4 Mose 21:1-35

  • Aye Arad maŋtsɛ lɛ nɔ kunim (1-3)

  • Akɔɔble onufu (4-9)

  • Israel nyiɛ kɛbɔle Moab (10-20)

  • Aye Amorbii lɛ a-Maŋtsɛ Sihon nɔ kunim (21-30)

  • Aye Amorbii lɛ a-Maŋtsɛ Og nɔ kunim (31-35)

21  Be ni Arad+ maŋtsɛ, ni ji Kanaannyo ni yɔɔ Negeb lɛ nu akɛ Israel nyiɛ Atarim gbɛ lɛ nɔ kɛmiiba lɛ, eyatutua Israel ni eŋɔ amɛteŋ mɛi komɛi nom.  No hewɔ lɛ, Israel wo Yehowa shi akɛ: “Kɛ́ okɛ maŋ nɛɛ wo midɛŋ lɛ, bɔ fɛɛ bɔ ni fee lɛ, makpãtã amɛmaji lɛ ahiɛ.”  No hewɔ lɛ, Yehowa bo Israel gbee toi, ni etu Kanaanbii lɛ ewo amɛdɛŋ, ni Israelbii lɛ kpãtã amɛ kɛ amɛmaji lɛ ahiɛ. Ni amɛwo jɛmɛ gbɛ́i akɛ Horma.*+  Be ni amɛjɛ Hor Gɔŋ+ lɛ he, ní amɛtsaa amɛgbɛfãa lɛ nɔ kɛtsɔɔ Ŋshɔ Tsuru lɛ naa gbɛ lɛ nɔ koni amɛlɔgɔ Edom shikpɔŋ lɛ,+ gbɛfãa lɛ hã etɔ gbɔmɛi lɛ* waa.  Ni maŋ lɛ tee nɔ amɛwie amɛshi Nyɔŋmɔ kɛ Mose+ amɛkɛɛ: “Mɛni hewɔ nyɛjie wɔ kɛje Ejipt koni wɔbagboi yɛ ŋa lɛ nɔ lɛ? Niyenii bɛ ni nu hu bɛ,+ ni wɔsumɔɔɔ* nɛkɛ niyenii* ni yɔɔ nyaŋemɔ nɛɛ.+  No hewɔ lɛ, Yehowa tsu onufui ni pɔizin yɔɔ amɛmli* kɛba maŋbii lɛ ateŋ, ni amɛtee nɔ amɛkɔmɔ Israelbii lɛ, ni amɛteŋ mɛi pii gboi.+  Enɛ hewɔ lɛ, maŋbii lɛ ba Mose ŋɔɔ ni amɛbakɛɛ: “Wɔfee esha akɛni wɔwie wɔshi Yehowa kɛ bo lɛ hewɔ.+ Kpa Yehowa fai koni ejie onufui lɛ kɛje wɔteŋ.” Ni Mose kpa fai ehã maŋ lɛ.+  Ni Yehowa kɛɛ Mose akɛ: “Feemɔ onufu ko ni tamɔ onufu ni pɔizin yɔɔ emli* ni okɛtsotsoro tso nɔ. Kɛkɛ lɛ, kɛ́ onufui lɛ eko kɔ̃ mɔ ko lɛ, ekwɛ onufu lɛ koni eya nɔ ehi wala mli.”  Amrɔ nɔŋŋ lɛ, Mose fee akɔɔble onufu+ ni ekɛtsotsoro tso lɛ nɔ,+ ni be fɛɛ be ni onufu baakɔ̃ mɔ ko ní ebaakwɛ akɔɔble onufu lɛ, eyi náa wala.+ 10  No sɛɛ lɛ, Israelbii lɛ fã ni amɛyabɔ nsara yɛ Obot.+ 11  Ni amɛfã kɛshi Obot, ni amɛyabɔ nsara yɛ Iye-abarim,+ yɛ ŋa ni kã Moab hiɛ lɛ nɔ, yɛ bokãgbɛ. 