Kojolɔi 7:1-25

  • Gideon kɛ ehii 300 lɛ (1-8)

  • Gideon asraafoi lɛ ye Midian nɔ kunim (9-25)

    • “Yehowa kɛ Gideon klante!” (20)

    • Midian asraafoi lɛ ayiŋ futu (21, 22)

7  Kɛkɛ ni Yerubaal, ni lɛ nɔŋŋ ji Gideon+ lɛ kɛ mɛi fɛɛ ni fata ehe lɛ te shi leebi maŋkpa ni amɛyabɔ nsara yɛ Harod Nubu lɛ naa, no mli lɛ, Midianbii lɛ ebɔ nsara yɛ he ni Gideon nsara lɛ yɔɔ lɛ kooyigbɛ yɛ More gɔŋkpɔ lɛ nɔ yɛ jɔɔ lɛ mli.  Agbɛnɛ, Yehowa kɛɛ Gideon akɛ: “Mɛi ni fata ohe lɛ ayi fa tsɔ bɔ ni mikɛ Midian baawo amɛdɛŋ.+ Kɛjeee nakai lɛ, Israel baashi etsitsi ni ebaawie eshi mi, ni ekɛɛ akɛ, ‘Mi diɛŋtsɛ minine ni here mi.’+  Agbɛnɛ, ofainɛ, daamɔ mɛi lɛ ahiɛ ni otswa adafi akɛ: ‘Mɔ fɛɛ mɔ ni miishe gbeyei ni ŋmiŋmi emɔ lɛ lɛ aku esɛɛ ni eya shĩa.’”+ No hewɔ lɛ, Gideon ka amɛ ekwɛ. Enɛ hã mɛi 22,000 ku amɛsɛɛ kɛtee shĩa ni eshwɛ mɛi 10,000.  Fɛɛ sɛɛ lɛ, Yehowa kɛɛ Gideon akɛ: “Mɛi lɛ ayi fa tsɔ lolo. Okɛ amɛ akpeleke shi kɛya nu lɛ he koni maka amɛ yɛ jɛmɛ mahã bo. Kɛ́ mikɛɛ bo akɛ, ‘Mɔ nɛ kɛ bo baaya lɛ,’ ekɛ bo baaya, shi kɛ́ mikɛɛ bo akɛ ‘Mɔ nɛ kɛ bo eyaŋ lɛ,’ ekɛ bo eyaŋ.”  No hewɔ lɛ, ekɛ mɛi lɛ kpeleke shi kɛtee nu lɛ he. Kɛkɛ ni Yehowa kɛɛ Gideon akɛ: “Tse mɛi fɛɛ ni kɛ amɛnine tsɔɔ nu lɛ kɛtoɔ amɛnaa ni amɛshɔɔ tamɔ gbee lɛmɔɔ nu lɛ kɛje mɛi ni baakula shi yɛ amɛnakutsei anaa amɛnu nu lɛ ahe.”  Mɛi ni kɛ amɛnine to amɛnaa ni amɛshɔ nu lɛ ayibɔ ji hii 300. Mɛi ni eshwɛ lɛ kula shi yɛ amɛnakutsei anaa amɛnu nu lɛ.  Agbɛnɛ, Yehowa kɛɛ Gideon akɛ: “Mikɛ hii 300 ni kɛ amɛnine to amɛnaa ni amɛshɔ nu lɛ baahere nyɛ, ni mikɛ Midian baawo nyɛdɛŋ.+ Shi hã mɛi krokomɛi ni eshwɛ lɛ fɛɛ aku amɛsɛɛ kɛya shĩa.”  No hewɔ lɛ, be ni amɛhe niyenii lɛ kɛ tɛtɛrɛmantɛrɛi* lɛ kɛjɛ mɛi lɛ adɛŋ lɛ, ehã Israel hii krokomɛi lɛ fɛɛ ku amɛsɛɛ kɛtee shĩa, ni ehã hii 300 lɛ pɛ hi shi. No mli lɛ, Midian nsara lɛ yɛ Gideon nsara lɛ shishigbɛ yɛ jɔɔ lɛ mli.