Kojolɔi 3:1-31

  • Yehowa ka Israel ekwɛ (1-6)

  • Otniel, klɛŋklɛŋ kojolɔ (7-11)

  • Kojolɔ Ehud gbe Maŋtsɛ Eglon ni eshwi lɛ (12-30)

  • Kojolɔ Shamgar (31)

3  Jeŋmaji ni Yehowa hã amɛhi shi koni amɛka Israelbii fɛɛ ni kɛ Kanaanbii lɛ wuko ta pɛŋ lɛ nɛ+  (efee nakai koni Israelbii ayinɔi ni baaba yɛ sɛɛ mli lɛ awu ta, mɛi ni amɛnako nɔ ko ni tamɔ nakai pɛŋ lɛ):  Filistibii lɛ anɔyelɔi enumɔ lɛ,+ kɛ Kanaanbii lɛ fɛɛ, Sidonbii+ lɛ, kɛ Hivbii+ ni yɔɔ Lebanon Gɔŋ+ lɛ nɔ kɛjɛ Baal-hermon Gɔŋ lɛ he aahu kɛyashi Lebo-hamat lɛ.*+  Ashi jeŋmaji nɛɛ koni akɛka Israelbii lɛ akwɛ akɛ amɛbaabo Yehowa kitãi ni etsɔ Mose nɔ ekɛhã amɛtsɛmɛi lɛ toi lo.+  No hewɔ lɛ, Israelbii lɛ hi Kanaanbii lɛ,+ kɛ Hitbii lɛ, kɛ Amorbii lɛ, kɛ Perizbii lɛ, kɛ Hivbii lɛ, kɛ Yebusbii lɛ ateŋ.  Israelbii lɛ yaŋɔɔ jeŋmaji nɛɛ abiyei lɛ akɛ amɛŋamɛi, ni amɛkɛ amɛ diɛŋtsɛ amɛbiyei lɛ hãa jeŋmaji nɛɛ abihii lɛ gbãla, ni amɛbɔi amɛnyɔŋmɔi lɛ sɔɔmɔ.+  No hewɔ lɛ, Israelbii lɛ fee efɔŋ yɛ Yehowa hiɛ, ni amɛhiɛ kpa Yehowa, amɛ-Nyɔŋmɔ lɛ nɔ, ni amɛyasɔmɔ Baal srɔtoi+ lɛ kɛ wɔŋ tsei lɛ.*+  No hewɔ lɛ, Yehowa mli wo la ewo Israelbii lɛ, ni ehɔ̃ɔ amɛ ewo Kushan-rishataim, ni ji Mesopotamia* maŋtsɛ lɛ dɛŋ. Israelbii lɛ sɔmɔ Kushan-rishataim afii kpaanyɔ.  Be ni Israelbii lɛ bo amɛtsɛ Yehowa koni ebaye ebua amɛ lɛ,+ Yehowa hã yiwalaherelɔ ko bahere Israelbii lɛ,+ lɛ ji Otniel,+ ni ji Kaleb nyɛmi nuu fioo Kenaz binuu lɛ. 10  Yehowa mumɔ lɛ ba enɔ,+ ni ebatsɔ Israel kojolɔ. Be ni efã ta lɛ, Yehowa kɛ Kushan-rishataim, Mesopotamia* maŋtsɛ lɛ wo edɛŋ ni eye Kushan-rishataim nɔ kunim. 11  No sɛɛ lɛ, toiŋjɔlɛ ba shikpɔŋ lɛ nɔ* afii 40. Ni Otniel, Kenaz binuu lɛ gbo. 12  Ni Israelbii lɛ bɔi efɔŋfeemɔ ekoŋŋ yɛ Yehowa hiɛ.+ No hewɔ lɛ, Yehowa hã Eglon, Moab+ maŋtsɛ lɛ ye Israel nɔ kunim, ejaakɛ amɛfee efɔŋ yɛ Yehowa hiɛ. 13  Kɛkɛ ni ebua Amonbii+ lɛ kɛ Amalekbii+ lɛ anaa koni amɛte shi amɛwo amɛ. Amɛtutua Israel ni amɛŋɔ tɛŋ tsei amaŋ lɛ.+ 14  Israelbii lɛ sɔmɔ Eglon, Moab maŋtsɛ lɛ afii 18.+ 15  Kɛkɛ ni Israelbii lɛ bo amɛtsɛ Yehowa koni ebaye ebua amɛ,+ no hewɔ lɛ, Yehowa hã amɛ yiwalaherelɔ ko,+ lɛ ji Ehud,+ abɛkulɔ lɛ,+ ni ji Benyaminnyo+ Gera binuu lɛ. Be ko lɛ, Israelbii lɛ tsu lɛ koni ekɛ nikeenii lɛ* ayahã Eglon, Moab maŋtsɛ lɛ. 16  No mli lɛ, Ehud efee klante ko ni hiɛ kɛ sɛɛ fɛɛ naa ba, ekɛlɛ ji ninetalɔ kome,* ni ekɛfi ehɛ yɛ eninejurɔgbɛ yɛ etade lɛ shishi. 17  Kɛkɛ ni ekɛ nikeenii lɛ yahã Eglon, Moab maŋtsɛ lɛ. Eglon ji nuu ko ni eshwi waa diɛŋtsɛ. 18  Be ni Ehud kɛ nikeenii lɛ ehã egbe naa lɛ, eyajie mɛi ni tere nikeenii lɛ kɛba lɛ gbɛ. 19  Shi be ni amɛshɛ amagai ni akpɛ́* ni yɔɔ Gilgal+ lɛ ahe lɛ, lɛ lɛ eku esɛɛ ni eyakɛɛ akɛ: “Maŋtsɛ, miyɛ teemɔŋ sane ko kɛhã bo.” No hewɔ lɛ, maŋtsɛ lɛ kɛɛ akɛ: “Nyɛjea kpo!”* Ni mɛi ni sɔmɔɔ lɛ lɛ fɛɛ shi lɛ. 20  No hewɔ lɛ, Ehud ba eŋɔɔ be ni ekome too eta shi yɛ eŋwɛi asa ni mli jɔɔ lɛ nɔ lɛ. Ni Ehud kɛɛ lɛ akɛ: “Nyɔŋmɔ kɛ sane ko etsu mi ni mikɛbahã bo.” Ni ete shi kɛjɛ emaŋtsɛ sɛi* lɛ nɔ. 21  Kɛkɛ ni Ehud kɛ ebɛku gbala klante lɛ yɛ ehɛ yɛ eninejurɔgbɛ ni ekɛtsu emusuŋ. 22  Klante lɛ kɛ esɛɛtso lɛ fɛɛ bote mli, ni fɔ lɛ ha dade lɛ he fɛɛ, ejaakɛ egbalaaa klante lɛ kɛjɛɛɛ emusuŋ, ni fei je kpo kɛjɛ emusuŋ. 23  Ehud tsɔ ablanaa lɛ nɔ* kɛje kpo, eŋamɔ ŋwɛi asa lɛ shinai lɛ ewo eyi ni eŋmɛlɛ amɛmli. 24  Be ni eshi etee lɛ, sɔɔlɔi lɛ ku amɛsɛɛ ni amɛbana akɛ aŋmɛlɛ ŋwɛi asa lɛ shinai lɛ amli. No hewɔ lɛ, amɛkɛɛ: “Eeenyɛ efee akɛ etee niiasɛɛ* yɛ sɛɛtsu ni mli jɔɔ lɛ mli.” 25  Amɛmɛ aahu kɛyashi ebɔi amɛnaa gbamɔ,* shi be ni amɛna akɛ egbeleee ŋwɛi asa lɛ shinai lɛ lolo lɛ, amɛyakɔ samfee lɛ ni amɛgbele shinai lɛ, ni amɛna akɛ amɛnuŋtsɔ lɛ kã shikpɔŋ ni egbo! 26  Be ni amɛlilaa shi lɛ, Ehud jo foi etee, ni eyatsɔ amagai ni akpɛ́*+ lɛ ahe kɛho, ni eyashɛ Seira shweshweeshwe. 27  Be ni eyashɛ lɛ, ekpã tɛtɛrɛmantɛrɛ*+ yɛ Efraim gɔji lɛ anɔ;+ ni Israelbii lɛ kpeleke shi kɛjɛ gɔji lɛ anɔ kɛtee, ni enyiɛ amɛhiɛ. 28  Ni ekɛɛ amɛ akɛ: “Nyɛnyiɛa misɛɛ, ejaakɛ Yehowa kɛ nyɛhenyɛlɔi, ni ji Moabbii lɛ ewo nyɛdɛŋ.” No hewɔ lɛ, amɛnyiɛ esɛɛ ni amɛyaŋɔ hei ni afoɔ Yordan lɛ yɛ lɛ ni amɛkɛsa Moabbii lɛ anaa, ni amɛhãaa mɔ ko mɔ ko afo. 29  Nakai be lɛ mli lɛ, amɛgbe Moabbii 10,000,+ hii ni he wala kɛ kãkãlɔi sɔŋŋ; amɛteŋ mɔ ko mɔ ko náaa hegbɛ ajo foi.+ 30  No hewɔ lɛ, aba Moab shi awo Israel shishi yɛ nakai gbi lɛ nɔ; ni toiŋjɔlɛ ba shikpɔŋ lɛ nɔ* afii 80.+ 31  Esɛɛ lɛ, Shamgar,+ Anat binuu lɛ hu here Israel; ekɛ tsina kpalamɔ tso+ gbe Filisti hii 600.+

