4 Mose 23:1-30

  • Bileam klɛŋklɛŋ abɛbua (1-12)

  • Bileam abɛbua ni ji enyɔ (13-30)

23  Ni Bileam kɛɛ Balak akɛ: “Maamɔ afɔleshaa latɛi kpawo yɛ biɛ,+ ni osaa tsinahii kpawo kɛ gwantɛŋhii kpawo ohã mi.”  Amrɔ nɔŋŋ lɛ, Balak fee nɔ ni Bileam kɛɛ lɛ. Ni Balak kɛ Bileam shã tsinanuu kome kɛ gwantɛŋnuu kome yɛ afɔleshaa latɛi lɛ eko fɛɛ eko nɔ.+  Ni Bileam kɛɛ Balak akɛ: “Hii biɛ yɛ oshãa afɔle lɛ he, ni maya. Ekolɛ Yehowa kɛ mi baakpe. Ni nɔ fɛɛ nɔ ni ebaajie kpo etsɔɔ mi lɛ, makɛɛ bo.” No hewɔ lɛ, etee gɔŋkpɔ kɛ enɔ kpataa ko nɔ.  Ni Nyɔŋmɔ kɛ Bileam kpe,+ ni Bileam kɛɛ lɛ akɛ: “Mito afɔleshaa latɛi kpawo lɛ sɛrɛnɛisɛrɛnɛi mimamɔ shi, ni mishã tsinanuu kome kɛ gwantɛŋnuu kome yɛ afɔleshaa latɛi lɛ eko fɛɛ eko nɔ.”  Yehowa kɛ wiemɔ nɛɛ wo Bileam naa akɛ:+ “Kuu osɛɛ kɛya Balak ŋɔɔ, ni nɔ ni oyawie nɛ.”  No hewɔ lɛ, eku esɛɛ etee ni eyana Balak kɛ Moab lumɛi lɛ fɛɛ ni amɛdamɔ eshãa afɔle lɛ he.  Kɛkɛ ni egba abɛbua nɛɛ akɛ:+ “Balak, Moab maŋtsɛ lɛ yaŋɔ mi kɛjɛ Aram,+Kɛjɛ bokãgbɛ gɔji lɛ anɔ ekɛɛ: ‘Ba ni obalomɔ Yakob ohã mi. Hɛɛ, ba ni obawie oshi Israel.’+   Te aaafee tɛŋŋ ni malomɔ mɛi ni Nyɔŋmɔ lomɔko amɛ lɛ? Ni te aaafee tɛŋŋ ni mawie mashi mɛi ni Yehowa ewieko eshiko amɛ lɛ?+   Mijɛɔ tɛsai lɛ ayiteŋ minaa amɛ,Ni mijɛɔ gɔŋkpɔi lɛ ayiteŋ minaa amɛ. Amɛkome too amɛhiɔ jɛmɛ akɛ maŋ;+Amɛbuuu amɛhe amɛshiii jeŋmaji lɛ anɔ.+ 10  Namɔ aaanyɛ Yakob mulu lɛ akane+Aloo ekane Israel mlijai ejwɛ mli ekome po? Hã magbo* jalɔi agbele,Ni minaagbee afee tamɔ amɛnɔ.” 11  Ni Balak kɛɛ Bileam akɛ: “Mɛni ofee mi nɛɛ? Mikɛ bo ba koni obalomɔ mihenyɛlɔi lɛ, ni naa, jɔɔmɔ sɔŋŋ moŋ ojɔɔ amɛ.”+ 12  Ehã hetoo akɛ: “Nɔ fɛɛ nɔ ni Yehowa kɛbaawo minaa lɛ, ani jeee no esa akɛ mawie?”+ 13  Balak kɛɛ lɛ akɛ: “Ofainɛ, ba ni wɔtee he kroko, he ni obaanyɛ ojɛ ona amɛ yɛ. Obaana amɛyifalɛ lɛ fã ko kɛkɛ; onaŋ amɛ fɛɛ. Lomɔmɔ amɛ yɛ jɛmɛ ohã mi.”+ 14  No hewɔ lɛ, eŋɔ lɛ kɛtee Zofim ŋa lɛ nɔ, kɛtee Pisga yiteŋ,+ ni emamɔ afɔleshaa latɛi kpawo, ni eshã tsinanuu kome kɛ gwantɛŋnuu kome yɛ afɔleshaa latɛi lɛ eko fɛɛ eko nɔ.