4 Mose 12:1-16

  • Miriam kɛ Aaron te shi amɛwo Mose (1-3)

    • Mose he jɔ fe gbɔmɛi fɛɛ (3)

  • Yehowa fã Mose he (4-8)

  • Kpiti shwie Miriam (9-16)

12  Agbɛnɛ, Miriam kɛ Aaron wie amɛshi Mose yɛ Kush yoo ni ekɛhi shi akɛ eŋa lɛ hewɔ, ejaakɛ eyaŋɔ Kush yoo akɛ eŋa.+  Amɛwie akɛ: “Ani Mose kome too pɛ nɔ Yehowa tsɔɔ ewieɔ? Ani etsɔko wɔ hu wɔnɔ ewieko?”+ No mli lɛ, Yehowa miibo toi.+  Ni nɛkɛ nuu Mose nɛɛ, ehe jɔ fe gbɔmɛi fɛɛ*+ ni yɔɔ shikpɔŋ lɛ nɔ.  Amrɔ nɔŋŋ lɛ, Yehowa kɛɛ Mose kɛ Aaron kɛ Miriam akɛ: “Nyɛyi etɛ lɛ fɛɛ, nyɛjea kpo kɛyaa kpee buu lɛ naa.” No hewɔ lɛ, amɛyi etɛ lɛ fɛɛ amɛje kpo amɛtee.  Ni Yehowa kpeleke shi kɛba yɛ atatu ni damɔ shi jaŋŋ lɛ mli,+ ni ebadamɔ kpee buu lɛ shinaa lɛ naa, ni etsɛ Aaron kɛ Miriam. Amɛyi enyɔ lɛ fɛɛ amɛtsi kɛtee hiɛ.  Kɛkɛ ni ekɛɛ: “Nyɛfainɛ, nyɛboa miwiemɔi lɛ toi. Kɛ́ Yehowa gbalɔ ko yɛ nyɛteŋ lɛ, ninaa mli mahã ele mi yɛ,+ ni lamɔ mli mikɛ lɛ baawie yɛ.+  Shi jeee nakai eji yɛ mitsulɔ Mose gbɛfaŋ! Mitu mishĩa lɛ fɛɛ miwo edɛŋ.*+  Hiɛ kɛ hiɛ* mikɛ lɛ wieɔ,+ yɛ faŋŋ mli, jeee abɛbuai amli; ni enaa bɔ ni Yehowa yɔɔ. Belɛ, mɛni hewɔ nyɛsheee gbeyei akɛ nyɛbaawie nyɛshi mitsulɔ Mose lɛ?”  No hewɔ lɛ, Yehowa mli wo la ewo amɛ, ni eshi amɛ etee. 10  Atatu lɛ je kpee buu lɛ nɔ, ni naa! kpiti shwie Miriam futaa tamɔ snoo.+ Ni Aaron tsɔ ehe ekwɛ Miriam, ni ena akɛ kpiti eshwie lɛ.+ 11  Amrɔ nɔŋŋ lɛ, Aaron kɛɛ Mose akɛ: “Miikpa bo fai, minuŋtsɔ! Ofainɛ, okɛ esha nɛɛ he toigbalamɔ lɛ akaba wɔnɔ! Wɔye kwashiai asane yɛ nɔ ni wɔfee nɛɛ mli. 12  Ofainɛ, kaahã Miriam tee nɔ ehi shi tamɔ mɔ ko ni egbo, mɔ ni be ni afɔɔ lɛ lɛ, eheloo lɛ fã ekpɔtɔ momo!” 13  Ni Mose bolɔ etsɛ Yehowa ekɛɛ: “Ao Nyɔŋmɔ, ofainɛ tsa lɛ! Ofainɛ!”+ 14  Yehowa hã Mose hetoo akɛ: “Kɛji epapa fɛ̃ lajɔ̃ eshwie ehiɛ lɛ, ani ehiɛ eshwieŋ shi gbii kpawo? Hã atsĩ enaa yɛ nsara lɛ sɛɛ gbii kpawo,+ no sɛɛ lɛ, akɛ lɛ aku sɛɛ kɛba mli ekoŋŋ.” 15  No hewɔ lɛ, atsĩ Miriam naa yɛ nsara lɛ sɛɛ gbii kpawo,+ ni maŋ lɛ efãaa kɛyashi be ni akɛ Miriam ku sɛɛ kɛba nsara lɛ mli ekoŋŋ. 16  Kɛkɛ ni maŋ lɛ fã kɛshi Hazerot,+ ni amɛyabɔ nsara yɛ Paran ŋa lɛ nɔ.+

Shishigbɛ Niŋmaa

Loo “ebaa ehe shi waa, ebaa ehe shi kwraa fe mɔ fɛɛ mɔ.”
Hebri sht. ŋm., “Eyeɔ anɔkwa yɛ mishĩa lɛ fɛɛ.”
Hebri sht. ŋm., “Naabu kɛ naabu.”