4 Mose 14:1-45

  • Gbɔmɛi lɛ miitao amɛku amɛsɛɛ kɛya Ejipt (1-10)

    • Yoshua kɛ Kaleb amaniɛbɔɔ kpakpa lɛ (6-9)

  • Yehowa mli fu; Mose kpa fai ehã maŋ lɛ (11-19)

  • Toigbalamɔ: afii 40 yɛ ŋa lɛ nɔ (20-38)

  • Amalekbii lɛ ye Israel nɔ kunim (39-45)

14  Ni maŋ muu lɛ fɛɛ wó amɛgbee nɔ ni amɛbolɔ ni amɛfó aahu nakai nyɔɔŋ lɛ mli fɛɛ.+  Israelbii lɛ fɛɛ bɔi huhuuhu wiemɔ amɛshi Mose kɛ Aaron,+ ni maŋ muu lɛ fɛɛ wie amɛshi amɛ akɛ: “Eji wɔgboi yɛ Ejipt shikpɔŋ lɛ nɔ, aloo wɔgboi yɛ ŋa nɛɛ nɔ moŋ kulɛ ehi!  Mɛni hewɔ Yehowa kɛ wɔ baa shikpɔŋ nɛɛ nɔ koni wɔbanyɔnyɔi yɛ klante naa lɛ?+ Abaaŋɔ wɔŋamɛi kɛ wɔbii lɛ nom.+ Ani ehiii hãaa wɔ moŋ akɛ wɔɔku wɔsɛɛ kɛya Ejipt?”+  Amɛkɛɛkɛɛ amɛhe po akɛ: “Nyɛhãa wɔwóa hiɛnyiɛlɔ, ní wɔku wɔsɛɛ kɛya Ejipt!”+  Kɛkɛ ni Mose kɛ Aaron kɛ amɛhiɛ bumɔ shi yɛ Israel maŋ muu lɛ fɛɛ ni ebua amɛhe naa lɛ ahiɛ.  Yoshua,+ Nun binuu lɛ, kɛ Kaleb,+ Yefune binuu lɛ, ní fata mɛi ni yakpá shikpɔŋ lɛ shi lɛ ahe lɛ, gbála amɛhe atadei,  ni amɛkɛɛ Israel maŋ muu lɛ fɛɛ akɛ: “Shikpɔŋ lɛ ni wɔyatsɔ nɔ kɛkpá lɛ shi lɛ ji shikpɔŋ ni hi jogbaŋŋ diɛŋtsɛ.+  Kɛ́ Yehowa yɛ wɔhe miishɛɛ lɛ, no lɛ, bɔ fɛɛ bɔ ni fee lɛ, ekɛ wɔ baaya shikpɔŋ nɛɛ nɔ, ni ekɛbaahã wɔ, shikpɔŋ ni mliki kɛ wo hoɔ yɛ nɔ lɛ.+  Shi nyɛkatsea Yehowa hiɛ atua, ni nyɛkashea shikpɔŋ lɛ nɔ bii lɛ gbeyei,+ ejaakɛ wɔbaami amɛ.* Ajie amɛhebuunɔ kɛje amɛnɔ, ni Yehowa kɛ wɔ yɛ.+ Nyɛkashea amɛ gbeyei.” 10  Fɛɛ sɛɛ lɛ, maŋ muu lɛ fɛɛ kɛɛ amɛbaatswia amɛ tɛi.+ Shi Yehowa anunyam lɛ pue yɛ kpee buu lɛ nɔ yɛ Israelbii lɛ fɛɛ ahiɛ.+ 11  Ni Yehowa kɛɛ Mose akɛ: “Mɛɛ beyinɔ nɔŋŋ maŋ nɛɛ baakã he atsɔɔ akɛ amɛbuuu mi,+ ni mɛɛ beyinɔ nɔŋŋ amɛbaakã he amɛtsɔɔ akɛ amɛheee minɔ amɛyeee kɛyashi, yɛ okadii fɛɛ ni mifee yɛ amɛteŋ lɛ sɛɛ?+ 12  Hã mikɛ tsɛŋemɔ hela ni gbeɔ mɔ atswa amɛ ni makpãtã amɛhiɛ, ni mahã otsɔ maŋ ni da ni he wa fe amɛ.”+ 13  Shi Mose kɛɛ Yehowa akɛ: “No lɛ, Ejiptbii lɛ, mɛi ni otsɔ ohewalɛ lɛ nɔ ojie maŋ nɛɛ kɛje amɛteŋ lɛ baanu,+ 14  ni amɛbaawie he amɛtsɔɔ shikpɔŋ nɛɛ nɔ bii lɛ. Mɛi nɛɛ hu enu akɛ bo, Yehowa, oyɛ maŋbii nɛɛ ateŋ,+ ni ojie ohe kpo otsɔɔ amɛ hiɛ kɛ hiɛ.+ Bo ji Yehowa, ni otatu lɛ damɔɔ amɛnɔ, ni kɛ́ je tsɛre lɛ onyiɛɔ amɛhiɛ yɛ atatu ni damɔ shi jaŋŋ mli, ni kɛ́ je na lɛ onyiɛɔ amɛhiɛ yɛ la ni damɔ shi jaŋŋ mli.