Kpojiemɔ Ko Ni Akɛhã Yohane 13:1-18

  • Kooloo awuiyelɔ ni yɔɔ yitsei kpawo jɛ ŋshɔ lɛ mli ba (1-10)

  • Kooloo awuiyelɔ ni yɔɔ akolontoi enyɔ jɛ shikpɔŋ lɛ mli ba (11-13)

  • Kooloo ni yɔɔ yitsei kpawo lɛ amaga lɛ (14, 15)

  • Kooloo awuiyelɔ lɛ okadi lɛ kɛ eyibɔ lɛ (16-18)

13  Ni eyadamɔ shi* yɛ ŋshɔnaa shia lɛ nɔ ni etsiii ehe. Ni mina kooloo awuiyelɔ+ ko miije kpo kɛmiijɛ ŋshɔ+ lɛ mli kɛmiiba, ni eyɛ akolontoi nyɔŋma kɛ yitsei kpawo, ni maŋtsɛ faii* nyɔŋma bumɔ ekolontoi lɛ anɔ, shi gbɛ́ii ni wieɔ eshiɔ Nyɔŋmɔ* yɛ eyitsei lɛ anɔ.  Agbɛnɛ kooloo awuiyelɔ ni mina lɛ tamɔ kootsɛ,* shi enaji tamɔ oshishibrishi naji, ni enaabu tamɔ jata naabu. Ni drako+ lɛ kɛ lɛ diɛŋtsɛ ehewalɛ lɛ kɛ emaŋtsɛ sɛi lɛ kɛ hegbɛ kpele hã lɛ.+  Mina eyitsei lɛ ateŋ ekome tamɔ nɔ ni epila waa bɔ ni eehe egbo, shi atsa epilamɔ lɛ,+ ni shikpɔŋ muu lɛ fɛɛ nyiɛ kooloo awuiyelɔ lɛ sɛɛ ni amɛnaa ekpɛ amɛhe.  Ni amɛjá drako lɛ ejaakɛ ekɛ hegbɛ lɛ ehã kooloo awuiyelɔ lɛ, ni amɛjá kooloo awuiyelɔ lɛ kɛ wiemɔ nɛɛ amɛkɛɛ: “Namɔ tamɔ kooloo awuiyelɔ lɛ, ni namɔ baanyɛ ekɛ lɛ awu?”  Ahã lɛ naabu ni wieɔ nii wuji kɛ wiemɔi fɔji,* ni ahã lɛ hegbɛ ni ekɛtsu nii nyɔji 42.+  Ni egbele enaa ewie wiemɔi fɔji*+ eshi Nyɔŋmɔ, ewie egbɛ́i lɛ kɛ eshihilɛhe lɛ, mɛi ni hiɔ ŋwɛi lɛ po ahe wiemɔi fɔji.+  Aŋmɛ lɛ gbɛ koni ekɛ mɛi krɔŋkrɔŋi lɛ awu ta ni eye amɛnɔ kunim,+ ni ahã lɛ hegbɛ yɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ kɛ jeŋmaŋ fɛɛ jeŋmaŋ nɔ.  Ni mɛi fɛɛ ni yɔɔ shikpɔŋ lɛ nɔ lɛ baajá lɛ. Kɛjɛ be ni ato je lɛ shishi* lɛ, aŋmako amɛteŋ mɔ ko mɔ ko gbɛ́i yɛ Gwantɛŋbi ni agbe lɛ+ lɛ wala wolokpo* lɛ mli.+  Kɛji mɔ ko yɛ toi lɛ, hã enu.+ 10  Kɛji ato akɛ aŋɔ mɔ ko nom lɛ, abaaŋɔ lɛ nom. Kɛ́ mɔ ko kɛ klante gbe mɔ ko lɛ,* esa akɛ akɛ klante agbe lɛ.