Bɔfoi Lɛ Anitsumɔi 15:1-41

  • Ataa naa yɛ ketiafoo hewɔ yɛ Antiokia (1, 2)

  • Akɛ sane lɛ ba Yerusalem (3-5)

  • Asafoŋ onukpai kɛ bɔfoi lɛ kpe kutuu (6-21)

  • Wolo ni jɛ gbɛtsɔɔmɔ kuu lɛ dɛŋ (22-29)

    • Nyɛtsia nyɛhe kɛjea lá he (28, 29)

  • Wolo lɛ wo asafoi lɛ hewalɛ (30-35)

  • Paulo kɛ Barnaba​—Amɛteŋ mɔ fɛɛ mɔ kɔ egbɛ (36-41)

15  Agbɛnɛ, hii komɛi kpeleke shi kɛjɛ Yudea kɛba ni amɛbabɔi nyɛmimɛi lɛ tsɔɔmɔ akɛ: “Kɛ́ afolɔɔɔ nyɛ ketia yɛ Mose Mla lɛ naa lɛ,+ anyɛŋ nyɛyiwala ahere.”  Shi be ni Paulo kɛ Barnaba kɛ amɛ kpãaa gbee, ni amɛkɛ amɛ taa naa saŋŋ lɛ, ato akɛ Paulo, kɛ Barnaba kɛ mɛi krokomɛi lɛ ateŋ mɛi komɛi akwɔ kɛya Yerusalem kɛya bɔfoi lɛ kɛ onukpai lɛ aŋɔɔ+ yɛ sane* nɛɛ hewɔ.  No hewɔ lɛ, be ni asafo lɛ yajie amɛ gbɛ lɛ, hii nɛɛ tsa amɛgbɛnyiɛmɔ lɛ nɔ kɛyatsɔ Foinike kɛ Samaria, ni amɛgba jeŋmajiaŋbii lɛ atsakemɔ lɛ fitsofitso amɛtsɔɔ, ni amɛhã nyɛmimɛi lɛ fɛɛ ná miishɛɛ babaoo.  Be ni amɛshɛ Yerusalem lɛ, asafo lɛ kɛ bɔfoi lɛ kɛ onukpai lɛ here amɛ hiɛmɛɛ, ni amɛgba amɛ nibii pii ni Nyɔŋmɔ tsɔ amɛnɔ efee lɛ.  Shi Farisifoi lɛ ajamɔ kuu lɛ mli bii lɛ ateŋ mɛi komɛi ni ehe eye lɛ te shi kɛjɛ amɛsɛii anɔ ni amɛkɛɛ: “Ehe miihia ni afolɔ amɛ ketia ni afã amɛ koni amɛye Mose Mla lɛ nɔ.”+  No hewɔ lɛ, bɔfoi lɛ kɛ onukpai lɛ bua amɛhe naa koni amɛtao sane nɛɛ mli.  Be ni amɛsusu nii ahe* saŋŋ lɛ, Petro te shi ni ekɛɛ amɛ akɛ: “Ataamɛi, nyɛmimɛi, nyɛle jogbaŋŋ akɛ kɛjɛ mra mli tɔ̃ɔ Nyɔŋmɔ hala mi kɛjɛ nyɛteŋ akɛ minaa esa akɛ jeŋmajiaŋbii lɛ anu wiemɔ lɛ he sane kpakpa lɛ yɛ ni amɛhe amɛye.+  Ni Nyɔŋmɔ, mɔ ni le tsuiŋ lɛ,+ hã amɛ mumɔ krɔŋkrɔŋ tamɔ bɔ ni ehã wɔ hu lɛ nɔŋŋ,+ ni ekɛye odase.  Ni ehãaa srɔto ko kwraa ahi wɔ kɛ amɛ teŋ,+ shi moŋ etsɔ hemɔkɛyeli nɔ ehã amɛtsuii ahe tse.+ 10  No hewɔ lɛ, agbɛnɛ, mɛni hewɔ nyɛkɛ kɔɔŋtso ni wɔ kɛ wɔtsɛmɛi lɛ fɛɛ nyɛɛɛ atere lɛ fɔ̃ɔ kaselɔi lɛ akuɛ nɔ+ kɛwoɔ Nyɔŋmɔ mlifu lɛ?+ 11  Nɔ ni tamɔɔɔ nakai lɛ, wɔyɛ hemɔkɛyeli akɛ Nuŋtsɔ Yesu dromɔ lɛ nɔ atsɔɔ ahereɔ wɔyiwala,+ ni amɛ hu amɛheɔ amɛyeɔ nakai nɔŋŋ.”