Shishigbɛ Niŋmaa

Loo “he ni atsɔɔ kɛboteɔ Hamat lɛ.”
Hebri sht. ŋm., “Aram-naharaim.”
Hebri sht. ŋm., “Aram.”
Loo “No sɛɛ lɛ, shikpɔŋ lɛ nɔ jɔ.”
Eeenyɛ efee akɛ, “nikeenii” nɛɛ ji maŋ too ko ni Moab maŋtsɛ lɛ biɔ yɛ amɛdɛŋ.
Eeenyɛ efee akɛ, ninetalɔ kuku, aaafee sɛntimitai 38 (iŋtsii 15). Kwɛmɔ Saji Krokomɛi B14 lɛ.
Shishitsɔɔmɔi komɛi kɛɔ akɛ, “be ni amɛshɛ tɛgbamɔhei lɛ.”
Hebri sht. ŋm., “Dioo.”
Loo “esɛi.”
Shishitsɔɔmɔi komɛi kɛɔ akɛ, “fɔlɔ ni kɔɔyɔɔ tsɔɔ mli lɛ mli.”
Hebri sht. ŋm., “eeha enaji ahe.”
Hebri sht. ŋm., “kɛyashi amɛhiɛ gboi.”
Shishitsɔɔmɔi komɛi kɛɔ akɛ, “eyatsɔ tɛgbamɔhe lɛ.”
Hebri sht. ŋm., “akolonto.”
Loo “ni shikpɔŋ lɛ nɔ jɔ.”