4 Mose 32:1-42

  • Shihilɛhei ni yɔɔ Yordan lɛ bokãgbɛ (1-42)

32  Agbɛnɛ, Rubenbii+ lɛ kɛ Gadbii+ lɛ yɛ lɛɛ kooloi babaoo diɛŋtsɛ, ni amɛna akɛ Yazer+ kɛ Gilead shikpɔji lɛ ji he ko ni hi jogbaŋŋ kɛhã kooloi alɛɛ.  No hewɔ lɛ, Gadbii lɛ kɛ Rubenbii lɛ tee Mose kɛ osɔfo Eleazar kɛ maŋ lɛ mli wekunukpai lɛ aŋɔɔ ni amɛyakɛɛ akɛ:  “Atarot kɛ Dibon kɛ Yazer kɛ Nimra kɛ Heshbon+ kɛ Eleale kɛ Sebam kɛ Nebo+ kɛ Beon,+  ni ji shikpɔŋ ni Yehowa ye nɔ kunim yɛ Israel maŋ lɛ hiɛ+ lɛ ji shikpɔŋ ni hi kɛhã kooloi alɛɛ, ni otsuji yɛ lɛɛ kooloi babaoo.”+  Amɛkɛɛ kɛtsa nɔ akɛ: “Kɛji wɔhiɛ eba nyam yɛ ohiɛ lɛ, no lɛ, hã akɛ shikpɔŋ nɛɛ ahã otsuji akɛ amɛnɔ. Kaahã wɔfo Yordan lɛ.”  Ni Mose kɛɛ Gadbii lɛ kɛ Rubenbii lɛ akɛ: “Ani nyɛnyɛmimɛi lɛ aya ta, ní nyɛ lɛ nyɛhi biɛ?  Mɛni hewɔ nyɛjeɔ Israelbii lɛ anijiaŋ wui koni amɛkafo mli kɛtee shikpɔŋ ni Yehowa etswa efai shi akɛ ekɛbaahã amɛ lɛ nɔ lɛ?  Nakai nyɛtsɛmɛi lɛ fee be ni mitsu amɛ kɛjɛ Kadesh-barnea koni amɛyakwɛ shikpɔŋ lɛ.+  Be ni amɛtee* Eshkol Jɔɔ*+ lɛ mli ní amɛna shikpɔŋ lɛ, amɛje Israelbii lɛ anijiaŋ wui koni amɛkaya shikpɔŋ ni Yehowa kɛbaahã amɛ lɛ nɔ.+ 10  Yehowa mli wo la nakai gbi lɛ, ni ekã kitã akɛ:+ 11  ‘Hii ni shi* Ejipt ni eye kɛjɛ afii 20 kɛyaa lɛ enaŋ shikpɔŋ+ ni mikã Abraham kɛ Isak kɛ Yakob kitã yɛ he lɛ,+ ejaakɛ amɛkɛ amɛtsui muu fɛɛ enyiɛɛɛ misɛɛ— 12  ja Kaleb,+ Keniznyo Yefune binuu lɛ, kɛ Yoshua,+ Nun binuu lɛ pɛ, ejaakɛ amɛ lɛ, amɛkɛ amɛtsui muu fɛɛ nyiɛ Yehowa sɛɛ.’+ 13  No hewɔ lɛ, Yehowa mli wo la ewo Israel, ni ehã amɛtsomlo yɛ ŋa lɛ nɔ afii 40,+ kɛyashi beyinɔ ni yinɔbii ni fee efɔŋ yɛ Yehowa hiɛ lɛ fɛɛ tã.+ 14  Ni naa, nyɛbaye nyɛtsɛmɛi lɛ anajiaŋ akɛ hii nɔshafeelɔi aseshibii, koni nyɛhã Yehowa mlifu ni naa wa lɛ afa yɛ Israel nɔ fe tsutsu lɛ. 15  Kɛ́ nyɛje esɛɛ lɛ, no lɛ, bɔ fɛɛ bɔ ni fee lɛ, ebaashi amɛ ekoŋŋ yɛ ŋa lɛ nɔ, ni nyɛbaahã maŋ muu nɛɛ fɛɛ hiɛ akpãtã.” 