4 Mose 28:1-31

  • Gbɛi ni atsɔɔ nɔ ashãa afɔlei srɔtoi (1-31)

    • Daa gbi afɔlei (1-8)

    • Hejɔɔmɔ Gbi lɛ nɔ afɔlei (9, 10)

    • Daa nyɔɔŋ nɔ afɔlei (11-15)

    • Hehoo lɛ afɔlei (16-25)

    • Otsii Agbi Jurɔ lɛ afɔlei (26-31)

28  No sɛɛ lɛ, Yehowa kɛɛ Mose akɛ:  “Fã Israelbii lɛ ni okɛɛ amɛ akɛ, ‘Nyɛkwɛa ni nyɛkɛ mifɔle, ni ji miniyenii lɛ, abahãa mi. Akɛ mifɔlei ni akɛ la shãa ni jeɔ ŋma jogbaŋŋ* woɔ mi lɛ aba yɛ amɛbei ni ato lɛ amli.’+  “Ni kɛɛmɔ amɛ akɛ, ‘Afɔle ni akɛ la shãa ni nyɛkɛbaabahã Yehowa lɛ nɛ: gbi fɛɛ gbi lɛ, akɛ gwantɛŋbii enyɔ ni ji hii ni kpa ko bɛ amɛhe ní eko fɛɛ eko eye afi ahã akɛ shãa afɔle, ni afee nakai daa.+  Okɛ gwantɛŋbi kome ni ji nuu ahã leebi, ní okɛ gwantɛŋbi kroko ni ji nuu lɛ ahã yɛ hulushinyɔɔ mli,*+  ni akɛ ashikishaŋ kpakpa efa mlijai nyɔŋma mli ekome* ni akɛ mu ni ashi* hin* mlijai ejwɛ mli ekome efutu afata he akɛ ŋmaa* afɔle.+  Eji shãa afɔle ni abaashã daa,+ afɔle ní ato shishi yɛ Sinai Gɔŋ lɛ nɔ akɛ afɔle ni jeɔ ŋma jogbaŋŋ,* afɔle ni akɛ la shãa ahãa Yehowa,  kɛ ehe dãa afɔle, hin mlijai ejwɛ mli ekome kɛhã gwantɛŋbii ni ji hii lɛ ateŋ eko fɛɛ eko.+ Fɔsemɔ dãa lɛ oshwie shi yɛ he krɔŋkrɔŋ lɛ akɛ dãa afɔle kɛhã Yehowa.  Okɛ gwantɛŋbi kroko ni ji nuu lɛ ahã yɛ hulushinyɔɔ mli.* Okɛ ŋmaa afɔle ni tamɔ leebi nɔ lɛ nɔŋŋ kɛ ehe dãa afɔle ni tamɔ leebi nɔ lɛ nɔŋŋ afata he, ni okɛhã akɛ afɔle ni akɛ la shãa ni jeɔ ŋma jogbaŋŋ* woɔ Yehowa.+  “‘Shi Hejɔɔmɔ Gbi+ lɛ nɔ lɛ, afɔle ni akɛbaaba lɛ afee gwantɛŋbii enyɔ ni ji hii ni kpa ko bɛ amɛhe ní eko fɛɛ eko eye afi, kɛ ashikishaŋ kpakpa efa mlijai nyɔŋma mli enyɔ ni akɛ mu efutu kɛhã ŋmaa afɔle, kɛ ehe dãa afɔle. 10  Enɛ ji Hejɔɔmɔ Gbi lɛ nɔ shãa afɔle lɛ, kɛ shãa afɔle ni ashãa daa gbi lɛ, kɛ ehe dãa afɔle.+ 11  “‘Nyɔɔŋ fɛɛ nyɔɔŋ shishijee* lɛ, nyɛkɛ tsinahii* enyɔ kɛ gwantɛŋnuu kome kɛ gwantɛŋbii kpawo ni ji hii ni kpa ko bɛ amɛhe ní eko fɛɛ eko eye afi abahãa akɛ shãa afɔle kɛhã Yehowa,+ 12  kɛ ashikishaŋ kpakpa susumɔnii mlijai nyɔŋma mli etɛ ni akɛ mu efutu akɛ ŋmaa afɔle+ kɛhã tsinahii lɛ ateŋ eko fɛɛ eko, kɛ ashikishaŋ kpakpa susumɔnii mlijai nyɔŋma mli enyɔ ni akɛ mu efutu akɛ ŋmaa afɔle kɛhã gwantɛŋnuu kome lɛ,+ 13  kɛ ashikishaŋ kpakpa susumɔnii mlijai nyɔŋma mli ekome ni akɛ mu efutu akɛ ŋmaa afɔle kɛhã gwantɛŋbii ni ji hii lɛ ateŋ eko fɛɛ eko, akɛ fɛɛ ashã shãa afɔle, afɔle ni jeɔ ŋma jogbaŋŋ,*+ afɔle ni akɛ la shãa ahãa Yehowa. 14  Ni amɛhe dãa afɔlei lɛ afee wain hin fã kɛhã tsinanuu kome,+ kɛ hin mlijai etɛ mli ekome kɛhã gwantɛŋnuu lɛ,+ kɛ hin mlijai ejwɛ mli ekome kɛhã gwantɛŋbi kome ni ji nuu lɛ.+ Enɛ ji daa nyɔɔŋ nɔ shãa afɔle ni abaashã nyɔɔŋ fɛɛ nyɔɔŋ nɔ yɛ afi lɛ mli. 15  Agbɛnɛ hu, akɛ abotianuu* kome ashã esha afɔle ahã Yehowa, akɛfata shãa afɔle ni ashãa daa kɛ ehe dãa afɔle lɛ he. 16  “‘Klɛŋklɛŋ nyɔɔŋ lɛ nɔ gbi ni ji 14 lɛ baafee Yehowa Hehoo lɛ.+ 17  Ni nyɔɔŋ nɛɛ nɔ gbi ni ji 15 lɛ nɔ lɛ, aye gbi jurɔ. Aye blodo ni ashikishaŋ-sha* bɛ mli lɛ gbii kpawo.+ 18  Klɛŋklɛŋ gbi lɛ nɔ lɛ, afee kpee krɔŋkrɔŋ. Nyɛkatsua nitsumɔ ko nitsumɔ ko ni wa. 19  Ni nyɛkɛ tsinahii* enyɔ kɛ gwantɛŋnuu kome kɛ gwantɛŋbii kpawo ni ji hii ní eko fɛɛ eko eye afi abahãa akɛ shãa afɔle, afɔle ni akɛ la shãa ahãa Yehowa. Nyɛkɛ kooloi ni kpa ko bɛ amɛhe abahãa.+ 20  Nyɛkɛ amɛhe ŋmaa afɔle ni ji ashikishaŋ kpakpa ni akɛ mu efutu afataa he kɛbaa,+ susumɔnii mlijai nyɔŋma mli etɛ kɛhã tsinanuu kome, kɛ susumɔnii mlijai nyɔŋma mli enyɔ kɛhã gwantɛŋnuu lɛ. 21  Okɛ susumɔnii mlijai nyɔŋma mli ekome aba kɛhã gwantɛŋbii kpawo ni ji hii lɛ ateŋ eko fɛɛ eko, 22  kɛ abotia kome hu kɛhã esha afɔle, koni akɛkpãtã ahã nyɛ. 23  Nyɛkɛ enɛɛmɛi baahã kɛfata leebi shãa afɔle, ni ji shãa afɔle ní ashãa daa lɛ he. 24  Nyɛkɛ enɛɛmɛi baahã akɛ niyenii* yɛ nakai gbɛ nɔŋŋ nɔ daa gbi kɛyashi gbii kpawo, eji afɔle ni akɛ la shãa ni jeɔ ŋma jogbaŋŋ* woɔ Yehowa. Akɛfata shãa afɔle ni ashãa daa kɛ ehe dãa afɔle lɛ he. 25  Gbi ni ji kpawo lɛ nɔ lɛ, nyɛfea kpee krɔŋkrɔŋ.+ Nyɛkatsua nitsumɔ ko nitsumɔ ko ni wa.+ 26  “‘Nyɛnibaa nii lɛ amli klɛŋklɛŋ yibii agbi lɛ nɔ,+ ni ji gbi ni nyɛkɛ ŋmaa hee baabahã Yehowa lɛ,+ nyɛfea kpee krɔŋkrɔŋ yɛ otsii agbi jurɔ ni nyɛyeɔ lɛ mli.+ Nyɛkatsua nitsumɔ ko nitsumɔ ko ni wa.+ 27  Nyɛkɛ tsinahii* enyɔ kɛ gwantɛŋnuu kome kɛ gwantɛŋbii kpawo ni ji hii ní eko fɛɛ eko eye afi abahãa akɛ shãa afɔle ni jeɔ ŋma jogbaŋŋ* woɔ Yehowa,+ 28  kɛ amɛhe ŋmaa afɔle ni ji ashikishaŋ kpakpa ni akɛ mu efutu, susumɔnii mlijai nyɔŋma mli etɛ kɛhã tsinahii lɛ ateŋ eko fɛɛ eko, susumɔnii mlijai nyɔŋma mli enyɔ kɛhã gwantɛŋnuu kome lɛ, 29  susumɔnii mlijai nyɔŋma mli ekome kɛhã gwantɛŋbii kpawo ni ji hii lɛ ateŋ eko fɛɛ eko, 30  kɛ abotianuu* kome hu koni akɛkpãtã ahã nyɛ.+ 31  Nyɛkɛ fɛɛ afataa shãa afɔle kɛ ehe ŋmaa afɔle ni ashãa daa lɛ he. Amɛfee kooloi ni kpa ko bɛ amɛhe,+ kɛ amɛhe dãa afɔlei.

