5 Mose 26:1-19

  • Klɛŋklɛŋ yibii ni akɛhãa akɛ afɔle (1-11)

  • Nibii amlijai nyɔŋma mli ekome kroko hu (12-15)

  • Israel ji Yehowa nii ni eshwɛɛɛ he kwraa (16-19)

26  “Kɛ́ oná oyashɛ shikpɔŋ ni Yehowa, o-Nyɔŋmɔ lɛ, kɛhãa bo akɛ gboshinii lɛ nɔ, ni oŋɔ akɛ onɔ, ni ohi nɔ lɛ,  jiemɔ shikpɔŋ lɛ nɔ nibaa nii* lɛ fɛɛ mli klɛŋklɛŋ yibii ni obaakpa yɛ oshikpɔŋ ni Yehowa, o-Nyɔŋmɔ lɛ, kɛhãa bo lɛ nɔ lɛ eko, ní okɛwo kɛntɛŋ mli ní oya he ni Yehowa, o-Nyɔŋmɔ lɛ, baahala koni ehã egbɛ́i lɛ ahi jɛmɛ lɛ.+  Yaa osɔfo ni sɔmɔɔ yɛ nakai gbii lɛ amli lɛ ŋɔɔ ní oyakɛɛ lɛ akɛ, ‘Ŋmɛnɛ lɛ, miikɛɛ Yehowa, o-Nyɔŋmɔ lɛ akɛ, miná mibashɛ shikpɔŋ ni Yehowa kã wɔtsɛmɛi lɛ kitã akɛ ekɛbaahã wɔ lɛ nɔ.’+  “Kɛkɛ lɛ, osɔfo lɛ baahe kɛntɛŋ lɛ yɛ odɛŋ ní ekɛma Yehowa, o-Nyɔŋmɔ lɛ, afɔleshaa latɛ lɛ hiɛ.  Ni owie yɛ Yehowa, o-Nyɔŋmɔ lɛ hiɛ akɛ, ‘Aramnyo+ ni tsomlo kɛnyiɛ* ji mipapa, ni ekpeleke shi kɛtee Ejipt+ ni eyahi jɛmɛ akɛ gbɔ, lɛ kɛ eshĩabii fioo ko.+ Shi etsɔ maŋ kpeteŋkpele ni he wa, ni yi fa yɛ jɛmɛ.+  Ni Ejiptbii lɛ fee wɔ niseniianii ni amɛwa wɔ yi ni amɛye wɔ nyɔŋ waa.+  Enɛ hewɔ lɛ, wɔbɔi bolɔmɔ kɛ Yehowa, wɔtsɛmɛi a-Nyɔŋmɔ lɛ tsɛmɔ, ni Yehowa nu wɔgbee, ni ekwɛ wɔmanehulu kɛ wɔhaomɔ kɛ wɔyi ni awaa lɛ.+  Naagbee lɛ, Yehowa kɛ nineshiwalɛ kɛ nine ni akpã mli+ kɛ nifeemɔi ni yɔɔ gbeyei kɛ okadii kɛ naakpɛɛ nii jie wɔ kɛje Ejipt.+  Ni ekɛ wɔ ba biɛ nɛɛ, ni ekɛ shikpɔŋ nɛɛ hã wɔ, shikpɔŋ ni mliki kɛ wo hoɔ yɛ nɔ lɛ.+ 10  Agbɛnɛ, mikɛ shikpɔŋ ni Yehowa kɛhã mi lɛ nɔ nibaa nii lɛ amli klɛŋklɛŋ yibii lɛ eba.’+ “Okɛma Yehowa, o-Nyɔŋmɔ lɛ hiɛ, ní okoto shi yɛ Yehowa, o-Nyɔŋmɔ lɛ hiɛ. 11  Ni omii ashɛ ohe yɛ nibii kpakpai fɛɛ ni Yehowa, o-Nyɔŋmɔ lɛ, kɛdro bo kɛ oshĩabii lɛ hewɔ, bo kɛ Levinyo kɛ gbɔ ni yɔɔ nyɛteŋ lɛ.