4 Mose 4:1-49

  • Kohatbii lɛ anitsumɔ (1-20)

  • Gershonbii lɛ anitsumɔ (21-28)

  • Meraribii lɛ anitsumɔ (29-33)

  • Mɛi akanemɔ lɛ he saji otii (34-49)

4  Agbɛnɛ, Yehowa kɛ Mose kɛ Aaron wie ekɛɛ:  “Nyɛkanea Kohat bihii+ ni yɔɔ Levi bihii lɛ ateŋ lɛ yɛ amɛwekui lɛ kɛ amɛtsɛmɛi ashĩai lɛ anaa,  mɛi fɛɛ ni eye kɛjɛ afii 30+ kɛyashi afii 50+ ni fata kuu ni ahã amɛ nitsumɔ yɛ kpee buu lɛ mli lɛ he lɛ.+  “Nitsumɔ ni Kohat bihii lɛ baatsu yɛ kpee buu lɛ mli nɛ.+ Eji nɔ krɔŋkrɔŋ fe fɛɛ:  Kɛ́ nsara lɛ miifã kɛya lɛ, Aaron kɛ ebihii lɛ aba mli ni amɛbajie pateeshɛŋ*+ lɛ, ní amɛkɛha Odaseyeli adeka+ lɛ he.  Amɛkɛ nu mli gbee hewolo aha nɔ, ní amɛkɛ mama bluu aha nɔ, ní amɛkɛ etsei+ ni akɛwóɔ lɛ ahɔlɔ amɛgbɛhei.  “Agbɛnɛ hu, amɛkɛ mama bluu aha okpɔlɔ ni akɛ hiɛmaa blodo lɛ maa nɔ lɛ nɔ,+ ni amɛkɛ kãi lɛ kɛ kɔɔpoi lɛ kɛ tsɛnsii lɛ kɛ dãa afɔle kɔɔpoi wuji lɛ amamɔ nɔ;+ blodo ni yɔɔ okpɔlɔ lɛ nɔ daa+ lɛ akã he ahi nɔ.  Amɛkɛ mama tsuru aha nɔ, ní amɛkɛ nu mli gbee hewolo aha nɔ, ní amɛkɛ etsei+ ni akɛwóɔ lɛ ahɔlɔ amɛgbɛhei.  No sɛɛ lɛ, amɛkɔ mama bluu ni amɛkɛha kanetso+ lɛ kɛ ekanei+ lɛ kɛ enibɛɛnii* lɛ kɛ elajeenii+ lɛ kɛ nibii fɛɛ ni akɛ mu ni akɛtsuɔ kanei lɛ ahe nii lɛ woɔ mli lɛ ahe. 10  Amɛkɛ nu mli gbee hewolo aha kanetso lɛ kɛ ehe nibii lɛ fɛɛ ahe, ni amɛkɛma tso ni akɛbaawó lɛ nɔ. 11  Ni amɛkɛ mama bluu aha shika tsuru afɔleshaa latɛ+ lɛ he, amɛkɛ nu mli gbee hewolo aha nɔ, ní amɛkɛ etsei+ ni akɛwoɔ lɛ ahɔlɔ amɛgbɛhei. 12  No sɛɛ lɛ, amɛŋɔ sɔɔmɔ nibii+ fɛɛ ni amɛkɛtsuɔ nii yɛ he krɔŋkrɔŋ lɛ daa lɛ, ní amɛkɛwo mama bluu mli, ní amɛkɛ nu mli gbee hewolo aha he, ní amɛkɛma tso ni akɛbaawó lɛ nɔ. 13  “Amɛjie lamulu* lɛ yɛ afɔleshaa latɛ lɛ mli,+ ní amɛkɛ mama ni akɛ kooloo hetsɔi afaseo* fee aha latɛ lɛ he. 14  Amɛkɛ afɔleshaa latɛ lɛ he nibii fɛɛ ni amɛkɛtsuɔ nii kɛ́ amɛmiisɔmɔ yɛ afɔleshaa latɛ lɛ he lɛ ashwie nɔ: lajeenii lɛ kɛ fakai lɛ kɛ sofii lɛ kɛ tsɛnsii lɛ kɛ afɔleshaa latɛ lɛ he nibii lɛ fɛɛ;+ ni amɛkɛ nu mli gbee hewolo aha nɔ, ní amɛkɛ etsei+ ni akɛwóɔ lɛ ahɔlɔ amɛgbɛhei. 15  “Kɛ́ nsara lɛ baafã kɛya lɛ, Aaron kɛ ebihii lɛ aha he krɔŋkrɔŋ lɛ kɛ nibii fɛɛ ni akɛtsuɔ nii yɛ he krɔŋkrɔŋ lɛ ahe+ amɛgbe naa dã. No sɛɛ lɛ, Kohat bihii lɛ aba mli ni amɛbahole nibii lɛ,+ shi amɛkata he krɔŋkrɔŋ lɛ he, kɛjeee nakai lɛ amɛbaagboi.