4 Mose 13:1-33

  • Shikpálɔi 12 ni atsu kɛtee Kanaan lɛ (1-24)

  • Amaniɛ gbonyo ni shikpálɔi nyɔŋma babɔ (25-33)

13  Ni Yehowa kɛ Mose wie ekɛɛ:  “Tsu hii koni amɛyakpá Kanaan shikpɔŋ lɛ ní mikɛbaahã Israelbii lɛ shi.* Nyɛtsua nuu kome kɛjɛa tsɛmɛi aweku fɛɛ tsɛmɛi aweku mli, hii nɛɛ ateŋ mɔ fɛɛ mɔ+ afee wekunukpa.”+  No hewɔ lɛ, Mose tsu amɛ kɛjɛ Paran ŋa lɛ nɔ+ yɛ Yehowa famɔ lɛ naa. Hii lɛ fɛɛ lɛ, Israelbii lɛ anukpai ni.  Amɛgbɛ́ii nɛ: Ruben weku lɛ mli lɛ, Shamua, Zakur binuu lɛ;  Simeon weku lɛ mli lɛ, Shafat, Hori binuu lɛ;  Yuda weku lɛ mli lɛ, Kaleb,+ Yefune binuu lɛ;  Isakar weku lɛ mli lɛ, Igal, Yosef binuu lɛ;  Efraim weku lɛ mli lɛ, Hoshea,+ Nun binuu lɛ;  Benyamin weku lɛ mli lɛ, Palti, Rafu binuu lɛ; 10  Zebulon weku lɛ mli lɛ, Gadiel, Sodi binuu lɛ; 11  Yosef weku lɛ mli lɛ,+ mɔ ni damɔ shi hã Manase+ weku lɛ ji Gadi, Susi binuu lɛ; 12  Dan weku lɛ mli lɛ, Amiel, Gemali binuu lɛ; 13  Asher weku lɛ mli lɛ, Setur, Mikael binuu lɛ; 14  Naftali weku lɛ mli lɛ, Nahebi, Vofsi binuu lɛ; 15  Gad weku lɛ mli lɛ, Geuel, Maki binuu lɛ. 16  Hii ni Mose tsu koni amɛyakpá shikpɔŋ lɛ shi lɛ agbɛ́ii nɛ. Ni Mose wo Hoshea, Nun binuu lɛ gbɛ́i akɛ Yoshua.*+ 17  Be ni Mose tsuɔ amɛ koni amɛyakpá Kanaan shikpɔŋ lɛ shi lɛ, ekɛɛ amɛ akɛ: “Nyɛyaa* Negeb lɛ, ni no sɛɛ lɛ, nyɛkwɔa kɛyaa gɔji lɛ anɔ.+ 18  Nyɛyakwɛa bɔ ni shikpɔŋ lɛ ji hã,+ ní nyɛkwɛ kɛji mɛi ni yɔɔ nɔ lɛ ahe wa loo amɛhe waaa, amɛyi faaa loo amɛyi fa, 19  nyɛkwɛa kɛji shikpɔŋ lɛ hi loo ehiii, kɛji maji ni amɛyɔɔ mli lɛ jwere shi kɛkɛ loo atswa gbogboi awo amɛhe. 20  Ni nyɛkwɛa kɛji shikpɔŋ lɛ baa nii* loo ebaaa nii,*+ kɛji tsei yɛ nɔ loo tsei bɛ nɔ. Nyɛfea ekãa+ ní nyɛŋɔa shikpɔŋ lɛ nɔ yibii lɛ eko kɛbaa.” Nakai be lɛ ji be mli ni klɛŋklɛŋ wain yibii lɛ tsuɔ.+ 21  No hewɔ lɛ, amɛkwɔ kɛtee ni amɛyakpá shikpɔŋ lɛ shi kɛjɛ Zin ŋa lɛ nɔ+ kɛtee Rehob+ ni bɛŋkɛ Lebo-hamat*+ lɛ. 22  Be ni amɛtee* Negeb lɛ, amɛba Hebron,+ he ni Ahiman kɛ Sheshai kɛ Talmai,*+ ni ji Anakbii+ lɛ yɔɔ lɛ. Nɔ kome ji akɛ, ato Hebron afii kpawo dani ato Zoan ni yɔɔ Ejipt lɛ. 23  Be ni amɛbashɛ Eshkol Jɔɔ*+ lɛ mli lɛ, amɛfo wain tso nine kɛ enɔ wain yibii kusha kome, ni hii lɛ ateŋ mɛi enyɔ kɛ tso wo mli ni amɛkɛwó, ni amɛkɛ pomegranetii lɛ kɛ agbamii lɛ hu eko ba.