+ 15  Kɛji ogbe maŋ nɛɛ fɛɛ shi kome* lɛ, maji ni enu gbɛ́i ni ofee lɛ he lɛ baakɛɛ akɛ: 16  ‘Yehowa nyɛɛɛ ekɛ maŋ nɛɛ aya shikpɔŋ ni ekã kitã akɛ ekɛbaahã amɛ lɛ nɔ, no hewɔ lɛ, egbe amɛ yɛ ŋa lɛ nɔ.’+ 17  No hewɔ lɛ, Yehowa, ofainɛ, hã ohewalɛ lɛ ada, tamɔ bɔ ni owo shi be ni okɛɛ akɛ: 18  ‘Yehowa, mɔ ni mli fuuu mra ni esuɔmɔ* fa pii,+ ni kɛ tɔmɔ kɛ toigbele* keɔ, shi egbalaa mɛi ni yeɔ fɔ lɛ atoi, mɔ ni kɛ tsɛmɛi atɔmɔi lɛ ahe toigbalamɔ baa bii anɔ, kɛ yinɔ ni ji etɛ kɛ yinɔ ni ji ejwɛ lɛ nɔ.’+ 19  Ofainɛ, okɛ maŋbii nɛɛ atɔmɔ lɛ ake amɛ yɛ osuɔmɔ kpele ni tsakeee lɛ hewɔ, tamɔ bɔ ni okɛke maŋbii nɛɛ kɛjɛ Ejipt aahu kɛbashi amrɔ nɛɛ.”+ 20  Ni Yehowa kɛɛ: “Mikɛke amɛ yɛ owiemɔ lɛ naa.+ 21  Shi nɔ kome ji akɛ, gbii abɔ ni mihiɛ kã nɛɛ, Yehowa anunyam lɛ baayi shikpɔŋ lɛ nɔ fɛɛ obɔ.+ 22  Shi, hii ni na minunyam kɛ okadii+ ni mifee yɛ Ejipt kɛ ŋa lɛ nɔ, ni kɛ̃lɛ amɛtee nɔ amɛka mi+ shii nyɔŋma nɛɛ, ni amɛbooo migbee toi lɛ ateŋ mɔ kome folo po+ 23  enaŋ shikpɔŋ ni mikã amɛtsɛmɛi lɛ he kitã lɛ. Dabi, mɛi ni ebuuu mi nɛɛ ateŋ mɔ kome folo po enaŋ shikpɔŋ lɛ.+ 24  Shi akɛni mitsulɔ Kaleb+ hiɛ jwɛŋmɔ* kroko, ni etee nɔ enyiɛ misɛɛ kɛ etsui fɛɛ hewɔ lɛ, bɔ fɛɛ bɔ ni fee lɛ, mikɛ lɛ baaya shikpɔŋ ni etee nɔ lɛ nɔ, ni eseshi baaŋɔ shikpɔŋ lɛ.+ 25  Akɛni Amalekbii lɛ kɛ Kanaanbii+ lɛ yɛ jɔɔ lɛ mli hewɔ lɛ, wɔ́ lɛ, nyɛdɔa nyɛyi, ni nyɛtsɔa Ŋshɔ Tsuru lɛ naa gbɛ lɛ nɔ kɛyaa ŋa lɛ nɔ.”+ 26  Ni Yehowa kɛɛ Mose kɛ Aaron akɛ: 27  “Mɛɛ beyinɔ nɔŋŋ maŋ fɔŋ nɛɛ baaya nɔ awie huhuuhu amɛshi mi kɛyashi?+ Minu huhuuhu ni Israelbii lɛ wieɔ amɛshiɔ mi lɛ.+ 28  Kɛɛmɔ amɛ akɛ, ‘“Gbii abɔ ni mihiɛ kã nɛɛ,” Yehowa kɛɛ, “mafee nyɛ bɔ ni minu akɛ nyɛwie lɛ pɛpɛɛpɛ!+ 29  Ŋa nɛɛ nɔ nyɛbaagboi yɛ,*+ hɛɛ, nyɛteŋ mɛi fɛɛ ni eye kɛjɛ afii 20 kɛyaa ni aŋmala amɛgbɛ́ii lɛ, nyɛteŋ mɛi fɛɛ ni wie huhuuhu amɛshi mi lɛ.+ 30  Nyɛteŋ mɔ ko mɔ ko eyaŋ shikpɔŋ ni mikã kitã* akɛ mahã nyɛhi nɔ lɛ nɔ,+ ja Kaleb, Yefune binuu lɛ, kɛ Yoshua, Nun binuu lɛ pɛ.+ 31  “‘“Ni mikɛ nyɛbii ni nyɛkɛɛ abaaŋɔ amɛ nom lɛ baaya shikpɔŋ lɛ nɔ,+ ni amɛbaaná amɛle shikpɔŋ ni nyɛkpoo lɛ.+ 32  Shi nyɛ lɛ, ŋa nɛɛ nɔ nyɛbaagboi yɛ.