4 Mose 6:1-27

  • Shi ni awoɔ akɛ abaatsɔ Nazirnyo (1-21)

  • Bɔ ni esa akɛ osɔfoi lɛ ajɔɔ mɛi ahã (22-27)

6  Yehowa tee nɔ ekɛ Mose wie ni ekɛɛ:  “Okɛ Israelbii lɛ awie ni okɛɛ amɛ akɛ, ‘Kɛ́ nuu ko loo yoo ko wo shi krɛdɛɛ ko akɛ ebaahi shi akɛ Nazirnyo*+ ehã Yehowa lɛ,  etsi ehe kɛje wain kɛ dãji krokomɛi ni wa ahe. Ekanu viniga ni akɛ wain fee loo viniga ni akɛ dãa ni wa fee.+ Ekanu nɔ ko nɔ ko ni akɛ wain yibii fee, ni ekaye wain yibii hu, eŋmɔŋ jio, egbiŋ jio.  Gbii abɔ fɛɛ ni eji Nazirnyo lɛ, ekaye nɔ ko nɔ ko ni jɛ wain tso mli, kɛjɛ wain yibii ni etsuko nɔ kɛyashi ehe totoi lɛ anɔ.  “‘Gbii ni ewo shi akɛ ebaahi shi akɛ Nazirnyo lɛ amli fɛɛ lɛ, yishɛɛ kakla akatsɔ eyiteŋ kɛho.+ Ekã he efee krɔŋkrɔŋ kɛtsɔ eyiteŋ tsɔi ni eeehã etsa kɛyashi be ni gbii ni ekɛjɔɔ ehe nɔ ehã Yehowa lɛ baaba naagbee lɛ nɔ.  Gbii fɛɛ ni ejɔɔ ehe nɔ ehã Yehowa lɛ amli lɛ, ekaya gbonyo* ko he.*  Kɛ́ epapa loo emami loo enyɛmi nuu loo enyɛmi yoo po gbo lɛ, ekabule ehe,+ ejaakɛ Nazirnyo ni etsɔ ehã e-Nyɔŋmɔ lɛ he okadi lɛ yɛ eyiteŋ.  “‘Gbii abɔ fɛɛ ni eji Nazirnyo lɛ, eyɛ krɔŋkrɔŋ hã Yehowa.  Shi kɛ́ mɔ ko gbo yɛ emasɛi trukaa,+ ni ebule yitsɔi ni feɔ ehenɔjɔɔmɔ kɛhã Nyɔŋmɔ lɛ he okadi* lɛ, no lɛ, eshɛ eyi+ yɛ gbi ni abaatsuu ehe lɛ nɔ. Eshɛ eyi lɛ yɛ gbi ni ji kpawo lɛ nɔ. 10  Ni gbi ni ji kpaanyɔ lɛ nɔ lɛ, ekɛ ŋa mli okpoi enyɔ loo shĩa okpoi bibii enyɔ abahã osɔfo lɛ yɛ kpee buu lɛ shinaa lɛ naa. 11  Osɔfo lɛ kɛ ekome afee esha afɔle, ni ekɛ ekroko lɛ hu afee shãa afɔle ní ekɛkpãtã ehã lɛ yɛ esha ni efee+ yɛ gbonyo* lɛ he lɛ hewɔ. Ni efee eyiteŋ krɔŋkrɔŋ yɛ nakai gbi lɛ nɔ. 12  Ni esaa ejɔɔ ehe nɔ ehã Yehowa ekoŋŋ kɛhã gbii ni ekɛbaahi shi akɛ Nazirnyo lɛ, ni ekɛ gwantɛŋnuu ni náko fe afi aba akɛ sɔ̃ afɔle. Shi akaneŋ tsutsu gbii lɛ afataŋ he, ejaakɛ ebule Nazirnyo ni eji lɛ. 13  “‘Agbɛnɛ, mla ni kã shi hã Nazirnyo nɛ: Kɛ́ egbe gbii ni ekɛbaahi shi akɛ Nazirnyo lɛ naa lɛ,+ akɛ lɛ aba kpee buu lɛ shinaa lɛ naa. 14  Ekɛ efɔle lɛ abahã Yehowa yɛ jɛmɛ: gwantɛŋnuu kome ni kpa ko bɛ ehe ni náko fe afi kɛhã shãa afɔle,+ gwantɛŋbi ni ji yoo ni náko fe afi kɛhã esha afɔle,+ gwantɛŋnuu kome ni kpa ko bɛ ehe kɛhã naanyobɔɔ afɔle,+ 15  kɛntɛŋ ni blodoi ni ashikishaŋ-sha* bɛ mli ni abɔlɔ lɛ tamɔ gai ni akɛ ashikishaŋ kpakpa ni akɛ mu efutu fee, kɛ akpɔɔnɔi* ni ashikishaŋ-sha bɛ mli ni akɛ mu ekpa he yɔɔ mli, kɛ amɛhe ŋmaa* afɔle+ kɛ amɛhe dãa afɔlei.