4 Mose 25:1-18

  • Israel kɛ Moab yei fee esha (1-5)

  • Finehas tsu he nɔ ko (6-18)

25  Be ni Israel yɔɔ Shitim+ lɛ, maŋbii lɛ kɛ Moab yei lɛ bɔi ajwamaŋ bɔɔ.+  Yei lɛ fɔ̃ maŋbii lɛ nine kɛtee afɔlei ni amɛshãa amɛhãa amɛnyɔŋmɔi lɛ ashishi,+ ni maŋbii lɛ bɔi niyeli kɛ amɛnyɔŋmɔi lɛ kotomɔ.+  No hewɔ lɛ, Israel yafata he kɛjá Baal ni yɔɔ Peor+ lɛ,* ni Yehowa mli wo la waa ewo Israel.  Yehowa kɛɛ Mose akɛ: “Ŋɔɔ maŋbii nɛɛ ahiɛnyiɛlɔi* lɛ fɛɛ, ni osɛŋ amɛ yɛ Yehowa hiɛ shwane ketekete,* koni Yehowa mlifu ni naa wa lɛ aje Israel nɔ.”  Ni Mose kɛɛ Israel kojolɔi+ lɛ akɛ: “Nyɛteŋ mɔ fɛɛ mɔ agbe ehii ni yafata he kɛjá Baal ni yɔɔ Peor lɛ.”*+  Shi be ni ayaana lɛ, Israelbii lɛ ateŋ mɔ ko kɛ Midian yoo ko miiba enyɛmimɛi lɛ ateŋ+ yɛ Mose kɛ Israel maŋ muu lɛ fɛɛ hiɛ, be mli ni amɛ lɛ, amɛmiifó yɛ kpee buu lɛ shinaa lɛ naa lɛ.  Be ni Finehas,+ ni ji osɔfo Aaron binuu Eleazar binuu lɛ na enɛ lɛ, ete shi amrɔ nɔŋŋ kɛjɛ maŋbii lɛ ateŋ, ni ekɔ akpɔlɔ ehiɛ edɛŋ.  Ni enyiɛ Israelnyo lɛ sɛɛ kɛtee mama tsũ lɛ mli, ni ekɛ akpɔlɔ lɛ tsu amɛyi enyɔ lɛ fɛɛ mli, ekɛtsu Israelnyo lɛ kɛ yoo lɛ mli kɛtsɔ yoo lɛ yoohe. Kɛkɛ ni amanehulu ni eba Israelbii lɛ anɔ lɛ sɛɛ fo.+  Mɛi ni gboi yɛ amanehulu lɛ hewɔ lɛ ayifalɛ ji mɛi 24,000.+ 10  Ni Yehowa kɛɛ Mose akɛ: 11  “Finehas,+ ni ji osɔfo Aaron binuu Eleazar binuu lɛ ehã mimli ni wo la ewo Israelbii lɛ sɛɛ efo, ejaakɛ ekpɛlɛɛɛ ni ajá nyɔŋmɔ kroko yɛ misɛɛ* yɛ amɛteŋ.+ No hewɔ ni eyɛ mli akɛ mibiɔ ni ajá mikome too pɛ moŋ, shi mikpãtãaa Israelbii lɛ ahiɛ lɛ.+ 12  No hewɔ lɛ, kɛɛmɔ akɛ, ‘Mikɛ mitoiŋjɔlɛ kpaŋmɔ lɛ miihã lɛ. 13  Ni ebaatsɔ kpaŋmɔ ni baahã lɛ kɛ eseshibii ni baaba yɛ esɛɛ lɛ aye osɔfo daa,+ ejaakɛ ekpɛlɛɛɛ ni ajá nyɔŋmɔ kroko yɛ e-Nyɔŋmɔ lɛ sɛɛ,+ ni ekpãtã ehã Israelbii lɛ.’” 14  Israelnyo ni agbe lɛ kɛ Midian yoo lɛ, egbɛ́i ji Zimri, Salu binuu lɛ, ni eji Simeonbii lɛ atsɛmɛi ashĩa lɛ wekunukpai lɛ eko. 15  Midian yoo ni agbe lɛ lɛ gbɛ́i ji Kozbi, Zur+ biyoo lɛ; Zur ji tsɛmɛi ashĩai ni yɔɔ Midian+ lɛ eko mli wekunukpai lɛ eko. 16  Sɛɛ mli lɛ, Yehowa kɛɛ Mose akɛ: 17  “Haomɔ Midianbii lɛ, ní otswia amɛ nii,+ 18  ejaakɛ amɛ hu amɛkɛ amɛŋaatsɔɔ nifeemɔi lɛ hao nyɛ yɛ Peor+ kɛ Kozbi, ni ji Midian wekunukpa ko biyoo lɛ sane lɛ mli; Kozbi ji amɛnyɛmi yoo ni agbe lɛ+ yɛ amanehulu gbi lɛ nɔ yɛ Peor sane lɛ hewɔ lɛ.”+

Shishigbɛ Niŋmaa

Loo “Israel kɛ ehe yakpɛtɛ Baal ni yɔɔ Peor lɛ he.”
Hebri sht. ŋm., “ayitsei.”
Hebri sht. ŋm., “yɛ Yehowa hiɛ yɛ hulu lɛ hiɛ.”
Loo “ehii ni kɛ amɛhe yakpɛtɛ Baal ni yɔɔ Peor lɛ he lɛ.”
Loo “ehiɛ dɔɔ waa yɛ mihe.”