4 Mose 29:1-40

  • Gbɛi ni atsɔɔ nɔ ashãa afɔlei srɔtoi (1-40)

    • Tɛtɛrɛmantɛrɛkpãmɔ gbi (1-6)

    • Kpatamɔ Gbi (7-11)

    • Agbai Agbi Jurɔ (12-38)

29  “‘Ni nyɔɔŋ ni ji kpawo lɛ nɔ klɛŋklɛŋ gbi lɛ nɔ lɛ, nyɛfea kpee krɔŋkrɔŋ. Nyɛkatsua nitsumɔ ko nitsumɔ ko ni wa.+ Eji gbi ni nyɛbaakpã tɛtɛrɛmantɛrɛ.+  Nyɛkɛ tsinanuu* kome kɛ gwantɛŋnuu kome kɛ gwantɛŋbii kpawo ni ji hii ni eko fɛɛ eko eye afi, ní kpa ko bɛ amɛ fɛɛ amɛhe, abahãa akɛ shãa afɔle ni jeɔ ŋma jogbaŋŋ* woɔ Yehowa,  kɛ amɛhe ŋmaa* afɔle ni ji ashikishaŋ kpakpa efa mlijai nyɔŋma mli etɛ ni akɛ mu efutu kɛhã tsinanuu lɛ, efa mlijai nyɔŋma mli enyɔ kɛhã gwantɛŋnuu lɛ,  kɛ efa mlijai nyɔŋma mli ekome kɛhã gwantɛŋbii kpawo ni ji hii lɛ ateŋ eko fɛɛ eko,  kɛ abotianuu* kome, ní akɛshã esha afɔle koni akɛkpãtã ahã nyɛ.  Akɛ enɛ afata daa nyɔɔŋ nɔ shãa afɔle lɛ kɛ ehe ŋmaa afɔle+ lɛ kɛ daa gbi shãa afɔle lɛ kɛ ehe ŋmaa afɔle+ lɛ kɛ amɛhe dãa afɔlei+ lɛ ahe, tamɔ bɔ ni afeɔ daa lɛ, eji afɔle ni jeɔ ŋma jogbaŋŋ,* afɔle ni akɛ la shãa ahãa Yehowa.  “‘Ni nyɔɔŋ ni ji kpawo nɛɛ nɔ gbi ni ji nyɔŋma lɛ nɔ lɛ, nyɛfea kpee krɔŋkrɔŋ,+ ni nyɛwaa nyɛhe yi.* Nyɛkatsua nitsumɔ ko nitsumɔ ko kwraa.+  Ni nyɛkɛ tsinanuu* kome kɛ gwantɛŋnuu kome kɛ gwantɛŋbii kpawo ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ abahãa Yehowa akɛ shãa afɔle, afɔle ni jeɔ ŋma jogbaŋŋ.*  Ni amɛhe ŋmaa afɔle lɛ afee ashikishaŋ kpakpa susumɔnii mlijai nyɔŋma mli etɛ ni akɛ mu efutu kɛhã tsinanuu lɛ, susumɔnii mlijai nyɔŋma mli enyɔ kɛhã gwantɛŋnuu kome lɛ, 10  susumɔnii mlijai nyɔŋma mli ekome kɛhã gwantɛŋbii kpawo ni ji hii lɛ ateŋ eko fɛɛ eko, 11  kɛ abotianuu* kome hu koni akɛshã esha afɔle, esoro esha afɔle ni akɛkpãtãa+ lɛ kɛ daa gbi shãa afɔle lɛ kɛ ehe ŋmaa afɔle lɛ, kɛ amɛhe dãa afɔlei lɛ. 12  “‘Ni nyɔɔŋ ni ji kpawo lɛ nɔ gbi ni ji 15 lɛ nɔ lɛ, nyɛfea kpee krɔŋkrɔŋ. Nyɛkatsua nitsumɔ ko nitsumɔ ko ni wa, ni nyɛyea gbi jurɔ nyɛhãa Yehowa gbii kpawo.+ 13  Ni nyɛkɛ tsinahii* 13 kɛ gwantɛŋhii 2 kɛ gwantɛŋbii 14 ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ abahãa akɛ shãa afɔle,+ afɔle ni akɛ la shãa ni jeɔ ŋma jogbaŋŋ* woɔ Yehowa. 