Kojolɔi 10:1-18

  • Kojolɔ Tola kɛ kojolɔ Yair (1-5)

  • Israel tse atua ni etsake etsui (6-16)

  • Amonbii lɛ ka akɛ amɛkɛ Israel baawu ta (17, 18)

10  Yɛ Abimelek gbii lɛ asɛɛ lɛ, Tola, Isakarnyo lɛ, te shi koni ehere Israel.+ Dodo binuu Pua binuu ji lɛ. Ehi Shamir yɛ Efraim gɔji lɛ anɔ.  Ekojo Israel afii 23. Kɛkɛ ni egbo ni afu lɛ yɛ Shamir.  Esɛɛ lɛ, Yair, Gileadnyo lɛ te shi ni ekojo Israel afii 22.  Eyɛ bihii 30 ni taraa tejii 30 nɔ, ni amɛyɛ maji 30, ni atsɛɔ maji nɛɛ Havot-yair+ kɛbashi ŋmɛnɛ; amɛyɛ Gilead shikpɔŋ lɛ nɔ.  Ni Yair gbo, ni afu lɛ yɛ Kamon.  Ni Israelbii lɛ fee efɔŋ yɛ Yehowa hiɛ ekoŋŋ,+ ni amɛyasɔmɔ Baal srɔtoi+ lɛ, kɛ Ashtoret amagai lɛ, kɛ Aram* nyɔŋmɔi lɛ, kɛ Sidon nyɔŋmɔi lɛ, kɛ Moab nyɔŋmɔi lɛ,+ kɛ Amonbii lɛ anyɔŋmɔi lɛ,+ kɛ Filistibii lɛ anyɔŋmɔi lɛ.+ Amɛje Yehowa sɛɛ ni amɛsɔmɔɔɔ lɛ.  Kɛkɛ ni Yehowa mli wo la ewo Israel, ni ehɔ̃ɔ amɛ ewo Filistibii lɛ kɛ Amonbii lɛ adɛŋ.+  No hewɔ lɛ, amɛhao Israelbii lɛ ni amɛwa amɛ yi yɛ nakai afi lɛ mli—amɛwa Israelbii lɛ ayi afii 18 yɛ Yordan sɛɛ yɛ Gilead, yɛ he ni no mli lɛ eji Amorbii lɛ ashikpɔŋ lɛ.  Amonbii lɛ hu foɔ Yordan Faa lɛ ni amɛkɛ Yuda weku lɛ, kɛ Benyamin weku lɛ, kɛ Efraim shĩa lɛ yawuɔ; ni enɛ hã Israel hao waa. 10  Kɛkɛ ni Israelbii lɛ bo amɛtsɛ Yehowa koni ebaye ebua amɛ,+ amɛkɛɛ: “Wɔfee esha wɔshi bo, ejaakɛ wɔje bo, wɔ-Nyɔŋmɔ lɛ sɛɛ, ni wɔyasɔmɔ Baal srɔtoi lɛ.”+ 11  Shi Yehowa kɛɛ Israelbii lɛ akɛ: “Ani jeee miji mɔ ni here nyɛ kɛje Ejiptbii lɛ,+ kɛ Amorbii lɛ,+ kɛ Amonbii lɛ, kɛ Filistibii lɛ,+ 12  kɛ Sidonbii lɛ, kɛ Amalekbii lɛ, kɛ Midianbii ni wa nyɛ yi lɛ adɛŋ? Be ni nyɛbo nyɛtsɛ mi lɛ, mihere nyɛ kɛje amɛdɛŋ. 13  Shi nyɛ lɛ, nyɛje misɛɛ ni nyɛyasɔmɔ nyɔŋmɔi krokomɛi.+ No hewɔ lɛ, mihereŋ nyɛ dɔŋŋ.+ 14  Nyɛyaa nyɔŋmɔi ni nyɛhala lɛ aŋɔɔ, ni nyɛbo nyɛtsɛ amɛ koni amɛbaye amɛbua nyɛ.+ Nyɛhãa amɛherea nyɛ yɛ nyɛhaomɔ be nɛɛ mli.”+ 15  Shi Israelbii lɛ kɛɛ Yehowa akɛ: “Wɔfee esha. Bo lɛ, feemɔ wɔ nɔ fɛɛ nɔ ni sa ohiɛ. Shi, ofainɛ, heremɔ wɔ kɛkɛ, ŋmɛnɛ gbi nɛɛ.” 16  Ni amɛjie jeŋmaji krokomɛi lɛ anyɔŋmɔi lɛ kɛje amɛteŋ ni amɛsɔmɔ Yehowa,+ no hewɔ lɛ, enyɛɛɛ edamɔ amanehulu ni Israelbii lɛ naa lɛ naa dɔŋŋ.*+ 17  Be ko lɛ, Amonbii+ lɛ bua amɛhe naa, ni amɛbabɔ nsara yɛ Gilead. No hewɔ lɛ, Israelbii lɛ hu bua amɛhe naa ni amɛyabɔ nsara yɛ Mizpa. 18  Mɛi ni yɔɔ Gilead lɛ kɛ Gilead lumɛi lɛ bibii amɛhe akɛ: “Namɔ baanyiɛ wɔhiɛ ni wɔkɛ Amonbii lɛ ayawu?+ Lɛ ebaaye mɛi fɛɛ ni yɔɔ Gilead lɛ anɔ.”

Shishigbɛ Niŋmaa

Loo “Siria.”
Loo “esusuma nyɛɛɛ etsui shi eto dɔŋŋ yɛ amanehulu ni Israelbii lɛ naa lɛ hewɔ.”