4 Mose 22:1-41

  • Balak yabɔ Bileam apaa (1-21)

  • Bileam teji lɛ wie (22-41)

22  Ni Israelbii lɛ fã ni amɛyabɔ nsara yɛ Moab ŋa kpataa lɛ nɔ, yɛ Yordan lɛ sɛɛ, yɛ Yeriko ŋɛlɛ nɔ.+  Agbɛnɛ, Balak,+ Zipor binuu lɛ na nibii fɛɛ ni Israel fee Amorbii lɛ,  ni gbeyei mɔ Moab waa diɛŋtsɛ yɛ maŋ lɛ hewɔ, ejaakɛ amɛyi fa waa; anɔkwa, Israelbii lɛ ahe gbeyei sɔŋŋ wo Moab hela.+  No hewɔ lɛ, Moab kɛɛ Midian onukpai+ lɛ akɛ: “Enɛ lɛ, asafo nɛɛ baakpe nibii fɛɛ ni bɔle wɔ lɛ, tamɔ bɔ ni tsina kpeɔ jwɛi yɛ ŋa nɔ lɛ.” Nakai beiaŋ lɛ, Balak, Zipor binuu lɛ ji Moab maŋtsɛ.  Etsu mɛi kɛtee Bileam, Beor binuu lɛ ŋɔɔ yɛ Petor+ ni yɔɔ Faa* lɛ naa lɛ, yɛ emaŋbii lɛ ashikpɔŋ lɛ nɔ. Etsu koni ayatsɛ lɛ kɛba, ni ekɛɛ: “Naa! Maŋ ko ejɛ Ejipt kɛba. Naa! Amɛha shikpɔŋ lɛ nɔ fɛɛ,+ ni amɛbahi mihiɛ kpaakpa.  Agbɛnɛ, ofainɛ, ba ni obalomɔ maŋ nɛɛ ohã mi,+ ejaakɛ amɛhe wa fe mi. Ekolɛ manyɛ amɛnɔ kunim maye, ni mashwie amɛ kɛje shikpɔŋ lɛ nɔ, ejaakɛ mile jogbaŋŋ akɛ mɔ ni ojɔɔ lɛ lɛ, ajɔɔ lɛ, ni mɔ ni olomɔɔ lɛ lɛ, alomɔɔ lɛ.”  No hewɔ lɛ, Moab onukpai lɛ kɛ Midian onukpai lɛ hiɛ klamɔ he nyɔmɔwoo lɛ yɛ amɛdɛŋ kɛfã gbɛ kɛtee Bileam ŋɔɔ,+ ni amɛkɛ Balak shɛɛ lɛ yahã lɛ.  Kɛkɛ ni ekɛɛ amɛ akɛ: “Nyɛyea jenamɔ lɛ yɛ biɛ, ni mabakɛɛ nyɛ nɔ fɛɛ nɔ ni Yehowa baakɛɛ mi lɛ.” No hewɔ lɛ, Moab lumɛi lɛ hi Bileam ŋɔɔ.  Ni Nyɔŋmɔ ba Bileam ŋɔɔ ni ebakɛɛ:+ “Mɛɛ hii yɔɔ oŋɔɔ lɛ?” 10  Bileam kɛɛ anɔkwa Nyɔŋmɔ lɛ akɛ: “Balak, Zipor binuu lɛ, ni ji Moab maŋtsɛ lɛ, tsu ní akɛ shɛɛ abahã mi akɛ, 11  ‘Naa! Maŋ ni jɛ Ejipt amɛbaa lɛ eha shikpɔŋ lɛ nɔ fɛɛ. Agbɛnɛ, ba ni obalomɔ amɛ ohã mi.+ Ekolɛ manyɛ mikɛ amɛ awu ni mashwie amɛ kɛya.’” 12  Shi Nyɔŋmɔ kɛɛ Bileam akɛ: “Okɛ amɛ akaya. Kaayalomɔ maŋ lɛ, ejaakɛ ajɔɔ amɛ.”