5 Mose 15:1-23

  • Daa afii kpawo lɛ, afoɔ nyɔmɔ ni mɔ ko hiɛ lɛ mli (1-6)

  • Ye obua ohiafoi (7-11)

  • Daa afii kpawo lɛ, ahãa nyɔji yeɔ amɛhe (12-18)

    • Akɛ dade kɛ enaa piɔpiɔ gbuɔ nyɔŋ toi (16, 17)

  • Afee kooloi akromɔbii krɔŋkrɔŋ (19-23)

15  “Daa afii kpawo naagbee lɛ, hã mɛi aye amɛhe.+  Nɛkɛ ji bɔ ni ahã mɛi aye amɛhe ahã: Mɔ fɛɛ mɔ ni kɛ nɔ ko efa enaanyo ko lɛ ahã enaanyo lɛ aye ehe kɛjɛ nyɔmɔ ni ehiɛ lɛ lɛ mli. Ekabi enaanyo loo enyɛmi lɛ nyɔmɔ ni ehiɛ lɛ lɛ, ejaakɛ abaashiɛ heyeli ahã Yehowa.+  Obaanyɛ obi gbɔ nyɔmɔ,+ shi nyɔmɔ fɛɛ nyɔmɔ ni onyɛmi hiɛ bo lɛ, kaabi lɛ.  Shi esaaa akɛ nyɛteŋ mɔ ko yeɔ ohia, ejaakɛ bɔ fɛɛ bɔ ni fee lɛ, Yehowa baajɔɔ bo+ yɛ shikpɔŋ ni Yehowa, o-Nyɔŋmɔ lɛ, kɛhãa bo akɛ gboshinii lɛ nɔ,  shi ja obo Yehowa, o-Nyɔŋmɔ lɛ, gbee toi kɛmɔ shi, ní oye kitãi nɛɛ fɛɛ ni miwoɔ bo ŋmɛnɛ gbi nɛɛ anɔ dã.+  Ejaakɛ Yehowa, o-Nyɔŋmɔ lɛ, baajɔɔ bo tamɔ bɔ ni ewo bo shi lɛ, ni okɛ onii baafa* jeŋmaji babaoo, shi bo lɛ, ehe ebahiaŋ ni oyafa nɔ ko;+ ni obaaye jeŋmaji babaoo anɔ, shi amɛ lɛ, amɛyeŋ onɔ.+  “Kɛ́ onyɛmimɛi lɛ ateŋ mɔ ko batsɔ ohiafo yɛ nyɛteŋ yɛ omaji lɛ eko mli yɛ shikpɔŋ ni Yehowa, o-Nyɔŋmɔ lɛ, kɛhãa bo lɛ nɔ lɛ, kaahã oyitsoŋ* miiwa ni kaamia odɛŋ hu yɛ onyɛmi ohiafo lɛ nɔ.+  Shi moŋ, odɛŋ akpɔ ahã lɛ* tswaa,+ ni bɔ fɛɛ bɔ ni fee lɛ, faa* lɛ nɔ fɛɛ nɔ ni he hiaa lɛ loo nɔ ni ebɛ lɛ.  Kwɛmɔ jogbaŋŋ ní okaná susumɔ fɔŋ nɛɛ yɛ otsui mli akɛ, ‘Afi ni ji kpawo lɛ, ni ji afi ni ahãa mɛi yeɔ amɛhe* lɛ eshɛ etã,’+ ni no hewɔ lɛ ofeee onyɛmi ohiafo lɛ ejurɔ, ni ohãaa lɛ nɔ ko nɔ ko. Kɛ́ ebolɔ etsɛ Yehowa ewo bo lɛ, no baatsɔ esha yɛ ogbɛfaŋ.+ 10  Hã lɛ nii tswaa,+ ni kaahã* lɛ nii kɛ mligbigbilimɔ, ejaakɛ enɛ hewɔ Yehowa, o-Nyɔŋmɔ lɛ, baajɔɔ nɔ fɛɛ nɔ ni ofeɔ kɛ nɔ fɛɛ nɔ ni otsuɔ lɛ nɔ lɛ.+ 11  Ejaakɛ ohiafoi baahi shikpɔŋ lɛ nɔ be fɛɛ be.+ No hewɔ ni mifãa bo akɛ, ‘Odɛŋ akpɔ ahã* onyɛmi ní naa nɔ ní miiye ohia yɛ oshikpɔŋ lɛ nɔ lɛ.’