+ Nibii nɛɛ ji Kohat bihii lɛ anitsumɔ* yɛ kpee buu lɛ mli. 16  “Eleazar,+ osɔfo Aaron binuu lɛ, ji mɔ ni baakwɛ mu ni akɛwoɔ kanei lɛ amli kɛsuɔ lɛ+ kɛ tsofa-kɛ-ŋma+ lɛ kɛ ŋmaa* afɔle ni ashãa daa lɛ kɛ mufɔɔ mu+ lɛ nɔ. Lɛ ji mɔ ni baakwɛ sɔlemɔ buu muu lɛ fɛɛ kɛ nibii fɛɛ ni yɔɔ mli lɛ anɔ, ni he krɔŋkrɔŋ lɛ kɛ ehe nibii lɛ hu fata he.” 17  Yehowa tee nɔ ekɛ Mose kɛ Aaron wie ekɛɛ: 18  “Nyɛkahãa Kohatbii lɛ awekui+ lɛ ashishi miibule yɛ Levibii lɛ ateŋ. 19  Shi feemɔ enɛ ohã amɛ koni amɛya nɔ amɛhi wala mli ní amɛkagboi kɛ́ amɛmiibɛŋkɛ nibii krɔŋkrɔŋi fe fɛɛ lɛ.+ Aaron kɛ ebihii lɛ abote mli, ní amɛtsɔɔ amɛteŋ mɔ fɛɛ mɔ enitsumɔ kɛ nɔ ni ebaawó. 20  Amɛkabote mli ní amɛbana nibii krɔŋkrɔŋi lɛ hiŋmɛitswaa po, kɛjeee nakai lɛ amɛbaagboi.”+ 21  Ni Yehowa kɛ Mose wie ekɛɛ: 22  “Kanemɔ Gershon bihii+ lɛ yɛ amɛtsɛmɛi ashĩai lɛ kɛ amɛwekui lɛ anaa. 23  Ŋmalamɔ mɛi fɛɛ ni eye kɛjɛ afii 30 kɛyashi afii 50 ni fata kuu ni ahã amɛ nitsumɔ yɛ kpee buu lɛ mli lɛ he lɛ agbɛ́ii. 24  Nitsumɔ ni Gershonbii lɛ awekui lɛ baatsu kɛ nibii ni amɛbaahole nɛ:+ 25  Amɛ amɛhole sɔlemɔ buu lɛ mamai+ lɛ, kɛ kpee buu lɛ, kɛ enɔhaanɔ lɛ kɛ nu mli gbee hewolo ni ha nɔ lɛ,+ kɛ kpee buu lɛ shinaa lɛ naa pateeshɛŋ lɛ,+ 26  kɛ kpo lɛ he pateeshɛŋi ni tsotsoroɔ shi+ lɛ, kɛ kpo ni bɔle sɔlemɔ buu lɛ kɛ afɔleshaa latɛ lɛ shinaa lɛ naa pateeshɛŋ+ lɛ, kɛ amɛkpãi lɛ kɛ amɛhe nibii lɛ fɛɛ kɛ nɔ fɛɛ nɔ ni akɛtsuɔ nii yɛ jɛmɛ lɛ. Enɛ ji amɛnitsumɔ. 27  Aaron kɛ ebihii lɛ ji mɛi ni baakwɛ Gershonbii+ lɛ anitsumɔ kɛ amɛjatsui lɛ fɛɛ anɔ; nyɛkɛ jatsui nɛɛ fɛɛ ahãa amɛ akɛ amɛsɔ̃. 28  Enɛ ji nitsumɔ ni Gershonbii lɛ awekui lɛ baatsu yɛ kpee buu lɛ mli,+ ni amɛbaatsu amɛnitsumɔi lɛ yɛ Itamar,+ osɔfo Aaron binuu lɛ shishi. 29  “Ni Merari bihii+ lɛ hu lɛ, ŋmalamɔ amɛgbɛ́ii yɛ amɛweku lɛ kɛ amɛtsɛmɛi ashĩa lɛ naa. 30  Ŋmalamɔ mɛi ni eye kɛjɛ afii 30 kɛyashi afii 50 lɛ agbɛ́ii, mɛi fɛɛ ni fata kuu ni ahã amɛ nitsumɔ yɛ kpee buu lɛ mli lɛ he lɛ. 31  Nibii ni amɛbaahole+ yɛ nitsumɔ ni amɛtsuɔ yɛ kpee buu lɛ gbɛfaŋ lɛ nɛ: sɔlemɔ buu lɛ mplaŋi+ lɛ kɛ emlibelemɔnii+ lɛ kɛ ekulashiŋi+ lɛ kɛ enɔdaamɔnii ni fɔji yɔɔ mli+ lɛ; 32  kpo ni bɔle he lɛ akulashiŋi+ lɛ, kɛ amɛnɔdaamɔnii ni fɔji yɔɔ mli+ lɛ, kɛ amɛdadei kɛ amɛnaa piɔpiɔi*+ lɛ, kɛ amɛkpãi lɛ, kɛ amɛhe nibii lɛ fɛɛ kɛ nitsumɔi fɛɛ ni kɔɔ enɛɛmɛi ahe lɛ. Nyɛtsɔa amɛteŋ mɔ fɛɛ mɔ nɔ ni ebaawó. 