+  Yɛ nakai nyɔɔŋ lɛ mli lɛ, Yehowa kɛɛ lɛ akɛ: “Tee shi, yaatutua mɛi ni yɔɔ nsara lɛ mli lɛ, ejaakɛ mikɛ amɛ ewo odɛŋ.+ 10  Shi kɛ́ ooshe gbeyei akɛ obaayatutua amɛ lɛ, no lɛ okɛ Pura, ni ji osɔɔlɔ lɛ akpeleke shi kɛya nsara lɛ he. 11  Bo nɔ ni amɛbaawie lɛ toi, ni no sɛɛ lɛ, obaaná ekãa* kɛtutua mɛi ni yɔɔ nsara lɛ mli lɛ.” Kɛkɛ ni ekɛ Pura, esɔɔlɔ lɛ, kpeleke shi kɛtee he ni asraafoi lɛ ebɔ nsara lɛ yɛ lɛ masɛi kpaakpa. 12  No mli lɛ, Midian kɛ Amalek kɛ Bokãgbɛbii lɛ fɛɛ+ bua shi yɛ jɔɔ lɛ mli babaoo tamɔ baalabii, ni amɛfukpɔŋɔi lɛ anyɛɛɛ akane,+ amɛyi fa tamɔ ŋshɔnaa shia. 13  Agbɛnɛ, Gideon yashɛ jɛmɛ, ni no mli lɛ nuu ko miigba enaanyo lamɔ ko ni ela, ni ekɛɛ akɛ: “Lamɔ ni mila lɛ nɛ. Blodo kokloo ko ni akɛ barle* fee koklo kɛba Midian nsara lɛ mli. Eba mama tsũ ko he, ni eshí mama tsũ lɛ waa aahu akɛ ekumɔ lɛ eshwie shi.+ Anɔkwa, etsɔ mama tsũ lɛ ebu shi, ni mama tsũ lɛ gbee shi shwɛtɛɛ.” 14  Kɛkɛ ni enaanyo lɛ kɛɛ akɛ: “Enɛ jeee nɔ ko nɔ ko akɛ Yoash binuu, Gideon,+ Israelnyo lɛ klante lɛ. Nyɔŋmɔ kɛ Midian kɛ nsara lɛ fɛɛ ewo edɛŋ.”+ 15  Be ni Gideon nu lamɔ lɛ kɛ eshishitsɔɔmɔ lɛ,+ amrɔ nɔŋŋ lɛ, ekula shi ni ejá Nyɔŋmɔ. No sɛɛ lɛ, eku esɛɛ kɛtee Israel nsara lɛ mli ni ekɛɛ: “Nyɛtea shi, ejaakɛ Yehowa kɛ Midian nsara lɛ ewo nyɛdɛŋ.” 16  Kɛkɛ ni ejara hii 300 lɛ mli ewo kui etɛ mli, ni ekɛ tɛtɛrɛmantɛrɛ*+ kɛ sũ kɔɔpoo agbo ni latso* hɔ mli lɛ hã amɛteŋ mɔ fɛɛ mɔ. 17  Kɛkɛ ni ekɛɛ amɛ akɛ: “Nyɛkwɛa mi ni nyɛfea bɔ ni mafee lɛ pɛpɛɛpɛ. Kɛ́ miyashɛ nsara lɛ masɛi lɛ, esa akɛ nyɛfee bɔ ni mafee lɛ pɛpɛɛpɛ. 