4 Mose 27:1-23

  • Zelofehad biyei lɛ (1-11)

  • Awó Yoshua hiɛnyiɛlɔ koni eye Mose sɛɛ (12-23)

27  Kɛkɛ ni Zelofehad,+ ni ji Manase binuu Makir binuu Gilead binuu Hefer binuu lɛ ni jɛ Yosef binuu Manase wekui lɛ eko mli lɛ biyei lɛ tsi amɛbɛŋkɛ. Zelofehad biyei lɛ agbɛ́ii ji Mala kɛ Noa kɛ Hogla kɛ Milka kɛ Tirza.  Amɛbadamɔ Mose kɛ osɔfo Eleazar kɛ wekunukpai+ lɛ kɛ maŋbii lɛ fɛɛ ahiɛ yɛ kpee buu lɛ shinaa lɛ naa, ni amɛkɛɛ:  “Wɔpapa gbo yɛ ŋa lɛ nɔ, shi efataaa kuu ni fee ekome kɛte shi amɛwo Yehowa, ni ji Kora sɛɛfilɔi lɛ ahe,+ shi egbo yɛ lɛ diɛŋtsɛ ehe esha hewɔ, ni ebɛ bihii.  Mɛni hewɔ wɔpapa gbɛ́i lɛ baalaaje yɛ eweku lɛ mli akɛni ebɛ binuu ko lɛ hewɔ? Hã wɔ gbɛfaŋnɔ ko yɛ wɔpapa nyɛmimɛi lɛ ateŋ.”  No hewɔ lɛ, Mose kɛ amɛsane lɛ yafɔ̃ Yehowa hiɛ.+  Ni Yehowa kɛɛ Mose akɛ:  “Zelofehad biyei lɛ asane ja. Bɔ fɛɛ bɔ ni fee lɛ, hã amɛ gbɛfaŋnɔ akɛ gboshinii yɛ amɛpapa nyɛmimɛi lɛ ateŋ, ní ohã amɛpapa gboshinii lɛ abaje amɛdɛŋ.+  Ni okɛɛ Israelbii lɛ akɛ, ‘Kɛji nuu ko gbo ni ebɛ binuu lɛ, no lɛ, nyɛhãa egboshinii lɛ atsɔa ebiyoo nɔ.  Ni kɛji ebɛ biyoo lɛ, no lɛ, nyɛkɛ egboshinii lɛ ahãa enyɛmimɛi hii. 10  Ni kɛji ebɛ nyɛmimɛi hii lɛ, no lɛ, nyɛkɛ egboshinii lɛ ahãa epapa nyɛmimɛi hii. 11  Ni kɛji epapa bɛ nyɛmimɛi hii lɛ, no lɛ, nyɛkɛ egboshinii lɛ ahãa ewekunyo ni bɛŋkɛ kpaakpa yɛ eweku lɛ mli, ní etsɔ enɔ. Nɛkɛ yiŋkpɛɛ* nɛɛ atsɔ mla ni kã shi hã Israelbii lɛ, tamɔ bɔ ni Yehowa fã Mose lɛ pɛpɛɛpɛ.’” 12  Ni Yehowa kɛɛ Mose akɛ: “Kwɔɔ kɛya Abarim gɔŋ+ nɛɛ nɔ, ni oyakwɛ shikpɔŋ ni mikɛbaahã Israelbii lɛ.+ 13  Kɛ́ okwɛ ogbe naa lɛ, bo hu abaafu bo tamɔ afu otsɛmɛi lɛ,*+ tamɔ bɔ ni afee onyɛmi nuu Aaron lɛ,+ 14  ejaakɛ be ni maŋbii lɛ kɛ mi béɔ yɛ Zin ŋa lɛ nɔ lɛ, nyɛtse famɔ ni mikɛhã akɛ afee mi krɔŋkrɔŋ yɛ amɛhiɛ yɛ nui lɛ ahewɔ lɛ hiɛ atua.+ Enɛ ji Meriba nui+ lɛ ni yɔɔ Kadesh,+ yɛ Zin ŋa lɛ nɔ+ lɛ.” 15  Ni Mose kɛɛ Yehowa akɛ: 16  “Hã Yehowa, gbɔmɛi fɛɛ amumɔ* Nyɔŋmɔ lɛ, ahala nuu ko ato maŋ lɛ nɔ, 17  mɔ ni baanyiɛ amɛhiɛ ni ekɛ amɛ aya ni ekɛ amɛ aba, mɔ ni baatsɔɔ amɛ gbɛ kɛya kɛba, bɔ ni afee ni Yehowa maŋ lɛ akafee tamɔ gwantɛŋi ni bɛ kwɛlɔ.” 18  No hewɔ lɛ, Yehowa kɛɛ Mose akɛ: “Ŋɔɔ Yoshua, Nun binuu lɛ, nuu ni mumɔ yɔɔ emli lɛ, ní okɛ onine afɔ̃ enɔ.+ 19  No sɛɛ lɛ, hã ebadamɔ osɔfo Eleazar kɛ maŋ muu lɛ fɛɛ hiɛ, ni owó lɛ hiɛnyiɛlɔ yɛ amɛ fɛɛ amɛhiɛ.+ 20  Ŋɔɔ hegbɛ* ni oyɔɔ lɛ eko ohã lɛ,+ koni Israel maŋ muu lɛ fɛɛ abo lɛ toi.+ 21  Ebaadamɔ osɔfo Eleazar hiɛ, ni osɔfo Eleazar baabi Yehowa nii ehã lɛ, koni etsɔ Yurim lɛ nɔ ele eyiŋkpɛɛ.*+ Efamɔ naa amɛje kpo yɛ, ni efamɔ naa amɛba mli yɛ, lɛ kɛ Israelbii ni kɛ lɛ yɔɔ lɛ kɛ maŋbii lɛ fɛɛ.” 22  No hewɔ lɛ, Mose fee tamɔ bɔ ni Yehowa fã lɛ lɛ pɛpɛɛpɛ. Eŋɔ Yoshua ni ekɛ lɛ yadamɔ osɔfo Eleazar kɛ maŋ muu lɛ fɛɛ hiɛ, 23  ni ekɛ eniji shwie enɔ ni ewó lɛ hiɛnyiɛlɔ,+ tamɔ bɔ ni Yehowa tsɔ Mose nɔ ewie lɛ pɛpɛɛpɛ.+

Shishigbɛ Niŋmaa

Loo “kojomɔ.”
Hebri sht. ŋm., “abaabua onaa afata omɛi lɛ ahe.” Eji lalawiemɔ ni akɛtsuɔ nii kɛhãa gbele.
Hebri sht. ŋm., “heloo fɛɛ mumɔi.”
Loo “hiɛnyam.”
Loo “ekojomɔ.”