+ 13  Bileam te shi leebi ni ekɛɛ Balak lumɛi lɛ akɛ: “Nyɛyaa nyɛshikpɔŋ nɔ, ejaakɛ Yehowa ekpɛlɛɛɛ ni mikɛ nyɛ aya.” 14  No hewɔ lɛ, Moab lumɛi lɛ shi, ni amɛku amɛsɛɛ kɛtee Balak ŋɔɔ, ni amɛyakɛɛ: “Bileam ekpɛlɛɛɛ ni ekɛ wɔ aba.” 15  Kɛ̃lɛ, Balak saa etsu lumɛi ni yi fa, ni hiɛ yɔɔ nyam fe klɛŋklɛŋ kuu lɛ. 16  Amɛba Bileam ŋɔɔ ni amɛbakɛɛ: “Nɔ ni Balak, Zipor binuu lɛ kɛɛ nɛ, ‘Ofainɛ, kaahã nɔ ko nɔ ko miitsĩ onaa koni okaba miŋɔɔ, 17  ejaakɛ mawo ohiɛ nyam waa diɛŋtsɛ, ni nɔ fɛɛ nɔ ni obaakɛɛ mifee lɛ, mafee. No hewɔ lɛ, ofainɛ, ba ni obalomɔ maŋ nɛɛ ohã mi.’” 18  Shi Bileam hã Balak tsuji lɛ hetoo akɛ: “Kɛ́ Balak kɛ lɛ diɛŋtsɛ eshĩa hã mi, ni jwiɛtɛi kɛ shika tsuru eyi mli obɔ po lɛ, minyɛŋ mafee nɔ ko kɛteke Yehowa, mi-Nyɔŋmɔ lɛ famɔ lɛ, nɔ ko bibioo jio, nɔ ko wulu jio.+ 19  Shi nyɛfainɛ, nyɛ hu nyɛhia biɛ gbɛkɛ nɛɛ, koni makwɛ nɔ ni Yehowa baakɛɛ mi ekoŋŋ.”+ 20  Ni Nyɔŋmɔ ba Bileam ŋɔɔ nyɔɔŋ, ni ebakɛɛ lɛ akɛ: “Kɛji hii nɛɛ ba koni amɛbatsɛ bo kɛya lɛ, no lɛ, okɛ amɛ aya. Shi nɔ ni makɛɛ owie lɛ, no pɛ owie.”+ 21  No hewɔ lɛ, Bileam te shi leebi ni ewo eteji* lɛ nɔ nii, ni ekɛ Moab lumɛi lɛ tee.+ 22  Shi Nyɔŋmɔ mli wo la akɛ eeya, ni Yehowa bɔfo badamɔ gbɛ lɛ nɔ koni etsĩ lɛ gbɛ. No mli lɛ, Bileam ta eteji lɛ nɔ, ni esɔɔlɔi lɛ ateŋ mɛi enyɔ fata ehe. 23  Ni be ni teji lɛ na Yehowa bɔfo damɔ gbɛ lɛ nɔ ní egbala eklante ehiɛ yɛ edɛŋ lɛ, eka akɛ ebaaje gbɛ lɛ nɔ kɛya ŋa lɛ mli. Shi Bileam bɔi teji lɛ yii, koni eku esɛɛ kɛba gbɛ lɛ nɔ. 24  Ni Yehowa bɔfo lɛ yadamɔ gbɛ leleoo ko ni kã wain ŋmɔji enyɔ ateŋ lɛ nɔ, ni tɛ gbogboi yɛ biɛ kɛ biɛ. 25  Be ni teji lɛ na Yehowa bɔfo lɛ, ekɛ ehe yakpɛtɛ gbogbo lɛ waa, ni emia Bileam nane* kɛkpɛtɛ gbogbo lɛ, ni Bileam bɔi lɛ yii ekoŋŋ. 26  Agbɛnɛ, Yehowa bɔfo lɛ baho ekoŋŋ ni eyadamɔ he ko fintɔŋŋ ní gbɛ bɛ ni akɛtsɔɔ he kɛyaa ninejurɔ loo abɛku. 27  Be ni teji lɛ na Yehowa bɔfo lɛ, ebu shi yɛ Bileam shishi, no hewɔ lɛ, Bileam mli fu waa ni ekɛ etso lɛ yi teji lɛ aahu. 28  Naagbee lɛ, Yehowa hã teji lɛ wie,*+ ni ekɛɛ Bileam akɛ: “Mɛni mifee bo hewɔ ni oyi mi shii etɛ sɔŋŋ nɛɛ?”