+ 12  Kɛkɛ ni amɛ fɛɛ amɛfee diŋŋ, ni amɛbɔi Barnaba kɛ Paulo toiboo, ni Barnaba kɛ Paulo gba amɛ okadii kɛ naakpɛɛ nii babaoo ni Nyɔŋmɔ tsɔ amɛnɔ efee yɛ jeŋmaji lɛ ateŋ lɛ. 13  Be ni amɛwie amɛgbe naa lɛ, Yakobo here nɔ ekɛɛ: “Ataamɛi, nyɛmimɛi, nyɛboa mi toi. 14  Simeon+ egba wɔ fitsofitso bɔ ni Nyɔŋmɔ gbala ejwɛŋmɔ kɛba jeŋmaji lɛ anɔ klɛŋklɛŋ kwraa koni ehala amɛteŋ mɛi komɛi kɛhã egbɛ́i lɛ.+ 15  Ni enɛ kɛ Gbalɔi lɛ awiemɔi lɛ kpãa gbee, tamɔ bɔ ni aŋma lɛ, akɛ: 16  ‘Nibii nɛɛ asɛɛ lɛ maku misɛɛ maba ni mawó David mama tsũ* ni egbee shi lɛ nɔ mama shi ekoŋŋ; masaa ehei ni efite lɛ ni masaa mama shi, 17  koni mɛi ni baashwɛ lɛ kɛ jeŋmajiaŋbii lɛ fɛɛ ni akɛ migbɛ́i tsɛɔ amɛ lɛ anyɛ atao Yehowa* sɛɛ gbɛ kɛ hiɛdɔɔ, Yehowa* kɛɛ, lɛ ji mɔ ni feɔ nibii nɛɛ+ 18  ni ale kɛjɛ blema tɔ̃ɔ lɛ.’+ 19  No hewɔ lɛ, miyiŋkpɛɛ* ji akɛ, akagbá mɛi ni jɛ jeŋmajiaŋbii lɛ ateŋ ni miiba Nyɔŋmɔ ŋɔɔ lɛ anaa,+ 20  shi moŋ aŋma amɛ akɛ, amɛtsi amɛhe kɛje nibii ni amagai ebule ahe,+ kɛje ajwamaŋbɔɔ* he,+ kɛje kooloi ni ashɔ̃tɔ* ahe, kɛ agbɛnɛ hu kɛje lá he.+ 21  Ejaakɛ kɛjɛ blema beebe lɛ, Mose yɛ mɛi ni shiɛɔ Mose he sane yɛ maŋ fɛɛ maŋ mli, ni Hejɔɔmɔ Gbi fɛɛ Hejɔɔmɔ Gbi lɛ, akaneɔ eniŋmai lɛ atsɔɔ mɛi yɛ kpeehei lɛ.”+ 22  Kɛkɛ ni bɔfoi lɛ kɛ onukpai lɛ kɛ asafo muu lɛ fɛɛ kpɛ mli akɛ amɛbaahala hii komɛi kɛjɛ amɛteŋ ni amɛtsu amɛ kɛ Paulo kɛ Barnaba kɛya Antiokia; amɛtsu Yuda ni atsɛɔ lɛ Barsaba lɛ, kɛ Sila,+ mɛi ni nyiɛɔ hiɛ yɛ nyɛmimɛi lɛ ateŋ lɛ. 23  Nɔ ni amɛŋma ni amɛtsɔ amɛnɔ amɛkɛmaje lɛ nɛ: “Bɔfoi lɛ kɛ onukpai lɛ, nyɛnyɛmimɛi lɛ, kɛhã nyɛmimɛi ni yɔɔ Antiokia,+ kɛ Siria, kɛ Kilikia ni jɛ jeŋmajiaŋbii lɛ ateŋ lɛ: Wɔmiiŋa nyɛ! 24  Akɛni wɔnu akɛ wɔteŋ mɛi komɛi ba nyɛŋɔɔ ni amɛkɛ nɔ ni amɛbawie lɛ bagbá nyɛnaa,+ ni amɛmiibɔ mɔdɛŋ akɛ amɛkpãtã nyɛhiɛ,* eyɛ mli akɛ wɔkɛ gbɛtsɔɔmɔ ko hãko amɛ lɛ, hewɔ lɛ, 25  wɔ fɛɛ wɔkpɛ mli akɛ wɔbaahala hii wɔfata wɔsuɔlɔi Barnaba kɛ Paulo he ni wɔtsu amɛ nyɛŋɔɔ, 26  hii enyɔ nɛɛ kɛ amɛwala* ehã yɛ wɔ-Nuŋtsɔ Yesu Kristo gbɛ́i lɛ hewɔ.+ 27  No hewɔ lɛ, wɔmiitsu Yuda kɛ Sila, koni amɛ hu amɛkɛ amɛnaabu ababɔ nyɛ nibii nɛɛ nɔŋŋ ahe amaniɛ.