33  Nɛkɛ ji bɔ ni Merari bihii lɛ awekui+ lɛ baasɔmɔ yɛ kpee buu lɛ mli, yɛ Itamar, ni ji osɔfo Aaron binuu lɛ shishi.”+ 34  Ni Mose kɛ Aaron kɛ maŋ lɛ mli wekunukpai+ lɛ ŋmala Kohat bihii lɛ agbɛ́ii+ yɛ amɛwekui lɛ kɛ amɛtsɛmɛi ashĩa lɛ naa, 35  mɛi fɛɛ ni eye kɛjɛ afii 30 kɛyashi afii 50 ni fata kuu ni ahã amɛ nitsumɔ yɛ kpee buu lɛ mli lɛ he lɛ.+ 36  Mɛi fɛɛ ni aŋmala amɛgbɛ́ii yɛ amɛwekui lɛ anaa lɛ ayifalɛ ji 2,750.+ 37  Mɛnɛɛmɛi ji Kohatbii lɛ awekui lɛ ateŋ mɛi ni aŋmala amɛgbɛ́ii, mɛi fɛɛ ni sɔmɔɔ yɛ kpee buu lɛ mli lɛ. Mose kɛ Aaron ŋmala amɛgbɛ́ii yɛ famɔ ni Yehowa tsɔ Mose nɔ ekɛhã lɛ naa.+ 38  Aŋmala Gershon bihii+ lɛ agbɛ́ii yɛ amɛwekui lɛ kɛ amɛtsɛmɛi ashĩa lɛ naa, 39  mɛi fɛɛ ni eye kɛjɛ afii 30 kɛyashi afii 50 ni fata kuu ni ahã amɛ nitsumɔ yɛ kpee buu lɛ mli lɛ he lɛ. 40  Mɛi fɛɛ ni aŋmala amɛgbɛ́ii yɛ amɛwekui lɛ kɛ amɛtsɛmɛi ashĩa lɛ naa lɛ ayifalɛ ji 2,630.+ 41  Gershon bihii lɛ awekui lɛ ni aŋmala amɛgbɛ́ii lɛ nɛ, mɛi fɛɛ ni sɔmɔɔ yɛ kpee buu lɛ mli lɛ. Mose kɛ Aaron hã aŋmala amɛgbɛ́ii yɛ Yehowa famɔ naa.+ 42  Aŋmala Merari bihii lɛ agbɛ́ii yɛ amɛwekui lɛ kɛ amɛtsɛmɛi ashĩa lɛ naa, 43  mɛi fɛɛ ni eye kɛjɛ afii 30 kɛyashi afii 50 ni fata kuu ni ahã amɛ nitsumɔ yɛ kpee buu lɛ mli lɛ he lɛ.+ 44  Amɛteŋ mɛi fɛɛ ni aŋmala amɛgbɛ́ii yɛ amɛwekui lɛ anaa lɛ ayifalɛ ji 3,200. + 45  Merari bihii lɛ awekui lɛ ni aŋmala amɛgbɛ́ii lɛ nɛ, mɛi ni Mose kɛ Aaron ŋmala amɛgbɛ́ii yɛ famɔ ni Yehowa tsɔ Mose nɔ ekɛhã lɛ naa lɛ.+ 46  Mose kɛ Aaron kɛ Israel wekunukpai lɛ ŋmala Levibii nɛɛ fɛɛ agbɛ́ii yɛ amɛwekui lɛ kɛ amɛtsɛmɛi ashĩai lɛ anaa; 47  amɛye kɛjɛ afii 30 kɛyashi afii 50, ni ahã amɛ fɛɛ nitsumɔ kɛ jatsui ni amɛbaahole yɛ kpee buu lɛ gbɛfaŋ.+ 48  Mɛi fɛɛ ni aŋmala amɛgbɛ́ii lɛ ayifalɛ ji 8,580.+ 49  Aŋmala amɛgbɛ́ii yɛ famɔ ni Yehowa tsɔ Mose nɔ ekɛhã lɛ naa, amɛteŋ mɔ fɛɛ mɔ yɛ nitsumɔ ni ahã lɛ kɛ ejatsu; aŋmala amɛgbɛ́ii tamɔ bɔ ni Yehowa fã Mose lɛ pɛpɛɛpɛ.

Shishigbɛ Niŋmaa

Ni ji, pateeshɛŋ ni akɛtsĩɔ Odaseyeli adeka lɛ hiɛ lɛ.
Loo “ebɛɛlei.”
Loo “fɔ lamulu,” ni ji, lamulu ni kooloi ni akɛshãa afɔle lɛ afɔ lɛ efutu.
Blɔfo mli lɛ, “pɛpol.”
Hebri sht. ŋm., “ajatsu.”
Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
Loo “shiŋmlii.” Shiŋmli ji dade loo tso kɛ enaa piɔpiɔ ni akaa awoɔ shikpɔŋ.