Abɛi 21:1-31

  • Yehowa kudɔɔ maŋtsɛ tsui (1)

  • Nifeemɔ ni ja hi fe afɔle (3)

  • Mɔdɛŋbɔɔ kɛ omanyeyeli baa (5)

  • Mɔ ni booo mɔ ni bɛ yelikɛbualɔ lɛ toi lɛ, aboŋ lɛ hu toi (13)

  • Hiɛshikamɔ ko bɛ ni teɔ shi eshiɔ Yehowa (30)

21  Maŋtsɛ tsui tamɔ fai yɛ Yehowa dɛŋ.+ Ekudɔɔ* lɛ kɛyaa he fɛɛ he ni esumɔɔ.*+  2  Gbɔmɔ gbɛi fɛɛ ja yɛ ehiɛ,+Shi Yehowa ji mɔ ni taoɔ tsuii* amli.+  3  Nifeemɔ ni hi kɛ nifeemɔ ni ja lɛ,Esaa Yehowa hiɛ fe afɔle.+  4  Henɔwomɔ hiŋmɛii kɛ tsui ni wóɔ ehe nɔ—Kane ni tsɔɔ mɛi fɔji agbɛ lɛ, esha ni.+  5  Mɔdɛŋbɔlɔ gbɛjianɔtoi baaye omanye kɛ̃,*+Shi mɛi fɛɛ ni yeɔ amɛhe oyai lɛ, amɛbaaye ohia kɛ̃.+  6  Jwetrii ni akɛ lilɛi ni maleɔ náa lɛ,Etamɔ kɔɔyɔɔ hakumɔ* ni sɛɛ etsɛɛɛ, eji tsɔne ni gbeɔ mɔ.* +  7  Mɛi fɔji ayiwalɛ baabɛɛ amɛ eshwie,+Ejaakɛ amɛyeee jalɛ sane.  8  Gbɔmɔ ni sane yɔɔ ehe lɛ, egbɛ ekɔ̃dɔ̃,Shi gbɔmɔ ni sane ko bɛ ehe* lɛ, enifeemɔ ja.+  9  Ehi akɛ obaayahi tsuyiteŋ koji lɛ eko mliFe nɔ ni okɛ yoo* béilɔ* baahi shĩa kome mli.+ 10  Mɔ fɔŋ* shweɔ efɔŋ;+Enaaa enyɛmi gbɔmɔ mɔbɔ.+ 11  Kɛ́ agbala buulu* toi lɛ, mɔ ni jwɛŋmɔ esako* lɛ hiɛ kãa shi,Ni kɛ́ hiɛshikalɔ ná sɛɛyoomɔ lɛ, eleɔ nii.* + 12  Jalɛ Nyɔŋmɔ lɛ kwɛɔ mɔ fɔŋ lɛ shĩa lɛ;Ewóɔ mɛi fɔji etswaa shi ni amɛhiɛ kpãtãa.+ 13  Mɔ fɛɛ mɔ ni tsimɔɔ etoi koni ekanu mɔ ni bɛ yelikɛbualɔ lɛ bolɔmɔ lɛ,Lɛ hu ebaabolɔ ni afoŋ edaaŋ.+ 14  Nikeenii ni akɛhãa yɛ teemɔŋ lɛ, ebaa mlifu shi,+Ni nyɔɔŋnii ni akɛhãa yɛ teemɔŋ* lɛ, ejɔɔ mlila ni naa wa he. 15  Kɛ́ jalɔ miiye jalɛ sane lɛ, enáa miishɛɛ,+Shi eji nɔ ko ni ehiii kwraa kɛhã mɛi ni feɔ efɔŋ lɛ. 16  Mɔ ni gbaa afã kɛjeɔ sɛɛyoomɔ gbɛ lɛ nɔ lɛ,Ebaayajɔɔ ehe yɛ mɛi ni egboi ni bɛ hewalɛ dɔŋŋ lɛ ateŋ.+ 17  Mɔ ni sumɔɔ ni eshwɛ ehiɛ lɛ,* ebaaye ohia;+Mɔ ni sumɔɔ wain kɛ mu lɛ, enáŋ nii. 18  Gbɔmɔ fɔŋ lɛ, eji kpɔmɔnɔ kɛhã jalɔ,Ni mɔ ni yeee anɔkwa lɛ, abaaŋɔ lɛ yɛ jalɔ najiaŋ.+ 19  Ehi akɛ obaayahi ŋa nɔ,Fe nɔ ni okɛ yoo* béilɔ* ni suɔ mɔ tsui baahi shi.+ 20  Jwetri ni jara wa kɛ mu yɛ hiɛshikalɔ shĩa,+Shi kwashia baakpãtã nii ni eyɔɔ lɛ hiɛ.* + 21  Mɔ fɛɛ mɔ ni tiuɔ jalɛ nifeemɔ kɛ suɔmɔ ni tsakeee sɛɛ lɛ,Ebaatsɔ jalɔ, ni ebaaná wala, kɛ anunyam.+ 22  Hiɛshikalɔ baanyɛ akwɔ kãkãlɔi amaŋ*Ni ekumɔ hewalɛ ni amɛkɛ amɛhiɛ fɔ̃ɔ nɔ lɛ eshwie shi.+ 23  Mɔ ni mɔɔ enaabu kɛ elilɛi mli lɛ,Enáaa* sane.+ 24  Mɔ ni yeɔ etsuinaa sane kɛ naafuutsɛ, nɛkɛ ji bɔ ni atsɛɔMɔ ni haa shi ni esheee nɔ ko gbeyei.+ 25  Nɔ ni anihaolɔ shweɔ lɛ baagbe lɛ,Ejaakɛ ekɛ eniji tsuuu nii.+ 26  Gbi muu fɛɛ lɛ, ekɛ hiɛdɔɔ shweɔ ni ená nii babaoo,Shi jalɔ lɛ, ehãa mɔ nɔ, ni esũuu enine.+ 27  Mɛi fɔji afɔle lɛ, nihiinii ni.+ Aahu ni ekɛaahã kɛ jwɛŋmɔ gbonyo!* 28  Amale odasefonyo hiɛ baakpãtã,+Shi mɔ ni boɔ sane toi lɛ, eyeɔ odase jogbaŋŋ.* 29  Gbɔmɔ fɔŋ kwaa efeɔ ekãa,+Shi jalɔ gbɛ ji nɔ ni baadamɔ shi.*+ 30  Hiɛshikamɔ ko loo sanesɛɛkɔmɔ ko loo ŋaawoo* ko bɛ ni teɔ shi eshiɔ Yehowa.+ 31  Asaa okpɔŋɔ atoɔ ta gbi,+Shi yiwalaheremɔ lɛ, Yehowa dɛŋ ejɛɔ.+

