4 Mose 11:1-35

  • Niiahewiemɔ hã la jɛ Nyɔŋmɔ ŋɔɔ ba (1-3)

  • Gbɔmɛi lɛ fó akɛ amɛmiitao loo (4-9)

  • Mose nu he akɛ ekome enyɛŋ ehiɛ gbɔmɛi lɛ (10-15)

  • Yehowa ŋɔ mumɔ ehã onukpai 70 (16-25)

  • Eldad kɛ Medad; Yoshua ye awuŋa ehã Mose (26-30)

  • Ahã trakɔkɔi ba; agbala gbɔmɛi lɛ atoi yɛ hiɛkɔ̃ɔ hewɔ (31-35)

11  Agbɛnɛ, maŋ lɛ bɔi nii ahe wiemɔ nyanyaanya yɛ Yehowa hiɛ. Be ni Yehowa nu lɛ, emli wo la waa, ni la jɛ Yehowa ŋɔɔ ebabɔi amɛ shãa, ni ekpãtã mɛi ni yɔɔ nsara lɛ naabunaabu lɛ ateŋ mɛi komɛi ahiɛ.  Be ni maŋ lɛ bolɔ amɛtsɛ Mose lɛ, ekpa Yehowa fai,+ ni la lɛ gbo.  No hewɔ lɛ, awo jɛmɛ gbɛ́i akɛ Tabera,* ejaakɛ la jɛ Yehowa ŋɔɔ ni ebashã amɛ.+  Kɛkɛ ni futufutu gbɔmɛi*+ ni yɔɔ amɛteŋ lɛ tsɔɔ bɔ ni nibii komɛi baa amɛtsine hã,+ ni Israelbii lɛ hu bɔi yaafo ekoŋŋ, amɛkɛɛ: “Namɔ baahã wɔ loo wɔye?+  Kwɛ bɔ ni wɔkaiɔ loi ni wɔyeɔ yaka yɛ Ejipt lɛ, kɛ agbɛnɛ hu kɔkumbai kɛ waatɛrɛi kɛ sabolai srɔtoisrɔtoi kɛ galik!+  Shi agbɛnɛ, wɔhiɛ* miikpãtã. Wɔnaaa nɔ ko nɔ ko, akɛ ja mana nɛɛ kɛkɛ.”+  Nɔ kome ji akɛ, mana+ lɛ tamɔ korianda* wu,+ ni etamɔ bedola ama.*  Maŋbii lɛ yaa ni amɛyaloɔ ni amɛwiɛɔ yɛ wiɛtɛi anɔ loo amɛshiɔ yɛ tso mli. No sɛɛ lɛ, amɛhoɔ yɛ dadesɛŋi* amli loo amɛshãa lɛ tamɔ blodoi koklobii,+ ni eŋɔɔmɔ tamɔ keeki ni akɛ mu shã.  Kɛ́ bɔ́ nyɔ nsara lɛ nɔ nyɔɔŋ lɛ, mana lɛ hu bashwieɔ shi.+ 10  Mose nu ni maŋbii lɛ miifó, weku fɛɛ weku, mɔ fɛɛ mɔ yɛ emama tsũ shinaa naa. Ni Yehowa mli fu waa,+ ni Mose hu náaa he miishɛɛ kwraa. 11  Kɛkɛ ni Mose kɛɛ Yehowa akɛ: “Mɛni hewɔ owaa otsulɔ yi? Mɛni hewɔ mihiɛ bako nyam yɛ ohiɛ, ni okɛ maŋbii nɛɛ fɛɛ ajatsu lɛ etere mi lɛ?+ 12  Ani mi miŋɔ maŋbii nɛɛ fɛɛ hɔ? Ani mi mifɔ amɛ, hewɔ ni okɛɛ mi akɛ, ‘Hiɛmɔ amɛ yɛ otsitsi nɔ, tamɔ bɔ ni sɔɔlɔ* hiɛɔ gbekɛ ni ekwɛɔ lɛ lɛ,’ kɛya shikpɔŋ ni okã kitã akɛ okɛbaahã amɛtsɛmɛi lɛ nɔ lɛ?+ 13  Nɛgbɛ maná loo yɛ mahã maŋbii nɛɛ fɛɛ? Ejaakɛ amɛmiifó sɔŋŋ amɛmiiwo mi akɛ, ‘Hã wɔ loo wɔye!’ 14  Mikome too minyɛŋ mahiɛ maŋ muu nɛɛ fɛɛ; etsii tsɔ hã mi.+ 15  Kɛ́ nɛkɛ okɛ mi baaye lɛ, no lɛ ofainɛ, gbee mi bianɛ nɔŋŋ.+ Kɛ́ mihiɛ eba nyam yɛ ohiɛ lɛ, no lɛ, kaahã mina amanehulu ko dɔŋŋ.” 16  Yehowa hã Mose hetoo akɛ: “Buamɔ Israel onukpai lɛ ateŋ hii 70 anaa ohã mi, hii ni ole akɛ amɛji maŋbii lɛ anɔ onukpai kɛ nɔkwɛlɔi,+ ní okɛ amɛ aya kpee buu lɛ naa, ní ohã amɛkɛ bo adamɔ jɛmɛ. 17  Makpeleke shi+ mikɛ bo abawie yɛ jɛmɛ,+ ni maŋɔ mumɔ+ ni yɔɔ onɔ lɛ eko ni mikɛbaashwie amɛnɔ, ni amɛbaaye amɛbua bo kɛtere maŋ lɛ jatsu lɛ, koni okome too okatere.+ 18  Kɛɛmɔ maŋ lɛ akɛ, ‘Nyɛfea nyɛhe krɔŋkrɔŋ kɛhã wɔ́,+ ejaakɛ bɔ fɛɛ bɔ ni fee lɛ, nyɛbaaye loo, ejaakɛ nyɛfó ni Yehowa enu,+ ni nyɛkɛɛ akɛ: “Namɔ baahã wɔ loo wɔye? Be ni wɔyɔɔ Ejipt lɛ, nibii hi jogbaŋŋ hã wɔ.”