14  Ni amɛhe ŋmaa afɔle lɛ afee ashikishaŋ kpakpa susumɔnii mlijai nyɔŋma mli etɛ ni akɛ mu efutu kɛhã tsinahii 13 lɛ ateŋ eko fɛɛ eko, susumɔnii mlijai nyɔŋma mli enyɔ kɛhã gwantɛŋhii 2 lɛ ateŋ eko fɛɛ eko, 15  kɛ susumɔnii mlijai nyɔŋma mli ekome kɛhã gwantɛŋbii 14 ni ji hii lɛ ateŋ eko fɛɛ eko, 16  kɛ abotianuu* kome hu koni akɛshã esha afɔle, esoro daa gbi shãa afɔle lɛ, kɛ ehe ŋmaa afɔle lɛ, kɛ ehe dãa afɔle lɛ.+ 17  “‘Ni gbi ni ji enyɔ lɛ nɔ lɛ, tsinahii* 12 kɛ gwantɛŋhii 2 kɛ gwantɛŋbii 14 ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ 18  kɛ amɛhe ŋmaa afɔle kɛ amɛhe dãa afɔlei kɛhã tsinahii lɛ, gwantɛŋhii lɛ, kɛ gwantɛŋbii ni ji hii lɛ, yɛ amɛyifalɛ lɛ naa, tamɔ bɔ ni afeɔ daa lɛ, 19  kɛ abotianuu* kome hu koni akɛshã esha afɔle, esoro daa gbi shãa afɔle lɛ kɛ ehe ŋmaa afɔle lɛ, kɛ amɛhe dãa afɔlei lɛ.+ 20  “‘Ni gbi ni ji etɛ lɛ nɔ lɛ, tsinahii 11 kɛ gwantɛŋhii 2 kɛ gwantɛŋbii 14 ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ 21  kɛ amɛhe ŋmaa afɔle kɛ amɛhe dãa afɔlei kɛhã tsinahii lɛ kɛ gwantɛŋhii lɛ kɛ gwantɛŋbii ni ji hii lɛ, yɛ amɛyifalɛ lɛ naa, tamɔ bɔ ni afeɔ daa lɛ, 22  kɛ abotia kome hu koni akɛshã esha afɔle, esoro daa gbi shãa afɔle lɛ kɛ ehe ŋmaa afɔle lɛ, kɛ ehe dãa afɔle lɛ.+ 23  “‘Ni gbi ni ji ejwɛ lɛ nɔ lɛ, tsinahii 10 kɛ gwantɛŋhii 2 kɛ gwantɛŋbii 14 ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ 24  kɛ amɛhe ŋmaa afɔle kɛ amɛhe dãa afɔlei kɛhã tsinahii lɛ kɛ gwantɛŋhii lɛ kɛ gwantɛŋbii ni ji hii lɛ, yɛ amɛyifalɛ lɛ naa, tamɔ bɔ ni afeɔ daa lɛ, 25  kɛ abotianuu* kome hu koni akɛshã esha afɔle, esoro daa gbi shãa afɔle lɛ, kɛ ehe ŋmaa afɔle lɛ, kɛ ehe dãa afɔle lɛ.+ 26  “‘Ni gbi ni ji enumɔ lɛ nɔ lɛ, tsinahii 9 kɛ gwantɛŋhii 2 kɛ gwantɛŋbii 14 ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ 27  kɛ amɛhe ŋmaa afɔle kɛ amɛhe dãa afɔlei kɛhã tsinahii lɛ kɛ gwantɛŋhii lɛ kɛ gwantɛŋbii ni ji hii lɛ, yɛ amɛyifalɛ lɛ naa, tamɔ bɔ ni afeɔ daa lɛ, 28  kɛ abotia kome hu koni akɛshã esha afɔle, esoro daa gbi shãa afɔle lɛ kɛ ehe ŋmaa afɔle lɛ, kɛ ehe dãa afɔle lɛ.