4 Mose 15:1-41

  • Afɔlei ahe mlai (1-21)

    • Mla kome too kã shi hã Israel fɔmɔ bii kɛ gbɔi fɛɛ (15, 16)

  • Eshai ni ajeee gbɛ afee lɛ ahe afɔlei (22-29)

  • Eshai ni ajeɔ gbɛ afeɔ lɛ ahe toigbalamɔ (30, 31)

  • Agbe mɔ ko ni ku Hejɔɔmɔ Gbi lɛ he mla lɛ mli lɛ (32-36)

  • Amanyai ahi atadei anaamui lɛ anaa (37-41)

15  Yehowa tee nɔ ekɛ Mose wie ekɛɛ:  “Okɛ Israelbii lɛ awie ni okɛɛ amɛ akɛ, ‘Kɛ́ nyɛná nyɛyashɛ shikpɔŋ ni mikɛhãa nyɛ koni nyɛhi nɔ lɛ nɔ,+  ni nyɛkɛ tsinai loo toi lɛ eko miihã akɛ afɔle ni akɛ la shãa ahãa Yehowa lɛ—kɛ́ eji shãa afɔle+ jio, afɔle ni akɛmiitsu shiwoo krɛdɛɛ ko he nii jio, afɔle ni ajɛɔ suɔmɔ mli akɛhãa+ jio, afɔle ni ashãa yɛ nyɛgbii juji+ lɛ anɔ jio, bɔ ni afee ni eje ŋma jogbaŋŋ* ewo Yehowa lɛ+  no lɛ, mɔ ni kɛ efɔle lɛ hãa lɛ, ekɛ ŋmaa* afɔle hu, ni ji ashikishaŋ kpakpa+ efa mlijai nyɔŋma mli ekome* ní akɛ mu hin* mlijai ejwɛ mli ekome efutu afata he kɛbahã Yehowa.  Okɛ wain hin mlijai ejwɛ mli ekome hu abahã akɛ dãa afɔle, ni okɛfata shãa afɔle+ lɛ loo gwantɛŋbi fɛɛ gwantɛŋbi ni ji nuu ni okɛbaashã afɔle lɛ he kɛba.  Shi kɛ́ gwantɛŋnuu ni lɛ, okɛ ŋmaa afɔle ni ji ashikishaŋ kpakpa efa mlijai nyɔŋma mli enyɔ ní akɛ mu hin mlijai etɛ mli ekome efutu afata he.  Ni okɛ wain hin mlijai etɛ mli ekome aba akɛ dãa afɔle ní jeɔ ŋma jogbaŋŋ* woɔ Yehowa.  “‘Shi kɛ́ okɛ tsinanuu miiba obahã Yehowa akɛ shãa afɔle+ loo afɔle ni akɛmiitsu shiwoo krɛdɛɛ+ ko he nii loo akɛ naanyobɔɔ afɔlei lɛ,+  no lɛ, okɛ ŋmaa afɔle hu, ni ji ashikishaŋ kpakpa efa mlijai etɛ mli ekome ní akɛ mu hin fã efutu afata tsinanuu lɛ he kɛba.+ 10  Okɛ wain hin fã hu aba akɛ dãa afɔle,+ akɛ afɔle ni akɛ la shãa ní jeɔ ŋma jogbaŋŋ* woɔ Yehowa. 11  Nɛkɛ esa akɛ afee kɛ́ akɛ tsinanuu fɛɛ tsinanuu loo gwantɛŋnuu fɛɛ gwantɛŋnuu loo gwantɛŋbi fɛɛ gwantɛŋbi ni ji nuu loo abotia fɛɛ abotia miihã. 12  Ekɔɔɔ he eko amɛyifalɛ ni nyɛkɛbaahã lɛ, nakai nyɛfea eko fɛɛ eko, yɛ amɛyifalɛ lɛ naa. 13  Nɛkɛ ji bɔ ni esa akɛ Israel fɔmɔ bi fɛɛ Israel fɔmɔ bi kɛ afɔle ni akɛ la shãa lɛ abahã akɛ afɔle ni jeɔ ŋma jogbaŋŋ* woɔ Yehowa. 14  “‘Kɛ́ gbɔ ko ni yɔɔ nyɛteŋ loo mɔ ko ni ebahi nyɛteŋ be kplaŋŋ lɛ hu miitao ekɛ afɔle ni akɛ la shãa abahã akɛ afɔle ni jeɔ ŋma jogbaŋŋ* woɔ Yehowa lɛ, lɛ hu efee lɛ bɔ ni nyɛfeɔ lɛ lɛ pɛpɛɛpɛ.+ 15  Mla kome kã shi hã nyɛ mɛi ni nyɛji maŋbii lɛ kɛ gbɔ ni yɔɔ nyɛteŋ lɛ fɛɛ. Etsɔ mla ni kã shi daa hã nyɛyinɔi fɛɛ. Bɔ ni nyɛyɔɔ lɛ, nakai nɔŋŋ gbɔ lɛ hu ji yɛ Yehowa hiɛ.+ 16  Mla kome kɛ yiŋkpɛɛ* kome akã shi ahã nyɛ kɛ gbɔ ni yɔɔ nyɛteŋ lɛ fɛɛ.’” 17  Yehowa tee nɔ ekɛ Mose wie akɛ: 18  “Okɛ Israelbii lɛ awie ni okɛɛ amɛ akɛ, ‘Kɛ́ nyɛyashɛ shikpɔŋ ni mikɛ nyɛ yaa nɔ lɛ nɔ, 19  ni nyɛye shikpɔŋ lɛ nɔ niyenii* lɛ eko lɛ,+ nyɛtsua onia nyɛhãa Yehowa. 