* 33  Agbɛnɛ, nyɛbihii lɛ baatsɔmɔ tookwɛlɔi afii 40 yɛ ŋa lɛ nɔ,+ ni anɔkwa ni nyɛyeee* lɛ he sɔ̃ lɛ baakã amɛnɔ kɛyashi nyɛteŋ naagbee mɔ kwraa baagbo yɛ ŋa lɛ nɔ.+ 34  Yɛ gbii ni nyɛkɛyakpá shikpɔŋ lɛ shi, ni ji gbii 40 lɛ naa lɛ,+ nyɛbaatere nyɛtɔmɔi lɛ ahe sɔ̃ lɛ afii 40,+ gbi kome fɛɛ gbi kome baafee afi, ni nyɛbaaná nyɛle nɔ ni jɛɔ shi ni ateɔ awoɔ mi lɛ mli kɛbaa.* 35  “‘“Mi, Yehowa, miwie. Nɔ ni mafee nɛkɛ maŋ fɔŋ nɛɛ fɛɛ, mɛi ni ebua amɛhe naa amɛwo mi lɛ nɛ: Ŋa nɛɛ nɔ amɛnaagbee baaba yɛ, ni biɛ amɛbaagboi yɛ.+ 36  Hii lɛ ni Mose tsu koni amɛyakpá shikpɔŋ lɛ shi, ní amɛhã maŋ muu lɛ fɛɛ wie huhuuhu amɛshi Mose be ni amɛku amɛsɛɛ amɛba kɛ shikpɔŋ lɛ he amaniɛbɔɔ gbonyo lɛ,+ 37  hɛɛ, hii lɛ ni kɛ shikpɔŋ lɛ he amaniɛbɔɔ gbonyo ba lɛ, abaatswia amɛ nii ni amɛbaagboi yɛ Yehowa hiɛ.+ 38  Shi Yoshua, Nun binuu lɛ, kɛ Kaleb, Yefune binuu lɛ, ní fata mɛi ni yakpá shikpɔŋ lɛ shi lɛ ahe lɛ, amɛbaaya nɔ amɛhi wala mli kɛ̃.”’”+ 39  Be ni Mose wie nɛkɛ wiemɔi nɛɛ etsɔɔ Israelbii lɛ fɛɛ lɛ, maŋ lɛ ye awerɛho waa diɛŋtsɛ. 40  Agbɛnɛ hu, amɛte shi leebi maŋkpa ni amɛka akɛ amɛbaakwɔ kɛya gɔŋ lɛ yiteŋ, ni amɛkɛɛ akɛ: “Naa, wɔfee klalo akɛ wɔbaakwɔ kɛya he ni Yehowa wie he lɛ, ejaakɛ wɔfee esha.”+ 41  Shi Mose kɛɛ: “Mɛni hewɔ nyɛtekeɔ Yehowa famɔ lɛ? Enɛ lɛ, eyeŋ omanye. 42  Nyɛkakwɔa kɛyaa, ejaakɛ Yehowa bɛ nyɛteŋ; ni nyɛhenyɛlɔi lɛ baaye nyɛnɔ kunim.+ 43  Ejaakɛ Amalekbii lɛ kɛ Kanaanbii lɛ yɛ jɛmɛ, ni amɛkɛ nyɛ baakpe,+ ni nyɛbaanyɔnyɔi yɛ klante naa. Akɛni nyɛje Yehowa sɛɛ hewɔ lɛ, Yehowa ehiŋ nyɛteŋ.”+ 44  Fɛɛ sɛɛ lɛ, amɛkpɛlɛɛɛ* ni amɛkwɔ kɛtee gɔŋ lɛ yiteŋgbɛ,+ shi Yehowa kpaŋmɔ adeka lɛ kɛ Mose tsiii amɛhe kɛjeee nsara lɛ teŋ.+ 45  Kɛkɛ ni Amalekbii lɛ kɛ Kanaanbii lɛ ni yɔɔ nakai gɔŋ lɛ nɔ lɛ kpeleke shi kɛba, ni amɛbatswia amɛ nii, ni amɛgbɛ amɛ amɛshwã kɛtee Horma tɔ̃ɔ.+

Shishigbɛ Niŋmaa

Hebri sht. ŋm., “ejaakɛ blodo ji amɛ kɛhã wɔ.”
Hebri sht. ŋm., “ogbe gbɔmɛi nɛɛ fɛɛ tamɔ agbeɔ gbɔmɔ kome.”
Loo “esuɔmɔ ni tsakeee.”
Hebri sht. ŋm., “mlatɔmɔ.”
Hebri sht. ŋm., “mumɔ.”
Loo “Ŋa nɛɛ nɔ nyɛgbohii lɛ baajwere shi yɛ.”
Hebri sht. ŋm., “ni miwó minine nɔ.”
Loo “ŋa nɛɛ nɔ nyɛgbohii lɛ baajwere shi yɛ.”
Hebri sht. ŋm., “ni nyɛshawofeemɔ.”
Loo “nɔ ni mihenyɛlɔ ni aaatsɔ lɛ tsɔɔ.”
Loo “amɛye amɛtsuinaa sane.”