ ni ebaafee bɔ ni ekpɛ eyiŋ lɛ pɛpɛɛpɛ; ni ebaaku esɛɛ kɛya, ni ekɛ ejwɛŋmɔ baaya mɛi ni shiɔ kpaŋmɔ krɔŋkrɔŋ lɛ anɔ. 31  Ni asraafoi* ni jɛ eŋɔɔ baate shi adamɔ shi; ni amɛbaabule jamɔhe lɛ,+ kɛ mɔɔ lɛ, ni amɛbaajie daa nifeemɔ*+ lɛ. “Ni amɛkɛ nyaŋemɔ nii ni kɛ amaŋfɔfeemɔ baa lɛ baama shi.+ 32  “Ni ebaatsɔ naadɔkɔmɔ* nɔ ehã mɛi ni feɔ efɔŋ amɛshiɔ kpaŋmɔ lɛ akwa Nyɔŋmɔ. Shi mɛi ni le amɛ-Nyɔŋmɔ lɛ baaye kunim, ni amɛbaafee bɔ ni amɛto amɛyiŋ lɛ pɛpɛɛpɛ. 33  Ni mɛi ni yɔɔ sɛɛyoomɔ+ yɛ maŋbii lɛ ateŋ lɛ baahã mɛi babaoo anu nii ashishi. Ni abaatsɔ klante, kɛ la, kɛ nomŋɔɔ, kɛ nii ni aloɔ yɛ ta mli nɔ ahã amɛtɛrɛ gbii fioo. 34  Shi kɛ́ ahã amɛtɛrɛ lɛ, abaaye abua amɛ fioo; ni mɛi babaoo baatsɔ naadɔkɔmɔ* nɔ amɛkɛ amɛhe akpɛtɛ amɛhe. 35  Ni abaahã mɛi ni yɔɔ sɛɛyoomɔ lɛ ateŋ mɛi komɛi atɛrɛ koni akɛtsu niiahetsuumɔ nitsumɔ ko yɛ amɛhewɔ koni ahã amɛhe atse ni amɛyɛ futaa+ kɛyashi naagbee be lɛ; ejaakɛ be ni ato ahã lɛ lɛ shɛko. 36  “Maŋtsɛ lɛ baafee nɔ ni esumɔɔ, ni ebaawó ehe nɔ, ni ebaafee ehe agbo yɛ nyɔŋmɔ fɛɛ nyɔŋmɔ nɔ; ni ebaawie wiemɔi ni hãa mɔ he jɔ̃ɔ ehe eshi nyɔŋmɔi a-Nyɔŋmɔ+ lɛ. Ni ebaaye omanye kɛyashi mlifu lɛ baaba naagbee; ejaakɛ esa akɛ nɔ ni akpɛ mli ato lɛ aba mli. 37  Ebuŋ etsɛmɛi a-Nyɔŋmɔ lɛ ehãŋ nɔ ko nɔ ko; ni enáŋ bulɛ ko ehãŋ nɔ ni yei sumɔɔ lɛ loo nyɔŋmɔ ko nyɔŋmɔ ko, shi ebaafee ehe agbo yɛ mɔ fɛɛ mɔ nɔ. 38  Shi ekɛ anunyam baahã mɔji anyɔŋmɔ lɛ moŋ;* ebaatsɔ shika tsuru kɛ jwiɛtɛi kɛ ojarawatɛi kɛ nibii ni jara wala* nɔ ekɛ anunyam ahã nyɔŋmɔ ko ni etsɛmɛi lɛ leee. 39  Ekɛ maŋsɛɛ nyɔŋmɔ ko baafee* bɔ ni ekpɛ eyiŋ akɛ ebaafee teemɔhei ni wala fe fɛɛ lɛ pɛpɛɛpɛ. Ebaawo mɛi ni buɔ lɛ lɛ* ahiɛ nyam waa, ni ebaahã amɛye nɔ yɛ mɛi babaoo ateŋ; ni ebaaja shikpɔŋ lɛ kɛhe shika. 