+ 24  Amɛtsɛ jɛmɛ Eshkol* Jɔɔ*+ yɛ yibii kusha ni Israelbii lɛ fo yɛ jɛmɛ lɛ hewɔ. 25  Gbii 40 sɛɛ lɛ,+ amɛku amɛsɛɛ kɛjɛ shikpɔŋ lɛ shikpámɔ lɛ amɛba. 26  No hewɔ lɛ, amɛba Mose kɛ Aaron kɛ Israel maŋ muu lɛ fɛɛ ŋɔɔ yɛ Paran ŋa lɛ nɔ, yɛ Kadesh.+ Amɛbabɔ maŋ muu lɛ fɛɛ amaniɛ, ni amɛkɛ shikpɔŋ lɛ nɔ yibii lɛ tsɔɔ amɛ. 27  Amaniɛ ni amɛbɔ Mose nɛ: “Wɔtee shikpɔŋ ni otsu wɔ nɔ lɛ nɔ, ni anɔkwa, mliki kɛ wo miiho yɛ nɔ,+ ni enɔ yibii nɛ.+ 28  Shi mɛi ni yɔɔ shikpɔŋ lɛ nɔ lɛ ahe wala, ni maji ni atswa gbogboi awo amɛhe lɛ hu dara waa diɛŋtsɛ. Agbɛnɛ hu, wɔna Anakbii lɛ yɛ jɛmɛ.+ 29  Amalekbii+ lɛ yɛ Negeb+ shikpɔŋ lɛ nɔ, ni Hitbii lɛ kɛ Yebusbii+ lɛ kɛ Amorbii+ lɛ yɛ gɔji lɛ anɔ, ni Kanaanbii+ lɛ hu yɛ ŋshɔ lɛ naa gbɛ,+ kɛ Yordan lɛ naa gbɛ.” 30  Ni Kaleb ka akɛ ebaajɔɔ maŋbii lɛ atsui he be ni amɛdamɔ Mose hiɛ lɛ, ekɛɛ: “Nyɛhãa wɔkwɔa kɛyaa amrɔ nɔŋŋ, ni bɔ fɛɛ bɔ ni ji lɛ, wɔbaaŋɔ shikpɔŋ lɛ, ejaakɛ wɔbaanyɛ shikpɔŋ lɛ nɔ kunim wɔye.”+ 31  Shi hii lɛ ni kɛ lɛ kwɔ kɛtee lɛ kɛɛ akɛ: “Wɔnyɛŋ wɔkwɔ kɛya ní wɔkɛ amɛ ayawu, ejaakɛ amɛhe wa fe wɔ.”+ 32  Ni amɛtee nɔ amɛkɛ shikpɔŋ ni amɛtee amɛyakpá lɛ shi lɛ he amaniɛbɔɔ gbonyo+ hã Israelbii lɛ amɛkɛɛ: “Shikpɔŋ ni wɔyatsɔ nɔ kɛkpá lɛ shi lɛ ji shikpɔŋ ni yeɔ enɔbii, ni mɛi fɛɛ ni wɔna yɛ nɔ lɛ dara waa diɛŋtsɛ.+ 33  Ni wɔna Nefilim lɛ, Anakbii+ lɛ, ni ji Nefilim lɛ aseshibii lɛ yɛ jɛmɛ, ni kɛ́ wɔkɛ wɔhe to amɛhe lɛ, wɔnaa wɔhe tamɔ agãi, ni bɔ ni wɔnaa wɔhe lɛ, nakai nɔŋŋ amɛ hu amɛnaa wɔ.”

Shishigbɛ Niŋmaa

Loo “koni amɛyakwɛ bɔ ni Kanaan shikpɔŋ lɛ ní mikɛbaahã Israelbii lɛ yɔɔ.”
Loo “Yehoshua,” eshishi ji, “Yehowa Ji Yiwalaheremɔ.”
Loo “Nyɛkwɔa kɛyaa.”
Hebri sht. ŋm., “shikpɔŋ lɛ ewo fɔ.”
Hebri sht. ŋm., “loo etã loo.”
Loo “kɛtee he ni atsɔɔ kɛboteɔ Hamat.”
Loo “amɛkwɔ kɛtee.”
Eeenyɛ efee akɛ, gbɛ́ii etɛ nɛɛ damɔ shi kɛhã Sheshai kɛ Ahiman kɛ Talmai wekui lɛ loo amɛshwiei lɛ.
Loo “Nujɔɔ.”
Eshishi ji, “Wain Yibii Kusha.”
Loo “Nujɔɔ.”