4 Mose 8:1-26

  • Aaron su kanei kpawo lɛ (1-4)

  • Atsuu Levibii lɛ ahe, amɛbɔi sɔɔmɔ (5-22)

  • Afii ni kɛ́ Levinyo ko ye lɛ, esɔmɔɔ loo ekpaa sɔɔmɔ (23-26)

8  Yehowa kɛ Mose wie ekɛɛ:  “Okɛ Aaron awie ni okɛɛ lɛ akɛ, ‘Kɛ́ osu kanei lɛ, hã kanei kpawo lɛ akpɛ kanetso lɛ hiɛgbɛ.’”+  No hewɔ lɛ, Aaron fee enɛ: Esu kanetso lɛ kanei lɛ koni amɛkpɛ kanetso+ lɛ hiɛgbɛ, tamɔ bɔ ni Yehowa fã Mose lɛ pɛpɛɛpɛ.  Nɛkɛ ji bɔ ni afee kanetso lɛ: Akɛ hamlɛ tswia shika tsuru kɛfee; kɛjɛ eteŋtso lɛ nɔ kɛyashi efɔfɔii lɛ anɔ lɛ, hamlɛ akɛtswia kɛfee.+ Afee kanetso lɛ yɛ ninaa+ ni Yehowa jie etsɔɔ Mose lɛ naa.  Yehowa kɛ Mose wie ekoŋŋ ekɛɛ:  “Ŋɔɔ Levibii lɛ yɛ Israelbii lɛ ateŋ, ní otsuu amɛhe.+  Bɔ ni otsuu amɛhe nɛ: Okɛ nu ni akɛtsuɔ mɔ he kɛjɛɔ esha mli ashwã amɛnɔ, ni amɛkɛ kakla ni akɛshɛɔ yi ashɛ amɛgbɔmɔtso muu lɛ fɛɛ he, amɛfɔ amɛtadei lɛ ahe, ní amɛtsuu amɛhe.+  No sɛɛ lɛ, amɛŋɔ tsinanuu*+ kɛ ehe ŋmaa* afɔle+ ni ji ashikishaŋ kpakpa ni akɛ mu efutu, ní oŋɔ tsinanuu* kroko ní akɛshã esha afɔle.+  Ni okɛ Levibii lɛ aba kpee buu lɛ hiɛ, ni obua Israelbii lɛ fɛɛ anaa.+ 10  Kɛ́ okɛ Levibii lɛ ba Yehowa hiɛ lɛ, Israelbii lɛ kɛ amɛniji ashwie Levibii+ lɛ anɔ. 11  Ni Aaron aŋɔ Levibii lɛ ahã* yɛ Yehowa hiɛ akɛ fɔ̃ɔ afɔle+ ni jɛ Israelbii lɛ adɛŋ, ni amɛ amɛbaatsu Yehowa sɔɔmɔ lɛ he nii.+ 12  “Agbɛnɛ, Levibii lɛ kɛ amɛniji ashwie tsinahii lɛ ayiteŋ.+ No sɛɛ lɛ, okɛ ekome ahã Yehowa akɛ esha afɔle, kɛ ekroko lɛ hu akɛ shãa afɔle koni okɛkpãtã+ ohã Levibii lɛ. 13  Ni ohã Levibii lɛ adamɔ Aaron kɛ ebihii lɛ ahiɛ, ni oŋɔ amɛ* ohã Yehowa akɛ fɔ̃ɔ afɔle. 14  Tse Levibii lɛ yɛ Israelbii lɛ ahe, ní Levibii lɛ atsɔ minɔ.+ 15  No sɛɛ lɛ, Levibii lɛ aba ni amɛbasɔmɔ yɛ kpee buu lɛ naa. Nɛkɛ ji bɔ ni otsuu amɛhe, ni oŋɔ amɛ* ohã akɛ fɔ̃ɔ afɔle. 16  Ejaakɛ amɛji mɛi ni akɛhã, akɛ amɛ ehã mi kɛjɛ Israelbii lɛ ateŋ. Maŋɔ amɛ mahã mihe yɛ mɛi fɛɛ ni ji kromɔbii* yɛ Israelbii lɛ ateŋ lɛ anajiaŋ.