+ 29  Bileam hã teji lɛ hetoo akɛ: “Ejaakɛ ofee mi buulu. Eji mihiɛ klante yɛ midɛŋ kulɛ, migbe bo momo!” 30  Ni teji lɛ kɛɛ Bileam akɛ: “Ani jeee miji oteji ni ota enɔ owala gbii abɔ fɛɛ kɛbashi ŋmɛnɛ lɛ? Ani mifee bo nɛkɛ pɛŋ?” Ehã hetoo akɛ: “Dabi!” 31  Ni Yehowa gbele Bileam hiŋmɛii,+ ni ena Yehowa bɔfo lɛ damɔ gbɛ lɛ nɔ ní egbala eklante ehiɛ yɛ edɛŋ. Amrɔ lɛ, ekoto shi ni ekɛ ehiɛ bu shi. 32  Ni Yehowa bɔfo lɛ kɛɛ lɛ akɛ: “Mɛni hewɔ oyi oteji lɛ shii etɛ sɔŋŋ nɛɛ? Naa! mi diɛŋtsɛ miba koni mibatsĩ bo gbɛ, ejaakɛ gbɛ ni okɔ lɛ miite shi kɛmiiwo misuɔmɔnaa nii.+ 33  Teji lɛ na mi, ni eka akɛ ebaatsɔ ehe kɛje mihiɛ shii etɛ nɛɛ fɛɛ.+ Eji etsɔɔɔ ehe kɛjeee mihiɛ kulɛ! Benɛ migbe bo momo, ni mibaa teji lɛ yi.” 34  Bileam kɛɛ Yehowa bɔfo lɛ akɛ: “Mifee esha, ejaakɛ mileee akɛ bo ji mɔ ni badamɔ gbɛ lɛ nɔ koni okɛ mi abakpe lɛ. Agbɛnɛ, kɛ́ esaaa ohiɛ lɛ, no lɛ, maku misɛɛ.” 35  Shi Yehowa bɔfo lɛ kɛɛ Bileam akɛ: “Okɛ hii lɛ aya, shi nɔ ni makɛɛ owie lɛ, no pɛ owie.” No hewɔ lɛ, Bileam kɛ Balak lumɛi lɛ tsa nɔ kɛtee. 36  Be ni Balak nu akɛ Bileam eba lɛ, etee amrɔ nɔŋŋ koni ekɛ lɛ ayakpe yɛ Moab maŋ lɛ ní kã Arnon jɔɔ lɛ naa, yɛ kpokpaa lɛ husu lɛ naa lɛ mli. 37  Balak kɛɛ Bileam akɛ: “Ani mitsuuu ni abatsɛ bo kɛba? Mɛni hewɔ obaaa lɛ? Ani osusuɔ akɛ minyɛŋ mawo ohiɛ nyam waa diɛŋtsɛ?”+ 38  Bileam hã Balak hetoo akɛ: “Naa, miba agbɛnɛ. Shi ani abaaŋmɛ mi gbɛ ni mawie nɔ ko? Wiemɔi ni Nyɔŋmɔ kɛbaawo minaa lɛ, no pɛ manyɛ mawie.”+ 39  No hewɔ lɛ, Bileam kɛ Balak tee, ni amɛba Kiriat-huzot. 40  Balak kɛ tsinai kɛ toi shã afɔle, ni ekɛ eko maje Bileam kɛ lumɛi ni fata ehe lɛ. 41  Enɔ leebi lɛ, Balak ŋɔ Bileam ni ekɛ lɛ kwɔ kɛtee Bamot-baal; kɛjɛ jɛmɛ lɛ, enyɛɔ enaa maŋ lɛ fɛɛ.+

Shishigbɛ Niŋmaa

Ekã shi faŋŋ akɛ, aatsɔɔ Yufrate Faa lɛ.
Hebri sht. ŋm., “tejiyoo.”
Loo “nane tokota.”
Hebri sht. ŋm., “gbele tejiyoo lɛ naabu.”