Shishigbɛ Niŋmaa

Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Hebri sht. ŋm., “yɛ gbɛkɛi enyɔ lɛ ateŋ,” eeenyɛ efee akɛ nɔ ni enɛ tsɔɔ ji, “yɛ gbɛkɛnaashi kɛ gbɛkɛ teŋ”; “be ni hulu enyɔ shi, shi duŋ woko.”
Efa mlijai nyɔŋma mli ekome feɔ litai 2.2 (kwat 2). Kwɛmɔ Saji Krokomɛi B14 lɛ.
Ni tsɔɔ akɛ, ashi tamɔ ashiɔ ŋme yɛ tso mli lɛ.
Hin kome feɔ litai 3.67 (pint 7.75). Kwɛmɔ Saji Krokomɛi B14 lɛ.
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Hebri sht. ŋm., “yɛ gbɛkɛi enyɔ lɛ ateŋ,” eeenyɛ efee akɛ nɔ ni enɛ tsɔɔ ji, “yɛ gbɛkɛnaashi kɛ gbɛkɛ teŋ”; “be ni hulu enyɔ shi, shi duŋ woko.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Hebri sht. ŋm., “Nyɛnyɔji lɛ ashishijee.”
Loo “tsina oblahii.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “abotia oblanyo.”
Loo “tsina oblahii.”
Hebri sht. ŋm., “blodo.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “tsina oblahii.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “abotia oblanyo.”