Shishigbɛ Niŋmaa

Ni ji, Yehowa.
Ni ji, Yehowa.
Loo “susumɔi.”
Loo “ahe baaba sɛɛnamɔ kɛ̃.”
Loo “afua; lamɔ.”
Shishitsɔɔmɔi komɛi kɛɔ akɛ, “Etamɔ afua ni sɛɛ etsɛɛɛ kɛhã mɛi ni taoɔ gbele lɛ.”
Loo “gbɔmɔ ni he tse.”
Loo “ŋa.”
Loo “ni wieɔ nii ahe; ni suɔ mɔ tsui.”
Loo “Mɔ fɔŋ susuma.”
Loo “hefɛoyelɔ.”
Loo “mɔ ni bɛ niiashikpamɔ.”
Loo “eleɔ nɔ ni esa akɛ efee.”
Hebri sht. ŋm., “nyɔɔŋnii ni hɔ miinaa.”
Loo “sumɔɔ shwɛmɔ-kɛ-ŋɔɔmɔ lɛ.”
Loo “ŋa.”
Loo “ni wieɔ nii ahe.”
Hebri sht. ŋm., “baami nii ni eyɔɔ.”
Loo “baanyɛ eye kãkãlɔi amaŋ nɔ kunim.”
Loo “Esusuma náaa.”
Loo “ekɛaahã be ni eeba ejeŋ yɛ gbɛ ni bɛ hiŋmɛi nɔ lɛ nɔ!”
Hebri sht. ŋm., “ewieɔ kɛyaa naanɔ.”
Loo “jalɔ ji mɔ ni hãa lɛ diɛŋtsɛ egbɛ damɔɔ shi.”
Loo “gbɛjianɔtoo; yiŋtoo.”