4 Mose 3:1-51

  • Aaron bihii lɛ (1-4)

  • Ahala Levibii lɛ koni amɛsɔmɔ (5-39)

  • Kromɔbii lɛ akpɔ̃mɔ (40-51)

3  Agbɛnɛ, Aaron kɛ Mose wekutɔkpai* lɛ yɛ gbi nɔ ni Yehowa kɛ Mose wie yɛ Sinai Gɔŋ lɛ nɔ lɛ nɛ.+  Aaron bihii lɛ agbɛ́ii nɛ: kromɔbi lɛ ji Nadab, kɛ Abihu+ kɛ Eleazar+ kɛ Itamar.+  Gbɛ́ii nɛɛ ji Aaron bihii lɛ agbɛ́ii, amɛji osɔfoi ni afɔ amɛ mu ni ahole amɛ* koni amɛsɔmɔ akɛ osɔfoi lɛ.+  Shi Nadab kɛ Abihu gboi yɛ Yehowa hiɛ be ni amɛkɛ la ni mla eŋmɛɛɛ gbɛ tee Yehowa hiɛ+ yɛ Sinai ŋa lɛ nɔ lɛ, ni amɛbɛ bihii. Shi Eleazar+ kɛ Itamar+ tee nɔ amɛfata amɛtsɛ Aaron he kɛsɔmɔ akɛ osɔfoi.  Ni Yehowa kɛɛ Mose akɛ:  “Okɛ Levi weku lɛ aba,+ ní okɛ amɛ abadamɔ osɔfo Aaron hiɛ, ni amɛbaasɔmɔ+ lɛ.  Amɛbaatsu amɛsɔ̃i lɛ ahe nii amɛhã lɛ kɛ maŋ muu lɛ fɛɛ yɛ kpee buu lɛ hiɛ kɛtsɔ amɛnitsumɔ ni kɔɔ sɔlemɔ buu lɛ he lɛ ni amɛbaatsu lɛ nɔ.  Amɛ amɛkwɛ kpee buu lɛ he nibii lɛ fɛɛ anɔ,+ ní amɛtsu amɛsɔ̃i lɛ ahe nii amɛhã Israelbii lɛ kɛtsɔ sɔlemɔ buu lɛ he nitsumɔi lɛ ni amɛbaatsu lɛ nɔ.+  Okɛ Levibii lɛ ahã Aaron kɛ ebihii lɛ. Amɛji mɛi ni akɛhã lɛ, akɛ amɛ ehã lɛ kɛjɛ Israelbii lɛ ateŋ.+ 10  Halamɔ Aaron kɛ ebihii lɛ ní amɛtsu amɛsɔfoyeli nitsumɔi lɛ,+ ni mɔkpɔŋ fɛɛ mɔkpɔŋ* ni baabɛŋkɛ lɛ, agbe lɛ.”+ 11  Yehowa tee nɔ ekɛ Mose wie ekɛɛ: 12  “Naa! mi lɛ, miŋɔ Levibii lɛ kɛjɛ Israelbii lɛ ateŋ kɛye Israelbii lɛ akromɔbii lɛ fɛɛ* anajiaŋ,+ ni Levibii lɛ baatsɔ minɔ. 13  Ejaakɛ kromɔbi fɛɛ kromɔbi lɛ, minɔ ni.+ Gbi ni mitswia kromɔbi fɛɛ kromɔbi ni yɔɔ Ejipt shikpɔŋ lɛ nɔ lɛ nii lɛ,+ mifee kromɔbi fɛɛ kromɔbi ni yɔɔ Israel lɛ krɔŋkrɔŋ mihã mihe, kɛjɛ gbɔmɔ nɔ kɛyashi kooloo nɔ.+ Amɛbaatsɔmɔ minɔ. Miji Yehowa lɛ.” 14  Yehowa tee nɔ ekɛ Mose wie yɛ Sinai ŋa lɛ nɔ+ ekɛɛ: 15  “Ŋmalamɔ Levi bihii lɛ agbɛ́ii yɛ amɛtsɛmɛi ashĩai lɛ anaa, kɛ agbɛnɛ hu, yɛ amɛwekui lɛ anaa. Ŋmaa nuu fɛɛ nuu ni eye kɛjɛ nyɔɔŋ kome kɛyaa lɛ gbɛ́i.”+ 16  No hewɔ lɛ, Mose ŋmala amɛgbɛ́ii yɛ Yehowa famɔ lɛ naa, tamɔ bɔ ni afã lɛ lɛ pɛpɛɛpɛ. 17  Levi bihii lɛ agbɛ́ii nɛ: Gershon kɛ Kohat kɛ Merari.+ 18  Agbɛnɛ, Gershon bihii lɛ agbɛ́ii yɛ amɛwekui lɛ anaa nɛ: Libni kɛ Shimei.+ 19  Kohat bihii lɛ yɛ amɛwekui lɛ anaa ji Amram kɛ Izehar kɛ Hebron kɛ Uziel.+ 20  Merari bihii lɛ yɛ amɛwekui lɛ anaa ji Mali+ kɛ Mushi.