+ 28  Ejaakɛ esa mumɔ krɔŋkrɔŋ+ lɛ kɛ wɔ hu wɔhiɛ akɛ wɔkɛ jatsu kroko akafɔ̃ nyɛnɔ dɔŋŋ, akɛ ja nibii ni he hiaa nɛɛ kɛkɛ: 29  akɛ nyɛyaa nɔ nyɛtsia nyɛhe kɛjea nibii ni akɛshã afɔle ahã amagai ahe,+ kɛjea lá he,+ kɛjea kooloi ni ashɔ̃tɔ* ahe,+ kɛ agbɛnɛ hu kɛjea ajwamaŋbɔɔ* he.+ Kɛ́ nyɛtee nɔ nyɛtsi nyɛhe kwraa kɛje nibii nɛɛ ahe lɛ, ebaahi ehã nyɛ. Nyɛhia shi jogbaŋŋ!”* 30  No hewɔ lɛ, be ni awo hii nɛɛ gbɛ lɛ, amɛkpeleke shi kɛtee Antiokia, ni amɛbua asafo muu lɛ fɛɛ naa ni amɛkɛ wolo lɛ hã amɛ. 31  Be ni amɛkane lɛ, amɛmii shɛ amɛhe waa diɛŋtsɛ yɛ hewalɛwoo lɛ hewɔ. 32  Ni Yuda kɛ Sila lɛ, akɛni amɛji gbalɔi hu hewɔ lɛ, amɛhã wiemɔi babaoo kɛwo nyɛmimɛi lɛ hewalɛ, ni amɛwaje amɛ.+ 33  Be ni amɛye be ko yɛ jɛmɛ lɛ, nyɛmimɛi lɛ wo amɛ gbɛ yɛ toiŋjɔlɛ mli kɛtee mɛi ni tsu amɛ lɛ aŋɔɔ. 34 * —— 35  Shi Paulo kɛ Barnaba hi Antiokia ni amɛtsɔɔ nii ni amɛkɛ mɛi krokomɛi babaoo hu fee ekome kɛjaje Yehowa* wiemɔ lɛ he sane kpakpa lɛ amɛtsɔɔ. 36  Gbii komɛi asɛɛ lɛ, Paulo kɛɛ Barnaba akɛ: “Agbɛnɛ* hã wɔku wɔsɛɛ wɔyasara nyɛmimɛi ni yɔɔ maŋ fɛɛ maŋ ni wɔyajaje Yehowa* wiemɔ lɛ yɛ mli lɛ, ni wɔkwɛ bɔ ni amɛyɔɔ.”+ 37  Barnaba ŋmɔ eyiŋ kpɔ akɛ ebaaŋɔ Yohane, mɔ ni atsɛɔ lɛ Marko+ lɛ efata amɛhe kɛya. 38  Shi Paulo sumɔɔɔ akɛ eŋɔɔ lɛ kɛfataa amɛhe, akɛni eshi amɛ yɛ Pamfilia ni ekɛ amɛ eyatsuuu nitsumɔ lɛ hewɔ.+ 39  Kɛkɛ ni mlifu ni naa wa te shi yɛ amɛteŋ, ni no hã amɛgbála amɛmli; ni Barnaba+ ŋɔ Marko efata ehe ni amɛyabote lɛlɛ mli kɛtee Kipro. 40  Paulo hala Sila, ni be ni nyɛmimɛi lɛ tu Paulo amɛwo Yehowa* dromɔ lɛ mli lɛ, eyiŋ etee.+ 41  Eyakpa Siria kɛ Kilikia eyawaje asafoi lɛ.

Shishigbɛ Niŋmaa

Loo “naataamɔ.”
Loo “amɛtaa naa.”
Loo “agba; shĩa.”
Loo “misusumɔ.”
Greek mli lɛ, por·neiʹa. Kwɛmɔ Wiemɔi Titrii Amligbalamɔ lɛ, “Ajwamaŋbɔɔ.”
Loo “kooloi ni agbe shi afɔseko amɛlá ashwieko shi.”
Loo “nyɛsusumai ahiɛ.”
Loo “amɛsusumai.”
Loo “kooloi ni agbe shi afɔseko amɛlá ashwieko shi.”
Greek mli lɛ, por·neiʹa. Kwɛmɔ Wiemɔi Titrii Amligbalamɔ lɛ, “Ajwamaŋbɔɔ.”
Loo “Nyɛkɛ shihilɛ jurɔ.”
Shishitsɔɔmɔi komɛi kɛɔ akɛ, “Bɔ fɛɛ bɔ ni fee lɛ.”