20  Nyɛkɛ nyɛklɛŋklɛŋ ŋmaa ni awiɛ ni boko lɛ afea blodoi ni abɔlɔ lɛ tamɔ gai, ní nyɛkɛbatsua onia.+ Bɔ ni nyɛtsuɔ ŋmaagbeemɔhe lɛ onia lɛ, nakai nɔŋŋ nyɛtsua enɛ. 21  Nyɛkɛ nyɛklɛŋklɛŋ ŋmaa ni awiɛ ni boko lɛ eko ahãa Yehowa akɛ onia yɛ nyɛyinɔi fɛɛ amli. 22  “‘Agbɛnɛ kɛ́ nyɛtɔ̃, ni nyɛyeee kitãi nɛɛ fɛɛ ni Yehowa tsɔ Mose nɔ ewie lɛ anɔ, 23  nibii fɛɛ ni Yehowa tsɔ Mose nɔ efã nyɛ kɛjɛ gbi nɔ ni Yehowa kɛ famɔ lɛ hã lɛ nɔ aahu kɛmiiya nyɛyinɔi fɛɛ amli, 24  ni kɛjeee gbɛ aje atɔ̃, ni maŋ lɛ leee lɛ, no lɛ, maŋ muu lɛ fɛɛ kɛ tsinanuu* kome aba koni akɛshã shãa afɔle ni jeɔ ŋma jogbaŋŋ* woɔ Yehowa, kɛ ehe ŋmaa afɔle kɛ ehe dãa afɔle, tamɔ bɔ ni afeɔ daa lɛ,+ kɛ abotianuu* kome, koni akɛshã esha afɔle.+ 25  Osɔfo lɛ akpãtã ahã Israel maŋ muu lɛ fɛɛ, ni akɛbaake amɛ,+ ejaakɛ tɔ̃ amɛtɔ̃, ni amɛkɛ amɛfɔle ba, eji afɔle ni akɛ la shãa ahãa Yehowa, ni amɛkɛ amɛhe esha afɔle ba Yehowa hiɛ yɛ amɛtɔmɔ lɛ hewɔ. 26  Akɛbaake Israel maŋ muu lɛ fɛɛ kɛ gbɔ ni yɔɔ amɛteŋ lɛ, ejaakɛ maŋbii lɛ fɛɛ tɔ̃ ní amɛjeee gbɛ. 27  “‘Kɛ́ mɔ* ko ejeee gbɛ efee esha ko lɛ, ekɛ abotiayoo ni náko fe afi aba ni akɛshã esha afɔle.+ 28  Ni osɔfo lɛ akpãtã yɛ Yehowa hiɛ ahã mɔ* ni tɔ̃ lɛ, akɛni ejeee gbɛ efee esha lɛ hewɔ, koni akɛkpãtã ahã lɛ, ni akɛbaake lɛ.+ 29  Shi Israel fɔmɔ bi kɛ gbɔ ni yɔɔ amɛteŋ lɛ, mla kome akã shi ahã nyɛ yɛ sane ni kɔɔ nɔ ko ni ajeee gbɛ afee lɛ he lɛ mli.+ 30  “‘Shi mɔ* ni jeɔ gbɛ efeɔ nɔ ko lɛ,+ kɛ́ eji maŋnyo jio, gbɔ jio, eebɔ musu eeshi Yehowa, ni esa akɛ afo lɛ ashɛ afɔ̃* kɛje emaŋbii lɛ ateŋ. 31  Akɛni nakai mɔ* lɛ egbe Yehowa wiemɔ lɛ he guɔ, ni eyeee ekitã lɛ nɔ hewɔ lɛ, bɔ fɛɛ bɔ ni fee lɛ, afo lɛ ashɛ afɔ̃.+ Ebaatere etɔmɔ lɛ he sɔ̃ lɛ.’”+ 32  Be ni Israelbii lɛ yɔɔ ŋa lɛ nɔ lɛ, amɛyana nuu ko ni miilɛ́ lai yɛ Hejɔɔmɔ Gbi lɛ nɔ.+ 33  Mɛi ni yana lɛ ni eelɛ́ lai lɛ kɛ lɛ ba* Mose kɛ Aaron kɛ maŋ muu lɛ fɛɛ hiɛ. 34  Amɛtsĩ enaa amɛwo he ko,+ ejaakɛ atsɔko nɔ tuuntu ni esa akɛ afee lɛ. 35  Ni Yehowa kɛɛ Mose akɛ: “Bɔ fɛɛ bɔ ni fee lɛ, agbe nuu lɛ,+ ni maŋ muu lɛ fɛɛ atswia lɛ tɛi yɛ nsara lɛ sɛɛ.”+ 36  No hewɔ lɛ, maŋ muu lɛ fɛɛ kɛ lɛ je kpo kɛtee nsara lɛ sɛɛ, ni amɛyatswia lɛ tɛi ni egbo, tamɔ bɔ ni Yehowa fã Mose lɛ pɛpɛɛpɛ. 37  Yehowa tee nɔ ekɛɛ Mose akɛ: 38  “Okɛ Israelbii lɛ awie ní okɛɛ amɛ akɛ, amɛfee amanyai* amɛwo amɛtadei anaamui lɛ anaa yɛ amɛyinɔi fɛɛ amli, ni amɛkɛ kpãa bluu awo amanyai lɛ ayiteŋgbɛ yɛ amɛtadei lɛ anaamui lɛ anaa.+ 39  ‘Nyɛfea amanyai* nɛɛ koni nyɛna ní nyɛkai Yehowa kitãi lɛ fɛɛ, ni nyɛye nɔ.+ Nyɛkanyiɛa nyɛtsuii kɛ nyɛhiŋmɛii asɛɛ, nii ni hãaa nyɛye mi anɔkwa* lɛ.+ 40  Enɛ baahã nyɛkai, ni nyɛbaaye mikitãi lɛ fɛɛ anɔ, ni nyɛbaafee krɔŋkrɔŋ nyɛhã nyɛ-Nyɔŋmɔ lɛ.+ 41  Miji Yehowa, nyɛ-Nyɔŋmɔ lɛ, mɔ ni jie nyɛ kɛje Ejipt shikpɔŋ lɛ nɔ koni mahã nyɛna akɛ miji nyɛ-Nyɔŋmɔ lɛ.+ Miji Yehowa, nyɛ-Nyɔŋmɔ lɛ.’”+