+ Biɛ shifimɔ kɛ hemɔkɛyeli+ yɛ mɛi krɔŋkrɔŋi+ lɛ agbɛfaŋ he ehia yɛ.+ 11  Kɛkɛ ni mina kooloo awuiyelɔ kroko ni miije kpo kɛmiijɛ shikpɔŋ lɛ mli, ni eyɛ akolontoi enyɔ tamɔ gwantɛŋbi, shi ebɔi wiemɔ tamɔ drako.+ 12  Etsuɔ klɛŋklɛŋ kooloo awuiyelɔ+ lɛ hegbɛ lɛ fɛɛ he nii yɛ ehiɛ. Ni ehãa shikpɔŋ lɛ kɛ mɛi ni yɔɔ shikpɔŋ lɛ nɔ lɛ jáa klɛŋklɛŋ kooloo awuiyelɔ ni atsa epilamɔ lɛ.+ 13  Ni efeɔ okadii wuji, ni ehãa la po jɛɔ ŋwɛi baa shikpɔŋ lɛ nɔ yɛ gbɔmɛi ahiɛ. 14  Elakaa mɛi ni yɔɔ shikpɔŋ lɛ nɔ lɛ, yɛ okadii ni aŋmɛ lɛ gbɛ ni efee yɛ kooloo awuiyelɔ lɛ hiɛ lɛ hewɔ, ni yɛ nakai be lɛ mli nɔŋŋ lɛ, ekɛɔ mɛi ni yɔɔ shikpɔŋ lɛ nɔ lɛ akɛ amɛfee amaga+ amɛhã kooloo awuiyelɔ lɛ ni klante naa pilamɔ lɛ yɔɔ ehe shi ená hewalɛ ekoŋŋ lɛ.+ 15  Ni aŋmɛ lɛ gbɛ ni ekɛ kɔɔyɔɔ ni amuɔ* ahã kooloo awuiyelɔ lɛ amaga lɛ, koni kooloo awuiyelɔ lɛ amaga lɛ awie, ni kooloo awuiyelɔ lɛ amaga lɛ ahã agbe mɛi fɛɛ ni kpoɔ akɛ amɛbaajá kooloo awuiyelɔ lɛ amaga lɛ. 16  Enyɛɔ gbɔmɛi fɛɛ—mɛi bibii kɛ mɛi wuji, niiatsɛmɛi kɛ ohiafoi, mɛi ni jeee nyɔji kɛ nyɔji—anɔ akɛ amɛkpɛlɛ ni akadi amɛ yɛ amɛninejurɔ nɔ loo yɛ amɛhiɛnai,+ 17  ni akɛ, mɔ ko mɔ ko nyɛŋ ahé nii loo ehɔ̃ɔ nii, akɛ ja mɔ ni yɔɔ okadi lɛ, loo kooloo awuiyelɔ lɛ gbɛ́i+ loo egbɛ́i yibɔ lɛ pɛ.+ 18  Biɛ hiɛshikamɔ he ehia yɛ: Mɔ ni yɔɔ sɛɛyoomɔ lɛ abu kooloo awuiyelɔ lɛ yibɔ lɛ he akɔntaa, ejaakɛ gbɔmɔ yibɔ ni, ni eyibɔ lɛ ji 666.+

Shishigbɛ Niŋmaa

Loo “musubɔɔ gbɛ́ii.”
Loo “akekerei.”
Ni ji, drako lɛ.
Loo “mlaŋtswi.”
Loo “musubɔɔ wiemɔi.”
Loo “musubɔɔ wiemɔi.”
Wolo kakadaŋŋ ni akotaa awoɔ tso he.
Greek sht. ŋm., “be ni ashɛ (dumɔwu) afɔ̃ shi,” ni tsɔɔ akɛ, be ni Adam kɛ Hawa bɔi amɛbii lɛ ahɔŋɔɔ.
Shishitsɔɔmɔi komɛi kɛɔ akɛ, “Kɛ́ ato akɛ akɛ klante agbe mɔ ko lɛ.”
Loo “mumɔ.”