Kojolɔi 4:1-24

  • Maŋtsɛ Jabin, Kanaannyo lɛ wa Israelbii lɛ ayi (1-3)

  • Gbalɔ yoo Debora kɛ Kojolɔ Barak (4-16)

  • Yael gbe tatsɛ Sisera (17-24)

4  Shi Ehud gbele sɛɛ lɛ, Israelbii lɛ fee efɔŋ ekoŋŋ yɛ Yehowa hiɛ.+  No hewɔ lɛ, Yehowa hɔ̃ɔ amɛ ewo Yabin, Kanaan maŋtsɛ lɛ,+ ni ye nɔ yɛ Hazor lɛ dɛŋ. Etatsɛ ji Sisera, mɔ ni hi Haroshet-ha-goyim*+ lɛ.  Israelbii lɛ bo amɛtsɛ Yehowa,+ ejaakɛ Yabin yɛ ta shwiilii 900 kɛ amɛhe dadei,*+ ni ewa Israelbii lɛ ayi waa+ afii 20.  Gbalɔ yoo+ ko ni atsɛɔ lɛ Debora, ni ji Lapidot ŋa lɛ, ji mɔ ni kojoɔ Israel yɛ nakai beiaŋ.  He ni etaa ji Debora tɛŋ tso lɛ shishi, yɛ Rama+ kɛ Betel+ teŋ, yɛ Efraim gɔji lɛ anɔ; Israelbii lɛ kwɔɔ kɛyaa eŋɔɔ koni ehã amɛle Nyɔŋmɔ yiŋkpɛi* lɛ.  Etsu ni ayatsɛ Barak,+ Abinoam binuu lɛ kɛjɛ Kedesh-naftali+ kɛba, ni ekɛɛ lɛ akɛ: “Ani Yehowa, Israel Nyɔŋmɔ lɛ fãko bo? ‘Yaafã ta kɛya* Tabor Gɔŋ lɛ nɔ, ni okɛ hii 10,000 ni jɛ Naftali kɛ Zebulon wekui lɛ amli lɛ afata ohe.  Makpala Sisera, Yabin tatsɛ lɛ kɛ eta shwiilii lɛ kɛ esraafoi lɛ kɛba oŋɔɔ yɛ Kishon faa*+ lɛ naa, ni mikɛ lɛ baawo odɛŋ.’”+  Kɛkɛ ni Barak kɛɛ lɛ akɛ: “Kɛ́ okɛ mi baaya lɛ, no lɛ maya, shi kɛ́ okɛ mi eyaaa lɛ, no lɛ miyaaa.”  Ni yoo lɛ to he ehã lɛ akɛ: “Mikɛ bo baaya kɛ̃. Shi tafãa nɛɛ mli anunyam lɛ efeŋ onɔ, ejaakɛ Yehowa kɛ Sisera baawo yoo ko dɛŋ.”+ Kɛkɛ ni Debora te shi ni ekɛ Barak tee Kedesh.+ 10  Barak hã Zebulon kɛ Naftali+ wekui lɛ babua amɛhe naa yɛ Kedesh, ni hii 10,000 nyiɛ enanemaahei lɛ asɛɛ. Debora hu kɛ lɛ kwɔ kɛtee. 11  No mli lɛ, Heber, Kennyo lɛ, etse ehe kɛje Kenbii lɛ,+ ni ji Mose shaanuu+ Hobab seshibii lɛ ahe, ni efee emama tsũ lɛ yɛ tso agbo ko masɛi yɛ Zaananim, yɛ Kedesh. 12  Ayabɔ Sisera amaniɛ akɛ, Barak, Abinoam binuu lɛ, ekwɔ kɛtee Tabor Gɔŋ lɛ nɔ.