4 Mose 5:1-31

  • Ajie mɛi ni he tseee lɛ kɛtee nsara lɛ sɛɛ (1-4)

  • Esha jajemɔ kɛ nɔ ko najiaŋtoo (5-10)

  • Nu ni akɛkwɛɔ kɛji mɔ ko ni asusuɔ akɛ efite gbãla lɛ efee nakai lɛɛlɛŋ lo (11-31)

5  Yehowa tee nɔ ekɛ Mose wie ekɛɛ:  “Fã Israelbii lɛ ní amɛjie mɔ fɛɛ mɔ ni miiye kpiti+ kɛ mɔ fɛɛ mɔ ni he hoɔ nu+ kɛ mɔ fɛɛ mɔ ni kɛ mɔ ko ni egbo ewo ehe muji*+ lɛ kɛje nsara lɛ mli.  Nuu jio, yoo jio, nyɛjiea amɛ kɛyaa. Nyɛkɛ amɛ ayaa nsara lɛ sɛɛ, koni amɛkabule+ mɛi ni miyɔɔ amɛteŋ* lɛ ansarai+ lɛ.”  No hewɔ lɛ, Israelbii lɛ fee nakai, ni amɛjie amɛ kɛtee nsara lɛ sɛɛ. Bɔ ni Yehowa kɛɛ Mose lɛ, nakai pɛpɛɛpɛ Israelbii lɛ fee.  Yehowa tsa nɔ ekɛ Mose wie ekɛɛ:  “Kɛɛmɔ Israelbii lɛ akɛ, ‘Kɛ́ nuu ko loo yoo ko yeee Yehowa anɔkwa, ni efee eshai ni gbɔmɛi feɔ lɛ eko lɛ, nakai mɔ* lɛ eye fɔ.+  Ejaje esha ni efee lɛ etsɔɔ,*+ ní ekɛ nii lɛ jara lɛ pɛpɛɛpɛ aku sɛɛ ahã akɛ najiaŋtoo nɔ yɛ fɔ ni eye lɛ hewɔ, ní ekɛ nii lɛ jara lɛ mlijai enumɔ mli ekome afata he;+ ekɛhã mɔ ni etɔ̃ enɔ lɛ.  Shi kɛ́ mɔ ni atɔ̃ enɔ lɛ bɛ wekunyo kpaakpa ní baahe najiaŋtoo nii lɛ, akɛyahã Yehowa, ni ebaatsɔ osɔfo lɛ nɔ, soro kpatamɔ gwantɛŋnuu ni ekɛbaakpãtã ehã mɔ lɛ.+  “‘Onia krɔŋkrɔŋ fɛɛ onia krɔŋkrɔŋ+ ni jɛ Israelbii lɛ aŋɔɔ ni akɛbahãa osɔfo lɛ atsɔ enɔ.+ 10  Mɔ fɛɛ mɔ nibii krɔŋkrɔŋi lɛ baatsɔ enɔ kwraa. Nɔ fɛɛ nɔ ni mɔ fɛɛ mɔ kɛbaahã osɔfo lɛ, nakai nii lɛ baatsɔ osɔfo lɛ nɔ.’” 11  Yehowa tee nɔ ekɛ Mose wie ekɛɛ: 12  “Okɛ Israelbii lɛ awie ni okɛɛ amɛ akɛ, ‘Kɛ́ nuu ko ŋa je esɛɛ ni eyeee lɛ anɔkwa, 13  ni nuu kroko kɛ eŋa lɛ ná bɔlɛ+ shi ewu lɛ leee, ni enɛ kã he efee teemɔŋ sane, ni yoo lɛ bule ehe, shi odasefonyo ko bɛ he, ni amɔko lɛ hu lɛ, nɔ ni afee nɛ: 14  Kɛji nuu lɛ bɔi awuŋa yeli ni esusu akɛ eŋa lɛ yeee lɛ anɔkwa be ni eŋa lɛ ebule ehe lɛ sɛɛ, aloo eye awuŋa ni esusu akɛ eŋa lɛ yeee lɛ anɔkwa be ni eŋa lɛ buleko ehe lɛ, 15  no lɛ, nuu lɛ kɛ eŋa lɛ aba osɔfo lɛ ŋɔɔ, ní ekɛ barle* ashikishaŋ efa mlijai nyɔŋma mli ekome* afata he akɛ afɔle kɛhã yoo lɛ. Ekafɔse mu eshwie nɔ, ni ekɛ frankinsɛnsi hu akashwie nɔ, ejaakɛ eji awuŋayeli ŋmaa* afɔle, ŋmaa afɔle ni hãa akaiɔ fɔ ni aye. 16  “‘Osɔfo lɛ kɛ yoo lɛ aba, ni ekɛ lɛ abadamɔ Yehowa hiɛ.+ 17  Osɔfo lɛ ayɛ nu krɔŋkrɔŋ ewo sũ nɔ ko mli, ní osɔfo lɛ akpiti sɔlemɔ buu lɛ shikpɔŋ lɛ sũ* lɛ eko ni ekɛwo nu lɛ mli. 18  Ni osɔfo lɛ ahã yoo lɛ abadamɔ Yehowa hiɛ, ni efɛne yoo lɛ yitsɔi eshwie nɔ, ni ekɛ kaimɔ ŋmaa afɔle lɛ, ni ji awuŋayeli ŋmaa afɔle+ lɛ, awo yoo lɛ dɛŋ, ní osɔfo lɛ ahiɛ nu ni joɔ ni kɛ loomɔ baa lɛ yɛ edɛŋ.+ 19  “‘Ni osɔfo lɛ ahã yoo lɛ akã kitã, ni ekɛɛ yoo lɛ akɛ: “Kɛji nuu kroko kɛ bo náko bɔlɛ be mli ni oyɔɔ owu lɛ shishi,+ ni ojeko esɛɛ, ni obuleko ohe lɛ, no lɛ, nu ni joɔ ni kɛ loomɔ baa nɛɛ akafee bo nɔ ko. 20  Shi kɛji oje owu lɛ sɛɛ be mli ni oyɔɔ eshishi, ni obule ohe, ni okɛ nuu kroko ená bɔlɛ+ yɛ owu lɛ sɛɛ lɛ—” 21  Osɔfo lɛ ahã yoo lɛ akã kitã ni loomɔ yɔɔ mli, ní osɔfo lɛ akɛɛ yoo lɛ akɛ: “Yehowa ahã otsɔ loomɔ kɛ kitãkamɔ nɔ yɛ omaŋbii lɛ ateŋ, ní Yehowa ahã oshuɔ* akpɔtɔ,* ní ehã omusu afuu. 22  Nu ni kɛ loomɔ baa nɛɛ abote omlinii lɛ amli ní ehã omusu afuu, ní ehã oshuɔ* akpɔtɔ.”* Ni yoo lɛ akɛɛ akɛ: “Amen! Amen!”* 23  “‘Ni osɔfo lɛ aŋmala loomɔi nɛɛ yɛ wolo nɔ, ni efɔ niŋmai lɛ ewo nu ni joɔ lɛ mli. 24  No sɛɛ lɛ, ehã yoo lɛ anu nu ni joɔ ni kɛ loomɔ baa lɛ, ni nu ni kɛ loomɔ baa lɛ abote yoo lɛ mli ní ejoo yɛ emli. 25  Ni osɔfo lɛ ahe awuŋayeli ŋmaa afɔle+ lɛ yɛ yoo lɛ dɛŋ, ni efɔ̃ ŋmaa afɔle lɛ kɛya kɛba yɛ Yehowa hiɛ, ni ekɛbɛŋkɛ afɔleshaa latɛ lɛ. 26  Osɔfo lɛ akpiti ŋmaa afɔle lɛ ekɔkɔ obɔ akɛ kaimɔ afɔle,* ní eshã* yɛ afɔleshaa latɛ lɛ nɔ,+ ni no sɛɛ lɛ, ehã yoo lɛ anu nu lɛ. 27  Kɛ́ ehã yoo lɛ nu nu lɛ, kɛji yoo lɛ ebule ehe, ni eyeee ewu lɛ anɔkwa lɛ, no lɛ, nu ni kɛ loomɔ baa lɛ baabote yoo lɛ mli ni ebaajoo yɛ emli, ni emusu baafuu, ni eshuɔ* baakpɔtɔ,* ni yoo lɛ baatsɔ loomɔ nɔ yɛ emaŋbii lɛ ateŋ. 28  Shi kɛ́ yoo lɛ buleko ehe ni ehe tse lɛ, no lɛ, ebaaye ehe kwraa kɛjɛ toigbalamɔ ni tamɔ nɛkɛ he, ni ebaanyɛ eŋɔ hɔ ni efɔ bii. 29  “‘Enɛ ji awuŋayeli he mla,+ kɛji eba lɛ akɛ yoo ko je ewu sɛɛ ni ebule ehe be mli ni eyɔɔ ewu shishi, 30  aloo kɛji nuu ko bɔi awuŋa yeli ni esusu akɛ eŋa yeee lɛ anɔkwa lɛ; ehã eŋa lɛ abadamɔ Yehowa hiɛ, ni osɔfo lɛ atsu mla nɛɛ fɛɛ he nii yɛ yoo lɛ gbɛfaŋ. 31  Nuu lɛ yeee fɔ ko kwraa, shi eŋa lɛ baatere efɔyeli lɛ he sɔ̃ lɛ.’”

