4 Mose 35:1-34

  • Maji ni akɛbaahã Levibii lɛ (1-8)

  • Abobaa maji (9-34)

35  Yehowa tee nɔ ekɛ Mose wie yɛ Moab ŋa kpataa lɛ nɔ, yɛ Yordan lɛ naa,+ yɛ Yeriko ekɛɛ:  “Fã Israelbii lɛ akɛ, amɛjɛ gboshinii ni amɛbaaná lɛ mli amɛhã Levibii lɛ maji ni amɛbaahi mli,+ ni esa akɛ amɛkɛ shikpɔji ni kooloi yeɔ nii yɛ nɔ ni bɔle maji lɛ ahe lɛ hu ahã Levibii lɛ.+  Amɛbaahi maji lɛ amli, ni shikpɔji ni kooloi yeɔ nii yɛ nɔ lɛ baakãmɔ shi ahã amɛlɛɛ kooloi, amɛnibii, kɛ amɛkooloi krokomɛi lɛ fɛɛ.  Maji lɛ ahe shikpɔji ni kooloi yeɔ nii yɛ nɔ ni nyɛkɛbaahã Levibii lɛ ajɛ maŋ lɛ gbogbo lɛ he kɛya sɛɛgbɛ ninetalɔi* 1,000 kɛbɔle maŋ lɛ kɛkpe.  Nyɛjɛa maŋ lɛ sɛɛgbɛ nyɛsusua ninetalɔi 2,000 yɛ bokãgbɛ, ninetalɔi 2,000 yɛ wuoyigbɛ, ninetalɔi 2,000 yɛ anaigbɛ, kɛ ninetalɔi 2,000 yɛ kooyigbɛ, ní maŋ lɛ ahi teŋ. Enɛɛmɛi baafee amɛmaji lɛ ahe shikpɔji ni kooloi yeɔ nii yɛ nɔ lɛ.  “Maji ni nyɛkɛbaahã Levibii lɛ afee abobaa maji 6,+ koni mɔ ko ni egbe gbɔmɔ lɛ ajo foi kɛya jɛmɛ,+ kɛ maji 42 krokomɛi hu.  Maji fɛɛ ni nyɛkɛbaahã Levibii lɛ afee maji 48, kɛ amɛhe shikpɔji ni kooloi yeɔ nii yɛ nɔ.+  Maji ni nyɛkɛbaahã Levibii lɛ, nyɛjɛa Israelbii lɛ anɔ lɛ mli nyɛhãa amɛ.+ Kuu ni da lɛ, nyɛhea maji babaoo yɛ edɛŋ, ni kuu ni edaaa lɛ, nyɛhea maji fioo yɛ edɛŋ.+ Kuu fɛɛ kuu ahã Levibii lɛ emaji lɛ eko yɛ gboshinii ni ebaaná lɛ naa.”  Yehowa tee nɔ ekɛ Mose wie ekɛɛ: 10  “Okɛ Israelbii lɛ awie ni okɛɛ amɛ akɛ, ‘Nyɛmiiba nyɛbafo Yordan lɛ kɛya Kanaan shikpɔŋ lɛ nɔ.+ 11  Nyɛhalaa maji ni hi hã nyɛ ní amɛtsɔmɔ abobaa maji, koni mɔ ni baagbe mɔ* ko ni jeee gbɛ eje egbe lɛ lɛ ajo foi kɛya jɛmɛ.+ 12  Maji nɛɛ baatsɔmɔ abobaa maji amɛhã nyɛ kɛje lá he oweletɔlɔ lɛ dɛŋ,+ koni mɔ ni gbe gbɔmɔ lɛ akagbo kɛyashi ebaayadamɔ maŋ lɛ hiɛ ni aye esane.+ 13  Akɛ abobaa maji ekpaa ni nyɛkɛbaahã lɛ baatsu yiŋtoo nɛɛ he nii. 14  Nyɛŋɔa maji etɛ nyɛhãa yɛ Yordan lɛ afã nɛɛ,+ kɛ maji etɛ hu yɛ Kanaan shikpɔŋ lɛ nɔ+ koni akɛfee abobaa maji. 15  Maji ekpaa nɛɛ baatsɔmɔ abobaa maji kɛhã Israelbii lɛ kɛ gbɔ+ kɛ mɔ ni ebahi amɛteŋ lɛ, koni mɔ fɛɛ mɔ ni baagbe mɔ ko* ni jeee gbɛ eje egbe lɛ lɛ ajo foi kɛya jɛmɛ.+ 16  “‘Shi kɛ́ ekɛ dade nɔ ko tswa lɛ ni egbo lɛ, no lɛ, gbɔmɔgbelɔ ji lɛ. Bɔ fɛɛ bɔ ni fee lɛ, agbe gbɔmɔgbelɔ lɛ.