+ 12  “Kɛ́ ahɔ̃ɔ onyɛmimɛi Hebribii lɛ ateŋ mɔ ko ahã bo, nuu jio, yoo jio, ni esɔmɔ bo afii ekpaa lɛ, no lɛ, afi ni ji kpawo lɛ nɔ lɛ, hã eye ehe.+ 13  Ni kɛ́ ohã eye ehe lɛ, kaawo lɛ gbɛ ni etee kɛ edɛ̃ folo. 14  Hã lɛ otoi lɛ kɛ oŋmaagbeemɔhe nii lɛ kɛ obui ni oŋaa mu loo wain yɛ mli lɛ amli nii lɛ eko tswaa. Bɔ pɛ ni Yehowa, o-Nyɔŋmɔ lɛ, ejɔɔ bo lɛ, nakai ohã lɛ. 15  Kaimɔ akɛ bo hu oyatsɔ nyɔŋ yɛ Ejipt shikpɔŋ lɛ nɔ, ni Yehowa, o-Nyɔŋmɔ lɛ, kpɔ̃ bo. No hewɔ ni mifãa bo ŋmɛnɛ akɛ ofee enɛ lɛ. 16  “Shi kɛ́ ekɛɛ bo akɛ, ‘Mishiŋ oŋɔɔ miyaŋ!’ akɛni esumɔɔ bo kɛ oshĩabii lɛ, ni emii shɛ ehe hu be mli ni eyɔɔ oŋɔɔ lɛ hewɔ lɛ,+ 17  no lɛ, kɔ dade kɛ enaa piɔpiɔ* ni okɛgbu etoi kɛmɔ shinaa lɛ, ní etsɔ onyɔŋ ewala gbii abɔ fɛɛ. Nakai nɔŋŋ ofee onyɔŋ yoo. 18  Kɛ́ oŋmɛɛ ehe ni eshi bo etee lɛ, kaana no akɛ nɔ ko ni wa, ejaakɛ sɔɔmɔ ni esɔmɔ bo afii ekpaa lɛ tamɔ apaafonyo nitsumɔ ni akɛbɔ he toi enyɔ, ni Yehowa, o-Nyɔŋmɔ lɛ, jɔɔ bo yɛ nɔ fɛɛ nɔ ni atsu lɛ mli. 19  “Feemɔ otsina kɛ otoo kromɔbi fɛɛ kromɔbi ni ji nuu lɛ krɔŋkrɔŋ ohã Yehowa, o-Nyɔŋmɔ lɛ.+ Okɛ otsina* kromɔbi lɛ akatsu nitsumɔ ko nitsumɔ ko, ni kaaku otoo kromɔbi hu hetsɔi. 20  Bo kɛ oshĩabii lɛ aye yɛ Yehowa, o-Nyɔŋmɔ lɛ, hiɛ daa afi, yɛ he ni Yehowa baahala lɛ.+ 21  Shi kɛ́ kpa ko yɛ ehe lɛ—akpake ni jio, shwilamɔ ni jio, aloo kpa kroko ni ehiii kwraa jio—okɛkashã afɔle ohã Yehowa, o-Nyɔŋmɔ lɛ.+ 22  Ye yɛ omaji* lɛ amli, tamɔ adowa loo baayelɔ nɔŋŋ, mɔ ni he tseee kɛ mɔ ni he tse fɛɛ baanyɛ aye.+ 23  Shi kaaye elá lɛ;+ tsi oshwie shikpɔŋ tamɔ nu.+

Shishigbɛ Niŋmaa

Loo “obaahe awaba ni okɛ onii baafa.”
Hebri sht. ŋm., “otsuiŋ.”
Hebri sht. ŋm., “gbɛɛ odɛŋ ohã lɛ.”
Loo “hemɔ awaba ni ofa.”
Eeenyɛ efee akɛ, eji afi ni atsiɔ nyɔmɔ ni mɔ ko hiɛ lɛ bimɔ atoɔ loo afoɔ nyɔmɔ lɛ mli kwraa.
Hebri sht. ŋm., “otsui akahã.”
Hebri sht. ŋm., “gbɛɛ odɛŋ ohã.”
Loo “fitii.”
Hebri sht. ŋm., “otsinanuu.”
Hebri sht. ŋm., “ogbói.”