40  “Naagbee be lɛ mli lɛ, wuoyigbɛ maŋtsɛ lɛ kɛ lɛ baashishii amɛhe, ni kooyigbɛ maŋtsɛ lɛ kɛ shwiilii, kɛ okpɔŋɔnɔtaralɔi, kɛ meelei babaoo baaba enɔ; ni ebaaya shikpɔji lɛ anɔ, ni ebaatsɔ amɛnɔ kɛho tamɔ nu afua. 41  Ebaabote shikpɔŋ ni ji Fɛfɛo Nɔ*+ lɛ mli hu, ni abaahã shikpɔji pii atɛrɛ. Shi mɛi ni baaje edɛŋ nɛ: Edom, kɛ Moab, kɛ Amonbii lɛ ateŋ mɛi titri lɛ. 42  Ni ebaaya nɔ ekpã enine mli yɛ shikpɔji lɛ anɔ; ni Ejipt shikpɔŋ lɛ ejeŋ mli. 43  Ni ebaaye Ejipt jwetrii ni akɛtee lɛ, ni ji shika tsuru, kɛ jwiɛtɛi, kɛ enibii ni jara wala* lɛ fɛɛ nɔ. Ni Libiabii lɛ kɛ Etiopiabii lɛ baanyiɛ enanemaahei lɛ asɛɛ.* 44  “Shi saji ni baajɛ bokãgbɛ* kɛ kooyigbɛ lɛ baahao lɛ, ni ebaaje kpo kɛ mlifu ni naa wa koni eyafite mɛi babaoo ni ekpãtã amɛhiɛ. 45  Ni ekɛ emaŋtsɛ mama tsũi lɛ baama ŋshɔ wulu lɛ kɛ Fɛfɛo Nɔ*+ lɛ gɔŋ krɔŋkrɔŋ lɛ teŋ; ni ebaaba aahu kɛbashi ebaashɛ enaagbee, ni mɔ ko mɔ ko bɛ ni baaye abua lɛ.

Shishigbɛ Niŋmaa

Loo “ni matsɔ tamɔ mɔɔ mahã lɛ.”
Loo “baate shi adamɔ shi.”
Loo “ni ebaaye nɔ kɛya shɔŋŋ.”
Loo “ebii.”
Loo “ni amɛyeŋ nɔ kɛyaŋ shɔŋŋ tamɔ bɔ ni eye nɔ kɛtee shɔŋŋ lɛ.”
Loo “ni ebaaye nɔ kɛya shɔŋŋ.”
Ni ji, gbekɛ yoo lɛ papa.
Loo “ni amɛshwɛɛɛ amɛhe kwraa.”
Loo “julɔi abihii.”
Hebri sht. ŋm., “niji.”
Loo “Wulamɔ Nɔ.”
Loo “Ebaatswa efai shi.”
Loo “ni ekɛ lɛ.”
“Nibilɔ ko,” eeenyɛ efee akɛ ebiɔ too. Loo “mɔ ko ni nyɛɔ mɛi anɔ ni amɛtsu nii.”
Shishitsɔɔmɔi komɛi kɛɔ akɛ, “ebaaba be ni mɛi leee amɛhe be.”
Loo “ŋaa.”
Hebri sht. ŋm., “niji.”
Shishitsɔɔmɔi komɛi kɛɔ akɛ, “hei ni ninamɔ babaoo yɔɔ lɛ be ni mɛi leee amɛhe be.”
Hebri sht. ŋm., “hei ni ewo fɔ.”
Loo “nu afua baaloo amɛ kɛya.”
Loo “ni emli baawo la ewo kpaŋmɔ krɔŋkrɔŋ lɛ.”
Hebri sht. ŋm., “niji.”
Loo “daa afɔle.”
Loo “yiteŋmuluwoo; lakamɔ.”
Loo “yiteŋmuluwoo; lakamɔ.”
Loo “Ekɛ anunyam baahã mɔji anyɔŋmɔ lɛ yɛ enajiaŋ.”
Loo “ni ashwɛɛɛ amɛhe kwraa.”
Loo “Maŋsɛɛ nyɔŋmɔ ko baaye abua lɛ ni ebaafee.”
Shishitsɔɔmɔi komɛi kɛɔ akɛ, “Ebaawo mɛi ni ebuɔ amɛ lɛ.”
Loo “Wulamɔ Nɔ.”
Loo “ni eshwɛɛɛ amɛhe kwraa.”
Loo “baanyiɛ esɛɛ.”
Loo “hulushiteehe.”
Loo “Wulamɔ Nɔ.”