+ 17  Ni kɛ́ ekɛ tɛ ni baanyɛ agbe mɔ tswa lɛ ni egbo lɛ, no lɛ, gbɔmɔgbelɔ ji lɛ. Bɔ fɛɛ bɔ ni fee lɛ, agbe gbɔmɔgbelɔ lɛ. 18  Ni kɛ́ ekɛ tso nɔ ko ni baanyɛ agbe mɔ tswa lɛ ni egbo lɛ, no lɛ, gbɔmɔgbelɔ ji lɛ. Bɔ fɛɛ bɔ ni fee lɛ, agbe gbɔmɔgbelɔ lɛ. 19  “‘Lá he oweletɔlɔ lɛ ji mɔ ni sa akɛ egbe gbɔmɔgbelɔ lɛ. Kɛji ekɛ lɛ kpe lɛ, lɛ diɛŋtsɛ egbe lɛ. 20  Kɛji mɔ lɛ gbo akɛni etsi eyisɛɛ yɛ nyɛ ni enyɛɔ lɛ lɛ hewɔ, aloo efɔ̃ nɔ ko etswa lɛ yɛ jwɛŋmɔ fɔŋ hewɔ,*+ 21  aloo egba lɛ ma yɛ nyɛ ni enyɛɔ lɛ lɛ hewɔ ni egbo lɛ, no lɛ, bɔ fɛɛ bɔ ni fee lɛ, agbe mɔ ni tswa lɛ nɔ lɛ. Gbɔmɔgbelɔ ji lɛ. Kɛ́ lá he oweletɔlɔ lɛ kɛ gbɔmɔgbelɔ lɛ kpe lɛ, egbe lɛ. 22  “‘Shi kɛ́ trukaa ni etsi mɔ lɛ yisɛɛ, ni jeee nyɛ ni enyɛɔ lɛ momo hewɔ, aloo efɔ̃ nɔ ko etswa lɛ ni ehiɛɛɛ jwɛŋmɔ fɔŋ ko,*+ 23  aloo kɛ́ enaaa lɛ, ni ehã tɛ ko bagbee enɔ, ni ejeee ehenyɛlɔ loo mɔ ko ni miitao lɛ efɔŋ, ni mɔ lɛ gbo lɛ, 24  no lɛ, maŋ lɛ akojo mɔ ni tswa mɔ lɛ nɔ lɛ kɛ lá he oweletɔlɔ lɛ teŋ, yɛ mlai nɛɛ anaa.+ 25  Maŋ lɛ ahere mɔ ni gbe gbɔmɔ lɛ yiwala kɛje lá he oweletɔlɔ lɛ dɛŋ, ní akɛ lɛ aku sɛɛ kɛya abobaa maŋ ní ejo foi kɛtee mli lɛ mli, ni esa akɛ ehi jɛmɛ kɛyashi osɔfonukpa ni akɛ mu krɔŋkrɔŋ lɛ fɔ lɛ mu lɛ baagbo.+ 26  “‘Shi kɛ́ mɔ ni gbe gbɔmɔ lɛ je kpo kɛteke abobaa maŋ ni ejo foi kɛtee mli lɛ husu, 27  ni lá he oweletɔlɔ lɛ na lɛ yɛ ebobaa maŋ lɛ husu lɛ sɛɛ, ni egbe mɔ ni gbe gbɔmɔ lɛ, eyeee lá yi sɔ̃. 28  Ejaakɛ esa akɛ ehi ebobaa maŋ lɛ mli kɛyashi osɔfonukpa lɛ baagbo. Shi kɛ́ osɔfonukpa lɛ gbo lɛ, no lɛ, mɔ ni gbe gbɔmɔ lɛ baanyɛ aku esɛɛ kɛya lɛ diɛŋtsɛ eshikpɔŋ nɔ ekoŋŋ.+ 29  Nii nɛɛ atsɔ mla ni nyɛkɛbaakojo saji yɛ nyɛyinɔi fɛɛ amli, yɛ nyɛshihilɛhei lɛ fɛɛ. 30  “‘Mɔ fɛɛ mɔ ni baagbe mɔ* ko lɛ, adamɔ odasefoi awiemɔ*+ abu lɛ gbɔmɔgbelɔ ní agbe lɛ;+ shi akagbe mɔ ko mɔ ko* yɛ odasefonyo kome pɛ odaseyeli naa. 31  Gbɔmɔgbelɔ ni sa gbele lɛ, nyɛkahea kpɔmɔnɔ ko yɛ ewala* hewɔ, ejaakɛ bɔ fɛɛ bɔ ni fee lɛ, esa akɛ agbe lɛ.+ 32  Ni nyɛkahea kpɔmɔnɔ ko yɛ mɔ ko ni ejo foi kɛtee ebobaa maŋ mli lɛ hewɔ, ní no hã ená hegbɛ eku esɛɛ ebahi eshikpɔŋ lɛ nɔ ekoŋŋ be mli ni osɔfonukpa lɛ gboko. 33  “‘Nyɛkawoa shikpɔŋ ni nyɛyɔɔ nɔ lɛ nɔ muji, ejaakɛ lá woɔ shikpɔŋ lɛ nɔ muji,+ ni anyɛŋ akɛ nɔ ko akpãtã ahã lá ni afɔse ashwie shikpɔŋ lɛ nɔ lɛ, ja mɔ ni fɔse lá lɛ eshwie shi lɛ nɔŋŋ lá.+ 34  Nyɛkabulea shikpɔŋ ni nyɛyɔɔ nɔ lɛ, nɔ ni mihiɔ nɔ lɛ; ejaakɛ mi, Yehowa, miyɛ Israelbii lɛ ateŋ.’”+

Shishigbɛ Niŋmaa

Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
Loo “susuma.”
Loo “baatswa susuma ko nɔ.”
Hebri sht. ŋm., “efɔ̃ nɔ ko etswa lɛ be mli ni ewo lɛ antɛo.”
Hebri sht. ŋm., “efɔ̃ nɔ ko etswa lɛ be mli ni ewoko lɛ antɛo.”
Loo “susuma.”
Hebri sht. ŋm., “anaabu.”
Loo “susuma ko susuma ko.”
Loo “esusuma.”