+ 12  “Kɛ́ ojie onibaa nii lɛ amlijai nyɔŋma mli ekomekomei+ lɛ fɛɛ yɛ afi ni ji etɛ, ni ji mlijai nyɔŋma mli ekomekome afi lɛ mli ogbe naa lɛ, okɛhã Levinyo kɛ gbɔ kɛ gbekɛ ni bɛ tsɛ* kɛ yoo okulafo, ní amɛye amɛtɔrɔ yɛ omaji* lɛ amli.+ 13  Ni owie yɛ Yehowa, o-Nyɔŋmɔ lɛ hiɛ akɛ, ‘Mijie gbɛfaŋnɔ krɔŋkrɔŋ lɛ kɛje mishĩa lɛ, ni mikɛhã Levinyo kɛ gbɔ kɛ gbekɛ ni bɛ tsɛ* kɛ yoo okulafo,+ tamɔ bɔ ni ofã mi lɛ pɛpɛɛpɛ. Mikuko okitãi lɛ amli, ni mikuko mihiɛ mishwieko nɔ hu. 14  Miyeko eko be ni miiye awerɛho, ni mijieko eko be ni mihe tseee, ni mikɛ eko hu hãko yɛ gbohii ahewɔ. Mibo Yehowa, mi-Nyɔŋmɔ lɛ, gbee toi, ni mifee nɔ fɛɛ nɔ ni ofã mi lɛ. 15  Agbɛnɛ, jɛɛ ŋwɛi ni ji oshihilɛhe krɔŋkrɔŋ lɛ okwɛ, ní ojɔɔ omaŋ Israel kɛ shikpɔŋ ni okɛhã wɔ lɛ,+ shikpɔŋ ni mliki kɛ wo hoɔ yɛ nɔ lɛ,+ tamɔ bɔ ni okã wɔtsɛmɛi lɛ kitã lɛ.’+ 16  “Ŋmɛnɛ gbi nɛɛ, Yehowa, o-Nyɔŋmɔ lɛ, miifã bo ni oye taomɔ nii kɛ yiŋkpɛi* nɛɛ anɔ. Okɛ otsui fɛɛ kɛ osusuma* fɛɛ abo toi ní oye nɔ.+ 17  Ŋmɛnɛ gbi nɛɛ, onine eshɛ Yehowa wiemɔ nɔ akɛ, ebaatsɔ o-Nyɔŋmɔ, kɛji onyiɛ egbɛi lɛ anɔ ni oye etaomɔ nii+ kɛ ekitãi+ kɛ eyiŋkpɛi* lɛ anɔ,+ ni obo egbee toi lɛ. 18  Ni ŋmɛnɛ gbi nɛɛ, Yehowa nine eshɛ owiemɔ nɔ akɛ, obaatsɔ emaŋ, enii ni eshwɛɛɛ he kwraa,+ tamɔ bɔ ni ewo bo shi lɛ, ni akɛ, obaaye ekitãi lɛ fɛɛ anɔ, 19  ni ewo shi akɛ, ebaawó onɔ gojoo fe jeŋmaji krokomɛi fɛɛ ni efee lɛ,+ ni ebaahã oná yijiemɔ kɛ gbɛ́i kɛ anunyam, kɛji ofee ohe maŋ krɔŋkrɔŋ ohã Yehowa, o-Nyɔŋmɔ lɛ.”+

Shishigbɛ Niŋmaa

Hebri sht. ŋm., “shikpɔŋ lɛ nɔ yibii.”
Shishitsɔɔmɔi komɛi kɛɔ akɛ, “Aramnyo ni hiɛ miikpãtã.”
Loo “awusã.”
Hebri sht. ŋm., “ogbói.”
Loo “awusã.”
Loo “kojomɔi.”
Loo “ekojomɔi.”