+ Bɔ fɛɛ bɔ ni fee lɛ, Yehowa baahã nyɛ loo, ni nyɛbaaye.+ 19  Nyɛbaaye loo, jeee gbi kome loo gbii 2 loo gbii 5 loo gbii 10 loo gbii 20, 20  shi nyɛbaaye lɛ nyɔɔŋ kome sɔŋŋ, kɛyashi be ni ebaaje kpo kɛje nyɛgugɔ mli, ni ebaaje fũ ewo nyɛ,+ ejaakɛ nyɛkwa Yehowa, mɔ ni yɔɔ nyɛteŋ lɛ, ni nyɛfó yɛ ehiɛ nyɛkɛɛ: “Mɛni hewɔ wɔshi Ejipt?”’”+ 21  Ni Mose kɛɛ: “Maŋbii ni miyɔɔ amɛteŋ lɛ ayifalɛ ji hii 600,000+ ni nyiɛɔ amɛnane nɔ, ni kɛ̃lɛ, bo diɛŋtsɛ okɛɛ, ‘Mahã amɛ loo, ni amɛbaaye bɔ ni fa nyɔɔŋ kome sɔŋŋ’! 22  Kɛ́ agbe toi kɛ tsinai lɛ, ani ebaashɛ amɛnaa? Aloo kɛ́ agbe loi fɛɛ ni yɔɔ ŋshɔ lɛ mli lɛ, ebaashɛ amɛnaa?” 23  Ni Yehowa kɛɛ Mose akɛ: “Ani Yehowa nine yɛ kuku tsɔ?+ Agbɛnɛ, obaana kɛji nɔ ni mikɛɛ lɛ baaba mli ahã bo loo ebaŋ mli.” 24  No hewɔ lɛ, Mose je kpo ni eyakɛɛ maŋ lɛ Yehowa wiemɔi lɛ. Ni ebua maŋ lɛ mli onukpai lɛ ateŋ hii 70 anaa, ni ehã amɛdamɔ kpee buu lɛ he kɛkpe.+ 25  Kɛkɛ ni Yehowa kpeleke shi yɛ atatu+ mli kɛba ni ekɛ lɛ bawie,+ ni eŋɔ mumɔ+ ni yɔɔ Mose nɔ lɛ eko ni ekɛshwie hii 70 lɛ ateŋ mɔ fɛɛ mɔ nɔ. Ni be ni mumɔ lɛ ba amɛnɔ lɛ, amɛbɔi amɛnifeemɔ tamɔ gbalɔi,*+ shi no sɛɛ lɛ, amɛfeee nakai dɔŋŋ. 26  No mli lɛ, hii lɛ ateŋ mɛi enyɔ yɛ nsara lɛ mli lolo. Amɛgbɛ́ii ji Eldad kɛ Medad. Ni mumɔ lɛ ba amɛnɔ, ejaakɛ amɛfata mɛi ni aŋmala amɛgbɛ́ii lɛ ahe, shi amɛyako kpee buu lɛ naa. No hewɔ lɛ, amɛbɔi amɛnifeemɔ tamɔ gbalɔi yɛ nsara lɛ mli. 27  Kɛkɛ ni oblanyo ko jo foi eyabɔ Mose amaniɛ akɛ: “Eldad kɛ Medad miifee amɛnii tamɔ gbalɔi yɛ nsara lɛ mli!” 28  Ni Yoshua,+ Nun binuu lɛ ni sɔmɔɔ Mose kɛjɛ eblahiiaŋ lɛ here nɔ, ni ekɛɛ: “Minuŋtsɔ Mose, tsĩi amɛ gbɛ!”+ 29  Shi Mose kɛɛ lɛ akɛ: “Ani ooye awuŋa oohã mi? Kaaye awuŋa ohã mi. Miná kulɛ, Yehowa maŋ lɛ fɛɛ tsɔmɔ gbalɔi, ní Yehowa kɛ emumɔ lɛ ashwie amɛnɔ!” 30  Sɛɛ mli lɛ, Mose kɛ Israel onukpai lɛ ku amɛsɛɛ kɛba nsara lɛ mli. 31  Ni kɔɔyɔɔ ko tswa kɛjɛ Yehowa ŋɔɔ, ni eloo trakɔkɔi* kɛjɛ ŋshɔ lɛ naa ni ehã amɛbashwie nsara lɛ he kɛkpe,+ aaafee gbi kome gbɛnyiɛmɔ yɛ nsara lɛ afã nɛɛ, kɛ gbi kome gbɛnyiɛmɔ yɛ nsara lɛ fã kroko lɛ hu kɛbɔle nsara lɛ he kɛkpe, ni amɛjwere shi aaafee ninetalɔi* enyɔ nɔkwɔlɛ kɛjɛ shikpɔŋ. 32  No hewɔ lɛ, nakai gbi lɛ mli fɛɛ kɛ nakai nyɔɔŋ lɛ mli fɛɛ kɛ enɔ jetsɛremɔ fɛɛ lɛ, maŋ lɛ shi kpe kɛbua trakɔkɔi lɛ anaa. Mɔ ko mɔ ko bɛ ni bua nɔ ni shɛɛɛ homer* nyɔŋma naa, ni amɛtee nɔ amɛgbɛgbɛɛ mli amɛshwie shi* yɛ nsara lɛ he fɛɛ kɛkpe. 33  Shi be ni loo lɛ yɔɔ maŋbii lɛ anyanyɔji ateŋ lolo, ní amɛnáko amɛta lɛ, Yehowa mli fu amɛ, ni Yehowa tswia maŋ lɛ nii kɛgbe amɛteŋ mɛi pii.+ 34  No hewɔ lɛ, amɛwo jɛmɛ gbɛ́i akɛ Kibrot-hataawa,*+ ejaakɛ jɛmɛ amɛfu mɛi ni hã nibii ni amɛ diɛŋtsɛ amɛsumɔɔ lɛ ba amɛtsine fe nine lɛ yɛ.+ 35  Ni maŋ lɛ fã kɛjɛ Kibrot-hataawa kɛtee Hazerot, ni amɛhi Hazerot.+