+ 13  Amrɔ nɔŋŋ ni Sisera bua eta shwiilii—shwiilii 900 kɛ amɛhe dadei*—lɛ fɛɛ kɛ asraafoi ni kɛ lɛ yɔɔ Haroshet-ha-goyim* lɛ fɛɛ naa koni amɛya Kishon faa*+ lɛ naa. 14  Kɛkɛ ni Debora kɛɛ Barak akɛ: “Tee shi, ejaakɛ ŋmɛnɛ ji gbi ni Yehowa kɛ Sisera baawo odɛŋ lɛ. Ani jeee Yehowa ni efã kɛnyiɛ ohiɛ nɛɛ?” Ni Barak kpeleke shi kɛjɛ Tabor Gɔŋ lɛ nɔ ni hii 10,000 nyiɛ esɛɛ. 15  Kɛkɛ ni Yehowa hã Sisera kɛ eta shwiilii lɛ fɛɛ kɛ asraafoi lɛ fɛɛ jijaa+ yɛ Barak klante lɛ naa. Naagbee lɛ, Sisera yi shi kɛjɛ eshwiili lɛ mli ni ewo foi yɛ enane nɔ. 16  Barak tiu ta shwiilii lɛ kɛ asraafoi lɛ kɛtee Haroshet-ha-goyim* tɔ̃ɔ. No hewɔ lɛ, agbe Sisera asraafoi lɛ fɛɛ yɛ klante naa; amɛteŋ mɔ kome po eshwɛɛɛ.+ 17  Shi Sisera wo foi yɛ enane nɔ kɛtee Yael,+ ni ji Heber,+ Kennyo lɛ ŋa lɛ mama tsũ lɛ he, ejaakɛ toiŋjɔlɛ yɛ Yabin,+ Hazor maŋtsɛ lɛ kɛ Heber, Kennyo lɛ shĩa lɛ teŋ. 18  Kɛkɛ ni Yael je kpo ekɛ Sisera bakpe, ni ekɛɛ lɛ akɛ: “Minuŋtsɔ, ba, ba mli. Kaashe gbeyei.” No hewɔ lɛ, etee yoo lɛ mama tsũ lɛ mli, ni yoo lɛ kɛ kuntu ko ha enɔ. 19  Ni ekɛɛ yoo lɛ akɛ: “Ofainɛ, hã mi nu fioo manu, ejaakɛ kumai miiye mi.” No hewɔ lɛ, yoo lɛ gbele wolo tɔ ko ni mliki yɔɔ mli lɛ naa, ni ehã lɛ eko enu,+ no sɛɛ lɛ, eha enɔ ekoŋŋ. 20  Ekɛɛ yoo lɛ akɛ: “Daamɔ mama tsũ lɛ shinaa lɛ shi, kɛ́ mɔ ko ba ni ebi bo akɛ, ‘Nuu ko yɛ biɛ lo?’ lɛ, kɛɛmɔ ‘Dabi!’” 21  Shi Yael, Heber ŋa lɛ, kɔ mama tsũ he tso kɛ enaa piɔpiɔ ko kɛ hamlɛ ehiɛ edɛŋ. Ni be ni nuu lɛ ewɔ vii ni efee gbedee lɛ, yoo lɛ dɛkɛ shi kɛbɛŋkɛ lɛ ni eka tso kɛ enaa piɔpiɔ lɛ kɛtsɔ eyitso mli, ni eka kɛmɔ shikpɔŋ lɛ, ni nuu lɛ gbo.+ 22  Barak nyiɛ Sisera sɛɛ kɛtee jɛmɛ, ni Yael je kpo ekɛ lɛ bakpe ni ekɛɛ lɛ akɛ: “Ba ni matsɔɔ bo nuu lɛ ni otaoɔ lɛ.” Ekɛ lɛ bote mli ni ena Sisera kã shi ni egbo ni mama tsũ he tso kɛ enaa piɔpiɔ lɛ tsɛ eyitso mli. 23  No hewɔ lɛ, Nyɔŋmɔ ba Yabin, Kanaan maŋtsɛ lɛ shi ewo Israelbii lɛ ashishi yɛ nakai gbi lɛ nɔ.+ 24  Israelbii lɛ anine tee nɔ etsii waa yɛ Yabin, Kanaan+ maŋtsɛ lɛ nɔ aahu kɛyashi amɛkpãtã Yabin, Kanaan maŋtsɛ lɛ hiɛ.+

Shishigbɛ Niŋmaa

Loo “jeŋmaji lɛ a-Haroshet.”
Hebri sht. ŋm., “dade shwiilii 900.”
Loo “kojomɔi.”
Loo “Yaaloo ohii lɛ kɛya.”
Loo “nujɔɔ.”
Hebri sht. ŋm., “dade shwiilii 900.”
Loo “jeŋmaji lɛ a-Haroshet.”
Loo “nujɔɔ.”
Loo “jeŋmaji lɛ a-Haroshet.”