18  Kɛ́ mikpã tɛtɛrɛmantɛrɛ* lɛ, kɛ́ mi kɛ mɛi fɛɛ ni fata mihe lɛ kpã lɛ, nyɛ hu nyɛkpãa nyɛtɛtɛrɛmantɛrɛi* lɛ kɛbɔlea nsara lɛ fɛɛ ni nyɛboa akɛ, ‘Yehowa kɛ Gideon nɔ ni!’” 19  Gideon kɛ hii 100 ni fata ehe lɛ bashɛ nsara lɛ masɛi yɛ nyɔɔŋ buu be ni ji enyɔ* lɛ shishijee mli, yɛ be ni atsake bulɔi lɛ sɛɛ nɔŋŋ. Amɛkpã amɛtɛtɛrɛmantɛrɛi*+ lɛ ni amɛjwara sũ kɔɔpoi agboi ni amɛhiɛ lɛ.+ 20  No hewɔ lɛ, kui etɛ lɛ kpã amɛtɛtɛrɛmantɛrɛi* lɛ ni amɛjwara amɛsũ kɔɔpoi agboi lɛ. Amɛhiɛ latsei* lɛ yɛ amɛbɛku ni amɛkpã tɛtɛrɛmantɛrɛi* ni amɛhiɛ yɛ amɛninejurɔ lɛ, ni amɛbo akɛ: “Yehowa kɛ Gideon klante!” 21  No mli fɛɛ lɛ, hii lɛ ateŋ mɔ fɛɛ mɔ damɔ egbɛhe kɛbɔle nsara lɛ kɛkpe, ni asraafoi lɛ ni yɔɔ nsara lɛ mli lɛ fɛɛ jo foi, amɛjo foi kɛ bolɔmɔ.+ 22  Mɛi 300 lɛ tee nɔ amɛkpã tɛtɛrɛmantɛrɛi* lɛ, ni Yehowa hã mɔ fɛɛ mɔ ni yɔɔ nsara lɛ mli lɛ dɔ eklante eto enyɛmi nɔ;+ ni asraafoi lɛ jo foi kɛtee Bet-shita tɔ̃ɔ, kɛ Zerera, aahu kɛyashi Abel-mehola+ klotia lɛ yɛ Tabat masɛi. 23  Ni ayatsɛ Israel hii lɛ kɛjɛ Naftali, kɛ Asher, kɛ Manase fɛɛ,+ ni amɛtiu Midian. 24  Gideon tsu mɛi kɛtee Efraim gɔji lɛ anɔ fɛɛ, ekɛɛ: “Nyɛkpelekea shi kɛyaa ni nyɛyatutuaa Midian ni nyɛŋɔ hei ni afoɔ nui lɛ yɛ lɛ kɛyashi Bet-bara kɛ Yordan.” No hewɔ lɛ, abua Efraim hii lɛ fɛɛ anaa, ni amɛyaŋɔ hei ni afoɔ nui lɛ yɛ lɛ kɛyashi Bet-bara kɛ Yordan. 25  Amɛmɔmɔ Midian lumɛi enyɔ lɛ, Oreb kɛ Zeeb hu; amɛgbe Oreb yɛ Oreb tɛsaa lɛ nɔ,+ ni amɛgbe Zeeb yɛ Zeeb bu ni aŋaa wain yɛ mli lɛ he. Amɛtee nɔ amɛtiu Midian+ ni amɛkɛ Oreb kɛ Zeeb yitsei bahã Gideon yɛ Yordan kpokpaa lɛ nɔ.

Shishigbɛ Niŋmaa

Hebri sht. ŋm., “akolontoi.”
Hebri sht. ŋm., “onijiaŋ baawa.”
Eji wiiti henɔ ko.
Loo “jatɛŋ; kɔti.”
Hebri sht. ŋm., “akolonto.”
Hebri sht. ŋm., “akolonto.”
Hebri sht. ŋm., “nyɛkolontoi.”
Kɛjɛ aaafee gbɛkɛ ŋmɛlɛ 10:00 kɛyashi maŋkɛ ŋmɛji 2:00.
Hebri sht. ŋm., “amɛkolontoi.”
Loo “jatɛŋi; kɔtii.”
Hebri sht. ŋm., “akolontoi.”
Hebri sht. ŋm., “amɛkolontoi.”
Hebri sht. ŋm., “akolontoi.”