12  Ni amɛfã kɛshi jɛmɛ ni amɛyabɔ nsara yɛ Zered Jɔɔ*+ lɛ naa. 13  Ni amɛfã kɛshi jɛmɛ ni amɛyabɔ nsara yɛ Arnon+ kpokpaa ní yɔɔ ŋa ni kã Amorbii lɛ ahusu lɛ naa lɛ nɔ, ejaakɛ Arnon ji Moab husu, ni ekã Moabbii lɛ kɛ Amorbii lɛ ateŋ. 14  No hewɔ ni awie “Vaheb ni yɔɔ Sufa kɛ Arnon jɔi* lɛ” ahe yɛ Yehowa Tai lɛ ahe wolo lɛ mli, 15  ni awie “jɔi* lɛ anaa,* he ni kã shi kɛyaa he ni Ar yɔɔ lɛ ní eyamɔɔ Moab husu lɛ” hu ahe yɛ mli lɛ. 16  No sɛɛ lɛ, amɛfã kɛtee Beer.* Enɛ ji nubu ni Yehowa wie he etsɔɔ Mose lɛ, akɛ: “Buamɔ maŋbii lɛ anaa, ní mahã amɛ nu.” 17  Nakai be lɛ mli lɛ, Israel lá nɛkɛ lala nɛɛ: “Nubu, tuemɔ!—Nyɛherea nɔ!* 18  Nubu ni lumɛi tsa lɛ, nubu ni maŋ lɛ mli abladei lɛ je lɛ,Amɛkɛ nɔyeli tso kɛ amɛ diɛŋtsɛ amɛdɛhiɛmɔtsei tsa.” Kɛkɛ ni amɛfã kɛjɛ ŋa lɛ nɔ kɛtee Matana, 19  amɛshi Matana kɛtee Nahaliel, ni amɛshi Nahaliel kɛtee Bamot.+ 20  Amɛfã kɛjɛ Bamot kɛtee jɔɔ ni yɔɔ Moab+ kpokpaa* lɛ nɔ lɛ mli, yɛ Pisga yiteŋ,+ he ni kwɛɔ Yeshimon* hiɛ lɛ.+ 21  Agbɛnɛ, Israel tsu mɛi kɛtee Sihon, Amorbii lɛ amaŋtsɛ lɛ ŋɔɔ akɛ:+ 22  “Hã wɔtsɔ oshikpɔŋ lɛ nɔ kɛho. Wɔgbaŋ kɛyaŋ ŋmɔ ko loo wain ŋmɔ ko mli. Wɔnuŋ nubu ko nubu ko mli nu. Wɔbaanyiɛ Maŋtsɛ Gbɛjegbɛ lɛ nɔ kɛyashi be ni wɔbaatsɔ oshikpɔŋ lɛ nɔ kɛho.”+ 23  Shi Sihon hãaa Israel atsɔ eshikpɔŋ lɛ nɔ kɛho. Moŋ lɛ, Sihon bua ewebii lɛ fɛɛ anaa ni eje kpo koni ekɛ Israel ayakpe yɛ ŋa lɛ nɔ, ni eba Yahaz ni ekɛ Israel babɔi wu.+ 24  Shi Israel ye enɔ kunim yɛ klante naa,+ ni eŋɔ eshikpɔŋ lɛ,+ kɛjɛ Arnon+ kɛyashi Yabok+ ní bɛŋkɛ Amonbii lɛ, ejaakɛ Yazer+ ji Amonbii lɛ ashikpɔŋ lɛ husu.