Shishigbɛ Niŋmaa

Eshishi ji, “Shãa,” ni tsɔɔ akɛ, la ni kpãtãa nibii babaoo ahiɛ; la ni tsoɔ grigri.
Eeenyɛ efee akɛ, aatsɔɔ mɛi ni jeee Israelbii ni futu amɛ lɛ.
Loo “wɔsusuma hiɛ.”
Korianda ji kwɛ̃ɛ nii ko ni wui lɛ su tamɔ lamulu su.
Bedola ama ji ama ko ni jeɔ ŋma ni anáa kɛjɛɔ tsei bibii komɛi ni kwɛ̃ɔ yɛ hei ni hulu tsoɔ waa yɛ lɛ amli.
Loo “kukwɛii.”
Loo “nuu ni kwɛɔ bi.”
Loo “amɛbɔi gbaa.”
Trakɔkɔi ji loofɔji komɛi ni ayeɔ, ni amɛkɛlɛmɔ aaafee sɛntimitai 18. Amɛtamɔ afi loo ŋa mli wuɔ.
Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
Homer kome feɔ litai 220 (kwat 200). Kwɛmɔ Saji Krokomɛi B14 lɛ.
Eeenyɛ efee akɛ, amɛgbɛgbɛɛ loi lɛ amli amɛshwie shi koni amɛka ni egbi.
Eshishi ji, “Mɛi Ni Hã Nibii Ba Amɛtsine Fe Nine Lɛ Afuuhei.”