+ 17  Ejaakɛ kromɔbi fɛɛ kromɔbi ni ji Israelnyo lɛ, minɔ ni, gbɔmɔ jio, kooloo jio.+ Mifee amɛ krɔŋkrɔŋ mihã mihe yɛ gbi ni mitswia kromɔbii fɛɛ ni yɔɔ Ejipt shikpɔŋ lɛ nɔ lɛ nii lɛ nɔ.+ 18  Maŋɔ Levibii lɛ yɛ kromɔbii fɛɛ ni ji Israelbii lɛ anajiaŋ. 19  Mikɛ Levibii lɛ baahã Aaron kɛ ebihii lɛ akɛ mɛi ni akɛhã kɛjɛ Israelbii lɛ ateŋ, ní amɛsɔmɔ yɛ Israelbii lɛ anajiaŋ yɛ kpee buu lɛ naa,+ ní amɛkpãtã amɛhã Israelbii lɛ, koni haomɔ ko akaba Israelbii lɛ ateŋ+ kɛ́ Israelbii lɛ tsi amɛbɛŋkɛ he krɔŋkrɔŋ lɛ.” 20  Mose kɛ Aaron kɛ Israelbii lɛ fɛɛ fee Levibii lɛ nakai. Nibii fɛɛ ni Yehowa fã Mose yɛ Levibii lɛ ahewɔ lɛ, nakai ji bɔ ni Israelbii lɛ fee amɛ. 21  No hewɔ lɛ, Levibii lɛ tsuu amɛhe ni amɛfɔ amɛtadei lɛ ahe,+ no sɛɛ lɛ, Aaron ŋɔ amɛ ehã* akɛ fɔ̃ɔ afɔle yɛ Yehowa hiɛ.+ Ni Aaron kpãtã ehã amɛ ni ekɛtsuu amɛhe.+ 22  No sɛɛ lɛ, Levibii lɛ tee amɛyatsu amɛnitsumɔ lɛ yɛ kpee buu lɛ naa yɛ Aaron kɛ ebihii lɛ ahiɛ. Bɔ ni Yehowa fã Mose akɛ afee Levibii lɛ, nakai pɛpɛɛpɛ amɛfee amɛ. 23  Agbɛnɛ, Yehowa kɛ Mose wie ekɛɛ: 24  “Enɛ kɔɔ Levibii lɛ ahe: Kɛ́ nuu ko ye afii 25 kɛyaa lɛ, eyafata mɛi ni sɔmɔɔ yɛ kpee buu lɛ naa lɛ ahe. 25  Shi kɛ́ eye afii 50 lɛ, ekafata mɛi ni sɔmɔɔ lɛ ahe dɔŋŋ, ekpa sɔɔmɔ lɛ kwraa. 26  Ebaanyɛ ewa enyɛmimɛi ni tsuɔ nii yɛ kpee buu lɛ naa lɛ, shi ekatsu nitsumɔ ni atsuɔ yɛ jɛmɛ lɛ eko. Enɛ ji nɔ ni ofee yɛ Levibii lɛ kɛ nitsumɔ ni amɛtsuɔ lɛ gbɛfaŋ.”+

Shishigbɛ Niŋmaa

Loo “tsina oblanyo.”
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Loo “tsina oblanyo.”
Hebri sht. ŋm., “afɔ̃ Levibii lɛ kɛya kɛba,” ni tsɔɔ akɛ, ehã amɛya sɛɛsɛɛ ni amɛba hiɛhiɛ.
Hebri sht. ŋm., “ni ofɔ̃ amɛ kɛya kɛba,” ni tsɔɔ akɛ, ohã amɛya sɛɛsɛɛ ni amɛba hiɛhiɛ.
Hebri sht. ŋm., “ni ofɔ̃ amɛ kɛya kɛba,” ni tsɔɔ akɛ, ohã amɛya sɛɛsɛɛ ni amɛba hiɛhiɛ.
Loo “kromɔbii fɛɛ ni gbeleɔ musu naa.”
Hebri sht. ŋm., “fɔ̃ amɛ kɛtee kɛba,” ni tsɔɔ akɛ, ehã amɛtee sɛɛsɛɛ ni amɛba hiɛhiɛ.