+ 16  Osɔfo lɛ kɛba Yehowa hiɛ, ni eshã esha afɔle kɛ shãa afɔle lɛ ehã lɛ. 17  Osɔfo lɛ kɛ gwantɛŋnuu lɛ kɛ kɛntɛŋ ni blodoi ni ashikishaŋ-sha* bɛ mli lɛ yɔɔ mli lɛ ahã Yehowa akɛ naanyobɔɔ afɔle, ni osɔfo lɛ kɛ ehe ŋmaa afɔle+ kɛ ehe dãa afɔle lɛ hu ahã. 18  “‘Agbɛnɛ, Nazirnyo lɛ ashɛ eyiteŋ tsɔi ni ekuko*+ lɛ yɛ kpee buu lɛ shinaa lɛ naa, ní eloo eyiteŋ tsɔi ni eshi ni etsa be mli ni eji Nazirnyo lɛ kɛyawo la ni yɔɔ naanyobɔɔ afɔle lɛ shishi lɛ mli. 19  Ni osɔfo lɛ aŋɔ gwantɛŋnuu lɛ nine* kome ni ahoo,+ kɛ blodo kome ni ashikishaŋ-sha* bɛ mli ni abɔ lɛ tamɔ ga kɛjɛ kɛntɛŋ lɛ mli, kɛ akpɔɔnɔɔ* kome ni ashikishaŋ-sha bɛ mli, ni ekɛ fɛɛ awo Nazirnyo lɛ dɛŋ be ni ehã ashɛ Nazirnyo ni eji lɛ he okadi lɛ ashwie lɛ sɛɛ. 20  Ni osɔfo lɛ afɔ̃ kɛya kɛba yɛ Yehowa hiɛ akɛ fɔ̃ɔ afɔle.+ Eji nɔ krɔŋkrɔŋ hã osɔfo lɛ, no kɛ fɔ̃ɔ afɔle lɛ tsitsi lɛ kɛ nane ni akɛhã akɛ onia lɛ.+ No sɛɛ lɛ, Nazirnyo lɛ baanyɛ anu wain. 21  “‘Mla ni kɔɔ Nazirnyo+ ni woɔ shi lɛ he nɛ: Kɛji ewo shi, ni ebaanyɛ ekɛ afɔle ni fe nɔ ni abiɔ yɛ edɛŋ akɛ Nazirnyo lɛ abahã Yehowa lɛ, no lɛ, eye shi ni ewo lɛ nɔ yɛ mla ni kɔɔ Nazirnyo ni eji lɛ he lɛ hewɔ.’” 22  Ni Yehowa kɛɛ Mose akɛ: 23  “Kɛɛmɔ Aaron kɛ ebihii lɛ akɛ, ‘Nɛkɛ ji bɔ ni nyɛjɔɔ+ Israelbii lɛ. Nyɛkɛa amɛ akɛ: 24  “Yehowa ajɔɔ bo+ ni ebu ohe. 25  Yehowa ahã ehiɛ akpɛ yɛ onɔ,+ ní edro bo. 26  Yehowa awó ehiɛ nɔ etsɔɔ bo ni ehã oná toiŋjɔlɛ.”’+ 27  Ni amɛkɛ migbɛ́i lɛ afɔ̃ Israelbii lɛ anɔ,+ koni majɔɔ amɛ.”+

Shishigbɛ Niŋmaa

Hebri mli lɛ, na·zirʹ, eshishi ji, “Mɔ Ni Ahala Lɛ; Mɔ Ni Ejɔɔ Ehe Nɔ; Mɔ Ni Ajie Lɛ Ato Afã.”
Loo “susuma ni egbo.”
Loo “ekabɛŋkɛ gbonyo ko he kwraa.”
Loo “ebule eyiteŋ lɛ ni feɔ lɛ Nazirnyo.”
Loo “susuma.” Kwɛmɔ Wiemɔi Titrii Amligbalamɔ lɛ.
Loo “akpaanɔi.”
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Loo “ashɛ eyiteŋ lɛ ni feɔ lɛ Nazirnyo.”
Loo “kɔɔŋ.”
Loo “akpaanɔɔ.”