+ Mɛnɛɛmɛi ji Levibii lɛ awekui lɛ yɛ amɛtsɛmɛi ashĩai lɛ anaa. 21  Gershon mli Libnibii+ aweku lɛ kɛ Shimeibii aweku lɛ jɛ. Mɛnɛɛmɛi ji Gershonbii lɛ awekui lɛ. 22  Amɛhii fɛɛ ni eye kɛjɛ nyɔɔŋ kome kɛyaa ni aŋmala amɛgbɛ́ii lɛ ayifalɛ ji 7,500.+ 23  Gershonbii lɛ awekui lɛ bɔ nsara yɛ sɔlemɔ buu lɛ sɛɛ,+ yɛ anaigbɛ. 24  Gershonbii lɛ atsɛmɛi ashĩa lɛ onukpa ji Eliasaf, Lael binuu lɛ. 25  Gershon bihii lɛ anitsumɔ+ yɛ kpee buu lɛ mli ji, ní amɛkwɛ sɔlemɔ buu lɛ kɛ mama lɛ+ kɛ enɔhaanɔ+ lɛ kɛ kpee buu lɛ shinaa lɛ naa pateeshɛŋ+ lɛ, 26  kɛ kpo lɛ he pateeshɛŋi ni tsotsoroɔ shi+ lɛ, kɛ pateeshɛŋ+ ni tsĩɔ kpo ni bɔle sɔlemɔ buu lɛ kɛ afɔleshaa latɛ lɛ he lɛ shinaa lɛ naa lɛ, kɛ kpo lɛ he kpãi lɛ, kɛ nitsumɔi fɛɛ ni kɔɔ enɛɛmɛi ahe lɛ nɔ. 27  Kohat mli Amrambii aweku lɛ kɛ Izeharbii aweku lɛ kɛ Hebronbii aweku lɛ kɛ Uzielbii aweku lɛ jɛ. Mɛnɛɛmɛi ji Kohatbii lɛ awekui lɛ.+ 28  Hii fɛɛ ni eye kɛjɛ nyɔɔŋ kome kɛyaa lɛ ayifalɛ ji 8,600; amɛji mɛi ni kwɛɔ he krɔŋkrɔŋ lɛ nɔ.+ 29  Kohat bihii lɛ awekui lɛ bɔ nsara yɛ sɔlemɔ buu lɛ wuoyigbɛ.+ 30  Kohatbii lɛ awekui lɛ atsɛmɛi ashĩa lɛ onukpa ji Elizafan, Uziel binuu lɛ.+ 31  Amɛnitsumɔ ji, ní amɛkwɛ Adeka+ lɛ kɛ okpɔlɔ+ lɛ kɛ kanetso+ lɛ kɛ latɛi+ lɛ kɛ nibii+ ni akɛsɔmɔɔ yɛ he krɔŋkrɔŋ lɛ kɛ pateeshɛŋ+ lɛ kɛ nitsumɔi fɛɛ ni kɔɔ enɛɛmɛi ahe lɛ nɔ.+ 32  Levibii lɛ awekunukpai lɛ anɔ onukpa ji Eleazar,+ osɔfo Aaron binuu lɛ, ni lɛ ji mɔ ni kwɛɔ mɛi ni tsuɔ nii yɛ he krɔŋkrɔŋ lɛ anɔ. 33  Merari mli Malibii aweku lɛ kɛ Mushibii aweku lɛ jɛ. Mɛnɛɛmɛi ji Meraribii lɛ awekui lɛ.+ 34  Hii fɛɛ ni eye kɛjɛ nyɔɔŋ kome kɛyaa ni aŋmala amɛgbɛ́ii lɛ ayifalɛ ji 6,200.+ 35  Meraribii lɛ awekui lɛ atsɛmɛi ashĩa lɛ onukpa ji Zuriel, Abihail binuu lɛ. Amɛbɔ nsara yɛ sɔlemɔ buu lɛ kooyigbɛ.+ 36  Merari bihii lɛ anitsumɔ ji, ní amɛkwɛ sɔlemɔ buu lɛ mplaŋi+ lɛ kɛ emlibelemɔnii+ lɛ kɛ ekulashiŋi+ lɛ kɛ enɔdaamɔnii ni fɔji yɔɔ mli lɛ kɛ ehe nibii+ lɛ fɛɛ kɛ nitsumɔi fɛɛ ni kɔɔ enɛɛmɛi ahe lɛ nɔ,+ 37  kɛ agbɛnɛ hu, akulashiŋi fɛɛ ni bɔle kpo lɛ he kɛkpe lɛ kɛ amɛnɔdaamɔnii ni fɔji yɔɔ mli lɛ,+ amɛdadei kɛ amɛnaa piɔpiɔi lɛ, kɛ amɛhe kpãi lɛ. 38  Mɛi ni bɔ nsara yɛ sɔlemɔ buu lɛ hiɛ, yɛ bokãgbɛ, yɛ kpee buu lɛ hiɛ, he ni ye hulushiteehe lɛ ji Mose kɛ Aaron kɛ ebihii lɛ. Amɛji mɛi ni sa akɛ amɛkwɛ jamɔhe lɛ nɔ akɛ amɛsɔ̃ ní amɛbaatsu he nii amɛhã Israelbii lɛ. Mɔkpɔŋ fɛɛ mɔkpɔŋ* ni baabɛŋkɛ lɛ, agbe lɛ.