16  Sɛɛ mli lɛ, amɛtsi amɛbɛŋkɛ lɛ ni amɛkɛɛ: “Hã wɔkɛ tɛi amamɔ kooloi atsũi wɔhã wɔkooloi lɛ, kɛ maji hu wɔhã wɔbii lɛ. 17  Shi wɔbaasaa wɔhe kɛhã tawuu,+ ni wɔbaanyiɛ Israelbii lɛ ahiɛ kɛyashi beyinɔ ni wɔkɛ amɛ baayashɛ he ni amɛyaa lɛ, shi wɔbii lɛ baahi maji ni atswa gbogboi awo amɛhe lɛ amli, koni shikpɔŋ lɛ nɔ bii lɛ akagba amɛnaa. 18  Wɔkuŋ wɔsɛɛ kɛbaŋ wɔshĩai lɛ amli kɛyashi beyinɔ ni Israelbii lɛ ateŋ mɔ fɛɛ mɔ nine baashɛ eshikpɔŋ nɔ akɛ gboshinii.+ 19  Ejaakɛ wɔkɛ amɛ eŋɔŋ gboshinii yɛ Yordan lɛ sɛɛgbɛ kɛyaa, ejaakɛ wɔ lɛ, wɔná wɔgboshinii momo yɛ Yordan lɛ bokãgbɛ.”+ 20  Mose hã amɛ hetoo akɛ: “Kɛji nyɛaafee enɛ lɛ: Nyɛkɔlɔa tawuu nii yɛ Yehowa hiɛ kɛhã ta lɛ;+ 21  ni kɛji nyɛteŋ mɔ fɛɛ mɔ kɔlɔ tawuu nii, ni efo Yordan lɛ yɛ Yehowa hiɛ be ni eshwieɔ ehenyɛlɔi lɛ yɛ ehiɛ+ 22  kɛyashi beyinɔ ni abaaye shikpɔŋ lɛ nɔ kunim yɛ Yehowa hiɛ lɛ,+ no sɛɛ lɛ, nyɛbaanyɛ nyɛku nyɛsɛɛ,+ ni nyɛyeŋ fɔ yɛ Yehowa kɛ Israel hiɛ. No lɛ, shikpɔŋ nɛɛ baatsɔ nyɛnɔ yɛ Yehowa hiɛ.+ 23  Shi kɛji nyɛfeee enɛ lɛ, no lɛ, nyɛfee esha nyɛshi Yehowa. Kɛ́ eba lɛ nakai lɛ, nyɛnáa nyɛlea akɛ nyɛhe esha lɛ baanyiɛ nyɛsɛɛ. 24  No hewɔ lɛ, nyɛbaanyɛ nyɛtotoo maji nyɛhã nyɛbii lɛ, ní nyɛmamɔ kooloi atsũi nyɛhã nyɛkooloi lɛ,+ shi nyɛyea shi ni nyɛwo lɛ nɔ.” 25  Gadbii lɛ kɛ Rubenbii lɛ kɛɛ Mose akɛ: “Otsuji baafee tamɔ bɔ ni minuŋtsɔ efã lɛ pɛpɛɛpɛ. 26  Wɔbii lɛ kɛ wɔŋamɛi lɛ kɛ wɔlɛɛ kooloi lɛ kɛ wɔshĩa kooloi lɛ fɛɛ baahi jɛmɛ, yɛ Gilead maji lɛ amli,+ 27  shi otsuji baafo faa lɛ kɛya, nuu fɛɛ nuu baawula ehe kɛhã ta koni wɔyawu ta lɛ yɛ Yehowa hiɛ,+ tamɔ bɔ ni minuŋtsɔ ewie lɛ pɛpɛɛpɛ.” 28  No hewɔ lɛ, Mose kɛ famɔ hã osɔfo Eleazar kɛ Yoshua, Nun binuu lɛ, kɛ Israelbii lɛ atsɛmɛi ashĩai lɛ anɔ onukpai lɛ yɛ amɛhewɔ. 