+ 29  “‘Ni gbi ni ji ekpaa lɛ nɔ lɛ, tsinahii 8 kɛ gwantɛŋhii 2 kɛ gwantɛŋbii 14 ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ 30  kɛ amɛhe ŋmaa afɔle kɛ amɛhe dãa afɔlei kɛhã tsinahii lɛ kɛ gwantɛŋhii lɛ kɛ gwantɛŋbii ni ji hii lɛ, yɛ amɛyifalɛ lɛ naa, tamɔ bɔ ni afeɔ daa lɛ, 31  kɛ abotia kome hu koni akɛshã esha afɔle, esoro daa gbi shãa afɔle lɛ kɛ ehe ŋmaa afɔle lɛ, kɛ ehe dãa afɔlei lɛ.+ 32  “‘Ni gbi ni ji kpawo lɛ nɔ lɛ, tsinahii 7 kɛ gwantɛŋhii 2 kɛ gwantɛŋbii 14 ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ 33  kɛ amɛhe ŋmaa afɔle kɛ amɛhe dãa afɔlei kɛhã tsinahii lɛ kɛ gwantɛŋhii lɛ kɛ gwantɛŋbii ni ji hii lɛ, yɛ amɛyifalɛ lɛ naa, tamɔ bɔ ni afeɔ daa lɛ, 34  kɛ abotia kome hu koni akɛshã esha afɔle, esoro daa gbi shãa afɔle lɛ kɛ ehe ŋmaa afɔle lɛ, kɛ ehe dãa afɔle lɛ.+ 35  “‘Gbi ni ji kpaanyɔ lɛ nɔ lɛ, nyɛfea henaabuamɔ krɔŋkrɔŋ. Nyɛkatsua nitsumɔ ko nitsumɔ ko ni wa.+ 36  Ni nyɛkɛ tsinanuu kome kɛ gwantɛŋnuu kome kɛ gwantɛŋbii kpawo ni ji hii ni eko fɛɛ eko eye afi, ní kpa ko bɛ amɛ fɛɛ amɛhe,+ abahãa akɛ shãa afɔle, afɔle ni akɛ la shãa ni jeɔ ŋma jogbaŋŋ* woɔ Yehowa, 37  kɛ amɛhe ŋmaa afɔle kɛ amɛhe dãa afɔlei kɛhã tsinanuu lɛ kɛ gwantɛŋnuu lɛ kɛ gwantɛŋbii ni ji hii lɛ, yɛ amɛyifalɛ lɛ naa, tamɔ bɔ ni afeɔ daa lɛ, 38  kɛ abotia kome hu koni akɛshã esha afɔle, esoro daa gbi shãa afɔle lɛ kɛ ehe ŋmaa afɔle lɛ, kɛ ehe dãa afɔle lɛ.+ 39  “‘Nyɛkɛ afɔlei nɛɛ ahãa Yehowa yɛ nyɛgbii juji ni ato lɛ anɔ,+ nyɛkɛfataa nyɛshiwoo afɔlei+ kɛ afɔlei ni nyɛjɛɔ nyɛsuɔmɔ mli nyɛkɛhãa+ lɛ ahe akɛ nyɛshãa afɔlei+ kɛ nyɛŋmaa afɔlei+ kɛ nyɛdãa afɔlei+ kɛ nyɛnaanyobɔɔ afɔlei.’”+ 40  Mose kɛɛ Israelbii lɛ nibii fɛɛ ni Yehowa fã lɛ lɛ.

Shishigbɛ Niŋmaa

Loo “tsina oblanyo.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Loo “abotia oblanyo.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “nyɛwaa nyɛsusumai ayi.” Kɛ́ akɛɛ ‘mɔ ko waa ehe yi’ lɛ, bei pii lɛ, nɔ ni etsɔɔ ji akɛ, mɔ lɛ tsĩɔ ehe naa yɛ nibii srɔtoi ahe, ni eko ji akɛ, ehiɔ ŋmaa.
Loo “tsina oblanyo.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “abotia oblanyo.”
Loo “tsina oblahii.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “abotia oblanyo.”
Loo “tsina oblahii.”
Loo “abotia oblanyo.”
Loo “abotia oblanyo.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”