Shishigbɛ Niŋmaa

Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
Efa mlijai nyɔŋma mli ekome feɔ litai 2.2 (kwat 2). Kwɛmɔ Saji Krokomɛi B14 lɛ.
Hin kome feɔ litai 3.67 (pint 7.75). Kwɛmɔ Saji Krokomɛi B14 lɛ.
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “kojomɔ.”
Hebri sht. ŋm., “blodo.”
Loo “tsina oblanyo.”
Loo “ŋma ni akɛkpãtãa mɔ; ŋma ni jɔɔ mɔ tsui he.” Hebri sht. ŋm., “ŋma ni hãa mɔ he jɔɔ lɛ.”
Loo “abotia oblanyo.”
Loo “susuma.”
Loo “susuma.”
Loo “susuma.”
Loo “agbe lɛ.”
Loo “susuma.”
Loo “kɛ lɛ kwɔ kɛba.”
“Amanya” ji nɔ ko ni akɛbãa nibii tamɔ atade, mama, pateeshɛŋ, kɛ nibii krokomɛi anaa ni ehãa efeɔ fɛo.
“Amanya” ji nɔ ko ni akɛbãa nibii tamɔ atade, mama, pateeshɛŋ, kɛ nibii krokomɛi anaa ni ehãa efeɔ fɛo.
Loo “nii ni hãa nyɛbɔɔ ajwamaŋ.”