+ 25  No hewɔ lɛ, Israel ŋɔ maji nɛɛ fɛɛ, ni amɛhihii Amorbii+ lɛ amaji lɛ fɛɛ amli, yɛ Heshbon kɛ maji ni baa lɛ abo* lɛ amli. 26  Ejaakɛ no mli lɛ, Heshbon ji Amorbii lɛ amaŋtsɛ Sihon lɛ maŋ, ni lɛ ekɛ Moab maŋtsɛ lɛ wu ni eshɔ̃ eshikpɔŋ lɛ fɛɛ yɛ edɛŋ aahu kɛyashi Arnon lɛ naa. 27  No hã akɛ abɛbua nɛɛ bɔi mɔ he fɛo yeli akɛ: “Ba Heshbon. Hã atswa Sihon maŋ lɛ ama shi, ní ema shi shiŋŋ. 28  Ejaakɛ la ko jɛ Heshbon ba, lalilɛi jɛ Sihon maŋ lɛ mli. Eshã Ar ni yɔɔ Moab lɛ, eshã nuŋtsɔmɛi ni yɔɔ Arnon hei ni kwɔlɔ lɛ. 29  Kpoo hã bo, Moab! Nyɛ mɛi ni nyɛyɔɔ Kemosh,+ abaakpãtã nyɛhiɛ! Ehãa ebihii lɛ tsɔmɔɔ kobɔlɔi, ni ebiyei lɛ hu tsɔmɔɔ nomii amɛhãa Sihon, Amorbii lɛ amaŋtsɛ lɛ. 30  Nyɛhãa wɔtswiaa amɛ nii;Abaakpãtã Heshbon hiɛ kɛyashi Dibon tɔ̃ɔ;+Nyɛhãa wɔfea lɛ amaŋfɔ kɛyashi Nofa tɔ̃ɔ;La baashã nii kɛyashi Medeba tɔ̃ɔ.”+ 31  No hewɔ lɛ, Israel hi Amorbii lɛ ashikpɔŋ lɛ nɔ. 32  Ni Mose tsu hii komɛi koni amɛyakpá Yazer+ shi. Amɛŋɔ maji ni baa lɛ abo* lɛ, ni amɛshwie Amorbii ni yɔɔ jɛmɛ lɛ. 33  No sɛɛ lɛ, amɛdɔ amɛyi ni amɛkwɔ kɛtsɔ Bashan Gbɛ lɛ nɔ. Ni Bashan maŋtsɛ Og+ kɛ ewebii lɛ fɛɛ je kpo koni amɛkɛ amɛ abakpe ní amɛkɛ amɛ awu yɛ Edrei.+ 34  Yehowa kɛɛ Mose akɛ: “Kaashe lɛ gbeyei,+ ejaakɛ mikɛ lɛ kɛ ewebii lɛ fɛɛ kɛ eshikpɔŋ lɛ baawo odɛŋ,+ ni obaafee lɛ tamɔ bɔ ni ofee Amorbii lɛ amaŋtsɛ Sihon ni hi Heshbon lɛ pɛpɛɛpɛ.”+ 35  No hewɔ lɛ, amɛtee nɔ amɛtswia lɛ kɛ ebihii lɛ kɛ ewebii lɛ fɛɛ nii, kɛyashi be ni eshwɛɛɛ ewebii lɛ ateŋ mɔ kome folo po ni hiɛ kã,+ ni amɛŋɔ eshikpɔŋ lɛ.+

Shishigbɛ Niŋmaa

Eshishi ji, “Atu Ahã Hiɛkpatamɔ.”
Loo “gbɔmɛi lɛ asusuma.”
Loo “wɔsusumai miinyɛ.”
Hebri sht. ŋm., “blodo.”
Loo “onufui kɛ amɛnaa la.”
Loo “onufu kɛ enaa la.”
Loo “Nujɔɔ.”
Loo “nujɔi.”
Loo “nujɔi.”
Loo “jɔi lɛ afã ni kpelekeɔ shi.”
Eshishi ji, “Nubu; Bu.”
Loo “Nyɛ hu nyɛláa!”
Hebri sht. ŋm., “ŋa.”
Shishitsɔɔmɔi komɛi kɛɔ akɛ, “shia ŋa lɛ; ŋa lɛ.”
Loo “ehewɔ maji.”
Loo “ehewɔ maji.”