Shishigbɛ Niŋmaa

Loo “mɔ fɛɛ mɔ ni susuma ko ewo ehe muji.” Kwɛmɔ Wiemɔi Titrii Amligbalamɔ lɛ, “Susuma.”
Loo “mɛi ni mihiɔ mama tsũ mli yɛ amɛteŋ.”
Loo “susuma.”
Hebri sht. ŋm., “Amɛjaje esha ni amɛfee lɛ amɛtsɔɔ.”
Eji wiiti henɔ ko.
Efa mlijai nyɔŋma mli ekome feɔ litai 2.2 (kwat 2). Kwɛmɔ Saji Krokomɛi B14 lɛ.
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Hebri sht. ŋm., “mulu.”
Eeenyɛ efee akɛ, aatsɔɔ fɔmɔ nii lɛ.
Loo “oshuɔ afite; oshuɔ abɛ.” Enɛ baanyɛ atsɔɔ akɛ mɔ lɛ fɔŋ.
Eeenyɛ efee akɛ, aatsɔɔ fɔmɔ nii lɛ.
Loo “oshuɔ afite; oshuɔ abɛ.” Enɛ baanyɛ atsɔɔ akɛ mɔ lɛ fɔŋ.
Loo “Aba mli nakai! Aba mli nakai!”
Hebri sht. ŋm., “ehã eje lasu.”
Eeenyɛ efee akɛ, aatsɔɔ fɔmɔ nii lɛ.
Loo “eshuɔ baafite; eshuɔ baabɛ.” Enɛ baanyɛ atsɔɔ akɛ mɔ lɛ fɔŋ.