+ 39  Hii fɛɛ ni ji Levibii ni eye kɛjɛ nyɔɔŋ kome kɛyaa ni Mose kɛ Aaron ŋmala amɛgbɛ́ii yɛ amɛwekui lɛ anaa yɛ Yehowa famɔ naa lɛ ayifalɛ ji 22,000. 40  Ni Yehowa kɛɛ Mose akɛ: “Ŋmalamɔ Israelbii lɛ akromɔbii fɛɛ ni ji hii ni eye kɛjɛ nyɔɔŋ kome kɛyaa lɛ agbɛ́ii,+ kanemɔ amɛ, ni oŋmala amɛgbɛ́ii lɛ oshwie shi. 41  Okɛ Levibii lɛ ahã mi yɛ Israelbii lɛ akromɔbii lɛ fɛɛ anajiaŋ+—miji Yehowa, ni okɛ Levibii lɛ ashĩa kooloi lɛ aye Israelbii lɛ ashĩa kooloi lɛ akromɔbii lɛ fɛɛ anajiaŋ.”+ 42  Ni Mose ŋmala Israelbii lɛ akromɔbii lɛ fɛɛ agbɛ́ii, tamɔ bɔ ni Yehowa fã lɛ lɛ pɛpɛɛpɛ. 43  Kromɔbii fɛɛ ni ji hii ni eye kɛjɛ nyɔɔŋ kome kɛyaa ni aŋmala amɛgbɛ́ii lɛ ayifalɛ ji 22,273. 44  Yehowa tee nɔ ekɛ Mose wie ekɛɛ: 45  “Okɛ Levibii lɛ aye Israelbii lɛ akromɔbii lɛ fɛɛ anajiaŋ, ni okɛ Levibii lɛ ashĩa kooloi lɛ hu aye amɛshĩa kooloi lɛ anajiaŋ, ni Levibii lɛ baatsɔ minɔ. Miji Yehowa lɛ. 46  Israelbii lɛ akromɔbii lɛ ayifalɛ ni amɛkɛfe Levibii lɛ ayifalɛ lɛ ji 273.+ Bɔ ni afee ni akpɔ̃+ mɛi ni fe nɔ nɛɛ, 47  hemɔ shekeli* enumɔ yɛ amɛteŋ mɔ fɛɛ mɔ yi,+ yɛ shekel ni akɛtsuɔ nii yɛ he krɔŋkrɔŋ lɛ naa.* Shekel kome feɔ gerai* 20.+ 48  Okɛ shika lɛ ahã Aaron kɛ ebihii lɛ, ní no afee Israelbii lɛ akromɔbii ni fe amɛ Levibii lɛ ayifalɛ lɛ akpɔmɔnii.” 49  No hewɔ lɛ, Mose he kpɔmɔ shika lɛ yɛ mɛi ni fe Levibii lɛ ayifalɛ lɛ adɛŋ, koni akɛkpɔ̃ amɛ. 50  Ehe shika lɛ yɛ Israelbii lɛ akromɔbii lɛ adɛŋ, shekeli 1,365, yɛ shekel ni akɛtsuɔ nii yɛ he krɔŋkrɔŋ lɛ naa. 51  Ni Mose kɛ kpɔmɔ shika lɛ hã Aaron kɛ ebihii lɛ, yɛ Yehowa wiemɔ lɛ naa, tamɔ bɔ ni Yehowa fã Mose lɛ pɛpɛɛpɛ.

Shishigbɛ Niŋmaa

Hebri sht. ŋm., “yinɔi.”
Hebri sht. ŋm., “awo amɛdɛŋ obɔbɔ.” Kwɛmɔ 2Mo 29:9 shn.
Loo “mɔ fɛɛ mɔ ni bɛ hegbɛ,” ni tsɔɔ akɛ, mɔ ni jɛɛɛ Aaron weku lɛ mli.
Hebri sht. ŋm., “akromɔbi fɛɛ kromɔbi ni gbeleɔ musu naa lɛ.”
Loo “Mɔ fɛɛ mɔ ni bɛ hegbɛ,” ni tsɔɔ akɛ, mɔ ni jeee Levinyo.
Shekel kome feɔ gram 11.4 (oz t 0.367). Kwɛmɔ Saji Krokomɛi B14 lɛ.
Loo “yɛ shekel krɔŋkrɔŋ lɛ naa.”
Gera kome feɔ gram 0.57 (oz t 0.01835). Kwɛmɔ Saji Krokomɛi B14 lɛ.