29  Mose kɛɛ amɛ akɛ: “Kɛji Gadbii lɛ kɛ Rubenbii lɛ kɛ nyɛ fo Yordan lɛ kɛtee, ni nuu fɛɛ nuu wula ehe kɛhã ta yɛ Yehowa hiɛ, ni aye shikpɔŋ lɛ nɔ kunim yɛ nyɛhiɛ lɛ, no lɛ, nyɛkɛ Gilead shikpɔŋ lɛ ahãa amɛ akɛ amɛnɔ.+ 30  Shi kɛji amɛkɔlɔɔɔ tawuu nii koni amɛkɛ nyɛ afo faa lɛ kɛya lɛ, no lɛ, amɛbaahi nyɛteŋ yɛ Kanaan shikpɔŋ lɛ nɔ.” 31  Kɛkɛ ni Gadbii lɛ kɛ Rubenbii lɛ hã hetoo akɛ: “Nɔ ni Yehowa ekɛɛ otsuji lɛ, no wɔbaafee. 32  Wɔbaakɔlɔ tawuu nii, ni wɔbaafo faa lɛ yɛ Yehowa hiɛ kɛya Kanaan shikpɔŋ lɛ nɔ,+ shi gboshinii ni wɔbaaná lɛ, Yordan lɛ afã nɛɛ wɔbaaná yɛ.” 33  No hewɔ lɛ, Mose ŋɔ Amorbii lɛ amaŋtsɛ Sihon+ maŋtsɛyeli lɛ, kɛ Bashan maŋtsɛ Og maŋtsɛyeli+ lɛ, ni ji nakai kpokpai lɛ anɔ shikpɔŋ lɛ, kɛ maji ni bɔle shikpɔŋ lɛ he lɛ ehã Gadbii lɛ kɛ Rubenbii+ lɛ kɛ Manase, ni ji Yosef binuu lɛ, weku lɛ fã lɛ.+ 34  Ni Gadbii lɛ to* Dibon+ kɛ Atarot+ kɛ Aroer+ 35  kɛ Atrot-shofan kɛ Yazer+ kɛ Yogbeha+ 36  kɛ Bet-nimra+ kɛ Bet-haran,+ maji ni atswa gbogboi awo amɛhe lɛ, ni amɛkɛ tɛi mamɔ toi atsũi amɛhã toi lɛ. 37  Ni Rubenbii lɛ to Heshbon+ kɛ Eleale+ kɛ Kiriataim+ 38  kɛ Nebo+ kɛ Baal-meon+—atsake amɛgbɛ́ii lɛ—kɛ Sibma; ni amɛwo maji ni amɛsaa amɛto lɛ gbɛ́ii hei. 39  Manase binuu Makir+ bii lɛ fã amɛyatutua Gilead, ni amɛŋɔ maŋ lɛ, ni amɛshwie Amorbii ni yɔɔ jɛmɛ lɛ. 40  No hewɔ lɛ, Mose kɛ Gilead hã Makir, Manase binuu lɛ, ni ehi jɛmɛ.+ 41  Ni Yair, Manase binuu lɛ, fã eyatutua jɛmɛ bii lɛ, ni eŋɔ amɛmama tsũ akrowai lɛ, ni etsɛ amɛ Havot-yair.*+ 42  Ni Noba fã eyatutua Kenat, ni eŋɔ maŋ lɛ kɛ maji ni baa lɛ abo* lɛ, ni ekɛ lɛ diɛŋtsɛ egbɛ́i Noba lɛ wo lɛ.

Shishigbɛ Niŋmaa

Loo “amɛkwɔ kɛtee.”
Loo “Nujɔɔ.”
Loo “kwɔ kɛshi.”
Loo “saa amɛto.”
Eshishi ji, “Yair Mama Tsũ Akrowai.”
Loo “ehewɔ maji.”