4 Mose 19:1-22

  • Tsinayoo tsuru lɛ kɛ hetsuumɔ nu lɛ (1-22)

19  Yehowa kɛ Mose kɛ Aaron wie ekoŋŋ ekɛɛ:  “Mla ni Yehowa ewo lɛ mli famɔ nɛ, ‘Kɛɛmɔ Israelbii lɛ akɛ, amɛkɛ tsinayoo tsuru ni yɔɔ hewalɛ ni kpa ko bɛ ehe+ ni akɛ kɔɔŋtso ko kwraa efɔ̃ko enɔ pɛŋ abahã bo.  Nyɛkɛ lɛ ahãa osɔfo Eleazar, ní ekɛ lɛ aje kpo kɛya nsara lɛ sɛɛ, ní agbe lɛ yɛ ehiɛ.  Ni osɔfo Eleazar kɛ ewao atsɔ tsinayoo lɛ lá lɛ eko, ní ekɛ elá lɛ ashwã trɔmɔɔ kɛtsɔɔ kpee buu lɛ hiɛgbɛ shii kpawo.+  No sɛɛ lɛ, ashã tsinayoo lɛ yɛ ehiɛ. Ashã ehewolo lɛ kɛ eloo lɛ kɛ elá lɛ kɛ efei lɛ fɛɛ.+  Ni osɔfo lɛ aŋɔ tseneduru tso kɛ hisopo+ kɛ mama tsuru, ni eshɛrɛ fɛɛ eshwie la ni ashãa tsinayoo lɛ yɛ mli lɛ mli.  No sɛɛ lɛ, osɔfo lɛ afɔ etadei ahe ní ekɛ nu aju ehe, ni no sɛɛ lɛ, eba nsara lɛ mli; shi osɔfo lɛ he tseŋ kɛyashi gbɛkɛ.  “‘Mɔ ni shã tsinayoo lɛ kɛ nu afɔ etadei ahe, ní ekɛ nu aju ehe, ni ehe tseŋ kɛyashi gbɛkɛ.  “‘Nuu ko ni he tse abua tsinayoo lɛ lamulu lɛ naa,+ ní ekɛyashwie he ko ni tse yɛ nsara lɛ sɛɛ, ni Israel maŋ lɛ kɛto koni akɛfee hetsuumɔ nu.+ Eji esha afɔle. 10  Mɔ ni baabua tsinayoo lɛ lamulu lɛ naa lɛ afɔ etadei ahe, ni ehe tseŋ kɛyashi gbɛkɛ. “‘Enɛ atsɔ mla ni kã shi daa hã Israelbii lɛ kɛ gbɔ ni yɔɔ amɛteŋ lɛ.+ 11  Mɔ fɛɛ mɔ ni taa mɔ ko ni egbo* he lɛ he tseŋ gbii kpawo.+ 12  Nakai mɔ lɛ kɛ nu lɛ* atsuu ehe yɛ gbi ni ji etɛ lɛ nɔ, ni ehe baatse yɛ gbi ni ji kpawo lɛ nɔ. Shi kɛji etsuuu ehe yɛ gbi ni ji etɛ lɛ nɔ lɛ, no lɛ, gbi ni ji kpawo lɛ nɔ lɛ ehe tseŋ. 13  Mɔ fɛɛ mɔ ni taa mɔ ko ni egbo he* ní etsuuu ehe lɛ, ebule Yehowa sɔlemɔ buu lɛ,+ ni nakai mɔ* lɛ, afo lɛ ashɛ afɔ̃* kɛje Israel.+ Akɛni akɛ hetsuumɔ nu+ lɛ shwãko enɔ hewɔ lɛ, ebaakã he efee mɔ ni he tseee. Ehe muji lɛ yɛ ehe lolo. 14  “‘Kɛ́ mɔ ko gbo yɛ mama tsũ mli lɛ, ehe mla ni kã shi nɛ: Mɔ fɛɛ mɔ ni baabote mama tsũ lɛ mli kɛ mɔ fɛɛ mɔ ni yɔɔ mama tsũ lɛ mli momo lɛ he tseee gbii kpawo. 15  Nɔ fɛɛ nɔ ni agbele naa, ní akɛ enaanɔ buko naa jogbaŋŋ* lɛ he tseee.+ 16  Mɔ fɛɛ mɔ ni yɔɔ ŋa nɔ ni taa mɔ ko ni akɛ klante gbe lɛ he loo etaa gbonyo he loo etaa mɔ ko wu he loo etaa fuuhe ko he lɛ, ehe tseee gbii kpawo.+ 17  Amɛŋɔ esha afɔle kooloo ni ashã lɛ lamulu lɛ eko amɛhã mɔ ni he tseee lɛ, ni amɛkɛ nu ni ayayɛ kɛjɛ nu ni hoɔ mli ashwie nɔ yɛ nɔ ko mli. 18  Ni mɔ ko ni he tse+ aŋɔ hisopo+ ní ekɛtsɔ nu lɛ mli, ní ekɛshwã mama tsũ lɛ kɛ nibii* fɛɛ ni yɔɔ mli lɛ kɛ mɛi* ni yɔɔ jɛmɛ lɛ anɔ, ekɛshwã mɔ ni ta wu lɛ he loo eta mɔ ni akɛ klante gbe lɛ lɛ he loo eta gbonyo lɛ he loo eta fuuhe lɛ he lɛ hu nɔ. 19  Mɔ ni he tse lɛ kɛshwã mɔ ni he tseee lɛ nɔ yɛ gbi ni ji etɛ lɛ kɛ gbi ni ji kpawo lɛ nɔ, ní etsuu ehe kɛjɛ esha mli yɛ gbi ni ji kpawo lɛ nɔ;+ no sɛɛ lɛ, efɔ etadei ahe ní ekɛ nu aju ehe, ni ehe baatse gbɛkɛ mli. 20  “‘Shi mɔ ni he tseee ní etsuuu ehe lɛ, nakai mɔ* lɛ, afo lɛ ashɛ afɔ̃* kɛje asafo lɛ mli,+ ejaakɛ ebule Yehowa jamɔhe lɛ. Akɛ hetsuumɔ nu lɛ shwãaa enɔ, no hewɔ lɛ, ehe tseee. 21  “‘Enɛ atsɔ mla ni kã shi daa hã amɛ: Mɔ ni kɛ hetsuumɔ nu lɛ shwãa+ lɛ afɔ etadei ahe, ni mɔ ni taa hetsuumɔ nu lɛ he lɛ he tseee kɛyashi gbɛkɛ. 22  Nɔ fɛɛ nɔ ni mɔ ni he tseee lɛ taa he lɛ he tseee, ni mɔ* ni taa nakai nii lɛ he lɛ hu he tseee kɛyashi gbɛkɛ.’”+

Shishigbɛ Niŋmaa

Loo “gbɔmɔ susuma ko gbonyo.” Kwɛmɔ Wiemɔi Titrii Amligbalamɔ lɛ.
Hebri sht. ŋm., “kɛ enɛ.”
Loo “Mɔ fɛɛ mɔ ni taa gbonyo, ni ji gbɔmɔ ko ni egbo susuma he.” Kwɛmɔ Wiemɔi Titrii Amligbalamɔ lɛ.
Loo “susuma.”
Loo “agbe lɛ.”
Loo “akɛ kpãa efiko enaanɔ akpɛtɛko naa.”
Ni ji, tsɛnsii kɛ kukwɛii kɛ amɛhenɔi ni abuɔ naa lɛ.
Loo “susumai.”
Loo “susuma.”
Loo “agbe lɛ.”
Loo “susuma.”