+ 15  No hewɔ lɛ, Bileam kɛɛ Balak akɛ: “Hii biɛ yɛ oshãa afɔle lɛ he, koni maya mikɛ lɛ* ayakpe yɛ jɛmɛ.” 16  Ni Yehowa kɛ Bileam kpe, ni ekɛ wiemɔ nɛɛ wo enaa akɛ:+ “Kuu osɛɛ kɛya Balak ŋɔɔ, ni nɔ ni oyawie nɛ.” 17  No hewɔ lɛ, eba eŋɔɔ ni ebana akɛ eemɛ yɛ eshãa afɔle lɛ he, ni Moab lumɛi lɛ fata ehe. Balak bi lɛ akɛ: “Mɛni Yehowa kɛɛ?” 18  Kɛkɛ ni egba abɛbua nɛɛ akɛ:+ “Balak, tee shi, ni obo toi. Bo mi toi, Zipor binuu. 19  Jeee gbɔmɔ ji Nyɔŋmɔ ní ebaamale,+Aloo gbɔmɔ bi ní ebaatsake ejwɛŋmɔ.*+ Kɛji ekɛɛ nɔ ko lɛ, ani efeŋ? Kɛji ewie lɛ, ani etsuŋ he nii?+ 20  Naa! Afã mi akɛ mijɔɔ;Amrɔ nɛɛ ejɔɔ,+ ni minyɛŋ matsake.+ 21  Eŋmɛɛɛ gbɛ ni akɛ majik hewalɛ ko afee nɔ ko kɛshi Yakob,Ni eŋmɛɛɛ gbɛ ni haomɔ ko aba Israel nɔ. Yehowa, e-Nyɔŋmɔ lɛ, kɛ amɛ yɛ,+Ni ajieɔ eyi waa akɛ maŋtsɛ yɛ amɛteŋ. 22  Nyɔŋmɔ jie amɛ kɛje Ejipt.+ Etamɔ ŋa mli tsinanuu akolontoi kɛhã amɛ.+ 23  Ejaakɛ tsofatsumɔ ko tsofatsumɔ ko nyɛŋ Yakob nɔ ko afee,+Ni klamɔ ko klamɔ ko hu nyɛŋ Israel nɔ ko afee.+ Amrɔ nɛɛ, abaanyɛ awie yɛ Yakob kɛ Israel he akɛ: ‘Nyɛkwɛa nɔ ni Nyɔŋmɔ efee!’ 24  Naa maŋ ni baate shi tamɔ jata,Ni ebaawó ehe nɔ tamɔ jata.+ Ebuŋ shi kɛyashi ebaaye kooloo ni emɔ lɛNí ebaanu mɛi ni agbe lɛ alá.” 25  Ni Balak kɛɛ Bileam akɛ: “Kɛ́ onyɛɛɛ olomɔ lɛ lɛ, belɛ kaajɔɔ lɛ hu.” 26  Bileam hã Balak hetoo akɛ: “Ani mikɛɛɛ bo akɛ, ‘Nɔ fɛɛ nɔ ni Yehowa baakɛɛ lɛ, no mafee’?”+ 27  Balak kɛɛ Bileam akɛ: “Ofainɛ, ba ni mikɛ bo aya he kroko hu. Ekolɛ ebaasa anɔkwa Nyɔŋmɔ lɛ hiɛ akɛ olomɔ lɛ ohã mi yɛ jɛmɛ.”+ 28  No hewɔ lɛ, Balak ŋɔ Bileam kɛtee Peor yiteŋ, he ni kwɛɔ Yeshimon* hiɛ lɛ.+ 29  Ni Bileam kɛɛ Balak akɛ: “Maamɔ afɔleshaa latɛi kpawo yɛ biɛ, ni osaa tsinahii kpawo kɛ gwantɛŋhii kpawo ohã mi.”+ 30  No hewɔ lɛ, Balak fee tamɔ bɔ ni Bileam kɛɛ lɛ pɛpɛɛpɛ, ni eshã tsinanuu kome kɛ gwantɛŋnuu kome yɛ afɔleshaa latɛi lɛ eko fɛɛ eko nɔ.

Shishigbɛ Niŋmaa

Loo “misusuma agbo.”
Ni ji, Nyɔŋmɔ.
Loo “ebaashwa ehe.”
Shishitsɔɔmɔi komɛi kɛɔ akɛ, “shia ŋa lɛ; ŋa lɛ.”